Agosti

Thaburi ĩyo nĩ ĩgwetete maũndũ maya merĩ ma bata: (1) Andũ athingu nĩ macemanagia na mathĩna. (2) Jehova nĩ atũhonokagia rĩrĩa twacemania na magerio. Hihi Jehova atũhonokagia atĩa? Njĩra ĩmwe ekaga ũguo nayo nĩ gũtũteithia kũgĩa na mawoni marĩa magĩrĩire megiĩ ũtũũro thĩinĩ wa mũtabarĩre ũyũ. O na gũtuĩka Jehova nĩ atwĩrĩire atĩ nĩ tũrĩkoragwo na gĩkeno nĩ ũndũ wa kũmũtungatĩra, ndakoragwo atwĩrĩire atĩ tũtirĩcemanagia na mathĩna. (Isa. 66:14) Atwĩkĩraga ngoro tũige meciria maitũ harĩ mahinda mokĩte, rĩrĩa tũgaakorũo na ũtũũro ũrĩa endaga tũkenere tene na tene. (2 Kor. 4:​16-18) No kamũira hĩndĩ ĩyo ĩkinye, nĩ atũteithagia gũthiĩ na mbere kũmũtungatĩra o mũthenya. (Maca. 3:​22-24) Nĩ maũndũ marĩkũ tũngĩĩruta kuumana na ngerekano cia ndungata njĩhokeku cia Jehova, cia mahinda ma Bibilia na cia mahinda maya? Rĩmwe na rĩmwe no tũcemanie na maũndũ materĩgĩrĩirũo. No tũngĩĩhoka Jehova, gũtirĩ hĩndĩ akaaga gũtũteithia.—Thab. 55:22. w23.04 14-15 ¶3-4

No twĩrute na kĩonereria kĩa Jusufu na Mariamu arĩa meehaarĩirie gwathĩkĩra athani arĩa anene o na rĩrĩa ũtaarĩ ũndũ mũhũthũ gwĩka ũguo. (Luk. 2:​1-6) Mariamu arĩ na nda ta ya mĩeri kenda, wathĩki wao na Jusufu nĩ wageririo. Augusto, mũtongoria wa thirikari ya Roma, nĩ aathanire atĩ andũ makeyandĩkithie. Jusufu na Mariamu maabataraga gũthiĩ Bethilehemu, rũgendo rwa ta kilomita 150 rũrĩa rwarĩ na mĩambato na mĩikũrũko mĩingĩ. Rũgendo rũu rũtingĩarĩ rũhũthũ, makĩria harĩ Mariamu. No nginya akorũo nĩ maatangĩkagĩra ũhoro wĩgiĩ ũgitĩri wa Mariamu na kaana kau aakuuĩte. Kwahoteka nĩ meeyũragia kũngĩthiĩ atĩa Mariamu angĩnyitwo nĩ ruo rwa kũgĩa mwana marĩ rũgendo-inĩ. No nginya akorũo nĩ maatangĩkagĩra ũgitĩri wa mwana ũcio tondũ nĩ maamenyaga nĩwe warĩ Mesia ũrĩa weranĩirũo. Hihi nĩ mangĩonire maũndũ macio marĩ kĩĩgwatio gĩa kwaga gwathĩkĩra thirikari? Jusufu na Mariamu matiarekire ũndũ o na ũmwe wa macio ũtũme mage gwathĩkĩra watho ũcio. Jehova nĩ aarathimire wathĩki wao. Mariamu nĩ aahotire gũkinya Bethilehemu o wega, na akĩgĩa mwana, na ũndũ ũcio ũgĩteithĩrĩria harĩ kũhinga kwa ũrathi wa Bibilia!—Mik. 5:2. w23.10 8 ¶9; 9 ¶11-12

Ũngĩka atĩa angĩkorũo nĩ ũiguaga guoya kũruta macokio mĩcemanio-inĩ? No ũteithĩke ũngĩhaaragĩria wega. (Thim. 21:5) O ũrĩa ũrĩtaũkagĩrũo nĩ gĩcunjĩ wega, noguo ũrĩiguaga ũrĩ ũndũ mũhũthũ kũruta macokio. Ningĩ, rutaga macokio makuhĩ. (Thim. 15:23; 17:27) Rĩrĩa ũraruta macokio makuhĩ, ndũngĩigua guoya ta rĩrĩa ũraruta macokio maraihu. Kũruta macokio makuhĩ na ciugo ciaku mwene, nĩ kũrĩonanagia atĩ nĩ ũhaarĩirie wega, na nĩ ũrataũkĩrũo nĩ gĩcunjĩ kĩu wega. Ĩ angĩkorũo nĩ ũgeretie kũhũthĩra motaaro mamwe ma macio, ĩndĩ no ũraigua guoya gũcokia makĩria ma riita rĩmwe kana merĩ? Korũo na ma atĩ Jehova nĩ arĩkenagio nĩwe nĩ ũndũ wa gwĩka ũrĩa wothe ũngĩhota. (Luk. 21:​1-4) Jehova ndatwĩraga twĩke ũndũ ũkĩrĩte ũhoti witũ. (Afil. 4:5) Wĩcirie ũrĩa ũngĩĩrutanĩria makĩria, wĩigĩre muoroto wa gwĩka ũguo, na ũhoe Jehova agũteithie gũikara ũhooreire. Kĩambĩrĩria-inĩ, amwe aitũ no twĩigĩre muoroto wa gũcokia naarĩ icokio rĩmwe ikuhĩ. w23.04 21 ¶6-8

Mũtũmwo Paulo aatũringithanirie na thigari cikarĩte ciĩhaarĩirie na ciĩhumbĩte nĩ ũndũ wa mbaara. Mũthigari ũrĩ wĩra-inĩ erĩgagĩrĩrũo akorũo ehaarĩirie hĩndĩ ciothe nĩ ũndũ wa mbaara. Ũguo noguo kũrĩ harĩ ithuĩ. Tũikaraga twĩhaarĩirie nĩ ũndũ wa mũthenya wa Jehova na njĩra ya kwĩhumba gako ga gĩthũri ka wĩtĩkio na wendo na ngũbia ya kĩĩrĩgĩrĩro. Gako ga gĩthũri nĩ kaagitagĩra ngoro ya mũthigari. Wĩtĩkio na wendo nĩ igitagĩra ngoro itũ ya mũhaano. Nĩ irĩtũteithagia gũthiĩ na mbere gũtungatĩra Ngai na kũrũmĩrĩra Jesu. Wĩtĩkio nĩ ũtũheaga ũũma atĩ Jehova nĩ arĩtũheaga ngerenwa nĩ ũndũ wa kũmũcaria na ngoro itũ yothe. (Ahib. 11:6) Nĩ ũrĩtũteithagia gũikara tũrĩ ehokeku harĩ Mũtongoria witũ Jesu o na angĩkorũo nĩ tũrĩcemanagia na moritũ. No twĩkĩre wĩtĩkio witũ hinya nĩguo tũhote gũkirĩrĩria moritũ, na njĩra ya gũthoma ũhoro wa cionereria cia mahinda maya cia andũ arĩa matũũrĩtie wĩkindĩru wao o na makĩnyariragwo kana marĩ na mathĩna ma kĩĩmbeca. Na no twĩtheme kũingĩra mũtego-inĩ wa kwenda mbeca na indo mũno tũngĩĩgerekania na arĩa mahũthĩtie ũtũũro wao nĩguo maige maũndũ ma Ũthamaki mbere. w23.06 10 ¶8-9

