Ũhoro Mwega Ũrĩa Waandĩkirũo nĩ Mariko
5 Magĩcoka makĩringa mũrĩmo ũcio ũngĩ wa iria gĩcigo-inĩ kĩa Agerasi.+ 2 Na rĩrĩa Jesu ooimire gatarũ-inĩ, o rĩo mũndũ warĩ na roho mũũru agĩũka kũrĩ we oimĩte mbĩrĩra-inĩ.* 3 Mũndũ ũcio aaikaraga kũu mbĩrĩra-inĩ, na nginyagia hĩndĩ ĩyo, gũtirĩ mũndũ o na ũmwe wahotete kũmuoha biũ, nginya na mũnyororo. 4 Nĩ oohagwo kaingĩ na bĩngũ na mĩnyororo, ĩndĩ agatua bĩngũ icio na agatuuanga mĩnyororo ĩyo; na gũtirĩ mũndũ warĩ na hinya wa kũmũtooria. 5 Na rĩrĩ, aatũũraga akayaga kũu mbĩrĩra-inĩ na irĩma-inĩ ũtukũ na mũthenya agĩĩtihangagia na mahiga. 6 No rĩrĩa oonire Jesu arĩ haraya, agĩtengʼera na akĩmũinamĩrĩra.+ 7 Agĩcoka akĩanĩrĩra na mũgambo mũnene akiuga: “Tũrorania kĩĩ nawe, Jesu, Mũrũ wa Ngai Ũrĩa ũrĩ Igũrũ Mũno? Ndakwĩhĩtithia mbere ya Ngai ndũkae kũũnyarira.”+ 8 Nĩ gũkorũo Jesu aawĩraga ũũ: “Uma thĩinĩ wa mũndũ ũyũ, wee roho ũyũ mũũru.”+ 9 No akĩũria mũndũ ũcio ũũ: “Wĩtagwo atĩa?” Nake akĩmũcokeria: “Njĩtagwo Mbũtũ, tondũ tũrĩ aingĩ.” 10 Na agĩthaitha Jesu mũno ndakaingate maroho macio kuuma bũrũri-inĩ ũcio.+
11 Na rĩrĩ, nĩ kwarĩ na rũũru rũnene rwa ngũrũe+ rwarĩaga kũu kĩrĩma-inĩ.+ 12 Nĩ ũndũ ũcio maroho macio makĩmũthaitha makĩmwĩra ũũ: “Twĩtĩkĩrie tũthiĩ tũingĩre thĩinĩ wa ngũrũe iria.” 13 Nake akĩmetĩkĩria. Namo maroho macio moru magĩkiuma na magĩthiĩ makĩingĩra thĩinĩ wa ngũrũe icio, naruo rũũru rũu rũgĩtengʼera kĩharũrũka-inĩ rũkĩgwa thĩinĩ wa iria, ngũrũe ta 2,000, igĩkuĩra iria-inĩ. 14 No arĩithi a cio makĩũra na magĩthiĩ makĩheana ũhoro ũcio itũũra-inĩ na mĩgũnda-inĩ, nao andũ magĩũka kuona ũrĩa gwekĩkĩte.+ 15 Nĩ ũndũ ũcio magĩkinya harĩ Jesu, na makĩona mũndũ ũcio warĩ na ndaimono, o we ũcio warĩ na mbũtũ ĩyo, aikarĩte thĩ ehumbĩte nguo na arĩ mũhonu meciria, na magĩĩtigĩra mũno. 16 Ningĩ arĩa meeyoneire maũndũ macio makĩmaganĩra ũrĩa gwekĩkĩte harĩ mũndũ ũcio warĩ na ndaimono na harĩ ngũrũe. 17 Nĩ ũndũ ũcio makĩambĩrĩria gũthaitha Jesu oime kũu gĩcigo-inĩ kĩao.+
18 Na rĩrĩa aaingĩraga thĩinĩ wa gatarũ, mũndũ ũcio warĩ na ndaimono akĩmũthaitha mathiĩ nake.+ 19 No rĩrĩ, Jesu ndaamwĩtĩkĩririe no aamwĩrire ũũ: “Inũka kũrĩ andũ anyu, na ũmeere maũndũ mothe marĩa Jehova* agwĩkĩire na tha iria akuonetie.” 20 Mũndũ ũcio agĩthiĩ na akĩambĩrĩria kũmenyithania ũhoro kũu Dekapoli* wĩgiĩ maũndũ mothe marĩa Jesu aamwĩkĩire, na andũ othe makĩgega.
