1 Johana
4 Endwa akwa, mũtigetĩkagie ũhoro wa roho o wothe, no ũthuthuragiei nĩguo mũmenye kana umanĩte na Ngai, nĩ gũkorũo nĩ kũgĩte na anabii aingĩ a maheeni thĩinĩ wa thĩ.
2 Ũũ nĩguo mũrĩmenyaga kana ũhoro wa roho umĩte kũrĩ Ngai: Ũhoro o wothe wa roho, ũrĩa umbũraga atĩ Jesu Kristo nĩ okĩte arĩ na mwĩrĩ wa nyama, umĩte kũrĩ Ngai. 3 Ũhoro o wothe wa roho ũtoimbũraga Jesu, ndumanĩte na Ngai. Makĩria ma ũguo, ũcio nĩguo ũhoro wa thũ ya Kristo, ũrĩa mũiguĩte atĩ nĩ ũngĩgooka, na rĩu ũrĩ thĩinĩ wa thĩ.
4 Twana tũtũ, inyuĩ mumanĩte na Ngai, na nĩ mũmatooretie, nĩ gũkorũo ũrĩa ũrĩ hamwe na inyuĩ nĩ mũnene gũkĩra ũrĩa ũrĩ hamwe na thĩ. 5 Acio moimanĩte na thĩ; nĩkĩo maragia maũndũ marĩa moimanĩte na thĩ, nayo thĩ nĩ ĩmathikagĩrĩria. 6 Ithuĩ tumanĩte na Ngai. Mũndũ o wothe ũmenyaga Ngai nĩ atũthikagĩrĩria; mũndũ o wothe ũtoimanĩte na Ngai ndatũthikagĩrĩria. Ũndũ ũcio nĩguo ũtũteithagia gũkũũrana ũhoro wa roho wa ma kuuma harĩ ũhoro wa roho wa maheeni.
7 Endwa akwa, nĩ tũthiĩi na mbere kwendana, tondũ wendo uumaga kũrĩ Ngai, na mũndũ o wothe wendanaga oimanĩte na Ngai na nĩ oĩ Ngai. 8 Mũndũ o wothe ũtendanaga ndamenyete Ngai, nĩ gũkorũo Ngai nĩ wendo. 9 Wendo wa Ngai waguũririo ũhoro-inĩ witũ na njĩra ĩno, atĩ Ngai nĩ aatũmire Mũrũ wake wa mũmwe gũkũ thĩ nĩguo tũgĩe na muoyo kũgerera harĩ we. 10 Wendo ũcio ũtariĩ ũũ, ti atĩ nĩ ithuĩ tweendire Ngai, no nĩwe watwendire na agĩtũma Mũrũ wake arĩ igongona rĩa ũiguano nĩ ũndũ wa mehia maitũ.
11 Endwa akwa, angĩkorũo ũguo nĩguo Ngai aatwendire-rĩ, o na ithuĩ nĩ twagĩrĩirũo kwendanaga. 12 Gũtirĩ mũndũ ũrĩ wona Ngai o na rĩ. Tũngĩthiĩ na mbere kwendana, Ngai egũikara hamwe na ithuĩ na wendo wake ũkinyanĩre thĩinĩ witũ. 13 Kũgerera ũndũ ũyũ nĩ tũmenyaga atĩ tũraikara tũrĩ na ũiguano hamwe nake, nake agaikara arĩ na ũiguano hamwe na ithuĩ, tondũ nĩ atũheete roho wake. 14 Makĩria ma ũguo-rĩ, ithuĩ ene nĩ tuonete na nĩ tũrutaga ũira atĩ Ithe witũ nĩ atũmĩte Mũrũwe oke arĩ Mũhonokia wa thĩ. 15 Mũndũ o wothe umbũraga atĩ Jesu nĩ Mũrũ wa Ngai, Ngai aikaraga arĩ na ũiguano na mũndũ ũcio, nake agaikara arĩ na ũiguano hamwe na Ngai. 16 Na nĩ tũmenyete na tũgetĩkia atĩ Ngai nĩ atwendete.
Ngai nĩ wendo, na mũndũ ũrĩa wendanaga aikaraga arĩ na ũiguano hamwe na Ngai, nake Ngai agaikara arĩ na ũiguano hamwe nake. 17 Ũguo nĩguo tuonetio wendo na njĩra nginyanĩru, nĩ getha tũgaakorũo na wĩyathi wa kwaria mũthenya wa cira, nĩ gũkorũo o ta ũrĩa ũcio atariĩ, noguo o na ithuĩ tũtariĩ thĩinĩ wa thĩ ĩno. 18 Wendo ndũrĩ guoya, ĩndĩ wendo ũrĩa mũkinyanĩru nĩ ũingataga guoya, tondũ guoya nĩ ũtũgiragĩrĩria. Mũndũ ũrĩa ũkoragwo na guoya ndarĩ wendo na njĩra nginyanĩru. 19 Ithuĩ tuonanagia wendo tondũ we nĩ aambire gũtwenda.
20 Mũndũ angiuga, “Nĩ nyendete Ngai,” na akorũo nĩ athũire mũrũ wa Ithe, ũcio nĩ wa maheeni. Nĩ gũkorũo mũndũ ũrĩa ũtendete mũrũ wa Ithe, ũcio onete, ndangĩhota kwenda Ngai, ũcio atarĩ ona. 21 Ningĩ tũrĩ na rĩathani rĩrĩ kuuma kũrĩ we, atĩ mũndũ o wothe wendete Ngai no mũhaka ende mũrũ wa Ithe.