Hihi Wee nĩ Wonaga Muoyo ta Ũrĩa Ngai Awonaga?

1, 2. Nĩ kĩheo kĩrĩkũ kuuma kũrĩ Ngai kĩ bata mũno ũmũthĩ, na nĩkĩ?

ITHE witũ wa Igũrũ nĩ atũheete kĩndũ kĩa bata mũno—kĩheo kĩa muoyo tũrĩ andũ ogĩ marĩ na ũhoti wa kuonania ngumo ta ciake. (Kĩambĩrĩria 1:27) Nĩ ũndũ wa kĩheo kĩu kĩa bata-rĩ, nĩ tũhotaga kũmenya ũrĩa mawatho ma Bibilia matũgunaga. Na njĩra ya kũmahũthĩra-rĩ, no tũkũre biũ kĩĩroho tũtuĩke andũ mendete Jehova na “mahũthĩire gũkũũrana wega na ũũru.”—Ahibirania 5:14.

² Ũhoti wa kũhũthĩra watho wa Bibilia nĩ wa bata mũno ũmũthĩ, tondũ thĩ ĩno ĩrĩ na maũndũ maingĩ mũno ũũ atĩ gũtirĩ mawatho mangĩthondekwo, mahutĩtie maũndũ mothe marĩa mangĩyumĩria thĩinĩ wa ũtũũro. Mĩthemba ya ũrigitani nĩ ngerekano njega ya ũndũ ũcio, mũno makĩria mwena-inĩ wa ndawa na ũrigitani ũkoniĩ thakame. Ũyũ nĩ ũndũ wa bata harĩ arĩa othe marenda gwathĩkĩra Jehova. No o na kũrĩ ũguo-rĩ, akorũo nĩ tũtaũkĩirũo nĩ watho wa Bibilia nĩ tũkũhota gũtua matua na ũũgĩ marĩa megũtũtiga na thamiri ĩtarĩ na ũcuke na tũikare o twendetwo nĩ Ngai. (Thimo 2:6-11) Ta wĩcirie ũhoro wa mamwe ma mawatho macio.

MUOYO NA THAKAME NĨ THERU

3, 4. Ũtheru wa thakame woonanirio hĩndĩ ĩrĩkũ rĩa mbere thĩinĩ wa Maandĩko, na wĩhocetie watho-inĩ ũrĩkũ?

³ Jehova aaguũririe rĩa mbere ũkuruhanu wa thakame na muoyo, o hamwe na ũtheru wacio, rĩrĩa Kaini oragire Habili. Ngai eerire Kaini ũũ: “Mũgambo wa thakame ya mũrũ wa nyũkwa nĩũrangaĩra uumĩte thĩ.” (Kĩambĩrĩria 4:10) Maitho-inĩ ma Jehova-rĩ, thakame ya Habili yarũgamĩrĩire muoyo wake, ũrĩa wakinyire mũthia thutha wa kũũragũo nĩ Kaini. Kwoguo-rĩ, na njĩra ĩngĩ, thakame ya Habili yakayagĩra Ngai amũrĩhĩrie.—Ahibirania 12:24.

⁴ Thutha wa Kĩguũ kĩa hĩndĩ ya Nuhu-rĩ, Ngai nĩ aaheire andũ rũtha rwa kũrĩa nyama cia nyamũ no matikarĩe thakame. Ngai oigire ũũ: “Mũtikanarĩanĩrie nyama hamwe na muoyo wacio, naguo ũguo nĩ ta kuuga thakame yacio. Naguo ũhoro ũyũ nĩ wa ma atĩ thakame yanyu, o yo nyene mĩoyo yanyu, nĩndĩrĩmĩũranagia.” (Kĩambĩrĩria 9:4, 5) Watho ũcio wagĩrĩirũo kũrũmĩrĩrũo nĩ njiaro ciothe cia Nuhu o nginya ũmũthĩ. Ũtĩtĩrithagia ũrĩa Ngai eerĩte Kaini mbere ĩyo—atĩ muoyo wa nyamũ ciothe ũrũgamĩrĩirũo nĩ thakame. Watho ũcio ningĩ wonanagia atĩ Jehova, Kĩhumo kĩa muoyo, nĩ agaacirithia andũ othe arĩa matatĩaga muoyo na thakame.—Thaburi 36:9.

