Ahibirania

10 Na tondũ Watho ũkoragwo na kĩĩruru kĩa maũndũ mega marĩa magooka, no ti maũndũ macio mo mene-rĩ, ndũrĩ hĩndĩ ũngĩhota gũtũma andũ arĩa mahoyaga makinyanĩre kũgerera magongona o macio marutagwo mwaka o mwaka. 2 Nĩ ũndũ korũo nĩguo-rĩ, githĩ magongona matingĩagĩtigire kũrutwo, nĩ gũkorũo andũ arĩa marutaga ũtungata mũtheru marĩkia gũtherio matingĩcokaga kũigua marĩ na mehia rĩngĩ? 3 Mũgarũ na ũguo, magongona macio maririkanagia andũ mwaka o mwaka atĩ nĩ ehia, 4 nĩ ũndũ thakame ya ndegwa na ya mbũri ndĩngĩhota kweheria mehia.

5 Kwoguo rĩrĩa okire thĩinĩ wa thĩ, oigire atĩrĩ: “‘Ndwakenirio nĩ magongona na maruta, ĩndĩ niĩ wahaarĩrĩirie mwĩrĩ. 6 Ndwakenirio nĩ magongona magima ma njino o na magongona ma mehia.’ 7 Hĩndĩ ĩyo ngiuga atĩrĩ: ‘Nĩ ndoka (nĩ haandĩke ũhoro wakwa thĩinĩ wa gĩkũnjo) nĩguo njĩke wendi waku, Wee Ngai.’” 8 Thutha wa kuuga: “Ndwakenirio nĩ magongona na maruta na magongona magima ma njino o na magongona ma mehia,” nĩmo magongona marĩa marutagwo kũringana na Watho, 9 acokete akoiga atĩrĩ: “Nĩ ndoka nĩguo njĩke wendi waku.” Akeheria ũndũ ũcio wa mbere nĩguo ahande ũcio wa kerĩ. 10 Kũgerera “wendi” ũcio nĩ tũtheretio na njĩra ya igongona rĩa mwĩrĩ wa Jesu Kristo riita rĩmwe rĩa kũigana.

11 Ningĩ-rĩ, o mũthĩnjĩri-Ngai nĩ athiaga gũtungata mũthenya o mũthenya na kũruta magongona o ro macio kaingĩ, o mo matangĩeheria mehia biũ. 12 No mũndũ ũcio aarutire igongona rĩmwe rĩa kũigana rĩa mehia na agĩikara thĩ guoko-inĩ kwa ũrĩo kwa Ngai, 13 kuuma hĩndĩ ĩyo agĩikara etereire nginya thũ ciake ituwo gaturũa ka makinya make. 14 Tondũ nĩ atuĩte arĩa maratherio akinyanĩru kũgerera igongona rĩmwe rĩa kũigana. 15 Makĩria ma ũguo, roho mũtheru ningĩ nĩ ũtũrutagĩra ũira, nĩ ũndũ thutha wa kuuga: 16 “‘Gĩkĩ nĩkĩo kĩrĩkanĩro kĩrĩa ngarĩkanĩra nao thutha wa matukũ macio,’ ũguo nĩguo Jehova* ekuuga. ‘Nĩ ngekĩra mawatho makwa ngoro-inĩ ciao na ndĩmaandĩke meciria-inĩ mao.’” 17 Ũcokaga ũkoiga atĩrĩ: “Na ndirĩ hĩndĩ ngaaririkana mehia mao na ciĩko ciao cia uuni-watho rĩngĩ.” 18 Na rĩrĩ, harĩa harĩ na wohanĩri wa mehia macio, hatingĩkorũo na bata rĩngĩ wa kũruta magongona ma mehia.