Kwĩgirĩrĩria nĩ ũhoti wa gũtongoria meciria maitũ na ciĩko citũ. Nĩ kũbataranagia rĩrĩa tũrakinyĩra mĩoroto itũ, makĩria angĩkorũo muoroto ũrĩa tũrenda gũkinyĩra nĩ mũritũ kana tũtirĩ na wendi wa kũũhingia. Ririkana atĩ kwĩgirĩrĩria nĩ gĩcunjĩ kĩa maciaro ma roho, kwoguo hoya Jehova akũhe roho wake mũtheru nĩguo ũgũteithie gũkũria ngumo ĩyo ya bata. (Luk. 11:13; Gal. 5:​22, 23) Ndũgeterere nginya rĩrĩa maũndũ marĩkorũo marĩ mega biũ. Thĩinĩ wa thĩ ĩno, no kũhoteke gũtirĩ hĩndĩ maũndũ mangĩkorũo marĩ mega biũ. Tũngĩeterera nginya rĩrĩa maũndũ makaagĩra biũ, no twage gũgaakinyĩra muoroto witũ. No tũkorũo tũtarĩ na wendi tondũ rĩngĩ muoroto witũ nĩ ũroneka ũrĩ mũritũ gũkinyĩra. Angĩkorũo muoroto waku nĩ mũritũ gũkinyĩra, geria kũũgayania. Kwa ngerekano, angĩkorũo harĩ ngumo ya Gĩkristiano ũrenda kũrutĩra wĩra, no wambĩrĩrie kũmĩonania tũmaũndũ-inĩ tũnini. Angĩkorũo muoroto waku nĩ gũthoma Bibilia ĩrĩ yothe, no wambĩrĩrie na kũbanga ihinda rĩnini rĩa gũthoma. w23.05 29 ¶11-13

Ihinda-inĩ rĩothe rĩa matukũ maya ma kũrigĩrĩria, Jehova nĩ ahũthĩrĩte ithondeka rĩake gũtigĩrĩra atĩ tũrĩ na irio cia kĩĩroho cia gũtũteithia ithuothe gũthiĩ na mbere kũgerera “Barabara ya Ũtheru.” (Isa. 35:8; 48:17; 60:17) No tuuge atĩ rĩrĩa rĩothe mũndũ etĩkĩra kwĩruta Bibilia, nĩ agĩaga na mweke wa kũingĩra ‘Barabara-inĩ ya Ũtheru.’ Amwe mathiaga o hanini magacoka makauma barabara-inĩ ĩyo. Angĩ nao makoragwo mehotorete gũthiĩ na mbere kũmĩgera o nginya mũthia. Hihi barabara ĩyo ĩkinyagia andũ kũ? Harĩ arĩa marĩ na kĩĩrĩgĩrĩro kĩa matu-inĩ, “Barabara ya Ũtheru” ĩmakinyagia thĩinĩ ya “paradiso ya Ngai” kũrĩa igũrũ. (Kũg. 2:7) Na harĩ arĩa marĩ na kĩĩrĩgĩrĩro gĩa gũkũ thĩ, barabara ĩyo ĩkaamakinyia mũthia-inĩ wa wathani wa mĩaka 1,000 wa Kristo, rĩrĩa mũndũ wothe agaatuĩka mũkinyanĩru. Angĩkorũo nĩ ũragerera barabara-inĩ ĩyo ũmũthĩ, ndũkarore na thutha. Na ndũkanatige kũmĩgerera o nginya ũrĩkie thabarĩ thĩinĩ wa thĩ njerũ. w23.05 17 ¶15; 19 ¶16-18

Nĩ ũndũ mũhũthũ gũtua itua rĩa kwĩyamũrĩra Jehova, mũndũ angĩciria maũndũ marĩa mothe Jehova amwĩkĩire. (Thab. 116:​12-14) Bibilia yugaga atĩ Jehova nĩ Mũheani wa “kĩheo o gĩothe kĩega na gĩkinyanĩru.” (Jak. 1:17) Kĩheo kĩrĩa kĩnene biũ anaheana nĩ igongona rĩa Mũrũwe Jesu. Ta wĩcirie ũrĩa kĩheo kĩu kĩrĩ kĩa mwanya. Igongona rĩu rĩa ũkũũri nĩ rĩkũhotithĩtie kũgĩa na ũrata wa hakuhĩ hamwe na Jehova. Ningĩ nĩ akũheete kĩĩrĩgĩrĩro gĩa gũgaatũũra tene na tene. (1 Joh. 4:​9, 10) Kwĩyamũrĩra Jehova nĩ njĩra ĩmwe ũngĩonania ngatho nayo nĩ ũndũ wa wendo ũcio mũnene wonetio, o hamwe na irathimo iria ciothe wamũkĩrĩte kuuma kũrĩ Jehova.—Gũcok. 16:17; 2 Kor. 5:15. w24.03 5 ¶8

Rĩrĩa tuona mĩthiĩre mĩũru ya andũ thĩinĩ wa thĩ ĩno, tũiguaga o ta ũrĩa Loti aaiguaga. Nĩ “[aatangĩkaga] mũno nĩ ũndũ wa mĩtugo ya rũtũrĩko ya andũ arĩa mooinaga watho,” tondũ nĩ aamenyaga atĩ Ithe witũ wa igũrũ nĩ athũire mĩthiĩre mĩũru. (2 Pet. 2:​7, 8) Tondũ Loti nĩ eetigĩrĩte Ngai na akamwenda, nĩ aamenete mĩthiĩre mĩũru ya andũ arĩa maamũthiũrũrũkĩirie. O na ithuĩ tũthiũrũrũkĩirio nĩ andũ matatĩĩte ithimi cia Jehova cia mĩtugo. O na kũhaana ũguo, no tũhote gũikara tũrĩ atheru kĩĩmĩtugo tũngĩtũũria wendo witũ harĩ Ngai na twĩrute kũmwĩtigĩra. Jehova nĩ atũteithagia gwĩka ũguo kũgerera ciugo cia gwĩkĩra ngoro iria irĩ thĩinĩ wa ibuku rĩa Thimo. Akristiano othe, marĩ arũme kana atumia, andũ ethĩ na akũrũ, no magunĩke mangĩthuthuria ũtaaro wa ũũgĩ ũrĩa ũrĩ ibuku-inĩ rĩu. Angĩkorũo nĩ twĩtigĩrĩte Ngai, nĩ twagĩrĩirũo kwĩmenyerera kũgĩa ũrata na andũ arĩa mekaga maũndũ moru. w23.06 20 ¶1-2; 21 ¶5