5, 6. Watho wa Musa wonanirie na njĩra ũrĩkũ atĩ thakame nĩ theru na nĩ ya goro? (Rora o na ithandũkũ rĩrĩ na kĩongo “Gũtĩa Muoyo wa Nyamũ.”)

⁵ Maũndũ macio merĩ ma bata mũno nĩ moonekaga thĩinĩ wa Watho wa Musa. Maũndũ ma Alawii 17:10, 11 yugaga ũũ: “Na rĩrĩ, mũndũ o wothe . . . ũrĩa ũkarĩa thakame ya mũthemba o na ũrĩkũ, nĩngaheta ũthiũ wakwa nĩ ũndũ wa mũndũ ũcio ũkũrĩa thakame, na nĩngamũingata ndĩmũthengie kũrĩ andũ ao. Nĩ gũkorũo muoyo wa mwĩrĩ wĩ thĩinĩ wa thakame; na nĩyo ndĩmũheete ĩigagwo kĩgongona-inĩ ya kũhorohagĩria mĩoyo yanyu; nĩ gũkorũo thakame nĩyo ĩhorohanagĩria nĩ ũndũ wa muoyo ũrĩa ũrĩ thĩinĩ wayo.”a—Rora ithandũkũ rĩrĩ na kĩongo “Hinya wa Kũhoroheria wa Thakame.”

⁶ Angĩkorũo thakame ya nyamũ ĩrĩa yathĩnjwo ndĩkũhũthĩrũo kĩgongona-inĩ-rĩ, yaagĩrĩirũo gũitwo thĩ. Na njĩra ĩyo-rĩ, muoyo ũkahaana ta wacokerio Mwene guo. (Gũcokerithia Maathani 12:16; Ezekieli 18:4, The Holy Bible in Gĩkũyũ Language, 2007) No rĩrĩ, ta rora wone atĩ Aisiraeli matiabataire kũgeria kũruta gathakame o gothe kuuma nyama-inĩ iria marenda kũrĩa. Angĩkorũo nyamũ ĩyo nĩ yathĩnjĩtwo ũrĩa kwagĩrĩire na thakame ĩkarekwo ĩitĩke biũ-rĩ, Mũisiraeli nĩ angĩamĩrĩire arĩ na thamiri njega, tondũ kũngĩakoretwo kuonanĩtio gĩtĩo kĩrĩa kĩagĩrĩire harĩ ũrĩa Mũheani-Muoyo.

7. Daudi onanirie gĩtĩo harĩ ũtheru wa thakame atĩa?

⁷ Daudi, ũrĩa we warĩ “mũndũ ũrĩa ngoro [ya Ngai] yendeire o ngoga,” nĩ aataũkĩirũo nĩ watho wa Ngai wĩgiĩ thakame. (Atũmwo 13:22) Hĩndĩ ĩmwe rĩrĩa aanyotiĩ mũno-rĩ, arũme atatũ ake magĩthiĩ kĩa hinya gĩthima-inĩ kĩarĩ gatagatĩ ka hema cia thũ, magĩtaha maĩ makĩmũrehera. Daudi eekire atĩa? Oririe ũũ: “Kaĩ ingĩkĩhota atĩa kũnyua thakame ya andũ aya metwarĩire ũgwati-inĩ wa gĩkuũ?” Maitho-inĩ ma Daudi-rĩ, maĩ macio matariĩ ta thakame ya arũme acio ake. Kwoguo o na gũtuĩka arĩ o mũnyotu-rĩ, “amaitire thĩ, amarutĩre Jehova.”—2 Samueli 23:15-17.

8, 9. Hihi woni wa Ngai igũrũ rĩgiĩ thakame nĩ wagarũrũkire kĩũngano kĩa Ũkristiano kĩambĩrĩria? Taarĩria.

⁸ Mĩaka 2,400 thutha wa Nuhu kũheo watho wĩgiĩ thakame, na ta mĩaka 1,500 thutha wa Watho ũrĩa wa kĩrĩkanĩro gũtuwo-rĩ, Jehova nĩ ateithirie kũgerera roho wake kĩama kĩrĩa gĩatongoragia gĩa kĩũngano gĩa Gĩkristiano kĩaandĩke ũũ: “Roho Mũtheru, o na ithuĩ, nĩtuonete arĩ wega tũtikamũigĩrĩre mũrigo ũkĩrĩte maũndũ maya matangĩtigĩka; namo nĩ maya, atĩ mũthemage kĩndũ kĩrĩa gĩothe kĩhakĩirũo mĩhianano, na thakame, na nyama cia nyamũ iria ciitĩtwo, o na ũmaraya.”—Atũmwo 15:28, 29.

