Onanagia Ngatho nĩ Ũndũ wa Ũtaana wa Jehova

JEHOVA nĩ Ngai mũtaana. (Jak. 1:17) Kuuma o njata iria irĩ igũrũ, nginyagia mĩmera ĩrĩa ĩrĩ kũndũ guothe thĩinĩ wa thĩ, ũũmbi wa Jehova nĩ wonanagia atĩ nĩ mũtaana.—Thab. 65:12, 13; 147:7, 8; 148:3, 4.

Mwandĩki wa thaburi aarĩ na ngatho mũno harĩ Mũũmbi nginya agĩtunga rwĩmbo rwa kũmũgooca. Thoma Thaburi 104, wone atĩ o nawe no ũkorũo na ngatho ta icio. Mwandĩki wa thaburi oigire ũũ: “Ngũtũũra nyinagĩra Jehova hingo ĩrĩa yothe ngũikara ndĩ muoyo; Ngai wakwa-rĩ, ndĩĩmũinagĩra ngĩmũgoocaga hĩndĩ ĩrĩa yothe ndĩ ho.” (Thab. 104:33) Hihi ũguo nĩguo wee ũiguaga?

KĨONERERIA KĨRĨA KĨEGA BIŨ KĨA ŨTAANA

Jehova endaga tũmũtũkie harĩ kuonania ũtaana. Ningĩ nĩ atuonetie bata wa gũkorũo tũrĩ ataana. Aatongoririe mũtũmwo Paulo kwandĩka ũũ: “Athaga andũ arĩa matongete na indo matukũ maya atĩ matikae kwĩgatha, o na kana mehoke indo icio itamenyagĩrũo, no mehokage Ngai, we ũtũheaga indo ciothe agĩtũtanahagĩra, nĩ getha tũcihũthagĩre na gĩkeno; ningĩ atĩ mekage wega, atĩ matonge na ũtonga o ũrĩa wa gwĩkaga maũndũ mega, na maikarage mehaarĩirie kũheana indo, matekũrega kũgaĩra andũ angĩ indo na ũtana: nĩguo atĩ meigagĩre mũthithũ ũrĩa ũngĩtuĩka gĩtina gĩa gwakwo maũndũ mega ma kũmaguna mahinda marĩa magoka, nĩ getha makona muoyo ũrĩa muoyo ma.”—1 Tim. 6:17-19.

Paulo akĩandĩkĩra kĩũngano gĩa Korintho marũa make ma kerĩ, nĩ onanirie mwerekera ũrĩa mũndũ agĩrĩirũo gũkorũo naguo akĩheana. Oigire ũũ: “Mũndũ o mũndũ nĩeke o ta ũrĩa acirĩire gwĩka na ngoro yake, na ndakarute kĩndũ ta egũkĩiguĩra ruo, kana ta arĩ kũringĩrĩrio aringĩrĩirio arute: nĩ gũkorũo Ngai endaga mũndũ ũrĩa ũkũheana akenete.” (2 Kor. 9:7) Agĩcoka akĩgweta ũrĩa kũheana kũrĩ ũguni harĩ arĩa maraheo tondũ nĩ kũmahingagĩria mabataro mao, na gũkaguna aheani tondũ nĩ magĩaga na irathimo cia kĩĩroho.—2 Kor. 9:11-14.

Paulo akĩrĩkĩrĩria gĩcunjĩ kĩu kĩa marũa make nĩ aagwetire njĩra ĩrĩa nene Ngai onanĩtie ũtaana wake nayo. Aandĩkire ũũ: “Nake Ngai arocokerio ngatho nĩ ũndũ wa kĩheo gĩake gĩtangiugĩka na ciugo ũrĩa gĩtariĩ!” (2 Kor. 9:15) Kĩheo kĩu kĩhutĩtie maũndũ mothe mega marĩa Ngai ekagĩra andũ ake kũgerera kũrĩ Jesu Kristo. Kĩheo kĩu nĩ kĩa goro ũũ atĩ ti ũndũ mũhũthũ gũtaarĩria ũhoro wakĩo na ciugo.