No kũhoteke nĩ ũrakarario nĩ andũ a famĩlĩ kana ũkeima maũndũ mamwe ma kĩĩmwĩrĩ nĩgetha ũige maũndũ ma Ũthamaki mbere. (Mat. 6:33) Angĩkorũo nĩguo, no ũkorũo na ma atĩ Jehova nĩ onaga kĩyo gĩaku gĩa kũmũtungatĩra. (Ahib. 6:10) Kwahoteka nĩ wĩyoneire ũũma wa ciugo ici cia Jesu: “Gũtirĩ mũndũ ũtigĩte nyũmba kana ariũ a nyina kana aarĩ a nyina kana nyina kana ithe kana ciana kana mĩgũnda nĩ ũndũ wakwa na nĩ ũndũ wa ũhoro ũrĩa mwega ũtekwamũkĩra maita 100 makĩria, ihinda-inĩ rĩrĩ—nyũmba, ariũ a nyina, aarĩ a nyina, nyina, ciana, na mĩgũnda, hamwe na mĩnyamaro—na mũtabarĩre-inĩ wa maũndũ ũrĩa ũroka, aheo muoyo wa tene na tene.” (Mar. 10:​29, 30) Irathimo iria ũgĩte nacio nĩ nyingĩ ikĩringithanio na maũndũ marĩa ũngĩkorũo wĩimĩte.—Thab. 37:4. w24.03 9 ¶5

Rĩrĩa Akristiano thĩinĩ wa Judea maagũmĩirũo nĩ ngʼaragu nene, aarĩ na ariũ a Ithe witũ a kĩũngano kĩa Antiokia nĩ “[maatuire] itua rĩa gũtũma ũteithio kũrĩ ariũ a Ithe witũ arĩa maaikaraga Judea, o mũndũ kũringana na ũrĩa angĩahotire.” (Atũm. 11:​27-30) O na gũtuĩka Akristiano acio maagũmĩirũo nĩ ngʼaragu maaikaraga kũndũ kũraihu, aarĩ na ariũ a Ithe witũ a Antiokia nĩ meehotorete kũmateithia. (1 Joh. 3:​17, 18) O na ithuĩ no tuonanie ũcayanĩri ũmũthĩ rĩrĩa twamenya atĩ aarĩ na ariũ a Ithe witũ nĩ mahutĩtio nĩ gĩcanjama. Nĩ twĩrutagĩra kũheana ũteithio o na ihenya, hihi na njĩra ya kũũria athuri a kĩũngano kana no tũteithĩrĩrie wĩra-inĩ mũna, na njĩra ya kũruta mĩhothi nĩ ũndũ wa wĩra wa thĩ yothe, kana na njĩra ya kũhoera arĩa magũmĩirũo nĩ gĩcanjama. Ningĩ aarĩ na ariũ a Ithe witũ no mabatare ũteithio wa mabataro ma o mũhaka. Rĩrĩa Mũthamaki witũ Jesu Kristo agooka kũrehe ituĩro, tũngĩenda agaatũkora tũkĩonania ũcayanĩri nĩguo atũhe mweke wa ‘kũgaya Ũthamaki.’—Mat. 25:​34-40. w23.07 4 ¶9-10; 6 ¶12

Jesu nĩ eegerekanagia na Jehova harĩ gũkorũo na ũigananĩru. Aatũmĩtwo nĩ Jehova gũkũ thĩ nĩguo ahunjĩrie “ngʼondu iria [ciorĩte] cia nyũmba ya Isiraeli.” No nĩ oonanirie ũigananĩru akĩhingia ũtungata ũcio. Hĩndĩ ĩmwe, mũtumia ũmwe ũtaarĩ Mũisiraeli nĩ aamũthaithire ahonie mũirĩtu wake ũrĩa “[wanyariragwo] ũũru mũno nĩ ndaimono.” Jesu nĩ aacaĩire mũtumia ũcio na agĩtĩkĩra kũhonia mũirĩtu wake. (Mat. 15:​21-28) Ta wĩcirie ngerekano ĩngĩ. Mbere ĩyo, Jesu aaugĩte ũũ hĩndĩ ya ũtungata wake: “Mũndũ wothe ũkaangaana . . . , o na niĩ nĩ ngaamũkaana.” (Mat. 10:33) No hihi nĩ aakaanire Petero ũrĩa wamũkaanire maita matatũ? Aca. Jesu nĩ aamenyaga atĩ Petero nĩ eerirĩte ũndũ ũcio eekĩte na atĩ aarĩ mũndũ mwĩhokeku. Thutha wa kũriũka, Jesu nĩ aaumĩrĩire Petero na hatarĩ nganja nĩ aamuonirie atĩ nĩ aamuoheire na atĩ no aamwendete. (Luk. 24:​33, 34) Jehova na Jesu nĩ marĩ ũigananĩru. O na ithuĩ Jehova erĩgagĩrĩra tũkorũo na ũigananĩru. w23.07 21 ¶6-7

Nĩ itũmi irĩkũ tũngĩtaarĩria arĩa mekagĩrĩra nganja kĩĩranĩro kĩa Ngai gĩa Paradiso nĩguo makorũo na ma atĩ nĩ gĩkaahinga? Kĩa mbere, Jehova we mwene nĩwe wĩranĩire kĩĩranĩro kĩu. Ibuku rĩa Kũguũrĩrio riugĩte ũũ: “Ũrĩa waikarĩire gĩtĩ kĩrĩa kĩa ũnene akiuga: ‘Atĩrĩrĩ, nĩ kwerũhia ndĩrerũhia maũndũ mothe.’” Jehova akoragwo na ũũgĩ, hinya, na wendi wa kũhingia kĩĩranĩro gĩake. Gĩa kerĩ, Jehova arĩ na ma biũ atĩ nĩ akaahingia kĩĩranĩro gĩake, ũũ atĩ harĩ we nĩ ta kĩhingĩte. Nĩkĩo aaugire ũũ: “Ciugo icio nĩ cia kwĩhokeka na nĩ cia ma. . . . Maũndũ macio nĩ mahingu!” Gĩa gatatũ, rĩrĩa Jehova ambĩrĩria ũndũ, atigagĩrĩra nĩ aũrĩkia. Nĩkĩo aaugire ũũ: “Nĩ niĩ Alifa na Omega.” (Kũg. 21:6) Jehova nĩ akoonania atĩ Shaitani nĩ mũheenania na gũtirĩ hĩndĩ angĩgirĩrĩria Ngai kũhingia muoroto wake. Kwoguo mũndũ angĩkwĩra atĩ ndarona ta ũndũ ũcio ũngĩhotekeka, no ũmũthomere Kũguũrĩrio 21:​5, 6 ũcoke ũmũtaarĩrie. Muonie atĩ nĩ ta Jehova ekĩrĩte kĩrore kũgerera ciugo iria arahũthĩra kũheana ũũma wa atĩ nĩ akaahingia kĩĩranĩro gĩake.—Isa. 65:16. w23.11 7 ¶18-19