⁹ Hatarĩ nganja-rĩ, kĩama kĩrĩa gĩatongoragia hĩndĩ ĩyo nĩ kĩamenyire atĩ thakame nĩ theru na atĩ kũmĩhũthĩra ũũru kwarĩ mehia maritũ o ta kũhoya mĩhianano kana gũtharia. Akristiano a ma ũmũthĩ nĩ metĩkagĩra ũndũ ũcio. Ningĩ-rĩ, tondũ nĩ meciragia mũno gĩtũmi kĩa watho mũna wa Bibilia-rĩ, nĩ mahotaga gũkenia Jehova rĩrĩa maratua maũndũ megiĩ ũhũthĩri wa thakame.

KŨHŨTHĨRA THAKAME ŨRIGITANI-INĨ

10, 11. (a) Aira a Jehova monaga atĩa gwĩkĩrũo thakame na icunjĩ ciayo iria nene? (b) Nĩ maũndũ-inĩ marĩkũ megiĩ ũhũthĩri wa thakame Akristiano mangĩgĩa na mawoni matiganĩte?

¹⁰ Aira a Jehova nĩ mamenyaga atĩ ‘gwĩthema thakame’ nĩ kuuga kwaga gwĩkĩrũo thakame, kana kũheana, kana kũiga thakame yao o ene atĩ nĩgetha magekĩrũo thutha-inĩ. Nĩ ũndũ wa gũtĩa watho wa Ngai-rĩ, matiĩtĩkagĩra icunjĩ irĩa inya nene cia thakame.

¹¹ Ũmũthĩ-rĩ, icunjĩ icio kaingĩ nĩ ĩgayũkanagio tũindo tũnini tũnini tũrĩa tũhũthagĩrũo na njĩra ngũrani. Hihi Mũkristiano no etĩkĩre tũindo ta tũu? Hihi nĩ atuonaga ta arĩ “thakame”? Mũndũ nĩwe wagĩrĩirũo kwĩyamũrĩra ũndũ ũcio. Noguo o na mĩthemba-inĩ ya ũrigitani ta gũcunga thakame na macini (hemodialysis), gũtwekia thakame (hemodilution), na kũhonokia thakame (cell salvage) akorũo ndĩkũrutwo ĩigwo ĩhũthĩrũo thutha-inĩ.—Rora Ũhoro Muongerere gĩcunjĩ kĩrĩ na kĩongo “Tũcunjĩ twa Thakame na Njĩra cia Ũrigitani.”

12. Twagĩrĩirũo kuona na gwĩka atĩa maũndũ-inĩ megiĩ thamiri?

¹² Hihi ũguo nĩ kuuga atĩ maũndũ marĩa matigagĩrũo mũndũ kĩũmbe eyamũrĩre ti ma bata maitho-inĩ ma Jehova? Aca, nĩ gũkorũo we nĩ arũmbũyanagia mũno na meciria maitũ na itũmi cia ciĩko ciitũ. (Thimo 17:3; 21:2; 24:12) Kwoguo thutha wa kũhoya na gwĩka ũthuthuria igũrũ rĩgiĩ ndawa kana ũrigitani mũna-rĩ, twagĩrĩirũo gwathĩkĩra thamiri iitũ ĩrĩa ĩmenyeretio nĩ Bibilia. (Aroma 14:2, 22, 23) Gũtirĩ mũndũ wagĩrĩirũo gũtwĩra ũrĩa tũgwĩka, na ningĩ tũtiagĩrĩire kũũria arĩa angĩ ũũ: “Ũngĩka atĩa korũo nĩwe?” Maũndũ-inĩ ta macio-rĩ, o Mũkristiano agĩrĩirũo ‘gwĩkuuĩra mũrigo wake mwene.’b—Agalatia 6:5; Aroma 14:12; rora ithandũkũ rĩrĩ na kĩongo “Hihi nĩ Nyonaga Thakame Ĩrĩ Theru?” karatathi ka 81.

