2 Ngai Ndatũrũmbũyagia—Hihi Ũcio nĩ Ũhoro wa Ma?

Ũrĩa ũngĩkorũo ũiguĩte: “Korũo biũ Ngai nĩ arũmbũyagia andũ-rĩ, nĩ angĩrĩ aniina maũndũ moru na mĩnyamaro thĩinĩ wa thĩ. Ningĩ o na angĩkorũo nĩ arũmbũyagia andũ ndikuona niĩ ta anũmbũyagia.”

Ũrĩa Bibilia ĩrutanaga: Jehova Ngai ndarehaga maũndũ moru. (Jakubu 1:13) O na gũtuĩka Ngai no ahote kweheria maũndũ moru o rĩrĩa rĩothe angĩenda-rĩ, etĩkĩrĩtie mũtabarĩre mũru ũthiĩ na mbere ihinda-inĩ rĩrĩ nĩguo aniine thitango iria cioimĩririo kĩambĩrĩria-inĩ kĩa andũ. Macũngĩrĩro-inĩ nĩ arĩoya ikinya rĩa kũniinĩra andũ mathĩna marĩa mothe moimanaga na arĩa maregaga wathani wake.—Kĩambĩrĩria 3:1-6; Isaia 65:17.a

Makĩria ma kũrũmbũiya andũ marĩ othe, Ngai nĩ onanagia wendo wake kũrĩ ithuĩ tũrĩ mũndũ ũmwe ũmwe. Mathayo 10:29-31 yonanagia atĩ nĩ amenyaga tũmaũndũ tuitũ nginya tũrĩa tũnyinyi mũno o na tũrĩa ithuĩ tũtoĩ: “Githĩ tũnyoni twĩrĩ tũtiendagio thendi ĩmwe? Natuo gũtirĩ o na kamwe kangĩgũa thĩ Ithe wanyu atoĩ. Na rĩrĩ, o na njuĩrĩ cianyu cia mũtwe nĩ ndare ciothe. Hakĩrĩ ũguo-rĩ, mũtikanetigĩre; inyuĩ mũrĩ bata gũkĩra tũnyoni tũingĩ.”

Ũrĩa kũmenya ma kũngĩgũteithia: Kaingĩ nĩ twĩthemaga andũ arĩa matarĩ tha kana matarũmbũyagia arĩa angĩ. Kwoguo nĩ ũndũ wa gũkorũo maheenetio atĩ Ngai ndamarũmbũyagia, andũ aingĩ matiendaga kũmũmenya o na hanini kana makamũhoyaga o rĩrĩa tu mona hatirĩ na ũndũ ũngĩ mangĩka. Kũmenya atĩ Jehova Ngai nĩ atũrũmbũyagia biũ no gũtũme wende kwĩruta makĩria ũhoro wake na ũkũrie ũrata hamwe nake.

Kwa ngerekano-rĩ, no gũkorũo wanahoya Ngai no ũkĩgĩa na nganja kana nĩ egũgũthikagĩrĩria o na kana hihi nĩ egũcokia mahoya maku. Bibilia ĩtũũmagĩrĩria atĩ ‘Mũigua wa mahoya’ akoragwo ehaarĩirie gũthikĩrĩria arĩa othe mamũhoyaga na ngoro njega.—Thaburi 65:2.

Ngai arakũũria ‘ũmũrekagĩrĩrie maũndũ mothe marĩa magũtangaga, tondũ nĩwe ũkũrũmbũyagia.’ (1 Petero 5:7) O na hĩndĩ ya mĩnyamaro no twĩhoke Jehova atũrũmbũiye, tondũ Kiugo gĩake kiugaga ũũ: “Jehova nĩ akoragwo hakuhĩ na arĩa athuthĩku ngoro; acio maherete roho-rĩ, agakĩmahonokia.”—Thaburi 34:18.

Korũo Ngai ndatũrũmbũyagia ndangĩtwĩrĩte tũmũhoyage.

[Kohoro ka Magũrũ-inĩ]