Tũngĩonania ngatho atĩa nĩ ũndũ wa maũndũ marĩa mothe Jehova na Mũrũ wake matwĩkĩire na marĩa marĩtwĩkĩra? Njĩra ĩmwe nĩ gũkorũo tũrĩ ataana na njĩra ya kũhũthĩra mahinda maitũ, hinya, na indo ciitũ gũtwarithia na mbere ũthathaiya wa Jehova o na angĩkorũo ũhoti witũ nĩ mũnene kana nĩ mũnini.—1 Maũ. 22:14; 29:3-5; Luk. 21:1-4.

Njĩra Iria Amwe Mahũthagĩra Kũruta Mĩhothĩ

O ta hĩndĩ ya Paulo-rĩ, andũ aingĩ ũmũthĩ nĩ ‘maigaga mũthithũ’ kana makabangĩra mbeca mũigana mũna na magacikia thĩinĩ wa ithandũkũ rĩa kĩũngano rĩa mĩhothi ya “Wĩra wa Thĩ Yothe.” (1 Kor. 16:2) O mweri, ciũngano nĩ itũmaga mĩhothi ĩyo wabici-inĩ ya Aira a Jehova ĩrĩa ĩrũgamĩrĩire bũrũri wao. Ningĩ no ũtũme mĩhothi ĩmwe kwa ĩmwe kũrĩ rũhonge rwĩtĩkĩrĩku kĩĩwatho, rũrĩa rũhũthagĩrũo nĩ Aira a Jehova bũrũri-inĩ wanyu. Nĩguo ũmenye rĩĩtwa rĩa rũhonge rũu, no waranĩrie na wabici ya Aira a Jehova ĩrĩa ĩrũgamĩrĩire bũrũri wanyu. Andirethi cia wabici ĩyo no cioneke thĩinĩ wa www.jw.org. Mĩthemba ya mĩhothi ĩrĩa ũngĩtũma ĩmwe kwa ĩmwe nĩ:

MĨHOTHI YA ĨMWE KWA ĨMWE

Mũndũ no arute mĩhothi yake kũgerera electronic bank transfer, debit card, kana credit card. Thĩinĩ wa wabici imwe cia honge mũndũ no atũme mĩhothi ĩyo kũgerera jw.org kana website ĩngĩ ĩrĩa ĩthurĩtwo.
Mbeca, mathaga ma goro, kana indo ingĩ cia bata. Nĩ wega gũtũma marũa maronania atĩ mbeca kana indo icio nĩ mĩhothi ya ĩmwe kwa ĩmwe.

MĨHOTHI ĨRĨ NA MĨHAKA

Mĩhothi ĩno nĩ mbeca irĩkanĩirũo atĩ no icokio mũheani angĩcibatara.
Nĩ wega gũtũma marũa maronania atĩ mĩhothi ĩyo ĩrĩ na mĩhaka.

MĨHOTHI ĨNGĨ

Makĩria ma iheo cia mbeca na indo cia bata, nĩ harĩ njĩra ingĩ cia kũhotha nĩguo mũndũ ateithĩrĩrie wĩra wa Ũthamaki wa thĩ yothe. Njĩra icio nĩ cionanĩtio haha mũhuro. O na angĩkorũo ũngĩenda kũhũthĩra njĩra irĩkũ, amba warie na wabici ya Aira a Jehova ĩrĩa ĩrũgamĩrĩire bũrũri wanyu nĩguo ũmenye nĩ njĩra irĩkũ ingĩhũthĩka. Na tondũ mawatho ma mabũrũri na ma kũruta igooti nĩ matiganĩte, harĩ bata kwaranĩria na mũndũ ũĩ wega ũhoro wa watho na wa ũruti wa magooti ũtanathuura njĩra ĩrĩa njega ya kũhotha.

Marĩhi ma Kũrũgamĩrĩra Ũndũ Ũterĩgĩrĩirũo (Insurance): Ĩno nĩ mĩhothi ĩrutĩtwo na njĩra ya kũgweta atĩ rũhonge rũna rũhũthagĩrũo nĩ Aira a Jehova nĩruo rũkaagunĩka nĩ marĩhi macio kana mbeca iria mũndũ arĩhagwo ũkũrũ-inĩ kana atiga wĩra.