MAWATHO MA JEHOVA MONANAGIA WENDO WAKE

13. Mawatho ma Jehova monanagia ũndũ ũrĩkũ ũmwĩgiĩ? Heana ngerekano.

¹³ Mawatho marĩa marĩ thĩinĩ wa Bibilia monanagia atĩ Jehova nĩ Mũheani-Watho mũũgĩ na Ithe wĩ wendani na ũrũmbũyagia mũno ũhoro wa ciana ciake. (Thaburi 19:7-11) O na gũtuĩka watho wĩgiĩ ‘gwĩthema thakame’ ndwaheanirũo ũrĩ wa kũgitĩra ũgima wa mwĩrĩ-rĩ, nĩ ũtũgitagĩra kuumana na mathĩna marĩa moimanaga na gwĩkĩrũo thakame. (Atũmwo 15:20) Kwaria ma-rĩ, arigitani aingĩ moigaga atĩ kwaga gwĩkĩrũo thakame nĩguo ũrigitani ũrĩa mwega biũ wa kĩĩrĩu. Harĩ Akristiano a ma-rĩ, maũndũ ta macio matĩtĩrithagia ũũgĩ wa Jehova ũtarĩ gĩthimi na wendo wake mũingĩ.—Isaia 55:9; Johana 14:21, 23.

14, 15. (a) Wendo wa Ngai harĩ andũ ake woonanagio nĩ mawatho marĩkũ? (b) Ũngĩhũthĩra mawatho macio atĩa?

¹⁴ Ũrĩa Ngai aarũmbũyagia andũ ake thĩinĩ wa Isiraeli nĩ woonanagio nĩ mawatho make. Kwa ngerekano-rĩ, oigĩte atĩ nyũmba cia Aisiraeli ikorũo na karũirigo kana karũthingo igũrũ guothe, kũgirĩrĩria mũndũ ndakae kũgwa, tondũ nyũmba igũrũ nĩgwekagĩrũo maũndũ maingĩ. (Gũcokerithia Maathani 22:8; 1 Samueli 9:25, 26; Nehemia 8:16; Atũmwo 10:9) Ngai ningĩ nĩ oigĩte atĩ ndegwa ndũi cikarage ihingĩirũo. (Thama 21:28, 29) Kwaga gwathĩkĩra mawatho macio-rĩ, kuonanagia kwaga gũtindanĩra na andũ arĩa angĩ, na nĩ kũngĩatũmire mũndũ agĩe na mehia ma thakame.

¹⁵ Ũngĩhũthĩra mawatho macio atĩa? Ta wĩcirie ũrĩa ngari yaku ĩhaana, ũrĩa ũtwarithagia ngari, na wĩcirie ũhoro wa nyamũ ciaku, mũciĩ waku, harĩa ũrutagĩra wĩra, na ikeno iria ũthuuraga? Mabũrũri-inĩ mamwe-rĩ, andũ aingĩ ethĩ makuaga nĩ ũndũ wa gũtwarithia ngari ũũru, matarĩ kĩhaarĩro. No rĩrĩ, andũ ethĩ arĩa marenda gũikara mendetwo nĩ Ngai-rĩ, nĩ matĩaga muoyo na maticaragia gwĩkenia na maũndũ marĩ na ũgwati. Matiĩciragia atĩ andũ ethĩ matingĩona ũgwati. Ithenya rĩa ũguo-rĩ, makenagĩra ũnyinyi wao na njĩra ya gwĩthema maũndũ marĩa mangĩmarehera thĩna.—Kohelethu 11:9, 10.

16. Nĩ watho ũrĩkũ wa Bibilia ũgirĩtie kũruta nda? (Rora kohoro ka magũrũ-inĩ.)

¹⁶ Nginya muoyo wa mwana ũtarĩ mũciare nĩ wa bata maitho-inĩ ma Ngai. Thĩinĩ wa Isiraeli ya tene-rĩ, mũndũ angĩaguraririe mũtumia wĩ na nda, na we kana mwana ũcio wake akue-rĩ, Ngai onaga mũndũ ũcio arĩ mũũragani, na “no mũhaka muoyo [ũngĩoimire] muoyo.”c (Thama 21:22, 23) Nĩ ũndũ ũcio-rĩ, ta wĩcirie ũrĩa Jehova aiguaga rĩrĩa arona ciana nyingĩ mũno itarĩ njiare ikĩũragwo o mwaka na njĩra ya kũruta nda, nyingĩ ciacio ciũragagwo nĩ ũndũ wa andũ kwĩyenda na kwenda gũthiĩ na mbere na mĩthiĩre yao ya waganu.

