2 Petero

2 O na kũrĩ ũguo, nĩ kuoimĩrire anabii a maheeni gatagatĩ-inĩ ka andũ a Ngai, o ta ũrĩa gũkoimĩra arutani a maheeni gatagatĩ-inĩ kanyu. Acio nĩ makaarehe nyamũkano njũru na njĩra ĩĩhithanĩtie, na nginya nĩ magaakaana ũrĩa wamagũrire, na nĩ ũndũ ũcio merehere kũniinwo kwa narua. 2 Makĩria ma ũguo, andũ aingĩ nĩ makaarũmĩrĩra mĩtugo yao ya rũtũrĩko,* na njĩra ĩrĩa ya ma nĩ ĩkaanyũrũrio nĩ ũndũ wao. 3 Ningĩ, nĩ ũndũ wa ũkoroku wao nĩ makegunaga na njĩra ya kũmũhe ndeto cia maheeni. No ituĩro rĩao, rĩrĩa rĩatuirũo tene mũno rĩtiregucia, na kũniinwo kwao kũrĩ hakuhĩ.

4 Atĩrĩrĩ, Ngai ndaagire kũherithia araika arĩa meehirie, no aamaikirie Tarataro,* akĩmoha thĩinĩ wa irima rĩrĩ nduma nene maikare kuo nginya hĩndĩ ĩrĩa magaatuĩrũo. 5 Na ndaagire kũherithia thĩ ĩrĩa yarĩ kuo tene, no nĩ aahonokirie Nuhu, mũhunjia wa ũthingu, hamwe na andũ angĩ mũgwanja hĩndĩ ĩrĩa aarehire mũiyũro igũrũ rĩa thĩ ya andũ mateetigĩrĩte Ngai. 6 Na rĩrĩa aacinire matũũra ma Sodomu na Gomora magĩtuĩka mũhu, nĩ kũmatuĩra aamatuĩrĩire, akĩiga kĩonereria kĩa ũrĩa gũgathiĩ harĩ andũ arĩa matetigĩrĩte Ngai. 7 Na akĩhonokia Loti, mũndũ warĩ mũthingu, ũrĩa watangĩkaga mũno nĩ ũndũ wa mĩtugo ya rũtũrĩko* ya andũ arĩa mooinaga watho, 8 nĩ gũkorũo o mũthenya mũndũ ũcio mũthingu nĩ aanyarirĩkaga nĩ ũndũ wa ciĩko cia uuni-watho iria eeyonagĩra na akaigua hĩndĩ ĩrĩa aatũũranagia nao. 9 Nĩ ũndũ ũcio, Jehova* nĩ oĩ kũhonokia andũ arĩa mamwĩyamũrĩire, akamaruta thĩinĩ wa magerio, na kũiga andũ arĩa matarĩ athingu makaaniinwo mũthenya wa ituĩro, 10 makĩria arĩa mendaga gũthahia mĩĩrĩ ya arĩa angĩ na makanyarara wathani.

Andũ acio matimakaga na nĩ etĩi, na matiĩtigĩraga kwaria maũndũ moru megiĩ arĩa Ngai aheete gĩtĩo, 11 no araika, o na gũtuĩka nĩ mamakĩrĩte na ũhoti na hinya, matimathitangaga na irumi, nĩ ũndũ wa ũrĩa maheete Jehova* gĩtĩo. 12 No andũ acio, o ta nyamũ iria iteciragia iria ciũmbĩtwo nĩ getha inyitagwo na ikaniinwo, nĩ maragia ũũru ũhoro-inĩ wĩgiĩ maũndũ marĩa matoĩ. Andũ acio nĩ makaaniinwo nĩ mĩthiĩre yao mĩũru, 13 mĩthiĩre ĩyo yao nĩ ĩgaatũma manyitwo nĩ moimĩrĩro moru.

Monaga kwĩingĩria mũtũũrĩre-inĩ wa mĩago ũrĩ ũndũ wa gũcanjamũra, nginya mũthenya. Acio nĩ imeni na marooro, na nĩo makĩragia njano harĩ morutani ma maheeni rĩrĩa marĩ maruga-inĩ hamwe na inyuĩ. 14 Maitho mao maiyũire ũtharia na matihotaga gwĩthema mehia, na nĩ magucagĩrĩria arĩa matarĩ hinya. Ngoro ciao imenyeretio gũkoroka. Acio nĩ ciana inyitĩtwo nĩ kĩrumi. 15 Nĩ mahĩtithĩtio, magatigana na njĩra ĩrĩa nũngarũ. Marũmĩrĩire njĩra ĩrĩa ya Balaamu mũrũ wa Beori, ũrĩa weendire kĩheo kĩrĩa aangĩamũkĩrire nĩ ũndũ wa gwĩka ũũru, 16 no nĩ aarũngirũo nĩ ũndũ wa kwagarara watho. Ndigiri, na nĩ nyamũ ĩtaaragia, ĩkĩaria na mũgambo wa mũndũ, ĩkĩgirĩrĩria ũgũrũki wa mũnabii ũcio.

17 Andũ acio nĩ ithima itakoragwo na maĩ, na nĩ kĩbii kĩrĩa kĩhurutagwo nĩ rũhuho rũnene, nao maigĩirũo nduma ĩrĩa ndumanu biũ. 18 Maũndũ marĩa maragia maiguĩkaga ta marĩ ma bata mũno no nĩ ma tũhũ. Kũgerera merirĩria ma mwĩrĩ na ciĩko cia rũtũrĩko,* magucagĩrĩria andũ arĩa maretharire ica ikuhĩ kuuma kũrĩ arĩa matũũraga mahĩtagia. 19 Mameeragĩra wĩyathi, no o ene nĩ ngombo cia ũhoro wa kũbutha; nĩ gũkorũo mũndũ o wothe angĩtoorio nĩ mũndũ, atuĩkaga ngombo yake. 20 Atĩrĩrĩ, angĩkorũo thutha wa gwĩthara kuumana na thahu wa thĩ ĩno kũgerera ũmenyo ũrĩa mũkinyanĩru wĩgiĩ Mwathani na Mũhonokia Jesu Kristo macokaga o rĩngĩ maũndũ-inĩ macio na magatoorio-rĩ, marigĩrĩrio mao nĩ moru gũkĩra mbere. 21 Nĩ kaba matangĩamenyete njĩra ya ũthingu wega gũkĩra kũmĩmenya magacoka makahũgũkĩra watho mũtheru ũrĩa maamũkĩrĩte. 22 Ũrĩa thimo ĩno ya ma yugaga nĩguo gwĩkĩkĩte: “Ngui nĩ ĩcokereire matahĩko mayo, na ngũrũe ya mũgoma ĩgacoka mũtondo-inĩ thutha wa gũthambio.”