Thingatagai Thayũ
“Nĩtũrũmagĩrĩrei maũndũ marĩa marehage thayũ.”—ROM. 14:19.
1, 2. Nĩ kĩĩ gĩtũmaga Aira a Jehova makenere thayũ gatagatĩ-inĩ kao?
ŨMŨTHĨ thĩinĩ wa thĩ gũtirĩ na thayũ wa ma. O na andũ a bũrũri ũmwe mararia rũthiomi rũmwe, kaingĩ nĩ magayũkanagio nĩ ndini, ũteti, mbeca na gĩthomo. Ngũrani na ũguo, andũ a Jehova makoragwo na ũrũmwe o na gũtuĩka moimĩte “ndũrĩrĩ-inĩ ciothe, . . . mĩhĩrĩga yothe na nduka ciothe o na mĩario yothe.”—Kũg. 7:9.
2 Thayũ ũrĩa tũkoragwo naguo gatagatĩ-inĩ gaitũ nduonekete o ũguo. Wonekaga tondũ nĩ tũkoragwo “tũiguaine na Ngai” nĩ ũndũ wa wĩtĩkio witũ harĩ Mũriũ wake ũrĩa thakame yake yaitirũo nĩguo ĩhumbĩre mehia maitũ. (Rom. 5:1; Ef. 1:7) Makĩria ma ũguo, Ngai ũrĩa wa ma nĩ aheaga ndungata ciake njĩhokeku roho wake, na rĩmwe rĩa maciaro ma roho ũcio nĩ thayũ. (Gal. 5:22) Ũndũ ũngĩ ũtũmaga tũkorũo na ũrũmwe na thayũ nĩ atĩ ‘tũtirĩ a gũkũ thĩ.’ (Joh. 15:19) Ũguo nĩ kuuga atĩ tũtinyitaga mbaru mwena o na ũrĩkũ wa gĩũteti. Tondũ nĩ ‘tũturĩte hiũ ciitũ cia njora igatuĩka cia mĩraũ-rĩ,’ tũtiĩingĩragia mbaara-inĩ cia gĩĩkabira kana cia mabũrũri.—Isa. 2:4.
3. Thayũ ũrĩa tũkenagĩra ũtũhotithagia gũkorũo na maũndũ marĩkũ, na nĩ kĩĩ gĩkwarĩrĩrio gĩcunjĩ-inĩ gĩkĩ?
3 Thayũ ũrĩa tũkoragwo naguo gatagatĩ-inĩ gaitũ ũhutĩtie maũndũ maingĩ, to kwaga gwĩka aarĩ na ariũ a Ithe witũ maũndũ mooru. O na gũtuĩka kĩũngano kĩa Aira a Jehova kĩrĩa tũrĩ thĩinĩ wakĩo no gĩkorũo na andũ moimĩte ndũrĩrĩ-inĩ nyingĩ na marĩ na mĩtugo ĩtiganĩte-rĩ, nĩ ‘twendanĩte.’ (Joh. 15:17) Thayũ witũ nĩ ũtũhotithagia “twĩkage andũ othe wega, na makĩria . . . andũ a nyũmba ya arĩa metĩkĩtie.” (Gal. 6:10) Paradiso iitũ ya kĩĩroho ĩrĩa ĩkoragwo na thayũ nĩ ya goro na nĩ yagĩrĩire kũgitĩrũo. Kwoguo-rĩ, rekei tũthuthurie ũrĩa tũngĩthingata thayũ thĩinĩ wa kĩũngano.
Hĩndĩ Ĩrĩa Twahĩngĩka
4. Tũngĩka atĩa nĩguo tũthingate thayũ hĩndĩ ĩrĩa tũhĩtĩirie mũndũ?
4 Mũrutwo Jakubu aandĩkire ũũ: “Ithuothe nĩtũhĩngĩcagwo nĩ maũndũ maingĩ. Na rĩrĩ, mũndũ angĩkorũo ndahĩngĩcagwo nĩ mĩario yake, nĩ mũndũ mũkinyanĩru.” (Jak. 3:2) Kwoguo, nĩ kũrĩ hĩndĩ kũngĩgĩa na kwaga kũiguana gatagatĩ-inĩ gaitũ na Akristiano arĩa angĩ. (Afil. 4:2, 3) Ĩndĩ, mathĩna gatagatĩ-inĩ ka andũ no maniinwo hatarĩ gũthũkia thayũ wa kĩũngano. Kwa ngerekano, ta wĩcirie ũtaaro ũrĩa twagĩrĩirũo nĩ kũhũthĩra tũngĩmenya atĩ hihi nĩ harĩ mũndũ tũhĩtĩirie.—Thoma Mathayo 5:23, 24.
