1 Johana

3 Ta mwĩciriei nĩ wendo ũtariĩ atĩa Ithe witũ atuonetie, atĩ tũgetwo ciana cia Ngai! Na ũguo nĩguo tũtariĩ. Nĩkĩo thĩ ĩtatũĩ, tondũ ndĩmũmenyete. 2 Endwa akwa, ithuĩ rĩu tũrĩ ciana cia Ngai, no gũtirĩ kũraguũrio ũrĩa tũgatuĩka. No nĩ tũĩ atĩ rĩrĩa akaaguũrio tũkaahanana nake, tondũ tũkaamuona o ta ũrĩa atariĩ. 3 Na mũndũ o wothe ũrĩ na kĩĩrĩgĩrĩro kĩu thĩinĩ wake nĩ etheragia, o ta ũrĩa ũcio nake arĩ mũtheru.

4 Mũndũ o wothe wĩhagia nĩ Watho oinaga, na mehia nĩ uuni-Watho. 5 Ningĩ-rĩ, nĩ mũĩ atĩ aaguũririo nĩguo eherie mehia maitũ, na ndarĩ mehia thĩinĩ wake. 6 Mũndũ wothe ũtũũraga arĩ na ũiguano nake ndamenyeraga kwĩhia; gũtirĩ mũndũ ũmenyerete kwĩhia ũrĩ wamuona kana akamũmenya. 7 Twana tũtũ, mũndũ o na ũrĩkũ ndakanamũhĩtithie; mũndũ ũrĩa wĩkaga maũndũ ma ũthingu nĩ mũthingu, o ta ũrĩa ũcio arĩ mũthingu. 8 Mũndũ ũrĩa ũmenyerete kwĩhia oimanĩte na Mũcukani, tondũ Mũcukani akoretwo akĩhia kuuma o kĩambĩrĩria. Na kĩu nĩkĩo gĩatũmire Mũrũ wa Ngai aguũrio, nĩguo anange mawĩra ma Mũcukani.

9 Mũndũ wothe umanĩte na Ngai ndamenyeraga kwĩhia, nĩ ũndũ mbeũ Yake ĩtũũraga thĩinĩ wa mũndũ ta ũcio, na ndangĩmenyera kwĩhia nĩ gũkorũo oimanĩte na Ngai. 10 Ciana cia Ngai na ciana cia Mũcukani imenyekaga na ũndũ ũyũ: Mũndũ o wothe ũtekaga maũndũ ma ũthingu ndoimanĩte na Ngai, o na kana mũndũ ũrĩa ũtendete mũrũ wa Ithe. 11 Tondũ ĩno nĩyo ndũmĩrĩri ĩrĩa mwaiguire kuuma o kĩambĩrĩria, atĩ nĩ twagĩrĩirũo kwendana; 12 ti ta Kaini, ũrĩa woimanĩte na ũrĩa mũru na akĩũraga mũrũ wa nyina. Na nĩ kĩĩ gĩatũmire amũũrage? Nĩ tondũ ciĩko ciake ciarĩ njũru, nacio cia mũrũ wa nyina ciarĩ cia ũthingu.

13 Ariũ a Ithe witũ, mũtikagege atĩ tondũ nĩ mũthũirũo nĩ thĩ. 14 Nĩ tũĩ atĩ nĩ tuumĩte thĩinĩ wa gĩkuũ tũgatonya muoyo-inĩ, tondũ nĩ twendete ariũ a Ithe witũ. Ũrĩa ũtendanaga atũũraga thĩinĩ wa gĩkuũ. 15 Mũndũ o wothe ũthũire mũrũ wa Ithe nĩ mũũragani, na nĩ mũĩ atĩ gũtirĩ mũũragani ũrĩ na muoyo wa tene na tene. 16 Ũndũ ũyũ nĩguo ũtũmĩte tũmenye ũhoro wa wendo, tondũ we nĩ aarutire muoyo wake nĩ ũndũ witũ, na ithuĩ nĩ twagĩrĩirũo kũruta mĩoyo itũ nĩ ũndũ wa ariũ a Ithe witũ. 17 No mũndũ o wothe ũrĩ na indo cia mũtabarĩre ũyũ na akona mũrũ wa Ithe arĩ na thĩna no akaga kũmũiguĩra tha-rĩ, wendo wa Ngai ũngĩgĩkorũo thĩinĩ wake atĩa? 18 Twana tũtũ, ithuĩ tũtiagĩrĩirũo kwendana o na ciugo kana na kanua, ĩndĩ twagĩrĩirũo kwendana na ciĩko na ma.

19 Ũndũ ũcio nĩguo ũrĩtũmaga tũmenye atĩ tuumanĩte na ũhoro wa ma, na tũkagĩa na ũũma thĩinĩ wa ngoro citũ tũrĩ mbere yake 20 ũhoro-inĩ wĩgiĩ ũndũ o wothe ũrĩa ngoro citũ ingĩtũtuĩra, tondũ Ngai nĩ mũnene gũkĩra ngoro citũ na nĩ oĩ maũndũ mothe. 21 Endwa akwa, ngoro citũ ingĩaga gũtũtuĩra-rĩ, no tũkorũo na wĩyathi wa kwaria na Ngai; 22 na kĩrĩa gĩothe tũmũhoyaga nĩ atũheaga, tondũ nĩ twathĩkagĩra maathani make na tũgeka maũndũ marĩa mamũkenagia. 23 Na rĩrĩ nĩrĩo rĩathani rĩake: atĩ tũgĩe na wĩtĩkio harĩ Mũrũwe Jesu Kristo na twendanage, o ta ũrĩa aatũheire rĩathani. 24 Makĩria ma ũguo, mũndũ ũrĩa wathĩkagĩra maathani make atũũraga arĩ na ũiguano nake, nake agatũũra arĩ na ũiguano na mũndũ ta ũcio. Na kũgerera roho ũrĩa aatũheire, nĩ tũmenyaga atĩ atũũraga arĩ na ũiguano hamwe na ithuĩ.