Ũhoro Mwega Ũrĩa Waandĩkirũo nĩ Mathayo

12 Ihinda-inĩ rĩu Jesu akiumagara agĩtuĩkanĩria mĩgũnda-inĩ ya ngano mũthenya wa Thabatũ. Nao arutwo ake makĩhũta makĩambĩrĩria gũtua igira cia ngano makĩrĩaga.+ 2 Rĩrĩa Afarisai moonire ũguo, makĩmwĩra ũũ: “Ta rora! Arutwo aku mareka ũndũ ũtarĩ mwĩtĩkĩrie gwĩkwo mũthenya wa Thabatũ.”+ 3 Nake akĩmacokeria atĩrĩ: “Kaĩ mũtathomete ũrĩa Daudi eekire rĩrĩa we na arũme arĩa maarĩ nake maarĩ ahũtu?+ 4 Ũrĩa aaingĩrire nyũmba ya Ngai na makĩrĩa mĩgate ya maruta,*+ ĩrĩa we na acio maarĩ nake mateetĩkĩrĩtio kũrĩa, tiga athĩnjĩri-Ngai oiki?+ 5 Kana mũtirĩ mwathoma thĩinĩ wa Watho, atĩ mĩthenya ya Thabatũ athĩnjĩri-Ngai arĩa marĩ hekarũ-inĩ nĩ magararaga Thabatũ na magathiĩ na mbere gũkorũo matarĩ na mahĩtia?+ 6 No ngũmwĩra atĩrĩ, haha harĩ na mũndũ mũnene gũkĩra hekarũ.+ 7 Ĩndĩ, korũo nĩ mũtaũkĩirũo ũũ nĩ kuuga atĩa, ‘Ngwenda tha+ no ti igongona,’+ mũtingĩatuĩra andũ matarĩ na mahĩtia. 8 Nĩ gũkorũo Mũrũ wa mũndũ nĩ Mwathani wa Thabatũ.”+

9 Thutha wa kuuma hau, agĩthiĩ agĩtonya thunagogi-inĩ yao, 10 na rĩrĩ, haarĩ mũndũ warĩ muonju guoko.*+ Nĩ ũndũ ũcio makĩũria Jesu atĩrĩ, “Nĩ kwagĩrĩire kũhonania mũthenya wa Thabatũ?” Meendaga mone ũndũ wa kũmũthitangĩra.+ 11 Nake akĩmacokeria atĩrĩ: “Ũngĩkorũo ũrĩ na ngʼondu ĩmwe na ngʼondu ĩyo ĩgwe irima mũthenya wa Thabatũ-rĩ, nĩ mũndũ ũrĩkũ gatagatĩ-inĩ kanyu ũtangĩmĩnyita na amĩrute kuo?+ 12 Githĩ mũndũ ndakĩrĩ wa bata gũkĩra ngʼondu! Nĩ ũndũ ũcio-rĩ, nĩ kwagĩrĩire gwĩka ũndũ mwega mũthenya wa Thabatũ.” 13 Agĩcoka akĩra mũndũ ũcio ũũ: “Tambũrũkia guoko gwaku.” Nake agĩgũtambũrũkia, nakuo gũkĩhona gũkĩhaana o ta kũu kũngĩ. 14 No Afarisai makiuma nja na makĩmũbangĩra njama ya kũmũũraga. 15 Rĩrĩa Jesu aamenyire ũguo, akiuma kuo. Na andũ aingĩ makĩmũrũmĩrĩra,+ nake akĩmahonia othe, 16 no akĩmahe mũkaana mũrũmu matikamũmenyithanie kũrĩ andũ,+ 17 nĩguo ahingie ciugo iria ciaaririo kũgerera mũnabii Isaia, ũrĩa woigire ũũ:

18 “Ta rora, ndungata yakwa+ ĩrĩa thuurĩte, ĩrĩa nyendete, na nĩ ndĩmĩtĩkĩrĩte!+ Nĩ ngeekĩra roho wakwa thĩinĩ wayo,+ nayo nĩ ĩkaamenyithia ndũrĩrĩ ũrĩa kĩhooto gĩtariĩ. 19 Ndĩgaakorũo na ngarari+ kana yanĩrĩre; na gũtirĩ mũndũ ũkaaigua mũgambo wayo barabara-inĩ iria nene. 20 Ndĩkoina ithanjĩ igonyoku, na ndĩkaahoria rũtambĩ rũratoga,+ o nginya rĩrĩa ĩkaagaacĩrithia kĩhooto. 21 Ndũrĩrĩ nĩ ikaaiga mwĩhoko wacio harĩ rĩĩtwa rĩayo.”+

22 Thutha ũcio makĩmũrehera mũndũ warĩ na ndaimono na aarĩ mũtumumu na bubu, nake akĩmũhonia, mũndũ ũcio warĩ bubu agĩkĩhota kwaria na kuona. 23 Na rĩrĩ, kĩrĩndĩ gĩothe gĩkĩgega na gĩkĩambĩrĩria kuuga atĩrĩ: “To gũkorũo ũyũ nĩwe Mũrũ wa Daudi?” 24 Rĩrĩa Afarisai maaiguire ũguo-rĩ, makiuga ũũ: “Mũndũ ũyũ aingataga ndaimono na hinya wa Beelizebubu,* mũnene wa ndaimono.”+ 25 Amenya ũrĩa meeciragia, akĩmeera atĩrĩ: “Ũthamaki o wothe ũngĩgayũkana no gũthira ũthiraga, na itũũra o rĩothe kana nyũmba ĩngĩgayũkana ndĩngĩrũgama. 26 O ũndũ ũmwe na ũcio, angĩkorũo Shaitani nĩ ekũingata Shaitani-rĩ, nĩ agayũkanĩte; ũthamaki wake ũngĩkĩrũgama atĩa? 27 Ningĩ angĩkorũo nyingataga ndaimono na hinya wa Beelizebubu-rĩ, ariũ anyu macingataga na hinya wa ũ? Kĩu nĩkĩo gĩgaatũma mamũtuĩre ciira. 28 No angĩkorũo nyingataga ndaimono kũgerera roho wa Ngai, Ũthamaki wa Ngai nĩ ũmũhĩtũkĩte.+ 29 Kana mũndũ angĩhota atĩa gũtharĩkĩra nyũmba ya mũndũ ũrĩ na hinya na amũtunye indo ciake tiga ambire kũmuoha? Hĩndĩ ĩyo norĩo angĩhota gũtaha indo iria irĩ nyũmba yake. 30 Ũrĩa wothe ũtarĩ mwena wakwa nĩ kũregana areganaga na niĩ, na ũrĩa wothe ũtacokanagĩrĩria hamwe na niĩ nĩ kũhurunja ahurunjaga.+

31 “Nĩ ũndũ ũcio ngũmwĩra atĩrĩ, andũ nĩ makooherũo mehia o mothe mehagia na irumi o ciothe iria marumanaga, ĩndĩ ũrĩa ũrumaga roho ndakooherũo.+ 32 Kwa ngerekano-rĩ, mũndũ o wothe ũkaaruma Mũrũ wa mũndũ nĩ akooherũo;+ no ũrĩa wothe ũkaaruma roho mũtheru, ndarĩ hĩndĩ akooherũo, mũtabarĩre-inĩ ũyũ wa maũndũ* kana ũrĩa ũgooka.+

33 “Angĩkorũo inyuĩ mũrĩ mũtĩ mwega, maciaro manyu marĩkoragwo marĩ mega, no angĩkorũo mũrĩ mũtĩ mũbuthu, maciaro manyu marĩkoragwo marĩ mabuthu, nĩ gũkorũo mũtĩ ũmenyekaga na maciaro maguo.+ 34 Inyuĩ rũciaro rwa nyoka irĩ thumu,+ mũngĩhota atĩa kwaria maũndũ mega na mũrĩ oru? Tondũ kanua karagia kĩrĩa kĩiyũire ngoro.+ 35 Mũndũ ũrĩa mwega arutaga maũndũ mega kuuma mũthithũ-inĩ wake mwega, no mũndũ ũrĩa mũũru arutaga maũndũ moru kuuma mũthithũ-inĩ wake mũũru.+ 36 Ngũmwĩra atĩrĩ, ũndũ o wothe wa tũhũ andũ maragia, nĩ magaaciirithio nĩ ũndũ waguo+ Mũthenya wa Ciira; 37 nĩ gũkorũo kũgerera ciugo ciaku nĩ ũgaatuwo mũthingu, na kũgerera ciugo ciaku nĩ ũgaatuĩrũo.”