5. Tũngĩthingata thayũ atĩa hĩndĩ ĩrĩa tũhĩtĩirio?
5 Ĩ mũndũ angĩkorũo atũhĩtĩirie mahĩtia matarĩ maritũ? Hihi no mũhaka twĩrĩgĩrĩre mũndũ ũcio ũtũhĩtĩirie oke atũhoe mũhera? Rĩandĩko rĩa 1 Akorintho 13:5 riugaga ũũ: ‘Wendani ndũigaga marakara.’ Hĩndĩ ĩrĩa tũhĩtĩirio, tũthingataga thayũ na njĩra ya kuohanĩra na kũriganĩrũo, ũguo nĩ kuuga atĩ ‘tũtiagĩrĩirũo kũiga marakara.’ (Thoma Akolosai 3:13.) Ũguo nĩguo twagĩrĩirũo nĩ gwĩka hĩndĩ ĩrĩa kwagĩa na mahĩtia matarĩ maritũ, tondũ gwĩka ũguo gũtũmaga gũkorũo na thayũ gatagatĩ-inĩ ka aarĩ na ariũ a Ithe witũ na tũkagĩa na thayũ wa meciria. Thimo ĩmwe ya ũũgĩ yugaga ũũ: “[Nĩ ũndũ mwega] kũrekera mũndũ ũngĩ rĩĩhia.”—Thim. 19:11.
6. Mũndũ angĩtwĩka ihĩtia tũrona arĩ ũritũ kuohanĩra twagĩrĩirũo nĩ gwĩka atĩa?
6 Ĩ angĩkorũo mahĩtia marĩa twĩkĩtwo nĩ maritũ mũno ũũ atĩ nĩ tũrona arĩ ũritũ kuohanĩra? Gũtheremia ũhoro ũcio kũrĩ andũ angĩ ti ũndũ wa ũũgĩ. Mũcene ta ũcio no gũthũkia ũthũkagia thayũ wa kĩũngano. Twagĩrĩirũo nĩ gwĩka atĩa nĩguo tũcarie kĩhonia kĩa ũndũ ũcio na njĩra ya thayũ? Rĩandĩko rĩa Mathayo 18:15 riugaga ũũ: “Mũrũ wa thoguo angĩkwĩhia-rĩ, thiĩ ũmuonie rĩĩhia rĩake mwĩ ndundu inyuerĩ: na angĩkũigua-rĩ, nĩmwacokanĩrĩra na mũrũ wa thoguo.” O na gũtuĩka rĩandĩko rĩa Mathayo 18:15-17 rĩaragia ũhoro wa mehia maritũ-rĩ, no tũrũmĩrĩre ũtaaro ũrĩa ũrĩ thĩinĩ wa mũhari wa 15, tũthiĩ na ũhoreri harĩ mũndũ ũrĩa ũtũhĩtĩirie na tũgerie gũcokia thayũ gatagatĩ-inĩ gaitũ hatarĩ mũndũ ũngĩ.a
7. Twagĩrĩirũo gũcaria kĩhonia kĩa ngucanio na ihenya nĩkĩ?
7 Mũtũmwo Paulo aandĩkire ũũ: “Mwarakara-rĩ, wĩmenyagĩrĩrei mũtikanehie; na mũtikanathũithie riũa mũrakaire: o na mũtikanarekererie mũcukani one kamweke.” (Ef. 4:26, 27) Jesu oigire ũũ: ‘Hiũhaga kũiguana na mũgwĩtia.’ (Mat. 5:25) Kwoguo gũthingata thayũ nĩ kuuga atĩ tuoyage ikinya rĩa na ihenya gũcaria kĩhonia kĩa mathĩna. Nĩkĩ? Tondũ gwĩka ũguo nĩ kũgitagĩra mathĩna matigathereme ta kĩronda kĩa ndĩĩra. Rekei tũtikareke, mwĩtĩo, ũiru kana kuona indo cia kĩĩmwĩrĩ irĩ cia bata mũno gũtũme twage gwetha kĩhonia kĩa ngucanio na ihenya hĩndĩ ĩrĩa cioimĩra.—Jak. 4:1-6.