Jehova eerĩire Iburahimu kĩĩranĩro kĩu rĩrĩa aarĩ mũthuri mũkũrũ wa mĩaka 75, na ndaarĩ na mwana. No ndoonire kĩĩranĩro kĩu gĩkĩhinga kĩrĩ gĩothe. Thutha wa kũringa Rũũĩ rwa Farati na gweterera mĩaka 25, Iburahimu nĩ oonire mũrũ wake Isaaka agĩciarũo na njĩra ya kĩama, na thutha wa mĩaka ĩngĩ 60 nĩ oonire tũguuka twake Esau na Jakubu tũgĩciarũo. (Ahib. 6:15) No Iburahimu ndoonire njiarũa ciake igĩtuĩka rũrĩrĩ rũnene na ikĩĩgwatĩra Bũrũri wa Kĩĩranĩro. O na kũrĩ ũguo, mũthuri ũcio mwĩhokeku aarĩ na ũrata wa hakuhĩ na Jehova. (Jak. 2:23) Na rĩrĩa Iburahimu akaariũkio, nĩ agaakena mũno kũmenya atĩ wĩtĩkio na wetereri wake nĩ ciareheire ndũrĩrĩ ciothe cia thĩ irathimo. (Kĩam. 22:18) Tũreruta atĩa? No twage kwĩyonera ciĩranĩro ciothe cia Jehova ikĩhinga ihinda-inĩ rĩrĩ. O na kũrĩ ũguo, tũngĩkorũo na wetereri o ta Iburahimu, no tũkorũo na ma atĩ Jehova nĩ arĩtũrathimaga ihinda-inĩ rĩrĩ na nĩ agaatũrathima na njĩra nene o na makĩria thĩinĩ wa thĩ njerũ ĩrĩa eranĩire.—Mar. 10:​29, 30. w23.08 24 ¶14

Mũthamaki Uzia arĩ mwĩthĩ aarĩ mwĩnyihia. Nĩ eerutire “gwĩtigĩra Ngai ũrĩa wa ma.” Aatũũrire mĩaka 68, na mĩaka mĩingĩ harĩ ĩyo, Jehova nĩ aamũrathimire. (2 Maũ. 26:​1-4) Uzia nĩ aatooririe ndũrĩrĩ nyingĩ iria ciarĩ thũ ciake na agĩtigĩrĩra atĩ Jerusalemu yarĩ na ũgitĩri mwega. (2 Maũ. 26:​6-15) Hatarĩ nganja Uzia nĩ aakenire nĩ maũndũ marĩa mothe Jehova aamũteithirie gwĩka. (Koh. 3:​12, 13) Mũthamaki Uzia nĩ aamenyerete kwĩraga andũ ũrĩa megwĩka. Kwahoteka ũndũ ũcio nĩ watũmaga one ta ataabataraga gwathĩkĩra mawatho ma Jehova. Mũthenya ũmwe Uzia nĩ aatonyire hekarũ ya Jehova nĩguo acine ũbumba kĩgongona-inĩ, ũndũ ũrĩa athamaki mataagĩrĩirũo gwĩka. (2 Maũ. 26:​16-18) Azaria, ũrĩa warĩ Mũthĩnjĩri-Ngai Ũrĩa Mũnene nĩ aageririe kũmũrũnga, no Uzia akĩrakara mũno. Ũndũ wa kĩeha nĩ atĩ Uzia nĩ aateanĩirie wĩhokeku wake, na Jehova akĩmũhũũra na mangũ. (2 Maũ. 26:​19-21) Na githĩ mũtũũrĩre wake ndũngĩarĩ ngũrani mũno angĩatũũrire arĩ mwĩnyihia? w23.09 10 ¶9-10

O na thutha wa mũtũmwo Petero gũtuĩka Mũkristiano mũitĩrĩrie maguta, no aabataraga kũrũa na mawathe make. Mwaka-inĩ wa 36 M.M., Petero aarĩ ho rĩrĩa Korinelio ũrĩa ũtaarĩ Mũyahudi aaitĩrĩirio maguta kũgerera roho mũtheru, ũndũ ũrĩa woonanirie wega atĩ “Ngai ndarĩ mũthutũkanio” na atĩ Andũ a Ndũrĩrĩ nĩ mangĩatuĩkire gĩcunjĩ gĩa kĩũngano gĩa Gĩkristiano. (Atũm. 10:​34, 44, 45) Thutha ũcio Petero nĩ aaiguaga arĩ na wĩyathi wa kũrĩanĩra na Andũ a Ndũrĩrĩ, ũndũ ũrĩa atangĩekire mbere ĩyo. O na kũrĩ ũguo, Akristiano amwe Ayahudi moonaga ta Ayahudi mataagĩrĩirũo kũrĩanĩra hamwe na Andũ a Ndũrĩrĩ. Rĩrĩa Akristiano amwe arĩa maarĩ na mawoni macio maathiire Antiokia, Petero nĩ aatigire kũrĩanĩra na ariũ a Ithe witũ a ndũrĩrĩ, hihi nĩ ũndũ wa gwĩtigĩra kũrakaria Akristiano acio Ayahudi. Mũtũmwo Paulo nĩ oonire ũhinga ũcio Petero aarĩ naguo, na akĩmũrũnga mbere ya andũ. (Gal. 2:​13, 14) No Petero ndakuire ngoro o na thutha wa gwĩka mahĩtia macio. w23.09 22 ¶8

