Marũa ma Mbere Kũrĩ Akorintho
10 Na rĩu ariũ a Ithe witũ, ngwenda mũmenye atĩ maithe maitũ ma tene othe maarĩ rungu rwa itu+ na othe nĩ maatuĩkanĩirie iria-inĩ+ 2 na othe nĩ maabatithirio magĩtuĩka arũmĩrĩri a Musa kũgerera itu rĩu na iria, 3 na othe maarĩaga irio o imwe cia kĩĩroho+ 4 na othe maanyuaga maĩ o mamwe ma kĩĩroho.+ Nĩ gũkorũo maanyuaga kuuma rwaro-inĩ rwa ihiga rwa kĩĩroho rũrĩa rwamarũmagĩrĩra, na rwaro rũu rwa ihiga rwarĩ Kristo.+ 5 O na kũrĩ ũguo, Ngai ndaakenirio nĩ aingĩ ao, nĩ gũkorũo nĩ maaniinĩirũo werũ-inĩ.+
6 Rĩu-rĩ, maũndũ macio maatuĩkire cionereria harĩ ithuĩ, nĩguo tũtikerirĩrie maũndũ moru, ta ũrĩa acio maamerirĩirie.+ 7 O na tũtikanatuĩke ahoi mĩhianano ta ũrĩa amwe ao meekire; o ta ũrĩa kwandĩkĩtwo atĩrĩ: “Andũ acio magĩikara thĩ kũrĩa na kũnyua. Magĩcoka magĩũkĩra nĩguo mekenie.”+ 8 O na tũtikeingĩrie thĩinĩ wa ngomanio itagĩrĩire* ta ũrĩa amwe ao meeingĩririe ngomanio-inĩ itagĩrĩire,* na nĩ ũndũ ũcio andũ 23,000 gatagatĩ-inĩ kao magĩkua mũthenya ũmwe.+ 9 O na tũtikanagerie Jehova*+ ta ũrĩa amwe ao maamũgeririe, na nĩ ũndũ ũcio makĩniinwo nĩ nyoka.+ 10 O na tũtigatuĩke andũ a kũnuguna ta ũrĩa amwe ao maanugunire,+ na nĩ ũndũ ũcio makĩniinwo nĩ mũniinani.+ 11 Maũndũ macio meekĩkire harĩ o marĩ cionereria, na makĩandĩkwo marĩ mũkaana harĩ ithuĩ+ arĩa tũkinyĩrĩirũo nĩ mĩico ya mĩtabarĩre ya maũndũ.
12 Nĩ ũndũ ũcio-rĩ, mũndũ ũrĩa wĩciragia atĩ nĩ arũgamĩte nĩ emenyagĩrĩre ndakae kũgwa.+ 13 Gũtirĩ igerio rĩmũkorete tiga o marĩa makoraga andũ.+ No Ngai nĩ mwĩhokeku, na ndangĩreka mũgerio gũkĩra ũrĩa mũngĩhota gwĩtiiria,+ no hĩndĩ ya igerio nĩ arĩmũheaga njĩra ya kuumĩrĩra nĩguo mũkahota kũrĩkirĩrĩria.+
14 Nĩ ũndũ ũcio endwa akwa, ũragĩrai ũhoi mĩhianano.+ 15 Ndĩraria na andũ marĩ na ũtaũku; tuai arĩ inyuĩ ũrĩa ndĩroiga. 16 Gĩkombe gĩa kĩrathimo kĩrĩa tũrathimaga-rĩ, na githĩ ti kũnyitanĩra harĩ thakame ya Kristo?+ Naguo mũgate ũrĩa twenyũrangaga-rĩ, na githĩ ti kũnyitanĩra harĩ mwĩrĩ wa Kristo?+ 17 Na tondũ mũgate nĩ ũmwe-rĩ, ithuĩ o na gũtuĩka tũrĩ aingĩ, tũrĩ mwĩrĩ ũmwe,+ nĩ ũndũ ithuothe tũrĩaga mũgate o ũcio ũmwe.