Rĩrĩa Kwagĩa Thĩna Ũrahutia Andũ Aingĩ
8, 9. Kwarĩ na mawoni marĩkũ matiganĩte thĩinĩ wa kĩũngano kĩa Roma hĩndĩ ya karine ya mbere? (b) Paulo aaheire Akristiano a Roma ũtaaro ũrĩkũ wĩgiĩ ngucanio ĩrĩa maarĩ nayo?
8 Rĩmwe na rĩmwe thĩinĩ wa kĩũngano nĩ kũrĩ hĩndĩ gũkoragwo na mathĩna marahutia andũ makĩria ma erĩ. Ũguo nĩguo gwatariĩ harĩ Akristiano thĩinĩ wa Roma arĩa mũtũmwo Paulo aandĩkĩire marũa atongoretio nĩ roho. Kwarĩ na ngucanio gatagatĩ-inĩ ka Akristiano Ayahudi na matarĩ Ayahudi. Andũ amwe thĩinĩ wa kĩũngano nĩ maahũthagia arĩa maarĩ na thamiri citaarĩ na hinya. Andũ acio nĩ maatuagĩra arĩa angĩ ũrĩa gũtagĩrĩire maũndũ-inĩ marĩa mabatiĩ kwĩyamũrĩra arĩ o. Paulo aaheire kĩũngano kĩu ũtaaro ũrĩkũ?—Rom. 14:1-6.
9 Paulo nĩ aarũngire ikundi icio cierĩ ciarĩ na ngucanio. Eerire arĩa maamenyete atĩ matiarĩ rungu rwa Watho wa Musa matigage kũhũthia arĩa angĩ. (Rom. 14:2, 10) Mwerekera ta ũcio nĩ ũngĩahĩngire Akristiano arĩa moonaga arĩ thahu kũrĩa indo iria ciakananĩtio nĩ Watho. Paulo aamaheire ũtaaro ũyũ: “Menya ũtharũrie wĩra wa Ngai o ũndũ wa ũhoro wa irio. Wega nĩ gũtige kũrĩagwo nyama, o na kana kũnyuagwo ndibei, o na kana gwĩkagwo ũndũ o na ũrĩkũ ũrĩa ũngĩtũma mũrũ wa thoguo ahĩtithio nĩguo.” (Rom. 14:14, 15, 20, 21) Nao Akristiano arĩa maarĩ na thamiri ciamagiragia gwĩka maũndũ mamwe, Paulo aamerire matige gũcirithagia arĩa thamiri ciao ciametĩkagĩria. (Rom. 14:13) Aamerire ũũ: “mũndũ o wothe wa gĩkundi kĩanyu . . . nĩatigage gwĩtua mũnene gũkĩra ũrĩa aagĩrĩirũo nĩ gwĩtua.” (Rom. 12:3) Thutha wa Paulo kũrũnga ikundi icio cierĩ igũrũ rĩa ngucanio ĩyo, aandĩkire ũũ: “Hakĩrĩ ũguo-rĩ, nĩtũrũmagĩrĩrei maũndũ marĩa marehage thayũ, o na marĩa mangĩtũma tuonganagĩrĩre hinya.”—Rom. 14:19.
10. O ta ũrĩa kwarĩ harĩ kĩũngano kĩa Roma gĩa karine ya mbere-rĩ, ũmũthĩ nĩ kĩĩ kĩbataranagia harĩ kũniina ngucanio?
10 No tũkorũo na ma atĩ kĩũngano kĩu kĩa Roma nĩ kĩamũkĩrire ũtaaro wa Paulo na gĩgĩka ũgarũrũku ũrĩa wabataranagia. Hĩndĩ ĩrĩa kwagĩa na ngucanio gatagatĩ-inĩ ka Akristiano ũmũthĩ-rĩ, na githĩ o na ithuĩ tũtikĩagĩrĩirũo kũniina ngucanio tũrĩ na ũhoreri na njĩra ya gũcaria na kũhũthĩra ũtaaro wa Maandĩko tũrĩ na wĩnyihia? O ta ũrĩa kwarĩ harĩ Akristiano a Roma, ũmũthĩ andũ marĩ na ngucanio no mabatare gwĩka ũgarũrũku nĩguo ‘maikarage maiguaine.’—Mar. 9:50.
Hĩndĩ Ĩrĩa Twahoywo Ũteithio
11. Angĩkorũo Mũkristiano ũhĩtanĩtie na ũngĩ nĩ arenda kwĩra mũthuri wa kĩũngano ũhoro ũcio, nĩ ũndũ ũrĩkũ mũthuri ũcio agĩrĩirũo nĩ kwĩmenyerera?