Ũngĩĩthuthuria ũtekwĩheenia wahota kuona ũndũ ũrabatara kũrutĩra wĩra. O na kũrĩ ũguo, ndũgakue ngoro. “Mwathani nĩ mũtugi,” na nĩ egũgũteithia kũrutĩra wĩra ũndũ ũcio. (1 Pet. 2:3) Mũtũmwo Petero atũheaga ũũma atĩ: “Ngai . . . we mwene nĩ ekũrĩkia kũmũmenyeria. Nĩ egũtũma mũrũme.” Kĩambĩrĩria-inĩ Petero aaiguaga atagĩrĩire gũkorũo hamwe na Mũrũ wa Ngai. (Luk. 5:8) No nĩ ũndũ wa ũrĩa aateithirio na njĩra ya wendo nĩ Jehova na Jesu, Petero nĩ aathiire na mbere gũkorũo arĩ mũrũmĩrĩri wa Kristo ategũkua ngoro. Nĩ ũndũ ũcio, Petero akĩagĩrĩra “gũtonya thĩinĩ wa Ũthamaki wa tene na tene wa Mwathani na Mũhonokia witũ Jesu Kristo.” (2 Pet. 1:11) Kĩu nĩ kĩheo kĩa bata mũno! O nawe ũngĩaga gũkua ngoro o ta Petero na wĩtĩkĩrie Jehova akũmenyerie, nĩ ũkaamũkĩra kĩheo kĩa muoyo wa tene na tene. Nĩ ‘ũgaakinyĩra muoroto wa wĩtĩkio waku, na nĩguo ũhonokio waku.’—1 Pet. 1:9. w23.09 31 ¶16-17

Gĩikaro kĩrĩa kĩamũre kĩarĩ na nja ĩmwe njariĩ na njirigĩre, harĩa athĩnjĩri-Ngai maarutagĩra mawĩra mao. Hau nĩho kĩgongona gĩa gĩcango gĩa kũrutĩra igongona rĩa njino gĩakoragwo, o hamwe na kĩraĩ gĩa gĩcango kĩa maĩ harĩa athĩnjĩri-Ngai meethambagĩra matanahingia ũtungata wao mũtheru. (Tham. 30:​17-20; 40:​6-8) Ũmũthĩ, Akristiano aitĩrĩrie maguta arĩa matigarĩte gũkũ thĩ matungataga marĩ na wĩhokeku nja-inĩ ĩrĩa nini ya hekarũ ya kĩĩroho. Kĩraĩ kĩa maĩ kĩrĩa kĩaigagwo gĩikaro-inĩ kĩrĩa kĩamũre na hekarũ-inĩ, nĩ kĩririkania kĩa bata harĩ o na Akristiano othe, atĩ mabatiĩ gũkorũo marĩ atheru kĩĩroho na kĩĩmĩtugo. Gũkĩrĩ ũguo-rĩ, “andũ kĩrĩndĩ kĩnene” mathathayagĩria Jehova kũ? Mũtũmwo Johana aamonire “marũgamĩte mbere ya gĩtĩ kĩrĩa kĩa ũnene,” harĩa hangĩringithanio na nja ĩrĩa nene gũkũ thĩ, na nĩho “[marutagĩra Ngai] ũtungata mũtheru mũthenya na ũtukũ thĩinĩ wa hekarũ yake.” (Kũg. 7:​9, 13-15) Na githĩ tũtikenagĩra mweke wa gũthathaiya Jehova hekarũ-inĩ yake nene ya kĩĩroho? w23.10 28-29 ¶15-16

Njĩra ĩmwe Jehova ahũthagĩra gũtwĩkĩra hinya nĩ kũgerera athuri a kĩũngano. (Isa. 32:​1, 2) Kwoguo aragia na athuri a kĩũngano rĩrĩa wagĩa na mĩtangĩko, na ũkoragwo wĩhaarĩirie kwamũkĩra ũteithio wao. Jehova no amahũthĩre gũgwĩkĩra hinya. Ningĩ kĩĩrĩgĩrĩro kĩrĩa tũheetwo nĩ Bibilia gĩa gũgaatũũra tene na tene kũrĩa igũrũ kana thĩinĩ wa Paradiso gũkũ thĩ nĩ gĩtwĩkagĩra hinya. (Rom. 4:​3, 18, 19) Kĩĩrĩgĩrĩro kĩu gitũ nĩ gĩtũheaga hinya wa gũkirĩrĩria magerio, kũhunjia ũhoro ũrĩa mwega, na kũhingia mawĩra matiganĩte marĩa twĩhokeirũo thĩinĩ wa kĩũngano. (1 Thes. 1:3) Kĩĩrĩgĩrĩro o kĩu nĩkĩo gĩekĩraga mũtũmwo Paulo hinya. Nĩ ‘aahatĩkagwo mũno,’ ‘agatukanĩrũo,’ ‘akanyarirũo,’ na ‘akagũithio thĩ.’ O na muoyo wake warĩ ũgwati-inĩ. (2 Kor. 4:​8-10) Paulo nĩ aagĩire na hinya wa gũkirĩrĩria na njĩra ya kũiga meciria harĩ kĩĩrĩgĩrĩro gĩake. (2 Kor. 4:​16-18) Paulo aaigaga meciria make harĩ kĩĩrĩgĩrĩro gĩa gũtũũra tene na tene kũrĩa igũrũ. Nĩ eecũranagia ũhoro wa kĩĩrĩgĩrĩro kĩu, na nĩ ũndũ ũcio, “[aathiaga] akĩerũhagio mũthenya o mũthenya.” w23.10 15-16 ¶14-17

Rĩrĩa ũrahoya, wĩyũrie kana rĩrĩ nĩrĩo ihinda rĩrĩa rĩagĩrĩire harĩ Jehova gũcokia mahoya maku. No tuone ta mahoya maitũ marabatara gũcokio o rĩo. No ma nĩ atĩ Jehova nĩwe ũĩ ihinda rĩrĩa rĩega biũ rĩa gũtũteithia. (Ahib. 4:16) Rĩrĩa Jehova aga gũcokia mahoya maitũ o rĩo, no tuone ta atuĩte itua rĩa kwaga gũtũcokeria. Ĩndĩ no gũkorũo Jehova arona ihinda rĩa kũmacokia ti ikinyu. Kwa ngerekano, mũrũ wa Ithe witũ mwĩthĩ no ahoe Jehova amũteithie kũhona, ĩndĩ age kũhona. Jehova angĩmũhonia na njĩra ya kĩama, Shaitani no auge atĩ mũrũ wa Ithe witũ ũcio athiĩ na mbere gũtungatĩra Jehova tondũ tu nĩ ahonio. (Ayub. 1:​9-11; 2:4) Ningĩ Jehova nĩ abangĩte ihinda rĩrĩa akaahonia andũ mĩrimũ yothe. (Isa. 33:24; Kũg. 21:​3, 4) Nĩ ũndũ ũcio, ihinda-inĩ rĩrĩ tũtingĩrĩgĩrĩra kũhonio na njĩra ya kĩama. Kwoguo mũrũ wa Ithe witũ ũcio no ahoe Jehova amũhe hinya na thayũ wa meciria nĩgetha ahote kũhiũrania na mũrimũ ũcio, na athiĩ na mbere kũmũtungatĩra arĩ mwĩhokeku. w23.11 23 ¶13

