1 Johana

2 Twana twakwa, ndĩramwandĩkĩra maũndũ maya nĩ getha mũtikehie. No rĩrĩ, mũndũ angĩhia, nĩ tũrĩ na mũteithia ũrĩ hamwe na Ithe witũ, nĩwe Jesu Kristo, na nĩ mũthingu. 2 Na we nĩ igongona rĩa ũiguano nĩ ũndũ wa mehia maitũ, ĩndĩ to ũndũ wa mehia maitũ tu no nĩ nginya ma thĩ yothe. 3 Na kũgerera ũndũ ũyũ nĩ tũĩ atĩ nĩ tũmũmenyete, tũngĩthiĩ o na mbere kũhingia maathani make. 4 Mũndũ ũrĩa ugaga, “Nĩ ndĩkĩtie kũmũmenya,” no ndahingagia maathani make-rĩ, ũcio nĩ mũheenania, na ũhoro wa ma ndũrĩ thĩinĩ wa mũndũ ũcio. 5 No rĩrĩ, mũndũ ũrĩa ũrũmagĩrĩra kiugo gĩake, wendo wa Ngai nĩ ũrĩkĩtie gũkinyanĩra thĩinĩ wake. Kũgerera ũndũ ũcio nĩ tũmenyaga atĩ tũrĩ na ũiguano hamwe nake. 6 Mũndũ ũrĩa ugaga arĩ na ũiguano hamwe nake no mũhaka we mwene athiage o ta ũrĩa Jesu aathiaga.

7 Endwa akwa, ti rĩathani rĩerũ ndĩramwandĩkĩra, ĩndĩ nĩ rĩathani rĩa tene rĩrĩa mũkoretwo narĩo kuuma o kĩambĩrĩria. Rĩathani rĩrĩ rĩa tene nĩ kiugo kĩrĩa mwaiguire. 8 Ningĩ, ndĩramwandĩkĩra rĩathani rĩerũ, na nĩ rĩa ma ũhoro-inĩ wake o na wanyu, nĩ gũkorũo nduma nĩ ĩrathira na ũtheri ũrĩa wa ma nĩ ũraara.

9 Mũndũ ũrĩa ugaga atĩ arĩ ũtheri-inĩ na nĩ athũire mũrũ wa Ithe, arĩ o nduma-inĩ. 10 Mũndũ ũrĩa wendete mũrũ wa Ithe atũũraga ũtheri-inĩ, na gũtirĩ ũndũ ũngĩmũhĩnga. 11 No mũndũ ũrĩa ũthũire mũrũ wa Ithe akoragwo nduma-inĩ na athiagĩra o nduma-inĩ, na ndamenyaga kũrĩa arathiĩ, nĩ gũkorũo nduma ĩyo nĩ ĩtumumarĩtie maitho make.

12 Ndĩramwandĩkĩra inyuĩ twana tũtũ tondũ nĩ muoheirũo mehia manyu nĩ ũndũ wa rĩĩtwa rĩake. 13 Ndĩramwandĩkĩra inyuĩ maithe, nĩ gũkorũo nĩ mũmenyete ũcio ũkoretwo kuo kuuma o kĩambĩrĩria. Ndĩramwandĩkĩra inyuĩ anake, nĩ gũkorũo nĩ mũtooretie ũrĩa mũru. Ndamwandĩkĩra inyuĩ ciana, nĩ gũkorũo nĩ mũmenyete Ithe witũ. 14 Ndamwandĩkĩra inyuĩ maithe, nĩ gũkorũo nĩ mũmenyete ũcio ũkoretwo kuo kuuma o kĩambĩrĩria. Ndamwandĩkĩra inyuĩ anake, nĩ gũkorũo mũrĩ na hinya, nakĩo kiugo kĩa Ngai gĩtũũraga thĩinĩ wanyu na nĩ mũtooretie ũrĩa mũru.