11 Ĩ Mũkristiano angĩenda kwaria na mũthuri wa kĩũngano ũhoro wĩgiĩ thĩna arĩ naguo na mũndũ wa famĩlĩ kana na Mũkristiano ũngĩ? Thimo 21:13 yugaga ũũ: “[Mũndũ] wa gwĩthinga matũ ndakaigue ũrĩa mũhũthũ agĩkaya, we nake no agakaya, na ndakaiguwo.” Ma nĩ atĩ mũthuri wa kĩũngano ‘ndangĩthinga matũ make.’ O na kũrĩ ũguo, thimo ĩngĩ yugaga ũũ: “Mwambĩrĩria cira onagwo ta arĩ we wĩ na kĩhooto, ĩndĩ ũrĩa me cira nake okaga agakĩmuururia.” (Thim. 18:17) Mũthuri agĩrĩirũo nĩ gũthikĩrĩria wega, no nĩ abataire emenyerere ndakanyite mbaru mũndũ ũrĩa ũroiga nĩ ahĩtĩirio. Thutha wa gũthikĩrĩria ũhoro ũcio, kũngĩhoteka nĩ agĩrĩirũo nĩ kũũria mũndũ ũcio ũhĩtĩirio kana nĩ aarĩtie na ũrĩa ũmũhĩtĩirie. Ningĩ mũthuri ũcio no amũririkanie makinya ma Kĩĩmaandĩko marĩa agĩrĩirũo nĩ kũrũmĩrĩra nĩguo athingate thayũ.
12. Heana ngerekano ironania ũgwati wa kuoya ikinya rĩa na ihenya thutha wa gũthikĩrĩria mũndũ ũhĩtĩirio.
12 Kũrĩ na ngerekano ithatũ kuuma Bibilia-inĩ iria cionanagia wega ũgwati wa kuoya ikinya rĩa na ihenya, thutha wa gũthikĩrĩria ũhoro kuuma mwena ũmwe tu. Thutha wa Potifaru gũthikĩrĩria mũtumia wake nĩ eetĩkirie atĩ Jusufu nĩ ageretie kũmũnyita kĩa hinya. Arĩ na marakara matarĩ na kĩhooto Potifaru agĩathana Jusufu aikio korokoro-inĩ. (Kĩam. 39:19, 20) Mũthamaki Daudi nake, rĩrĩa eerirũo nĩ Ziba atĩ mwathi wa Ziba, Mefiboshethu nĩ aanyitĩte thũ cia Daudi mbaru no gwĩtĩkia eetĩkirie. Daudi akĩhĩka kuuga ũũ: “Atĩrĩrĩ, indo ciothe cia Mefiboshethu nĩ ciaku.” (2 Sam. 16:4; 19:25-27) Nake Mũthamaki Aritashashita nĩ eerirũo atĩ Ayahudi nĩ gwaka maakaga thingo cia Jerusalemu rĩngĩ na atĩ maarĩ hakuhĩ gũũkĩrĩra Ũthamaki wa Perisia. Mũthamaki ũcio agĩtĩkia riboti ĩyo ya maheeni na agĩathana atĩ wĩra wa gwaka Jerusalemu rĩngĩ ũrũgamio. Ũndũ ũcio ũgĩtũma Ayahudi matige gwaka hekarũ ya Ngai. (Ezar. 4:11-13, 23, 24) Athuri Akristiano magĩrĩirũo nĩ kũrũmĩrĩra ũtaaro ũrĩa Paulo aaheire Timotheo, wa gwĩthemaga gũtua matua ma na ihenya matambĩte kũmenya maũndũ mothe.—Thoma 1 Timotheo 5:21.
13, 14. (a) Ithuothe nĩ maũndũ marĩkũ tũtakoragwo na ũhoti wa kũmenya megiĩ andũ mahĩtanĩtie? (b) Nĩ kĩĩ kĩngĩteithia athuri matuithanie Akristiano arĩa angĩ ũrĩa kwagĩrĩire?