18 Ta rorai Isiraeli na njĩra ya kĩĩmwĩrĩ: Na githĩ arĩa marĩaga magongona matinyitanagĩra na kĩgongona?+ 19 Nĩ ũndũ ũcio-rĩ, hihi ndĩrenda kuuga atĩa? Hihi ndĩrenda kuuga atĩ kĩndũ kĩrĩa kĩrutĩirũo mũhianano kĩrĩ igongona nĩ kĩa bata, kana atĩ mũhianano nĩ wa bata? 20 Aca; no ndĩrenda kuuga atĩ kĩrĩa ndũrĩrĩ irutaga igongona, irutagĩra ndaimono no ti Ngai;+ na ndikwenda inyuĩ mũnyitanagĩre na ndaimono.+ 21 Mũtingĩkorũo mũkĩnyuĩra gĩkombe kĩa Jehova* na gĩkombe kĩa ndaimono; mũtingĩkorũo mũkĩrĩĩra “metha-inĩ ya Jehova”*+ na metha-inĩ ya ndaimono. 22 Kana hihi ‘nĩ Jehova* tũrenda gũtũma aigue ũiru’?+ Kaĩ tũrĩ na hinya kũmũkĩra?
23 Maũndũ mothe nĩ metĩkĩrĩtio nĩ watho, no ti maũndũ mothe marĩ ũguni. Maũndũ mothe nĩ metĩkĩrĩtio nĩ watho, no ti maũndũ mothe ma gwaka.+ 24 Mũndũ o wothe nĩ acaragie, ti maũndũ ma kwĩguna we mwene, no marĩa ma kũguna mũndũ ũrĩa ũngĩ.+
25 Rĩagai kĩndũ o gĩothe kĩrĩa kĩendagio thoko-inĩ ya nyama, mũtekũũrĩrĩria ũhoro wakĩo nĩ ũndũ wa thamiri cianyu, 26 nĩ gũkorũo “thĩ nĩ ya Jehova,* o na kĩrĩa gĩothe kĩrĩ thĩinĩ wayo.”+ 27 Mũndũ ũtarĩ mwĩtĩkia angĩmũnyita ũgeni na mũkorũo nĩ mũrenda gũthiĩ, rĩagai kĩndũ o gĩothe kĩrĩa kĩaigwo mbere yanyu, mũtekũũrĩrĩria ũhoro wakĩo nĩ ũndũ wa thamiri cianyu. 28 No mũndũ angĩmwĩra atĩrĩ, “Kĩndũ gĩkĩ kĩrutĩtwo kĩrĩ igongona,” mũtikarĩe, tondũ wa mũndũ ũcio wamwĩra na tondũ wa thamiri.+ 29 Ndirenda kuuga thamiri yaku, no nĩ thamiri ya mũndũ ũcio ũngĩ. Tondũ rĩrĩ, wĩyathi wakwa ũngĩgĩtuĩrũo nĩ thamiri ya mũndũ ũngĩ nĩkĩ?+ 30 Angĩkorũo ndĩrarĩa ndĩ na ngatho-rĩ, nĩ kĩĩ kĩngĩtũma njambio tondũ wa kĩrĩa ndĩracokia ngatho nĩ ũndũ wakĩo?+
31 Nĩ ũndũ ũcio-rĩ, kana nĩ kũrĩa mũrarĩa, kana nĩ kũnyua, kana nĩ ũndũ ũngĩ o wothe mũreka-rĩ, ĩkagai maũndũ mothe nĩguo mũgoocithie Ngai.+ 32 Tigagai gũtuĩka mĩhĩnga harĩ Ayahudi o hamwe na Angiriki na harĩ kĩũngano kĩa Ngai,+ 33 o ta ũrĩa ndĩrageria gũkenia andũ othe maũndũ-inĩ mothe, itegũcaria ũrĩa ingĩĩguna niĩ mwene,+ o tiga ũrĩa andũ aingĩ mangĩgunĩka, nĩguo mahonokio.+