Akaunti cia Bengi: Ici nĩ akaunti cia bengi, marũa ma marĩhi, kana akaunti cia mũndũ ũmwe ũmwe arĩa matigĩte wĩra iria ingĩĩhokerũo kana irĩhwo kũrĩ rũhonge rũna rũhũthagĩrũo nĩ Aira a Jehova mũndũ angĩkua, kũringana na mĩtaratara ya bengi cia kwanyu.

Cĩya na Bondi (stocks and bonds): Cĩya na bondi no iheanwo kũrĩ rũhonge rũna rũhũthagĩrũo nĩ Aira a Jehova irĩ kĩheo kĩa ĩmwe kwa ĩmwe kana kũiguanĩra atĩ nĩ igaatuĩka cia rũhonge rũu mũndũ akua.

Nyũmba na Mĩgũnda: Ici nĩ nyũmba na mĩgũnda ĩrĩa ĩheanagwo kũrĩ rũhonge rũna rũhũthagĩrũo nĩ Aira a Jehova, hihi irĩ iheo cia ĩmwe kwa ĩmwe kana angĩkorũo nĩ nyũmba ya gũikara, no marĩkanĩre atĩ mũheani egũthiĩ na mbere gũikara thĩinĩ wayo hĩndĩ yothe ĩrĩa egũkorũo muoyo.

Bacici cia o Mwaka: Ici nĩ mbeca kana indo iria iheanagwo kũrĩ rũhonge rũna rũhũthagĩrũo nĩ Aira a Jehova harĩ na mũbango atĩ mũheani, kana mũndũ ũngĩ ũrĩa ũthuurĩtwo nĩwe, aamũkagĩre mũigana mũna wa bacici o mwaka hĩndĩ ĩrĩa yothe e muoyo. Mũheani nĩ anyihanyihagĩrio igooti mwaka ũrĩa mũbango ũcio wambĩrĩria.

Marũa ma Kwĩgaya na Ũramati (Wills and Trusts): Indo kana mbeca no ciĩhokerũo rũhonge rũhũthagĩrũo nĩ Aira a Jehova kũgerera marũa ma kĩĩwatho ma kwĩgaya, kana kũgweta atĩ rũhonge rũu nĩruo rũkaagunĩka nĩ ngirimiti ya ũramati. Mũbango ũcio no ũkorũo na ũguni mũna ũhoro-inĩ wĩgiĩ igooti.

Mĩhothi ya mĩthemba ta ĩyo nĩ ĩbataraga mũbango harĩ mũheani. Nĩ ũndũ wa gũteithĩrĩria andũ arĩa mangĩenda gũteithia wĩra wa thĩ yothe wa Aira a Jehova kũgerera njĩra imwe cia icio, broshua ĩĩtagwo Charitable Planning to Benefit Kingdom Service Worldwide nĩ ĩhaarĩirio na Gĩthũngũ na Kĩhispania. Broshua ĩyo yaandĩkirũo nĩguo ĩtaarĩrie njĩra imwe cia kũheana iheo, rĩu kana thutha-inĩ, ta kũheana igai mũndũ akua. Ũhoro ũmwe ũrĩa ũrĩ broshua-inĩ ĩyo no wage kũhũthĩka harĩ we nĩ ũndũ wa igooti kana mawatho mangĩ ma bũrũri wanyu. Kwoguo thutha wa gũthoma broshua ĩyo, wagĩrĩirũo kwaranĩria na wakiri waku kana mũndũ ũrĩa ũgũtaaraga ũhoro-inĩ wĩgiĩ watho kana igooti. Kũgerera njĩra icio cia kũruta mĩhothi, andũ aingĩ nĩ mahotete kũnyita mbaru wĩra witũ wa kĩĩndini na wa gũteithia andũ thĩ yothe na makanyihanyihia marĩhi mao ma igooti. Angĩkorũo broshua ĩyo nĩ yonekaga bũrũri-inĩ wanyu, no ũmĩone ũngĩĩtia kobĩ kuuma kũrĩ mwandĩki wa kĩũngano kĩanyu.

Ũngĩenda ũhoro makĩria no waranĩrie na wabici ya Aira a Jehova ĩrĩa ĩrũgamĩrĩire bũrũri wanyu.