13 O na hĩndĩ ĩrĩa haroneka ta twamenya ũhoro wothe kuuma mĩena yerĩ ya andũ matetanĩtie, harĩ bata kũmenya atĩ ‘mũndũ angĩkorũo eciragia atĩ arĩ ũndũ amenyete wega-rĩ, mũndũ ũcio ndarĩ aragĩa na ũmenyo ta ũrĩa agĩrĩirũo nĩ kũgĩa naguo.’ (1 Kor. 8:2) Hihi kũna nĩ tũĩ maũndũ mothe marĩa matũmĩte andũ acio mahĩtanie? Hihi no tũmenye biũ maũndũ mothe megiĩ andũ acio mahĩtanĩtie? Hĩndĩ ĩrĩa athuri maratuithania, harĩ bata memenyerere mũno matikaheenio na mawara kana ndeto cia mũhuhu. Jesu Kristo, Mũtuanĩri ciira ũrĩa wamũrĩtwo nĩ Ngai, atuanagĩra ciira na ũthingu. We ‘ndatuaga ciira na gĩthiithi, o na kana akarũithania na ũndũ wa kũigua njukũ.’ (Isa. 11:3, 4) Ithenya rĩa ũguo-rĩ, Jesu atongoragio nĩ roho wa Jehova. Athuri Akristiano o nao no mũhaka matongoragio nĩ roho mũtheru wa Ngai.
14 Athuri matanamba gũtuithania Akristiano arĩa angĩ, marabatara kũhoya ũteithio wa roho wa Jehova na kwĩhoka ũtongoria wa roho ũcio na njĩra ya gũcaria ũtaaro wa Kiugo kĩa Ngai na wa mabuku marĩa macabĩtwo nĩ ngombo ĩrĩa ĩĩhokekete na njũgĩ.—Mat. 24:45.
Gũthingata Thayũ o Ũrĩa Wothe Tũngĩhota
15. Nĩ hĩndĩ ĩrĩkũ twagĩrĩirũo nĩ kũribota mehia maritũ marĩa tũrĩkĩtie kũmenya?
15 Tũrĩ Akristiano, twĩkagĩrũo ngoro tũthingatage thayũ. O na kũrĩ ũguo-rĩ, Bibilia yugaga ũũ: ‘Ũũgĩ ũrĩa uumaga Igũrũ o mbere nĩ mũtheru, na ningĩ wenda ũiguano.’ (Jak. 3:17) Gũkorũo na ũiguano kũgwetetwo kũrĩ gwa kerĩ kuuma harĩ ũtheru, ũguo nĩ kuuga, kũrũmia ithimi theru cia Ngai cia mĩtugo na kũrũmĩrĩra maathani make ma ũthingu. Mũkristiano angĩmenya atĩ Mũkristiano ũngĩ nĩ ekĩte mehia maritũ, agĩrĩirũo nĩ kũmwĩkĩra ngoro akoimbũre mehia macio kũrĩ athuri. (1 Kor. 6:9, 10; Jak. 5:14-16) Mũndũ ũcio wĩhĩtie angĩaga gwĩka ũguo-rĩ, Mũkristiano ũcio ũrĩkĩtie kũmenya ũhoro wa mehia macio agĩrĩirũo nĩ kwĩra athuri. Angĩrega gwĩka ũguo akĩĩgwatia atĩ arenda gũtũũria thayũ na ũcio wĩhĩtie-rĩ, ũndũ ũcio ũngĩtũma o nake atuĩke mwĩhia.—Alaw. 5:1; thoma Thimo 29:24.
16. Tũngĩĩruta atĩa kuumana na ũrĩa Jehu eekire Mũthamaki Joramu?
16 Jehu nĩ eekire ũndũ wonanagia atĩ ũthingu wa Ngai nĩ wa bata gũkĩra gũtũũria thayũ hamwe na mũndũ wĩhĩtie. Ngai aatũmĩte Jehu akahingie ituĩro Rĩake harĩ nyũmba ya Mũthamaki Ahabu. Mũthamaki mũũru wetagwo Joramu, mũrũ wa Ahabu na Jezebeli, arĩ ngari-inĩ yake okĩte gũcemania na Jehu, akĩmũria: “Gwĩ thayũ Jehu?” Hihi Jehu aamũcokeirie atĩa? “Thayũ wa kĩĩ, ũmaraya wa nyũkwa Jezebeli, o na ũrogi wake, ciingĩhĩte ũũ?” (2 Ath. 9:22) Hĩndĩ ĩo Jehu akĩgeeta ũta wake akĩratha Joramu mũguĩ ũkiumanĩra ngoro. O ta ũrĩa Jehu oire ikinya, athuri nao matiagĩrĩirũo nĩ kũrekereria arĩa mamenyerete kwĩhia na rũtũrĩko matekwĩrira atĩ nĩguo matũũrie thayũ na andũ acio. Athuri meheragia ehia arĩa maaga kwĩrira nĩguo kĩũngano gĩthiĩ na mbere gũkorũo na thayũ hamwe na Ngai.—1 Kor. 5:1, 2, 11-13.