O na gũtuĩka Samsoni nĩ eekire ihĩtia inene, ndaakuire ngoro. Nĩ aacaririe mweke wa kũhingia wĩra ũrĩa aaheetwo nĩ Ngai kwerekera Afilisti. (Atiir. 16:​28-30) Samsoni aathaithire Jehova ũũ: “[Reke] ndĩrĩhĩrie kũrĩ Afilisti.” Ngai wa ma nĩ aacokirie ithaithana rĩu rĩa Samsoni na akĩmũcokeria hinya wake wa mwanya. Maumĩrĩro maarĩ atĩ, ihinda-inĩ rĩu Samsoni nĩ aatooririe Afilisti na njĩra nene gũkĩra ũrĩa aamatooretie mbere ĩyo. O na gũtuĩka Samsoni nĩ aagĩire na maumĩrĩro moru ma mahĩtia make, ndaatigire kwĩrutanĩria gwĩka wendi wa Jehova. O na ithuĩ tũngĩka ihĩtia na tũbatare kũrũngwo kana kũũrũo nĩ mweke mũna wa ũtungata, tũtiagĩrĩirũo gũkua ngoro. Ririkanaga atĩ Jehova nĩ akoragwo ehaarĩirie gũtuohera. (Thab. 103:​8, 9) O na tũngĩkorũo tũhĩtĩtie, Jehova no atũhũthĩre o ta ũrĩa aahũthĩrire Samsoni. w23.09 6 ¶15-16

Rĩrĩa wakirĩrĩria nĩ wĩtĩkĩrĩkaga harĩ Jehova. Ũguo ti kuuga atĩ Jehova nĩ akenaga rĩrĩa ũracemania na magerio kana mathĩna. Ũndũ ũrĩa ũmũkenagia nĩ kuona ũgĩkirĩrĩria ũrĩ mwĩhokeku. Ũcio nĩguo ũndũ ũrĩa ũtũmaga wĩtĩkĩrĩke harĩ we. Na githĩ kĩu ti kĩrathimo kĩa mwanya? (Thab. 5:12) Ririkana atĩ Iburahimu nĩ eetĩkĩrĩkire harĩ Jehova nĩ ũndũ wa gũkirĩrĩria magerio. Jehova nĩ aamũtuire mũrata wake, na akĩmuona arĩ mũndũ mũthingu. (Kĩam. 15:6; Rom. 4:​13, 22) O na ithuĩ no tũgĩe na mweke ta ũcio. Tũtiĩtĩkĩrĩkaga harĩ Ngai nĩ ũndũ wa mũigana wa wĩra ũrĩa tũhingagia ũtungata-inĩ wake, kana mĩeke ĩrĩa twĩhokeirũo. Twĩtĩkĩrĩkaga nĩwe nĩ ũndũ wa gũkirĩrĩria magerio tũrĩ na wĩhokeku. Ithuothe no tũhote gũkirĩrĩria gũtekũmakania mĩaka ĩrĩa tũrĩ nayo, ũrĩa maũndũ maitũ mahaana, kana ũhoti witũ. Hihi harĩ igerio ũrakirĩrĩria na wĩhokeku? Angĩkorũo nĩ harĩ, no ũmĩrĩrio kũmenya atĩ nĩ ũretĩkĩrĩka harĩ Ngai. Rĩrĩa twamenya atĩ nĩ twĩtĩkĩrĩkĩte harĩ Jehova, ũndũ ũcio nĩ wĩkĩraga hinya kĩĩrĩgĩrĩro gitũ. w23.12 11 ¶13-14

No mũhaka mũrũ wa Ithe witũ erute kwaranagĩria wega na andũ arĩa angĩ. Mũndũ ũrĩ na ũhoti ũcio nĩ athikagĩrĩria andũ arĩa angĩ na akageria gũtaũkĩrũo nĩ mawoni mao na ũrĩa maraigua ngoro-inĩ. (Thim. 20:5) No ahote gũtaũkĩrũo nĩ mũndũ kũringana na ũrĩa mũndũ ũcio araria na kũgerera ciĩko ciake cia mwĩrĩ na ũthiũ. Ndũngĩhota gwĩka ũguo ũtekũhũthĩra mahinda na andũ arĩa angĩ. Angĩkorũo kaingĩ waranagĩria na andũ kũgerera indo ta email kana ndũmĩrĩri, ũndũ ũcio no ũtũme ũritũhĩrũo kwaranĩria na andũ ũthiũ kwa ũthiũ. Kwoguo, caragia mĩeke ya kwaranĩria na andũ ũthiũ kwa ũthiũ. (2 Joh 12) Ningĩ no mũhaka mũrũ wa Ithe witũ mũgimaru kĩĩroho akorũo na ũhoti wa kwĩrũgamĩrĩra na kũrũmbũiya andũ a nyũmba yake. (1 Tim. 5:8) Nĩ wega kwĩruta ũndũ ũngĩgũteithia kuona wĩra. (Atũm. 18:​2, 3; 20:34; Ef. 4:28) Tuĩka mũndũ ũĩkaine atĩ nĩ akoragwo na kĩyo wĩra-inĩ wake, na ũrĩkagia ũndũ ũrĩa ambĩrĩria. Gwĩka ũguo no gũgũteithie kuona wĩra na kũũtũũria. w23.12 27 ¶12-13

Bibilia ĩkĩaria ũhoro wĩgiĩ “mũthenya wa Jehova” ĩkoragwo ĩkĩaria igũrũ rĩgiĩ ihinda rĩrĩa Jehova akaaniina thũ ciake na ahonokie andũ ake. Mahinda-inĩ ma tene, kũrĩ hĩndĩ Jehova aaherithirie ndũrĩrĩ imwe. (Isa. 13:​1, 6; Ezek. 13:5; Zef. 1:8) Mahinda-inĩ maya, “mũthenya wa Jehova” ũkaambĩrĩria na tharĩkĩro ya Babuloni Ũrĩa Mũnene na ũrĩkĩrĩre na mbaara ya Hari–Magedoni. Nĩguo tũkaahonoka “mũthenya ũcio,” tũrabatara kwĩhaarĩria ihinda-inĩ rĩrĩ. Jesu aarutanire atĩ nĩ twagĩrĩirũo ‘gũikara twĩhaarĩirie’ nĩ ũndũ wa “thĩna [ũrĩa] mũnene,” kuonania atĩ ũcio nĩ ũndũ tũbatiĩ gũthiĩ na mbere gwĩka. (Mat. 24:21; Luk. 12:40) Thĩinĩ wa marũa make ma mbere kũrĩ Athesalonike marĩa aandĩkire atongoretio nĩ roho, mũtũmwo Paulo nĩ aahũthĩrire ngerekano cigana ũna nĩguo ateithie Akristiano gũikara mehaarĩirie nĩ ũndũ wa mũthenya mũnene wa Jehova wa ituĩro. Paulo nĩ aamenyaga atĩ mũthenya wa Jehova ndũngĩokire matukũ-inĩ macio. (2 Thes. 2:​1-3) O na kũrĩ ũguo, nĩ eekĩrire ngoro ariũ a Ithe mehaarĩrie nĩ ũndũ wa mũthenya ũcio ta ũngĩokire rũciũ, na o na ithuĩ no tũhũthĩre ũtaaro ũcio. w23.06 8 ¶1-2