17. Ũngĩũmĩrĩrĩa mũndũ warutĩte nda atanamenya ithimi cia Ngai atĩa?

¹⁷ No rĩrĩ, ĩ mũtumia angĩkorũo nĩ aarutĩte nda atanamenya ma ya Bibilia? Hihi nĩ kuuga atĩ Ngai ndangĩmuohera? Aca! Kwaria ma-rĩ, mũndũ wĩrirĩte kũna no akorũo na ma atĩ Jehova nĩ ekũmuohera nĩ ũndũ wa thakame ya Jesu ĩrĩa yaitirũo. (Thaburi 103:8-14; Aefeso 1:7) Kristo we mwene oigire ũũ: “Ndiokire gwĩta andũ arĩa athingu, no arĩa ehia, nĩ getha merire.”—Luka 5:32.

WĨTHEME RŨMENA!

18. Bibilia yonanagia atĩ kĩhumo kĩnene kĩa ũiti wa thakame nĩ kĩĩ?

¹⁸ O na tũgĩthemaga gwĩka arĩa angĩ ũũru-rĩ, Jehova endaga tũniine biũ kuuma ngoro-inĩ ciitũ gĩtũmi kĩnene kĩa ũiti wa thakame—rũmena. Mũtũmwo Johana aandĩkire ũũ: “Mũndũ o wothe ũthũire mũrũ wa ithe nĩ mũũragani.” (1 Johana 3:15) Mũndũ ta ũcio to gũthũũra athũire mũrũ wa ithe, no eriragĩria mũndũ ũcio akue. Rũmena rũu no ruoneke kũgerera njukũ njũru kana kũmũigĩrĩra kĩgenyo atĩ angĩkorũo ũndũ ũcio nĩ wa ma, mũndũ ũcio no acirithio nĩ Jehova. (Maũndũ ma Alawii 19:16; Gũcokerithia Maathani 19:18-21; Mathayo 5:22) Kwoguo-rĩ, nĩ ũndũ wa bata mũno atĩ tũgerie kũniina rũmena ruothe tũngĩkorũo naruo thĩinĩ wa ngoro ciitũ!—Jakubu 1:14, 15; 4:1-3.

19. Mũndũ ũrĩa ũtongoragio nĩ Bibilia onaga ciugo ta cia Thaburi 11:5 na Afilipi 4:8, 9 atĩa?

¹⁹ Ningĩ-rĩ, arĩa monaga muoyo ũrĩ wa bata o ta ũrĩa Jehova awonaga, na makenda gũikaraga mendetwo nĩwe, nĩ methemaga mĩthemba yothe ya ũhinya. Thaburi 11:5 yugaga ũũ: ‘Ũrĩa mwendi ũtoi, ngoro ya Jehova nĩ ĩmũthũire.’ Ciugo icio to kuuga iroiga ũrĩa Ngai atariĩ; irĩ na watho wa gũtũtongoria ũtũũro-inĩ witũ. Itũmaga arĩa mendete Ngai metheme mĩthemba o yothe ya ikeno iria ĩngĩtũma mũndũ ende ũhinya. O ũndũ ũmwe-rĩ, uuge wa atĩ Jehova nĩ “Ngai mwene thayũ” ũtũmaga ndungata ciake ciyũrie meciria macio na ngoro ciao maũndũ marĩa mangĩendeka, na marĩa magĩrĩru, na ma kũgaathwo, marĩa marehaga thayũ.—Afilipi 4:8, 9.

WĨTHEME MATHONDEKA MARĨ NA MEHIA MA GŨITA THAKAME

20-22. Akristiano moyaga ikinya rĩrĩkũ kwerekera thĩ, na nĩkĩ?