38 Thutha ũcio, andĩki-watho na Afarisai amwe makĩmũcokeria makĩmwĩra atĩrĩ: “Mũrutani, tũkwenda ũtuonie kĩmenyithia.”+ 39 Nake akĩmacokeria akĩmeera ũũ: “Rũciaro rũru na rũtharia* rwendaga kuona kĩmenyithia, no gũtirĩ kĩmenyithia rũkuona o tiga kĩmenyithia kĩrĩa kĩa mũnabii Jona.+ 40 Nĩ gũkorũo o ta ũrĩa Jona aarĩ thĩinĩ wa nda ya thamaki nene thikũ ithatũ ũtukũ na mũthenya,+ noguo Mũrũ wa mũndũ arĩkorũo thĩinĩ wa mbĩrĩra* thikũ ithatũ ũtukũ na mũthenya.+ 41 Andũ a Nineve nĩ makaariũkio hĩndĩ ya ituĩro hamwe na rũciaro rũrũ na marũtuĩre, tondũ nĩ meeririre maahunjĩrio nĩ Jona.+ No rĩrĩ, haha harĩ na mũndũ ũkĩrĩte Jona.+ 42 Mũtumia mũthamaki wa mwena wa mũhuro nĩ akaariũkio hĩndĩ ya ituĩro hamwe na rũciaro rũrũ na arũtuĩre, tondũ nĩ ookire oimĩte ituri cia thĩ nĩguo aigue ũũgĩ wa Suleimani.+ No rĩrĩ, haha harĩ na mũndũ ũkĩrĩte Suleimani.+

43 “Rĩrĩa roho mũũru woima thĩinĩ wa mũndũ, ũthiaga ũgereire kũndũ gũtarĩ maĩ ũgĩcaria handũ ha kũhurũka, no ũkaga.+ 44 Roho ũcio ũkoiga atĩrĩ, ‘Ngũcoka nyũmba-inĩ yakwa ĩrĩa ndoimire,’ na wakinya, ũgakora nyũmba ĩyo ĩtegũikarũo no ĩhaatĩtwo ĩgathera na ĩkagemio. 45 Ũgacoka ũgathiĩ ũkagĩĩra maroho mangĩ mũgwanja moru kũũkĩra, na thutha wa kũingĩra, magatũũra kuo; naguo ũhoro wa marigĩrĩrio wa mũndũ ũcio ũgathũka gũkĩra mbere.+ Ũguo noguo ũhoro wa rũciaro rũrũ rũru ũgaaikara.”

46 Na hĩndĩ ĩyo aaragia na kĩrĩndĩ, nyina na ariũ a nyina+ maarũgamĩte nja makĩenda kwaria nake.+ 47 Mũndũ ũmwe akĩmwĩra ũũ: “Maitũguo na ariũ a maitũguo marũgamĩte nja makĩenda kwaria nawe.” 48 Nake agĩcokeria mũndũ ũcio wamwĩrire ũguo atĩrĩ: “Maitũ nũũ, na ariũ a maitũ nĩa?” 49 Agĩtambũrũkia guoko erekeirie harĩ arutwo ake, akiuga: “Ta rora, aya nĩo maitũ na ariũ a maitũ!+ 50 Tondũ mũndũ o wothe wĩkaga wendi wa Awa ũrĩa ũrĩ igũrũ, nĩwe mũrũ wa maitũ, na mwarĩ wa maitũ o na maitũ.”+