Kũguũrĩrio
2 “Kũrĩ mũraika wa kĩũngano kĩa Efeso andĩka atĩrĩ: Maya nĩmo maũndũ marĩa ekuuga ũcio ũnyitĩte njata iria mũgwanja na guoko gwake kwa ũrĩo na agathiaga arĩ gatagatĩ-inĩ ka mĩtĩ ĩrĩa mũgwanja ya thahabu ya kũigĩrĩrũo matawa: 2 ‘Nĩ njũĩ ciĩko ciaku, na kĩyo o na ũkirĩrĩria waku, na atĩ ndũrekagĩrĩria andũ oru, na nĩ ũthuthuragia arĩa moigaga atĩ nĩ atũmwo, no tiguo marĩ, na ũkona nĩ aheenania. 3 Ningĩ nĩ wonanagia ũkirĩrĩria na ũkomĩrĩria maũndũ maingĩ nĩ ũndũ wa rĩĩtwa rĩakwa na ndũrĩ worũo nĩ hinya. 4 O na kũrĩ ũguo, ũndũ ũrĩa ngũgũcuukĩra nĩ ũyũ, atĩ nĩ ũtigĩte wendo ũrĩa warĩ naguo kĩambĩrĩria-inĩ.
5 “‘Nĩ ũndũ ũcio ririkana harĩa uumĩte ũkagwa, na wĩrire na wĩke ciĩko iria wekaga kĩambĩrĩria-inĩ. No ũngĩaga gwĩka ũguo-rĩ, nĩ ngũũka kũrĩ wee, na njeherie mũtĩ waku wa kũigĩrĩrũo matawa handũ haguo, o tiga wĩririre. 6 No ningĩ-rĩ, ũrĩ na ũndũ ũyũ mwega: atĩ nĩ ũthũire ciĩko cia nyamũkano ya Nikolai, iria o na niĩ thũire. 7 Ũrĩa ũrĩ gũtũ nĩ aigue ũrĩa roho ũrera ciũngano: Ũrĩa ũgũtooria nĩ ngaamwĩtĩkĩria arĩe maciaro ma mũtĩ wa muoyo ũrĩa ũrĩ thĩinĩ wa paradiso ya Ngai.’
8 “Na kũrĩ mũraika wa kĩũngano gĩa Simurina andĩka atĩrĩ: Maya nĩmo maũndũ marĩa ekuuga, ‘ũrĩa wa Mbere na wa Mũthia,’ o ũcio wakuire na agĩcokio muoyo: 9 ‘Nĩ njũĩ mĩnyamaro na thĩna waku—no ũrĩ gĩtonga—na irumi iria ũrumagwo nĩ arĩa meĩtaga Ayahudi na tiguo marĩ kũna, ĩndĩ makoragwo marĩ thunagogi ya Shaitani. 10 Ndũgetigĩre maũndũ marĩa ũkũnyarirũo namo. Atĩrĩrĩ, Mũcukani nĩ arĩikagia amwe anyu njera nĩguo mũgerio biũ, na nĩ mũgũkorũo na mĩnyamaro ihinda rĩa thikũ ikũmi. Ikara ũrĩ mwĩhokeku nginya gĩkuũ, na nĩ ngaakũhe thũmbĩ ya muoyo. 11 Ũrĩa ũrĩ gũtũ nĩ aigue ũrĩa roho ũrera ciũngano: Mũndũ ũrĩa ũgũtooria ndarĩ hĩndĩ agekwo ũndũ nĩ gĩkuũ kĩrĩa gĩa kerĩ.’
12 “Kũrĩ mũraika wa kĩũngano kĩrĩa kĩrĩ Perigamo andĩka atĩrĩ: Maya nĩmo maũndũ marĩa ekuuga ũcio ũrĩ na rũhiũ rwa njora rũraihu na rũũgĩ rũnoretwo mĩena yerĩ: 13 ‘Nĩ njũĩ kũrĩa ũtũũraga, ũguo nĩ kuuga, kũrĩa gĩtĩ kĩa ũnene gĩa Shaitani kĩrĩ; ĩndĩ no ũrũmĩtie rĩĩtwa rĩakwa, na ndũigana gũkaana wĩtĩkio waku harĩ niĩ o na matukũ-inĩ ma Antipasi mũira wakwa mwĩhokeku, ũrĩa woragĩirũo kũu kwanyu, o kũu Shaitani atũũraga.