Mwaka-inĩ wa 1978 nĩ gwakirũo nyũmba ĩmwe ndaihu ya ngoroba 60 taũni-inĩ ya Tokyo, Japan. Andũ nĩ maarigagwo kana nyũmba ĩyo nĩ ĩngĩahotire gwĩtiiria ithingithia iria igũmagĩra taũni ĩyo kaingĩ. Hihi mainjinia meekire atĩa nĩguo nyũmba ĩyo ĩhote gwĩtiiria ithingithia? Maakire nyũmba ĩyo ũndũ ĩngĩakorirũo ĩrĩ nũmu, na o hĩndĩ ĩyo ĩkorũo na ũhoti wa kwĩgonya hanini nĩguo ndĩkagwe rĩrĩa yainainio nĩ ithingithia. Akristiano matariĩ ta nyũmba ĩyo ndaihu. Na njĩra ĩrĩkũ? No mũhaka Mũkristiano akorũo na ũigananĩru harĩ gũikara arũmĩte na o hĩndĩ ĩyo akorũo ehaarĩirie kũgarũrĩra rĩrĩa kwaumĩra mogarũrũku. Nĩ agĩrĩirũo gũkorũo arĩ mũrũmu na aikare ategũthengeka ũhoro-inĩ wĩgiĩ kũrũmia mawatho ma Jehova na ithimi ciake. Nĩ akoragwo ‘ehaarĩirie gwathĩka’ na ndaregeragia itua rĩake. Na o hĩndĩ ĩyo, nĩ agĩrĩirũo gũkorũo arĩ na “ũigananĩru” kana akorũo ehaarĩirie kũgarũrĩra kũngĩhoteka kana rĩrĩa kwabatarania. (Jak. 3:17) Mũkristiano ũrĩa wĩrutĩte gũkorũo na ũigananĩru ta ũcio, nĩ ethemaga kũnyitĩrĩra mũno mawoni make kana kũheeneka na ihenya. w23.07 14 ¶1-2

Jesu nĩ aabatarire kũregana na magerio ma Shaitani ũrĩa Mũcukani, nginya rĩrĩa aamwĩrire ĩmwe kwa ĩmwe atiganĩrie wĩhokeku wake harĩ Ngai. (Mat. 4:​1-11) Shaitani nĩ eehotorete biũ gũtũma Jesu ehie nĩguo aremwo kũruta ũkũũri. Jesu nĩ aacemanirie na magerio mangĩ hĩndĩ ya ũtungata wake gũkũ thĩ. Nĩ aanyaririrũo na akĩĩhĩtĩrũo kũũragwo. (Luk. 4:​28, 29; 13:31) Ningĩ nĩ aahiũranagia na kwaga gũkinyanĩra kwa arũmĩrĩri ake. (Mar. 9:​33, 34) Na hĩndĩ ya igerio rĩake rĩa mũico atanoragwo, nĩ eekirũo maũndũ moru na akĩnyũrũrio. Agĩcoka akĩũragwo na njĩra yarĩ na ruo rũingĩ na ya gĩconoko. (Ahib. 12:​1-3) Aabataraga gũkirĩrĩria igerio rĩu rĩa mũico atarĩ na ũgitĩri wa Jehova. (Mat. 27:46) Hatarĩ nganja, Jesu nĩ aahĩtũkĩire maũndũ maritũ mũno nĩguo arute ũkũũri. Na githĩ tũtitindĩkagwo kwenda Jesu o na makĩria twecũrania maũndũ marĩa mothe eehaarĩirie gwĩka nĩ ũndũ witũ? w24.01 10-11 ¶7-9

Wetereri nĩ ũtũteithagia gũkorũo na ũrata mwega na andũ arĩa angĩ. Nĩ ũtũteithagia kũmathikĩrĩria na kinyi rĩrĩa mararia. (Jak. 1:19) Ningĩ wetereri nĩ ũtũteithagia gũikarania na andũ na njĩra ya thayũ. Nĩ ũtũteithagia kwaga kũhiũha kuuga kana gwĩka ũndũ ũtarĩ wa ũtugi rĩrĩa tũraigua tũrĩ na mĩtangĩko. Na tũngĩkorũo na wetereri, tũtirĩhiũhaga kũrakara rĩrĩa andũ arĩa angĩ matũtuurithia. Handũ ha kwĩrĩhĩria, ‘tũrĩthiaga na mbere gũkiranagĩrĩria mũndũ na ũrĩa ũngĩ na kuohanagĩra twĩyendeire.’ (Kol. 3:​12, 13) Wetereri ningĩ no ũtũteithie gũtua matua mega. Handũ ha kũhĩkĩka kana gũtua itua tũtecirĩtie, nĩ tũrĩhũthagĩra mahinda gũthuthuria maũndũ mothe tũtanatua itua. Kwa ngerekano, tũngĩkorũo tũgĩetha wĩra, no twĩkore tũgĩtĩkĩra wĩra wa mbere ũrĩa tũkuona. No tũngĩkorũo na wetereri, nĩ tũrĩoyaga ihinda tũkamba gwĩciria ũrĩa wĩra ũcio ũngĩhutia famĩlĩ citũ na ũrata witũ na Jehova. Tũngĩkorũo na wetereri no twĩtheme gũtua itua rĩtarĩ rĩega. w23.08 22 ¶8-9