15 Mũtikende thĩ o na kana indo iria irĩ thĩinĩ wa thĩ. Mũndũ angĩkorũo nĩ endete thĩ, wendo wa Ithe witũ ndũrĩ thĩinĩ wake; 16 nĩ gũkorũo maũndũ mothe marĩa marĩ thĩinĩ wa thĩ, ta merirĩria ma mwĩrĩ na merirĩria ma maitho na mwĩyonanio wa indo iria mũndũ arĩ nacio, matiumanĩte na Ithe witũ, ĩndĩ moimanĩte na thĩ. 17 Ningĩ-rĩ, thĩ nĩ gũthira ĩrathira o hamwe na merirĩria mayo, no mũndũ ũrĩa wĩkaga wendi wa Ngai egũtũũra tene na tene.

18 Twana tũtũ, tũrĩ ihinda rĩa mũthia, na o ta ũrĩa mũiguĩte, thũ ya Kristo nĩ ĩroka, o na rĩu nĩ kuumĩrĩte thũ nyingĩ cia Kristo, na ũndũ ũcio ũratũmenyithia wega atĩ tũrĩ ihinda rĩa mũthia. 19 Acio nĩ mooimire gatagatĩ-inĩ gaitũ tondũ matiarĩ a thiritũ itũ; nĩ ũndũ korũo maarĩ a thiritũ itũ, nĩ mangĩatũũrire hamwe na ithuĩ. Ĩndĩ nĩ mooimire nĩ getha kũmenyeke atĩ ti othe a thiritũ itũ. 20 Na inyuĩ nĩ mũitĩrĩirio maguta nĩ ũrĩa mũtheru, na inyuothe mũrĩ na ũmenyo. 21 Ndiramwandĩkĩra atĩ tondũ mũtiũĩ ũhoro ũrĩa wa ma, ĩndĩ ndĩramwandĩkĩra tondũ nĩ mũĩ ũhoro ũcio na gũtirĩ maheeni moimanaga na ũhoro ũrĩa wa ma.

22 Nũ mũheenania o tiga ũrĩa ugaga atĩ Jesu tiwe Kristo? Ũcio nĩwe thũ ya Kristo, ũrĩa ũkaanaga Ithe witũ na Mũrũwe. 23 Mũndũ ũrĩa ũkaanaga Mũriũ ndakoragwo na ũiguano na Ithe witũ. No ũrĩa umbũraga Mũriũ nĩ oimbũraga Ithe witũ o nake. 24 No inyuĩ-rĩ, no mũhaka maũndũ marĩa mũiguĩte kuuma o kĩambĩrĩria maikarage thĩinĩ wanyu. Angĩkorũo maũndũ macio mũiguĩte kuuma o kĩambĩrĩria nĩ marĩikaraga thĩinĩ wanyu, o na inyuĩ mũrĩ na ũiguano na Mũriũ na mũrĩ na ũiguano na Ithe witũ. 25 Makĩria ma ũguo-rĩ, we mwene nĩ aatwĩrĩire muoyo wa tene na tene.

26 Ndamwandĩkĩra maũndũ macio nĩ ũndũ wa arĩa marageria kũmũhĩtithia. 27 No inyuĩ, tondũ nĩ mũitĩrĩirio maguta kũgerera roho mũtheru na roho ũcio ũikaraga igũrũ rĩanyu-rĩ, mũtirabatara mũndũ o na ũrĩkũ amũrute; no Ngai nĩ ahũthagĩra roho ũcio kũmũruta maũndũ mothe, naguo nĩ wa ma na ndũheenanagia. O ta ũrĩa roho ũcio ũmũrutĩte, tũũrai mũrĩ na ũiguano hamwe nake. 28 Nĩ ũndũ ũcio twana tũtũ-rĩ, ikaragai mũrĩ na ũiguano hamwe nake, nĩ getha rĩrĩa akaaguũrio tũgaakorũo na wĩyathi wa kwaria na tũtikanamũconokere hĩndĩ yake ya gũkorũo kuo yakinya. 29 Angĩkorũo nĩ mũĩ atĩ we nĩ mũthingu, nĩ mũĩ atĩ mũndũ wothe wĩkaga maũndũ ma ũthingu oimanĩte nake.