19 Kwoguo ariũ a Ithe witũ, tondũ tũrĩ na ũmĩrĩru wa kũhũthĩra njĩra ya gũtonya harĩa hatheru kũgerera thakame ya Jesu, 20 ĩrĩa aatũhingũrĩire ĩrĩ njĩra njerũ na ĩrĩ muoyo kũgerera harĩ gĩtaama, ũguo nĩ kuuga, mwĩrĩ wake, 21 na tondũ tũrĩ na mũthĩnjĩri-Ngai ũrĩ na riri thĩinĩ wa nyũmba ya Ngai-rĩ, 22 nĩ tũgĩkuhĩrĩriei tũrĩ na ngoro theru na wĩtĩkio mũrũmu, thutha wa ngoro citũ gũtherio kuumana na thamiri njũru na mĩĩrĩ itũ ĩgathambio na maĩ matheru. 23 Nĩ tũgĩthiĩi na mbere kũruta ũira wĩgiĩ kĩĩrĩgĩrĩro gitũ tũtegũthangania, nĩ ũndũ ũrĩa weranĩire nĩ mwĩhokeku. 24 Ningĩ nĩ twĩciranagie mũndũ na ũrĩa ũngĩ nĩguo twĩkĩranage hinya harĩ kwendana na mawĩra mega, 25 tũtegũtiga gũcemanagia hamwe, ta ũrĩa andũ amwe memenyeretie, no twĩkĩranage hinya, na tũgakĩrĩrĩria gwĩka ũguo o ũrĩa mũrona mũthenya ũcio ũgĩkuhĩrĩria.

26 Nĩ ũndũ tũngĩmenyera kwĩhia tũkĩendaga thutha wa kũgĩa na ũmenyo mũkinyanĩru wa ma, hatirĩ igongona rĩngĩ rĩtigaru rĩa mehia, 27 ĩndĩ harĩ na ituĩro rĩroka rĩa kũguoyohia na marakara mararĩrĩmbũka marĩa makaaniina arĩa makararagia. 28 Mũndũ o wothe waregaga kũrũmĩrĩra Watho wa Musa oragagwo atekũiguĩrũo tha hangĩakorirũo na ũira wa andũ erĩ kana atatũ. 29 Mũgwĩciria nĩ iherithia rĩnene atĩa rĩagĩrĩire harĩ mũndũ ũrĩa ũrangĩrĩirie Mũrũ wa Ngai na akona thakame yake ya kĩrĩkanĩro ĩtarĩ ya bata o ĩrĩa aatheririo nayo, na agatuurithia roho ũrĩa ũrehaga ũtugi mũnene atarĩ na gĩtĩo? 30 Nĩ gũkorũo nĩ tũũĩ Ũrĩa ugĩte ũũ: “Kũrĩhanĩria nĩ gwakwa; nĩ niĩ ngaarĩhanĩria.” Na ningĩ akoiga: “Jehova* nĩ agaatuĩra andũ ake.” 31 Nĩ ũndũ wa kũguoyohia kũherithio nĩ Ngai ũrĩa ũrĩ muoyo.

32 O na kũrĩ ũguo, ririkanagai matukũ marĩa ma tene, thutha wa kũgĩa na ũtheri, mwakirĩrĩirie moritũ manene o hamwe na mĩnyamaro. 33 Rĩmwe nĩ mwaconorithagio mbere ya andũ na mũkanyarirũo, na hĩndĩ ĩngĩ mũkanyitanĩra na arĩa meekagwo maũndũ ta macio. 34 Nĩ gũkorũo nĩ mwacayagĩra arĩa moohetwo njera na mũtiorirũo nĩ gĩkeno mwatunywo indo cianyu, nĩ kũmenya atĩ inyuĩ ene mũrĩ na mũthithũ mwega makĩria na wa gũtũũra.

35 Nĩ ũndũ ũcio thiĩi na mbere kwaria mũrĩ na ũcamba, tondũ ũndũ ũcio nĩ ũgaatũma mũheo kĩheo kĩnene. 36 Tondũ nĩ mũrabatara ũkirĩrĩria, nĩguo thutha wa gũkorũo mwĩkĩte wendi wa Ngai, mũkaamũkĩra ũndũ ũrĩa eranĩire. 37 Nĩ gũkorũo no “kahinda kanini gatigaru,” nake “ũrĩa ũroka akinye na ndegũcererũo.” 38 “No mũndũ ũrĩa mũthingu egũtũũra nĩ ũndũ wa wĩtĩkio,” na “angĩcoka na thutha, ndingĩkenio nĩwe.” 39 Ithuĩ tũtirĩ arĩa macokaga na thutha makanangwo, ĩndĩ tũrĩ arĩa marĩ na wĩtĩkio ũngĩtũma tũtũũre muoyo.