Hihi nĩ Kũrĩ Mũigua wa Mahoya?

“Nĩ kũrĩ hĩndĩ ndaakoragwo na nganja kana nĩ kũrĩ Ngai. O na kũrĩ ũguo, kũrĩ rĩmwe ndaahoyaga. Ndaarĩ na njiriri kana mahoya makwa nĩ maathikagĩrĩrio, no reke njuge atĩ nĩ nderĩgagĩrĩra atĩ nĩ maathikagĩrĩrio. Ndiarĩ na gĩkeno na ndiarĩ na muoroto ũtũũro-inĩ. Nĩ ndetigagĩra gwĩtĩkia Ngai tondũ ndeciragia atĩ no andũ arĩa matarĩ na hinya metĩkagia Ngai.”—PATRICIA,a IRELAND.

HIHI ũrĩ waigua ta ũguo Patricia aaiguaga? Hihi nĩ ũhoyaga o na akorũo nĩ ũkoragwo na nganja kana Ngai arĩ kuo? Akorũo nĩguo-rĩ, ndũrĩ wiki. Ta wĩcirie maũndũ maya.

◼ Ũthuthuria wekirũo harĩ andũ 2,200 kuuma Ngeretha woonanirie atĩ gĩcunjĩ kĩa 22 harĩ igana no o tu metĩkĩtie atĩ nĩ kũrĩ Ngai ũrĩa wombire thĩ na igũrũ na ũrĩa ũiguaga mahoya. O na kũrĩ ũguo, harĩ andũ acio, gĩcunjĩ kĩa 55 harĩ igana nĩ mahoyaga rĩmwe na rĩmwe.

◼ Ũthuthuria wekirũo harĩ andũ 10,000 itarũ-inĩ inya cia thĩ woonanirie atĩ, harĩ arĩa metĩkĩtie atĩ gũtirĩ Ngai, hakuhĩ gĩcunjĩ kĩa 30 harĩ igana nĩ mahoyaga.

Makoragwo na Nganja Nĩkĩ?

Mũthuri ũmwe wĩtagwo Allan kuuma England aroiga ũũ: “Ndoigaga atĩ ndietĩkĩtie nĩ kũrĩ Ngai tondũ ndeciragia atĩ ndini ciokire kuoha andũ meciria na gũthondeka mbeca. Ningĩ ndeciragia atĩ, korũo nĩ kũrĩ Ngai, gũtingĩrĩ na wagi wa kĩhooto ta ũrĩa kũrĩ. No o na kũrĩ ũguo, rĩmwe na rĩmwe nĩ ndaaikaraga thĩ ngaaria na ‘kĩndũ.’ Ningĩ nĩ ndeyũragia ũũ: ‘Ndoimire kũ?’”

Mũndũ o wothe ũiguaga ũguo nĩ akoragwo na itũmi ciake cia kũgĩa na nganja kana mahoya nĩ macokagio. Maita maingĩ nganja no irehwo nĩ kwaga macokio ma ciũria ta ici irĩ haha mũhuro:

◼ Hihi nĩ kũrĩ Mũũmbi?

◼ Nĩkĩ ndini maita maingĩ nĩcio irehaga maũndũ moru?

◼ Ngai etĩkagĩria andũ manyamarĩke nĩkĩ?

Ũngĩmenya macokio ma ciũria icio, hihi no ũkorũo na ũũma wĩgiĩ mahoya?

[Kohoro ka magũrũ-inĩ]