Gwĩcũrania ũrĩa werĩire Jehova ũkĩmwĩyamũrĩra nĩ kũrĩkĩraga hinya itua rĩaku rĩa kũregana na magerio, rĩrĩa waigua ũkuĩte ngoro nĩ ũndũ wa gũkorũo na mwerekera wa kwĩhia. Na njĩra ĩrĩkũ? Rĩrĩa mũndũ eyamũrĩra Jehova, akoragwo eregete. Ũguo nĩ kuuga no nginya aregane na merirĩria na mĩoroto yake ĩrĩa ĩtakenagia Jehova. (Mat. 16:24) Kwoguo rĩrĩa wacemania na igerio, ndũrĩambaga kũhindahinda ũrigĩtwo nĩ ũrĩa ũgwĩka. Ũrĩkoragwo ũtuĩte itua kabere rĩa gũikara ũrĩ mwĩhokeku harĩ Jehova. Na njĩra ĩngĩ, ũrĩkoragwo ũtuĩte itua irũmu rĩa gũkenia Jehova o ta Ayubu. O na gũtuĩka nĩ aacemanirie na magerio maritũ mũno, aaugire ũũ arĩ na ũũma: “Gũtirĩ hĩndĩ ngaatiganĩria wĩkindĩru wakwa!”—Ayub. 27:5. w24.03 9 ¶6-7

Jehova “Ngai mwene wendo” nĩ akoragwo hamwe na ithuĩ. (2 Kor. 13:11) Nĩ atũrũmbũyagia tũrĩ mũndũ ũmwe ũmwe. Tũrĩ na ma atĩ nĩ ‘tũthiũrũrũkĩirio nĩ wendo Wake mwĩhokeku.’ (Thab. 32:10) O ũrĩa tũrecũrania ũrĩa Jehova atuonetie wendo, noguo tuonaga ũrĩa aratũrũmbũiya, na tũkamũkuhĩrĩria o na makĩria. No tũmũhoe tũtegwĩtigĩra na tũmwĩre ũrĩa wendo wake ũrĩ wa bata harĩ ithuĩ. No tũmũitũrũrĩre mĩtangĩko itũ yothe, tũrĩ na ma atĩ nĩ ataũkagĩrũo nĩ ithuĩ na atĩ nĩ ehaarĩirie gũtũteithia. (Thab. 145:19) O ta ũrĩa mwaki ũtwĩkĩraga ũrugarĩ hĩndĩ ya heho, no taguo wendo wa Jehova ũtũũmagĩrĩria rĩrĩa tũracemania na magerio na moritũ. Kwoguo amũkagĩra wendo wake muororo, nĩguo ũkũũmagĩrĩrie na ũkũheage thayũ ũtũũro-inĩ waku. Na ũndũ ũcio ũrotũma o ũmwe witũ auge: “Nĩ nyendete Jehova”!—Thab. 116:1. w24.01 31 ¶19-20

Jesu to kũmenyithia aamenyithirie andũ atĩ Ngai etagwo Jehova. Ayahudi arĩa aarutaga nĩ mooĩ rĩĩtwa rĩa Ngai. No Jesu nĩ ooire ikinya rĩa ‘kũmataarĩria ũhoro Wake.’ (Joh. 1:​17, 18) Kwa ngerekano, Maandĩko ma Kĩhibirania nĩ maguũrĩtie atĩ Jehova nĩ arĩ tha na nĩ mũcayanĩri. (Tham. 34:​5-7) Jesu nĩ aathathaũrire ũhoro ũcio wega rĩrĩa aaheanire ngerekano ya mwanake ũrĩa worĩte. Rĩrĩa twathoma ũrĩa ithe aamuonire “arĩ o haraya” agĩcoka, agĩtengʼera kũmũtũnga, akĩmũhĩmbĩria, na akĩmuohera kuuma ngoro, nĩ tũtaũkagĩrũo wega nĩ tha na ũcayanĩri wa Jehova. (Luk. 15:​11-32) Hatarĩ nganja Jesu nĩ aaguũririe ũrĩa Ithe atariĩ kũna. w24.02 10 ¶8-9

Jehova nĩ acanjamũraga na akomĩrĩria arĩa marĩ na mĩtangĩko. Tũngĩĩgerekania atĩa na Jehova harĩ gũcaĩra arĩa angĩ na kũmomĩrĩria? Ũndũ ũmwe tũngĩka nĩ gũkũria ngumo iria ingĩtũteithia gũcaĩra na kũũmĩrĩria arĩa angĩ. Hihi nĩ ngumo ta irĩkũ tũngĩkũria? Nĩ kĩĩ kĩngĩtũteithia gũtũũria wendo ũrĩa tũrabatara nĩguo ‘tũikare tũkĩũmanagĩrĩria’ o mũthenya? (1 Thes. 4:18) Tũrabatara gũkũria ngumo ta tha, wendo ta wa andũ a nyina ũmwe, na ũtugi. (Kol. 3:12; 1 Pet. 3:8) Ngumo icio irĩtũteithagia atĩa? Rĩrĩa twakorũo na ũcayanĩri o hamwe na ngumo ta icio, nĩ tũrĩkoragwo na wendi mũnene wa kũũmĩrĩria arĩa marĩ na mĩtangĩko. Jesu aaugire, “Kanua karagia kĩrĩa kĩiyũire ngoro. Mũndũ ũrĩa mwega arutaga maũndũ mega kuuma mũthithũ-inĩ wake mwega.” (Mat. 12:​34, 35) Hatarĩ nganja, kũũmĩrĩria aarĩ na ariũ a Ithe witũ nĩ njĩra ya bata ya kuonania atĩ nĩ tũmendete. w23.11 10 ¶10-11

Nĩ tũrabatara kũhoya ũteithio nĩguo tũtaũkĩrũo nĩ morathi ma Bibilia. Ta wĩcirie ngerekano ĩno. Ta hũũra mbica mũthiĩte gũceera kũndũ ũtoĩ mũrĩ na mũrata waku, no mũrata waku agakorũo nĩ oĩ kũndũ kũu wega. Nĩ aramenya kũrĩa mũrĩ, na nĩ oĩ kũrĩa o barabara yerekeire. Hatarĩ nganja, no ũcokie ngatho nĩ ũndũ wa mũrata waku gwĩtĩkĩra gũthiĩ nawe. Ũndũ ũmwe na ũcio, Jehova nĩ oĩ wega mahinda marĩa tũratũũra na maũndũ marĩa marĩ mbere itũ. Kwoguo nĩguo tũtaũkĩrũo nĩ ũrathi wa Bibilia, no mũhaka tũmũhoe ũteithio. (Dan. 2:28; 2 Pet. 1:​19, 20) O ta mũciari o wothe mwega, Jehova endaga ciana ciake igaakorũo na ũtũũro mwega ihinda-inĩ rĩũkĩte. (Jer. 29:11) No ngũrani na mũciari ta ũcio, Jehova no ahote kũratha ũhoro wĩgiĩ ihinda rĩũkĩte atekũhĩtia. Nĩ aandĩkithirie morathi Kiugo-inĩ gĩake, nĩguo tũhotage kũmenya ũhoro wĩgiĩ maũndũ ma bata matanekĩka.—Isa. 46:10. w23.08 8 ¶3-4