Ahibirania

11 Wĩtĩkio nĩ gũkorũo na kĩĩrĩgĩrĩro kĩa ma kĩa maũndũ marĩa matanyĩtwo, ũira mũrũmu wa maũndũ marĩa mataroneka o na gũtuĩka marĩ ho. 2 Nĩ ũndũ wa wĩtĩkio-rĩ, andũ a tene nĩ maagĩire na ũira atĩ Ngai nĩ ametĩkĩrĩte.

3 Nĩ ũndũ wa wĩtĩkio nĩ tũmenyaga atĩ mĩtabarĩre ya maũndũ* yaigirũo nĩ kiugo kĩa Ngai harĩa yagĩrĩire, na nĩ ũndũ ũcio, maũndũ marĩa monekaga makoragwo moimanĩte na marĩa matonekaga.

4 Nĩ ũndũ wa wĩtĩkio, Habili aarutĩire Ngai igongona rĩega gũkĩra rĩrĩa rĩarutirũo nĩ Kaini, na nĩ ũndũ wa wĩtĩkio ũcio akĩgĩa na ũira atĩ aarĩ mũthingu, nĩ gũkorũo Ngai nĩ eetĩkĩrire iheo ciake, na o na gũtuĩka nĩ aakuire, no aragia kũgerera wĩtĩkio wake.

5 Nĩ ũndũ wa wĩtĩkio, Enoko nĩ eeheririo nĩguo ndagacemanie na mĩnyamaro ya gĩkuũ, na ndaacokire kuoneka handũ tondũ Ngai nĩ aamweheretie; nĩ gũkorũo ataneherio nĩ aagĩire na ũira atĩ nĩ aakenagia Ngai. 6 Makĩria ma ũguo, gũtingĩhoteka gũkenia Ngai hatarĩ na wĩtĩkio, tondũ mũndũ ũrĩa ũkuhagĩrĩria Ngai no mũhaka etĩkie atĩ arĩ kuo na atĩ nĩ arathimaga arĩa mamũcaragia na kĩyo.

7 Nĩ ũndũ wa wĩtĩkio, thutha wa Nuhu kwamũkĩra mũkaana wa maũndũ matoonekete, nĩ onanirie atĩ nĩ eetigĩrĩte Ngai, agĩaka thabina ya kũhonokeria andũ a nyũmba yake; na kũgerera wĩtĩkio ũcio agĩtuĩra thĩ na agĩtuĩka mũgai wa ũthingu ũrĩa umanaga na wĩtĩkio.

8 Nĩ ũndũ wa wĩtĩkio, hĩndĩ ĩrĩa Iburahimu eetirũo, nĩ aathĩkire na njĩra ya gũthiĩ kũrĩa angĩaheirũo gũtuĩke igai rĩake; o na gũtuĩka ndaamenyaga kũrĩa aathiaga, nĩ oimagarire. 9 Nĩ ũndũ wa wĩtĩkio we aatũũrire ta mũgeni thĩinĩ wa bũrũri wa kĩĩranĩro o ta arĩ bũrũri-inĩ mũgeni, na aatũũraga hema-inĩ hamwe na Isaaka na Jakubu, arĩa maarĩ agai hamwe nake a kĩĩranĩro o ro kĩu. 10 Nĩ gũkorũo eetereire itũũra rĩrĩa rĩrĩ na mĩthingi ya ma, o rĩo mũthondeki na mwaki warĩo arĩ Ngai.

11 Nĩ ũndũ wa wĩtĩkio, o nake Sara nĩ aamũkĩrire hinya wa kũgĩa nda, o na ahĩtũkĩtie mĩaka, tondũ nĩ onaga Ũrĩa weranĩire kĩĩranĩro kĩu arĩ mwĩhokeku. 12 Nĩ ũndũ ũcio-rĩ, kuumana na mũndũ wahaanaga ta akuĩte hagĩciarũo ciana nyingĩ o ta njata cia igũrũ na itangĩtarĩka o ta mũthanga ũrĩa ũkoragwo hũgũrũrũ-inĩ cia iria.

13 Andũ acio othe maakuire marĩ na wĩtĩkio, o na gũtuĩka mationire ciĩranĩro icio ikĩhinga; no nĩ maacionire irĩ o haraya na magĩcikenera na makĩmenyithia andũ atĩ o maarĩ ageni na aikari a kahinda kanini thĩinĩ wa bũrũri ũcio. 14 Nĩ ũndũ arĩa maragia ũguo monanagia wega atĩ maracaria na kĩyo handũ hao ene. 15 No korũo nĩ maathiire na mbere kũririkana kũndũ kũrĩa moimĩte-rĩ, nĩ mangĩagĩire na mweke wa gũcoka kuo. 16 No rĩu marathingata handũ hega makĩria, ũguo nĩ kuuga, handũ hakonainie na igũrũ. Kwoguo Ngai ndaconokaga gwĩtwo Ngai wao, nĩ gũkorũo nĩ ahaarĩirie itũũra nĩ ũndũ wao.

17 Nĩ ũndũ wa wĩtĩkio, rĩrĩa Iburahimu aageririo, aarĩ hakuhĩ kũruta Isaaka igongona, Iburahimu o ũcio wakenete mũno nĩ kwamũkĩra kĩĩranĩro akĩenda kũruta mũrũ wake wa mũmwe, 18 o na gũtuĩka nĩ eerĩtwo atĩrĩ: “Arĩa mageetagwo rũciaro rwaku makoimana na Isaaka.” 19 No agĩtua atĩ Ngai no ahote kũmũriũkia o na kuuma kũrĩ arĩa akuũ, na nĩ aamwamũkĩrire kuuma kuo na njĩra ya ngerekano.