17. Akristiano othe makoragwo na itemi rĩrĩkũ harĩ gũthingata thayũ?
17 Maita maingĩ maũndũ marĩa matũmaga aarĩ na ariũ a Ithe witũ mahĩtanie matikoragwo marĩ maritũ ũndũ marabatara kamĩtĩ ya ciira. Nĩ ũndũ wa wendo-rĩ, githĩ ndũkĩrĩ ũndũ mwega kwaga gũtindanĩrĩra na tũmahĩtia twa arĩa angĩ! Kiugo kĩa Ngai kiugaga ũũ: ‘Mũhumbĩri rĩĩhia rĩa mũndũ nĩ wendani arongoretie, no ũrĩa ũinagĩrĩria ũndũ atigithanagia arĩa marĩ ũrata mũnene.’ (Thim. 17:9) Gwathĩkĩra ciugo icio nĩ kũrĩtũteithagia ithuothe tũgitagĩre thayũ wa kĩũngano na tũgatũũria ũkuruhanu mwega hamwe na Jehova.—Mat. 6:14, 15.
Gũthingata Thayũ Kũrehaga Irathimo
18, 19. Tũgunĩkaga atĩa nĩ ũndũ wa gũthingata thayũ?
18 Gũthingata “maũndũ marĩa marehaga thayũ” gũtũrehagĩra irathimo nyingĩ. Nĩ tũkenagĩra ũkuruhanu wa hakuhĩ na Jehova rĩrĩa tũrarũmĩrĩra njĩra ciake ningĩ tũgatũma gũkorũo na ũrũmwe thĩinĩ wa paradiso iitũ ya kĩĩroho. Ningĩ gũthingata thayũ thĩinĩ wa kĩũngano nĩ gũtũteithagia kuona ũrĩa tũngĩthingata thayũ rĩrĩa tũrĩ hamwe na arĩa tũhunjagĩria “Ũhoro-ũrĩa-Mwega wa thayũ.” (Ef. 6:15) Nĩ wega tũikarage twĩhaarĩirie gũkoragwo ‘twĩkindĩire harĩ andũ othe, na tũrĩ akirĩrĩria’ rĩrĩa tũrĩ magerio-inĩ.—2 Tim. 2:24.
19 Ningĩ, ririkana atĩ nĩ “gũkariũkio andũ arĩa athingu o na arĩa matarĩ athingu.” (Atũm. 24:15) Hĩndĩ ĩrĩa kĩĩrĩgĩrĩro kĩu gĩkaahinga gũkũ thĩ, andũ milioni nyingĩ arĩa magacokio muoyo a kuuma o “rĩrĩa thĩ yombirũo,” magaakorũo marĩ na ũmũndũ ũtiganĩte na moimĩte mĩrerere-inĩ ngũrani. (Luk. 11:50, 51) Kũruta andũ arĩa makaariũkio njĩra cia thayũ ũgakorũo ũrĩ mweke wa mwanya mũno. Na githĩ maũndũ marĩa tũrarutwo ũmũthĩ megiĩ gũthingata thayũ matigatũteithia mũno hĩndĩ ĩyo!
[Kohoro ka magũrũ-inĩ]
a Nĩguo wone ũtongoria wa Maandĩko wĩgiĩ mehia maritũ ta mũcene mũũru mũno na ũhahanyi, rora ngathĩti ya Mnara wa Mlinzi, ya Oktomba 15, 1999, karatathi ga 17-22.
Weruta Atĩa?
• Tũngĩthingata thayũ atĩa rĩrĩa tũhĩtĩirie mũndũ?
• Twagĩrĩirũo nĩ gwĩka atĩa nĩguo tũthingate thayũ rĩrĩa tũhĩtĩirio?
• Nĩkĩ ti ũndũ wa ũũgĩ kũnyita mbaru mwena o na ũrĩkũ harĩ andũ marĩ na ngucanio?
• Taarĩria nĩkĩ mehia matiagĩrĩirũo nĩ kũrekererio atĩ nĩguo tũtũũrie thayũ na ũrĩa wĩhĩtie.
[Mbica karatathi ka 25]
Jehova nĩ endete arĩa mohanagĩra marĩ na mwĩyendero