²⁰ Maitho-inĩ ma Ngai-rĩ, thĩ yothe ya Shaitani ĩrĩ na mehia ma gũita thakame. Thirikari cia gĩũteti, iria thĩinĩ wa Maandĩko iringithanĩtio na nyamũ ndĩani, nĩ ciũragĩte andũ milioni nyingĩ, hamwe na ndungata nyingĩ cia Jehova. (Danieli 8:3, 4, 20-22; Kũguũrĩrio 13:1, 2, 7, 8) Ahũri biacara hamwe na athomi a sayanisi makoretwo makĩrutithania wĩra hamwe na thirikari icio gũthondeka matharaita moru mũno, na magatonga mũno nĩ ũndũ ũcio. Nĩ ma atĩ “kĩrĩndĩ gĩa thĩ gĩothe nĩgĩtũire kĩnyitĩtwo nĩ ũcio mũũru.”—1 Johana 5:19.

²¹ Tondũ arũmĩrĩri a Jesu ti “a gũkũ thĩ” na matiĩingĩragia o na hanini maũndũ-inĩ ma gĩũteti na mbaara-rĩ, nĩ meethemaga kũgĩa na mehia ma gũita thakame, mao ene na ma kĩrĩndĩ.d (Johana 15:19; 17:16) Na makĩĩgerekania na Kristo-rĩ, matiĩrĩhagĩria ũũru na ũũru rĩrĩa andũ arĩa angĩ mamanyariira. Ithenya rĩa ũguo-rĩ, monagia thũ ciao wendo, o na magacihoera.—Mathayo 5:44; Aroma 12:17-21.

²² Igũrũ rĩa mothe-rĩ, Akristiano a ma nĩ methemaga kwĩingĩrania na “Babuloni ũrĩa Mũnene,” ndini ciothe cia maheeni, ĩrĩa ĩrĩ mehia manene ma gũita thakame gũkĩra ithondeka rĩngĩ o rĩothe. Kiugo kĩa Ngai kiugaga ũũ igũrũ rĩgiĩ Babuloni ũrĩa Mũnene: “Thĩinĩ warĩo nĩkuo gwakorirũo thakame ya anabii na ya andũ arĩa aamũre, o na ya andũ arĩa othe maanakĩũragwo gũkũ thĩ.” Nĩ ũndũ ũcio-rĩ, tũraheo mũkaana ũyũ: “Umai kuo, andũ akwa.”—Kũguũrĩrio 17:6; 18:2, 4, 24.

23. Kuuma thĩinĩ wa Babuloni ũrĩa Mũnene nĩ kuuga atĩa?

²³ Gũtigana na Babuloni ũrĩa Mũnene to kuuga tu rĩĩtwa rĩaku rĩthario mabuku-inĩ mao. Nĩ hamwe na kũmena mĩtugo ĩrĩa ĩtĩkĩragio kana ĩkagaathĩrĩrio nĩ ndini cia maheeni—maũndũ ta ũtharia, kwĩingĩrĩa ũteti-inĩ, na gũthingata ũtonga na njĩra ya ũkoroku. (Thaburi 97:10; Kũguũrĩrio 18:7, 9, 11-17) Nĩ maita maingĩ mũno maũndũ macio matũmaga andũ maite thakame.

24, 25. Ngai onagia tha mũndũ ũrĩa wĩrirĩte na mũthingi ũrĩkũ, na ũndũ ũcio woonanĩtio na njĩra ĩrĩkũ mahinda-inĩ ma Bibilia?

²⁴ Tũtanamenya ma-rĩ, ithuothe, nĩ twanyitaga mbaru na njĩra ĩmwe kana ĩngĩ mũtabarĩre wa Shaitani na kwoguo tũkĩgĩa na mehia ma gũita thakame. No rĩrĩ, nĩ ũndũ nĩ twagarũrire mĩthiĩre iitũ, tũkĩgĩa na wĩtĩkio thĩinĩ wa igongona rĩa ũkũũri rĩa Kristo, na tũkĩyamũrĩra Ngai-rĩ, nĩ twetĩkĩrĩkire nĩ Ngai, na tũkĩgĩa na ũgitĩri wa kĩĩroho. (Atũmwo 3:19) Ũgitĩri ũcio woonanĩtio kabere thĩinĩ wa Bibilia nĩ matũũra marĩa ma kũũrĩra.—Ndari 35:11-15; Gũcokerithia Maathani 21:1-9.

