Ahibirania
13 Thiĩi na mbere kwendana ta ariũ a nyina ũmwe. 2 Mũtikariganĩrũo kũnyitanaga ũgeni, nĩ gũkorũo kũgerera gwĩka ũguo amwe matekũmenya nĩ maanyitire araika ũgeni. 3 Ririkanagai arĩa marĩ njera, ta muohetwo hamwe nao, o na arĩa maranyarirũo, tondũ o na inyuĩ mũrĩ thĩinĩ wa mwĩrĩ. 4 Rekei kĩhiko kĩheagwo gĩtĩo nĩ andũ othe, na ũrĩrĩ wa kĩhiko ũigagwo ũrĩ mũtheru, nĩ ũndũ Ngai nĩ agaatuĩra arĩa meingĩragia thĩinĩ wa ngomanio itagĩrĩire,* o hamwe na itharia. 5 Mũtũũrĩre-inĩ wanyu-rĩ, tigagai kwenda mbeca, na mũiganagĩre na indo iria mũrĩ nacio. Nĩ gũkorũo we oigĩte ũũ: “Ndirĩ hĩndĩ ngaagũtiga, na ndirĩ hĩndĩ ngaagũtirika.” 6 Nĩ getha tũkoragwo na ũmĩrĩru mũnene wa kuuga: “Jehova* nĩwe mũndeithia; ndigwĩtigĩra. Mũndũ angĩnjĩka atĩa?”
7 Ririkanagai arĩa matongoragia gatagatĩ-inĩ kanyu, o acio mamũrutĩte kiugo kĩa Ngai, na mwecũrania ũhoro wa moimĩrĩro ma mĩthiĩre yao-rĩ, mwĩgerekanagiei na wĩtĩkio wao.
8 Jesu Kristo atũũraga arĩ o we ira na ũmũthĩ, na tene na tene.
9 Mũtikahĩtithio nĩ morutani ma mĩthemba ngũrani na mageni, nĩ gũkorũo nĩ kaba ngoro yongererũo hinya nĩ ũtugi mũnene wa Ngai handũ ha irio, o icio itagunaga arĩa macithingataga.
10 Tũrĩ na kĩgongona kĩrĩa arĩa marutaga ũtungata mũtheru hema-inĩ matarĩ etĩkĩrie kũrĩa kuuma harĩ kĩo. 11 Nĩ gũkorũo mĩĩrĩ ya nyamũ iria thakame yacio ĩtwaragwo nĩ mũthĩnjĩri-Ngai ũrĩa mũnene harĩa hatheru ĩrĩ igongona rĩa mehia ĩcinagĩrũo nja ya itũũra. 12 Nĩ ũndũ ũcio, Jesu o nake nĩ aanyamarĩkĩire nja ya kĩhingo gĩa itũũra nĩguo atherie andũ na thakame yake mwene. 13 Hakĩrĩ ũguo-rĩ, nĩ tũgĩthiĩi harĩ we nja ya itũũra, tũkirĩrĩirie gũconorithio ta ũrĩa we aaconorithirio, 14 tondũ gũkũ tũtirĩ na itũũra rĩngĩtũũra, ĩndĩ tũrathingata na kĩyo itũũra rĩrĩa rĩroka. 15 Kũgerera harĩ we, hingo ciothe nĩ tũrutagĩre Ngai igongona rĩa kũgooca, ũguo nĩ kuuga, maciaro marĩa moimaga tũnua-inĩ twitũ tũrĩa tuumbũraga rĩĩtwa rĩake. 16 Makĩria ma ũguo, mũtikanariganĩrũo gwĩkaga wega na kũgayagĩra arĩa angĩ kĩrĩa mũrĩ nakĩo, nĩ ũndũ Ngai nĩ akenagio mũno nĩ magongona ta macio.
17 Athĩkagĩrai arĩa matongoragia gatagatĩ-inĩ kanyu na mũmenyihagĩrie, nĩ gũkorũo meimaga toro makĩmũrũmbũyia nĩ ũndũ nĩ makoorio ũhoro wanyu, nĩguo mekage ũguo makenete na mategũcaya, tondũ ũndũ ũcio no ũkorũo na moimĩrĩro moru harĩ inyuĩ.
18 Tũhoyagĩrei, nĩ gũkorũo tũrehoka atĩ thamiri citũ nĩ theru, na twendaga gũkorũo tũrĩ ehokeku maũndũ-inĩ mothe. 19 No makĩria ndĩramũũria mũhoyage nĩguo njokio kũrĩ inyuĩ o narua.
20 Rĩu-rĩ, Ngai mwene thayũ, o we wariũkirie mũrĩithi ũrĩa mũnene wa ngʼondu, Mwathani witũ Jesu, na thakame ya kĩrĩkanĩro gĩa tene na tene, 21 aromũhe kĩndũ kĩrĩa gĩothe kĩega nĩguo mwĩkage wendi wake, akĩmũhotithagia gwĩka maũndũ marĩa mamũkenagia kũgerera Jesu Kristo. Ngai arogoocwo tene na tene. Ameni.
22 Rĩu-rĩ, ndĩramũthaitha ariũ a Ithe witũ atĩ mũthikĩrĩrie mũtegũthethũka ciugo ici cia kũmwĩkĩra hinya, nĩ gũkorũo ndamwandĩkĩra marũa makuhĩ. 23 Ngwenda mũmenye atĩ mũrũ wa Ithe witũ Timotheo nĩ ohoretwo. Angĩũka ica ikuhĩ, nĩ tũgooka nake kũrĩ inyuĩ.
24 Ngeithĩriai arĩa othe matongoragia gatagatĩ-inĩ kanyu o hamwe na arĩa othe aamũre. Nĩ mwageithio nĩ arĩa marĩ Italia.
25 Ũtugi mũnene wa Ngai ũroikara hamwe na inyuĩ inyuothe.