21 Thutha wa Jesu gũcoka na gatarũ mũrĩmo ũcio ũngĩ wa iria, kĩrĩndĩ kĩnene gĩkĩũngana harĩ we, na aarĩ rũteere-inĩ rwa iria.+ 22 Mũrũgamĩrĩri ũmwe wa thunagogi wetagwo Jairo agĩũka, na thutha wa kuona Jesu, akĩĩgũithia thĩ magũrũ-inĩ make.+ 23 Na akĩmũthaitha maita maingĩ, akĩmwĩra: “Kairĩtu gakwa nĩ karwaru mũno.* Ndagũthaitha, ũka ũgakaigĩrĩre moko+ nĩguo kahone gatũũre muoyo.” 24 Nĩ ũndũ ũcio Jesu agĩthiĩ hamwe nake, na kĩrĩndĩ kĩnene gĩkĩmũrũmĩrĩra na gĩkahatĩkanĩra harĩ we.
25 Na rĩrĩ, nĩ haarĩ na mũtumia watũũraga oiraga thakame+ mĩaka 12.+ 26 Nĩ aanyamarĩkĩte mũno moko-inĩ ma ndagĩtarĩ aingĩ na agakorũo ahũthĩrĩte indo ciake ciothe no ndaateithĩkĩte, ĩndĩ no kwĩhĩrũo eehagĩrũo. 27 Rĩrĩa aaiguire ũhoro wĩgiĩ Jesu, agĩthiĩ thutha wake arĩ kĩrĩndĩ-inĩ na akĩhutia nguo yake ya igũrũ,+ 28 tondũ eeĩraga na ngoro ũũ: “Ingĩhutia o nguo ciake cia igũrũ tu, nĩ ngũhona.”+ 29 Na o hĩndĩ ĩyo agĩtiga kuura, na akĩigua mwĩrĩ-inĩ wake ahona mũrimũ ũcio mũũru.
30 Na o hĩndĩ ĩyo Jesu akĩigua harĩ hinya+ woima thĩinĩ wake, na akĩhũgũkĩra kĩrĩndĩ akĩũria: “Nũũ wahutia nguo ciakwa cia igũrũ?”+ 31 No arutwo ake makĩmũũria atĩrĩ: “Ũrona kĩrĩndĩ gĩkĩhatĩkanĩra harĩ wee, na ũkoria, ‘Nũũ wahutia?’” 32 O na kũrĩ ũguo, nĩ aaroraga mĩena yothe nĩguo one nũũ wekĩte ũguo. 33 Tondũ mũtumia ũcio nĩ aamenyaga ũrĩa gwathiĩte, agĩthiĩ amakĩte na akĩinainaga akĩĩgũithia mbere yake na akĩmwĩra ũhoro wothe. 34 Nake akĩmwĩra atĩrĩ: “Mwarĩ ũyũ, wĩtĩkio waku nĩ watũma ũhone. Thiĩ na thayũ,+ na ndũkanathĩnio nĩ mũrimũ ũcio mũũru rĩngĩ.”+
35 Na o hĩndĩ ĩyo aaragia, hagĩũka andũ moimĩte mũciĩ kwa mũrũgamĩrĩri ũcio wa thunagogi makĩmwĩra: “Kairĩtu gaku nĩ gakuire! Ũgũgĩthĩnia Mũrutani rĩngĩ nĩkĩ?”+ 36 No Jesu akĩigua ũrĩa mooigaga na akĩra mũrũgamĩrĩri ũcio wa thunagogi ũũ: “Ndũgetigĩre,* no gĩa na wĩtĩkio.”+ 37 Na rĩrĩ, ndeetĩkĩririe mũndũ o na ũrĩkũ amũrũmĩrĩre tiga Petero, Jakubu, na Johana mũrũ wa nyina na Jakubu.+
38 Nĩ ũndũ ũcio magĩkinya nyũmba ya mũrũgamĩrĩri ũcio wa thunagogi, na agĩkora kũrĩ na gĩcanjama andũ magĩcakaya, makĩrĩraga manĩrĩire.+ 39 Thutha wa kũingĩra, akĩmoria atĩrĩ: “Kĩrĩro gĩkĩ na gĩcanjama nĩ cia kĩ? Mwana ũcio ndakuĩte ĩndĩ nĩ gũkoma akomete.”+ 40 Maigua ũguo, makĩambĩrĩria kũmũthekerera na kĩnyũrũri. No thutha wa kũmeera moime nja othe, akĩoya ithe wa mwana ũcio na nyina na acio maarĩ nake, magĩthiĩ harĩa mwana ũcio aarĩ. 41 Agĩcoka akĩnyita mwana ũcio guoko, akĩmwĩra ũũ: “Talitha kumi,” ciugo icio ciataũrũo ciugaga ũũ: “Kairĩtu, ndakwĩra atĩrĩ, ũkĩra!”+ 42 Na o rĩo kairĩtu kau gagĩũkĩra na gakĩambĩrĩria gwĩtwara. (Kaarĩ ka mĩaka 12.) Na o hĩndĩ ĩyo arĩa maarĩ ho magĩkena mũno. 43 No we akĩmaatha rĩngĩ na rĩngĩ* matikareke mũndũ o na ũrĩkũ amenye ũhoro ũcio,+ na akĩmeera mahe kairĩtu kau kĩndũ gĩa kũrĩa.