14 “‘No rĩrĩ, ndĩ na maũndũ manini ngũgũcuukĩra, atĩ ũrĩ na andũ kũu marũmagĩrĩra ũrutani wa Balaamu, o ũcio warutire Balaki kũigĩra ciana cia Isiraeli mũhĩnga, nĩguo irĩe indo irutĩirũo mĩhianano igongona na ciĩingĩrie thĩinĩ wa ngomanio itagĩrĩire.* 15 O taguo, ningĩ ũrĩ na andũ kũu marũmagĩrĩra ũrutani wa nyamũkano ya Nikolai. 16 Kwoguo wĩrire. Ũngĩaga kwĩrira, nĩ ngũũka o narua, na nĩ ngũrũa nao ngĩhũthĩra rũhiũ rũraihu rũrĩa rũrĩ kanua-inĩ gakwa.
17 “‘Ũrĩa ũrĩ gũtũ nĩ aigue ũrĩa roho ũrera ciũngano: Mũndũ ũrĩa ũgũtooria nĩ ngaamũhe mana mamwe marĩa mahithe, na ndĩmũhe kahiga ka rangi mwerũ, kandĩkĩtwo rĩĩtwa rĩerũ rĩrĩa gũtarĩ mũndũ ũngĩ ũngĩrĩmenya o tiga ũcio wakamũkĩra.’
18 “Kũrĩ mũraika wa kĩũngano gĩa Thuatira andĩka atĩrĩ: Maya nĩmo maũndũ marĩa Mũrũ wa Ngai ekuuga, ũrĩa ũrĩ maitho matariĩ ta rũrĩrĩmbĩ rwa mwaki na makinya mahaana gĩcango kĩrĩa kĩega: 19 ‘Nĩ njũĩ ciĩko ciaku, na wendo na wĩtĩkio na ũtungata na ũkirĩrĩria waku, na atĩ ciĩko ciaku cia thutha-inĩ nĩ ikĩrĩte iria wekire kĩambĩrĩria-inĩ.
20 “‘No rĩrĩ, ũndũ ũyũ nĩguo ngũgũcuukĩra, atĩ nĩ ũrekagĩrĩria mũtumia ũrĩa wĩtagwo Jezebeli, ũcio wĩĩtaga mũnabii, na akarutana na akahĩngĩca ndungata ciakwa nĩguo ciĩingĩrie thĩinĩ wa ngomanio itagĩrĩire* na irĩe indo irutĩirũo mĩhianano igongona. 21 Na nĩ ndamũheire ihinda erire, no ndendaga kwĩrira ciĩko ciake cia ngomanio itagĩrĩire.* 22 Atĩrĩrĩ, ndĩ hakuhĩ kũmũhũũra na mũrimũ mũru, nao arĩa mekaga ũtharia nake ndũme magĩe na thĩna mũnene, o tiga meririre ciĩko icio ciake. 23 Na nĩ ngũũraga ciana ciake na mahũũra moru, nĩguo ciũngano ciothe imenye atĩ nĩ niĩ thuthuragia meciria marĩa ma thĩinĩ mũno o hamwe na ngoro, na inyuĩ nĩ ngaamũrĩha o mũndũ kũringana na ciĩko ciake.
24 “‘O na kũrĩ ũguo, inyuĩ acio angĩ mũrĩ Thuatira, inyuĩ mũtarũmagĩrĩra ũrutani ũcio, o inyuĩ mũtarĩ mwamenya marĩa metagwo “maũndũ marikĩru ma Shaitani,” ngũmwĩra atĩrĩ: Ndirĩ mũrigo ũngĩ o na ũmwe ngũmũigĩrĩra. 25 O na kũrĩ ũguo, thiĩi na mbere kũrũmia kĩrĩa mũrĩ nakĩo nginya njũke. 26 Na mũndũ ũrĩa ũgũtooria na arũmĩrĩre ciĩko ciakwa nginya mũthia, nĩ ngaamũhe wathani igũrũ rĩa ndũrĩrĩ, 27 nake nĩ akaarĩithagia andũ na rũthanju rwa kĩgera nĩguo amanange o ta indo cia rĩũmba ciunangĩtwo tũcunjĩ tũcunjĩ, o ta ũrĩa nyamũkĩrĩte wathani kuuma kũrĩ Awa. 28 Na nĩ ngaamũhe njata ĩrĩa ya rũcinĩ. 29 Ũrĩa ũrĩ gũtũ nĩ aigue ũrĩa roho ũrera ciũngano.’