²⁵ Mũbango ũcio watariĩ atĩa? Mũisiraeli angĩoragire mũndũ ũngĩ atekwenda-rĩ, arĩ atengʼerere itũũra rĩa kũũrĩra. Thutha wa cira wake gũtuwo nĩ acirithania arĩa maagĩrĩire, mũndũ ũcio aabatiĩ aikare thĩinĩ wa itũũra rĩu rĩa kũũrĩra kinya rĩrĩa mũthĩnjĩri-Ngai-mũnene agaakua. Hĩndĩ ĩyo norĩo angĩathiire gũtũũra kũndũ kũngĩ. Githĩ kĩu ti kĩonereria kĩega mũno gĩa tha cia Ngai na kĩa ũrĩa onaga muoyo ũrĩ wa bata! Matũũra macio ma kũũrĩra nĩ mahaanaine na mũbango wa Ngai ũmũthĩ wa gũtũgitĩra kuuma gĩkuũ nĩ ũndũ wa kuuna watho wa Ngai wĩgiĩ ũtheru wa muoyo na thakame. Mũbango ũcio wĩhocetie harĩ igongona rĩa ũkũũri rĩa Kristo. Hihi wee nĩ wonaga mũbango ũcio ũrĩ wa bata? Ũngĩonania ũndũ ũcio na njĩra ĩrĩkũ? Njĩra ĩmwe nĩ kwĩra arĩa angĩ manyitanĩre nawe harĩ gũikara thĩinĩ itũũra rĩa kũũrĩrũo rĩa mũhaano, mũno twaririkana atĩ “thĩna mũnene” wĩ hakuhĩ mũno.—Mathayo 24:21; 2 Akorintho 6:1, 2.

ONA MUOYO ŨRĨ WA BATA NA NJĨRA YA KŨHUNJIA NDŨMĨRĨRI YA ŨTHAMAKI

26-28. Ũmũthĩ ũhoro witũ ũhaana ta wa mũnabii Ezekieli na njĩra ĩrĩkũ, na tũngĩikara twendetwo nĩ Ngai atĩa?

²⁶ Andũ a Ngai ũmũthĩ matũririkanagia hĩndĩ ya mũnabii Ezekieli, ũrĩa watuĩtwo nĩ Jehova mũrangĩri wa nyũmba ya Isiraeli amaheage mĩkaana kuuma kwĩ Ngai. Ngai oigire ũũ: “Igua ũhoro ũrĩa ũkuuma kanua gakwa, ũmahe ũhoro uumĩte harĩ niĩ wa atĩ memenyerere.” Ezekieli aangĩagire gwĩka ũguo eerĩtwo-rĩ, nĩwe ũngĩoririo thakame ya arĩa moragirũo rĩrĩa Jerusalemu yatuĩrĩirũo cira. (Ezekieli 33:7-9) No Ezekieli nĩ aathĩkire na kwoguo ndaagĩire na mehia ma gũita thakame.

²⁷ Ũmũthĩ nĩ tũkuhĩrĩirie mũthia wa thĩ yothe ya Shaitani. Nĩ ũndũ ũcio-rĩ, Aira a Jehova monaga arĩ watho na gĩtĩo kũhunjia ũhoro wa ‘mũthenya ũrĩa Ngai akagerana ngero cia kwĩrĩhĩria’ hamwe na ndũmĩrĩri ya Ũthamaki. (Isaia 61:2; Mathayo 24:14) Wee nĩ ũrutaga biũ wĩra ũcio wa bata? Mũtũmwo Paulo nĩ oire na ũritũ wĩra wake wa kũhunjia. Nĩũndũ ũcio-rĩ, nĩkĩo oigire ũũ: “Ndirĩ hingo ingĩcokererũo nĩ thakame ya mũndũ o wothe angĩũra. Nĩ gĩkorũo ndirĩ ndatithia ta ndĩ na guoya ngĩmũmenyithia maũndũ mothe marĩa Ngai aatũire aciragĩra gwĩka.” (Atũmwo 20:26, 27) Kĩu nĩ kĩonereria kĩega mũno gĩa kwĩgerekania nakĩo.

²⁸ Hatarĩ nganja-rĩ, kuona muoyo na thakame ta ũrĩa Jehova acionaga ti kũiganu akorũo nĩ tũkwenda gũtũũra twendetwo nĩwe. Nĩ tũrabatara gũikara tũrĩ atheru maitho-inĩ make, o ta ũrĩa tũkuona thĩinĩ wa gĩcunjĩ gĩkĩ kĩrũmĩrĩire.