1 Johana
5 Mũndũ o wothe wĩtĩkĩtie atĩ Jesu nĩwe Kristo oimanĩte na Ngai, nake mũndũ o wothe wendete Ithe nĩ endete ũrĩa umanĩte nake. 2 Ũndũ ũyũ nĩguo ũtũmaga tũmenye atĩ nĩ twendete ciana cia Ngai, twakorũo twendete Ngai na tũgathĩkagĩra maathani make. 3 Nĩ gũkorũo kwenda Ngai nĩ atĩrĩ, tũrũmagĩrĩre maathani make; na maathani make ti mũrigo, 4 tondũ mũndũ o wothe umanĩte na Ngai nĩ atooragia thĩ. Na nĩ tũtooretie thĩ kũgerera wĩtĩkio witũ.
5 Nũ ũngĩhota gũtooria thĩ? Na githĩ ti mũndũ ũrĩa wĩtĩkĩtie atĩ Jesu nĩwe Mũrũ wa Ngai? 6 Ũcio nĩwe wokire na njĩra ya maĩ na thakame, no ti na maĩ matheri, ĩndĩ nĩ na maĩ na thakame, nĩwe Jesu Kristo. Na roho nĩ ũrutaga ũira, tondũ roho nĩguo ũguũragia ũhoro wa ma. 7 Nĩ gũkorũo kũrĩ indo ithatũ irutaga ũira: 8 roho, maĩ, na thakame; na icio ithatũ nĩ irĩ ũiguano.
9 Angĩkorũo nĩ twĩtĩkagĩra ũira wa andũ, ũira wa Ngai nĩ mũnene makĩria. Nĩ gũkorũo ũyũ nĩguo ũira ũrĩa Ngai arutaga, ũira wĩgiĩ Mũrũ wake. 10 Mũndũ ũrĩa wĩtĩkĩtie Mũrũ wa Ngai, arĩ na ũira ũcio thĩinĩ wake. Mũndũ ũrĩa ũtetĩkĩtie Ngai amũtuĩte mũheenania, nĩ gũkorũo ndetĩkĩtie ũira ũrĩa Ngai arutaga wĩgiĩ Mũrũ wake. 11 Na ũira ũcio nĩ atĩ, Ngai nĩ aatũheire muoyo wa tene na tene, na muoyo ũcio ũrĩ thĩinĩ wa Mũrũ wake. 12 Ũrĩa ũrĩ na ũiguano na Mũriũ arĩ na muoyo ũcio; ũrĩa ũtarĩ na ũiguano na Mũrũ wa Ngai ndarĩ na muoyo ũcio.
13 Ndamwandĩkĩra maũndũ maya nĩ getha mũmenye atĩ mũrĩ na muoyo wa tene na tene, inyuĩ arĩa mũrĩ na wĩtĩkio harĩ rĩĩtwa rĩa Mũrũ wa Ngai. 14 Na ũyũ nĩguo ũũma ũrĩa tũkoragwo naguo harĩ we, atĩ tũngĩhoya ũndũ o na ũrĩkũ kũringana na wendi wake, nĩ atũiguaga. 15 Na angĩkorũo nĩ tũĩ atĩ nĩ atũiguaga twamũhoya ũndũ o na ũrĩkũ-rĩ, nĩ tũĩ atĩ nĩ tũkũheo indo iria tũhoyaga, nĩ gũkorũo nĩ tũmũhoete.
16 Mũndũ o wothe angĩona mũrũ wa Ithe agĩka mehia matangĩrehe gĩkuũ, nĩ amũhoere Ngai, na Ngai nĩ ekũmũhe muoyo. Ũndũ ũcio ũhutĩtie arĩa matekaga mehia marĩa marehaga gĩkuũ. Nĩ kũrĩ mehia marehaga gĩkuũ. Ti ũhoro wĩgiĩ mehia ta macio ndĩrera mũndũ ũcio amũhoere. 17 Maũndũ mothe matarĩ ma ũthingu nĩ mehia, no nĩ kũrĩ mehia matarehaga gĩkuũ.
18 Nĩ tũĩ atĩ mũndũ o wothe uumanĩte na Ngai ndamenyeraga kwĩhia, no ũcio umanĩte na Ngai* nĩ amũroraga, na ũrĩa mũru ndangĩhota kũmwĩka ũũru. 19 Nĩ tũĩ atĩ tumanĩte na Ngai, no thĩ yothe ĩtongoragio nĩ ũrĩa mũru. 20 No nĩ tũĩ atĩ Mũrũ wa Ngai nĩ okĩte, na nĩ atũheete ũtaũku nĩguo tũgĩe na ũmenyo wĩgiĩ Ũrĩa wa ma. Na tũrĩ na ũiguano na ũcio wa ma, kũgerera Mũrũ wake Jesu Kristo. Ũcio nĩwe Ngai ũrĩa wa ma na muoyo wa tene na tene. 21 Twana tũtũ, mwĩthemei mĩhianano.