Ayubu
29 Ayubu agĩthiĩ na mbere kwaria* akiuga atĩrĩ:
2 “Na arĩ korũo ndariĩ ta ũrĩa ndatariĩ mĩeri ĩrĩa mĩhĩtũku,
Matukũ-inĩ marĩa Ngai aanũmbũyagia,
3 Hĩndĩ ĩrĩa aarekaga tawa wake ũmũrĩke igũrũ rĩa mũtwe wakwa,
Rĩrĩa ndathiagĩra nduma-inĩ mũrĩkĩirũo nĩ ũtheri wake,+
4 Hĩndĩ ĩrĩa* ndagaacĩrĩte biũ,
Rĩrĩa ũrata wakwa na Ngai warehaga irathimo hema-inĩ yakwa,+
5 Rĩrĩa Mwene-Hinya-Wothe aarĩ o hamwe na niĩ,
Na ciana* ciakwa ciothe ikandigicĩria,
6 Rĩrĩa tũcĩra twakwa twaiyũraga thiagĩ,
Na mahiga makanjikũrũkĩria tũrũũĩ twa maguta.+
7 Hĩndĩ ĩrĩa ndathiaga kĩhingo-inĩ gĩa itũũra+
Na ngaikara thĩ kĩhaaro-inĩ kĩa mũingĩ,+
8 Anake maanyonaga makehera njĩra,*
Na nginya athuri akũrũ maarũgamaga na magaikara marũngiĩ.+
9 Anene nĩ meegiragĩrĩria kwaria;
Makahumbĩra tũnua twao na guoko.
10 Mĩgambo ya andũ arĩa marĩ igweta ndĩaiguĩkaga;
Nĩmĩ ciao cianyitanĩte na mwena wa igũrũ wa tũnua twao.
11 Mũndũ wothe waiguaga ũhoro wakwa aaragia wega igũrũ rĩakwa,
Nao andũ arĩa maanyonaga makaruta ũira mwega ũnjĩgiĩ.
12 Nĩ gũkorũo nĩ ndateithagia athĩni arĩa maahoyaga ũteithio,+
O hamwe na mwana ũtaarĩ na ithe na mũndũ o wothe ũtaarĩ na wa kũmũteithia.+
14 Ndehumbaga ũthingu ta nguo;
Nakĩo kĩhooto gĩakwa gĩatariĩ ta kanjũ* na kĩremba.
15 Ndatuĩkĩte maitho harĩ atumumu
Na magũrũ harĩ arĩa maathuaga.
17 Nĩ ndoinaga thĩa cia mũndũ ũrĩa wekaga maũndũ moru+
Na ngathara mũndũ ũrĩa wakoragwo magego-inĩ make.
18 Ndoigaga atĩrĩ, ‘Niĩ ngaakuĩra gwakwa mũciĩ,*+
Na matukũ makwa magaakorũo marĩ maingĩ o ta mũthanga wa iria-inĩ.
19 Mĩri yakwa ĩgaatherema o nginya maĩ-inĩ,
Na ime rĩkaararaga honge-inĩ ciakwa.
20 Riri wakwa ũikaraga ũkĩerũhagio,
Naguo ũta ũrĩa ũrĩ guoko-inĩ gwakwa ũgũtũũra ũrathaga.’
21 Andũ maathikagĩrĩria mageterera njarie,
Magakira nĩguo maigue ũtaaro wakwa.+
22 Ndarĩkia kwaria, matiakoragwo na ũndũ ũngĩ wa kuuga;
Ciugo ciakwa ciatonyaga* matũ-inĩ mao irĩ hooreru.
23 Maanjetagĩrĩra ta ũrĩa andũ metagĩrĩra mbura;
Maathamagia tũnua twao biũ ta metereire mbura ĩrĩa ya kũrigĩrĩria.+
24 Hĩndĩ ĩrĩa ndamathekia, matietĩkagia;
Ũtheri wa ũthiũ wakwa nĩ wamaheaga mwĩhoko.*