20 Nĩ ũndũ wa wĩtĩkio nake Isaaka nĩ aarathimire Jakubu na Esau ũhoro-inĩ wĩgiĩ maũndũ marĩa mangĩgooka.

21 Nĩ ũndũ wa wĩtĩkio, rĩrĩa Jakubu aakuhĩrĩirie gũkua, nĩ aarathimire ariũ arĩa erĩ a Jusufu na agĩthathaiya etiranĩtie na mũtirima wake.

22 Nĩ ũndũ wa wĩtĩkio, rĩrĩa Jusufu aakuhĩrĩirie gũkua, nĩ aaririe ũhoro wa thama ya ciana cia Isiraeli, na agĩathana ũndũ-inĩ wĩgiĩ mahĩndĩ make.

23 Nĩ ũndũ wa wĩtĩkio, Musa nĩ aahithirũo nĩ aciari ake mĩeri ĩtatũ thutha wa gũciarũo, nĩ gũkorũo nĩ moonire kaana kau karĩ gathaka na matietigĩrire watho wa mũthamaki. 24 Nĩ ũndũ wa wĩtĩkio, rĩrĩa Musa atuĩkire mũndũ mũgima, nĩ aaregire gwĩtagwo mũriũ wa mwarĩ wa Firauni, 25 agĩthuura kũnyariranĩrio na andũ a Ngai handũ ha gũkenera mehia gwa kahinda kanini, 26 tondũ nĩ onaga kũnyararũo arĩ Mũitĩrĩrio Maguta kũrĩ ũtonga mũnene gũkĩra mĩthithũ ya Misiri, tondũ aaikarire atanyĩte kwamũkĩra kĩheo. 27 Nĩ ũndũ wa wĩtĩkio nĩ oimire Misiri, ategwĩtigĩra marakara ma mũthamaki, nĩ gũkorũo aathiire na mbere gũikara ehandĩte ta onaga Ũrĩa ũtangĩoneka. 28 Nĩ ũndũ wa wĩtĩkio nĩ aakũngũĩire Pasaka na akĩminjaminjĩria itugĩ cia mĩrango thakame, nĩguo mũniinani ndakorage marigithathi mao.

29 Nĩ ũndũ wa wĩtĩkio magĩtuĩkanĩria Iria Rĩrĩa Itune o ta arĩ thĩ nyũmũ, no rĩrĩa Amisiri maageririe gwĩka ũguo, makĩmerio.

30 Nĩ ũndũ wa wĩtĩkio thingo cia Jeriko nĩ ciagũire thutha wa andũ gũcithiũrũrũka mĩthenya mũgwanja. 31 Nĩ ũndũ wa wĩtĩkio Rahabu ũrĩa warĩ mũmaraya ndaaniinanĩirio na andũ aremi, nĩ gũkorũo nĩ aamũkĩrire athigani na njĩra ya thayũ.

32 Ngũkiuga atĩa ũngĩ? Nĩ gũkorũo ihinda rĩtingĩnjĩtĩkĩria kwaria ũhoro wĩgiĩ Gideoni, Baraka, Samsoni, Jefitha, Daudi, o na Samueli na anabii arĩa angĩ. 33 Nĩ ũndũ wa wĩtĩkio nĩ maahootire mothamaki, magĩka maũndũ ma ũthingu, makĩamũkĩra ciĩranĩro, makĩhinga mĩrũthi tũnua, 34 makĩhoria hinya wa mwaki, makĩhonoka kũniinwo na rũhiũ, makĩheo hinya rĩrĩa maarĩ ahinyĩrĩrĩku, magĩtuĩka njamba ita-inĩ, na magĩtooria mbũtũ iria ciamatharĩkagĩra. 35 Atumia makĩriũkĩrio andũ ao arĩa maakuĩte, no andũ amwe makĩnyarirũo tondũ matingĩetĩkĩrire gũkaana wĩtĩkio nĩguo marekererio, nĩ getha megĩĩre na ũriũkio ũrĩa mwega makĩria. 36 Amwe maageririo na njĩra ya kũnyũrũrio na kũhũũrũo iboko, na makĩria ma ũguo, makĩohwo mĩnyororo na magĩikio njera. 37 Makĩhũũrũo na mahiga, makĩgerio, magĩtinio na thoo, makĩũragwo na rũhiũ, makĩĩhumba njũa cia ngʼondu na cia mbũri rĩrĩa maarĩ na thĩna na mĩnyamaro, na magĩkwo maũndũ moru; 38 na thĩ ndĩamaagĩrĩire. Makĩũrũra werũ-inĩ, irĩma-inĩ, ngurunga-inĩ o na marima-inĩ ma thĩ.

39 Na andũ acio othe, o na gũtuĩka nĩ maagĩire na ũira mwega nĩ ũndũ wa wĩtĩkio wao-rĩ, mationire kũhinga gwa kĩĩranĩro, 40 tondũ Ngai nĩ onete o mbere ũndũ mwega makĩria nĩ ũndũ witũ, nĩguo matikae gũtuo akinyanĩru ithuĩ tũtarĩ ho.