2 Timotheo

3 No menya atĩ, matukũ-inĩ ma kũrigĩrĩria nĩ gũkaagĩa mahinda ma ũgwati maritũ kũhiũrania namo. 2 Nĩ gũkorũo andũ nĩ magatuĩka eyendi, endi mbeca, egani, egathi, arumi Ngai, mataathĩkagĩra aciari, matarĩ ngatho, matarĩ ehokeku, 3 matarĩ wendo ũrĩa wa ndũire, matendaga ũiguano, acambania, mategiragĩrĩria, matarĩ tha, matendete maũndũ mega, 4 akunyanĩri, momĩtie ciongo, etĩi, mendete ikeno gũkĩra ũrĩa mendete Ngai, 5 monekaga ta meyamũrĩire Ngai ĩndĩ makarega hinya ũrĩa umanaga na wĩyamũrĩri ũcio; wĩtheme biũ andũ acio. 6 Gatagatĩ-inĩ kao kuumagĩra arũme meingĩragia na wara nyũmba-inĩ cia andũ makagucagĩrĩria atumia arĩa matarĩ hinya nĩ ũrĩa marĩ na mehia maingĩ, magĩtongoragio nĩ merirĩria ma mĩthemba ngũrani, 7 makĩĩrutaga hingo ciothe ĩndĩ matirĩ hĩndĩ mahotaga kũgĩa na ũmenyo wa ma.

8 O ta ũrĩa Janesi na Jambare maakararirie Musa, noguo acio o nao mathiaga na mbere gũkararia ũhoro ũrĩa wa ma. Andũ ta acio nĩ mathũkĩte biũ meciria mao, na nĩ maregetwo ũhoro-inĩ wa wĩtĩkio. 9 No rĩrĩ, matingĩgacĩra tondũ ũrimũ wao nĩ ũrĩonekaga wega kũrĩ andũ othe, o ta ũrĩa kwarĩ harĩ arũme acio erĩ. 10 No wee nĩ ũrũmĩrĩire biũ ũrutani wakwa, mũtũũrĩre wakwa, muoroto wakwa, wĩtĩkio wakwa, wetereri wakwa, wendo wakwa, ũkirĩrĩria wakwa; 11 ningĩ-rĩ, nĩ ũĩ mĩnyamaro na mathĩna ta marĩa ndaacemanirie namo Antiokia, Ikonio, na Lusitera. Nĩ ndaakirĩrĩirie mĩnyamaro ĩyo, nake Mwathani akĩhonokia kuumana nayo yothe. 12 Na rĩrĩ, arĩa othe meriragĩria gũtũũra na wĩrutĩri Ngai marĩ na ngwatanĩro hamwe na Kristo Jesu o nao nĩ marĩnyariragwo. 13 No andũ oru na arĩa metuaga ũrĩa matarĩ marĩkĩragĩrĩria o kũũruha, makĩhĩtithagia andũ na makĩhĩtithagio.

14 No wee-rĩ, thiĩ na mbere kũrũmĩrĩra maũndũ marĩa werutire na ũgĩteithio gwĩtĩkia, tondũ nĩ ũĩ werutire kuuma kũrĩ ũ 15 na atĩ kuuma ũrĩ o gakenge ũkoretwo ũĩ maandĩko marĩa matheru, o marĩa mangĩtũma ũtuĩke mũũgĩ nĩ getha ũkaahonoka kũgerera wĩtĩkio harĩ Kristo Jesu. 16 Maandĩko mothe matongoretio nĩ roho wa Ngai na nĩ marĩ ũguni harĩ kũrutana, gũkaanania, kũrũnga maũndũ, kũherithia na njĩra ya ũthingu, 17 nĩ getha mũndũ wa Ngai akoragwo arĩ mwagĩrĩru kũna, ehotorete biũ nĩ ũndũ wa wĩra wothe mwega.