“Mwĩmenyererei Mũndũ o na Ũrĩkũ Ndakanamũtahe”!

1. Shaitani ageragia atĩa kũnyita meciria maitũ mĩgwate kũringana na Akolosai 2:4, 8?

SHAITANI endaga tũtige gũtungatĩra Jehova. Nĩguo ahingie muoroto ũcio wake, ageragia gũcenjia mwĩcirĩrie witũ, ũguo nĩ kuuga, anyite meciria maitũ mĩgwate nĩgetha tũmwathĩkagĩre arĩ we. Ageragia gũtũgucĩrĩria na gũtũheenereria tũmũrũmĩrĩre na njĩra ya kũhũthĩra maũndũ marĩa twendete.​—Thoma Akolosai 2:4, 8.

2-3. (a) Twagĩrĩirũo gwĩciria ũhoro wa mũkaana ũrĩa ũrĩ thĩinĩ wa Akolosai 2:8 nĩkĩ? (b) Tũkwarĩrĩria ũndũ ũrĩkũ thĩinĩ wa gĩcunjĩ gĩkĩ?

² Hihi tũrĩ ũgwati-inĩ mũnene wa kũhĩtithio nĩ Shaitani? Ĩĩ. Ririkana atĩ Paulo akĩandĩka mũkaana ũrĩa ũrĩ thĩinĩ wa Akolosai 2:8, ndaandĩkagĩra andũ arĩa matetĩkĩtie. Aandĩkagĩra Akristiano arĩa maaitĩrĩirio maguta kũgerera roho mũtheru. (Kol. 1:2, 5) Akristiano acio maarĩ ũgwati-inĩ, na o na ithuĩ tũrĩ ũgwati-inĩ mũnene mahinda-inĩ maya. (1 Kor. 10:12) Nĩkĩ? Tondũ Shaitani nĩ aharũrũkĩtio gũkũ thĩ, na ũndũ ũrĩa erutanagĩria mũno gwĩka nĩ kũhĩtithia ndungata njĩhokeku cia Ngai. (Kũg. 12:9, 12, 17) Makĩria ma ũguo, tũratũũra ihinda rĩrĩa andũ aganu na arĩa metuaga ũrĩa matarĩ ‘marakĩrĩrĩria o kũũruha.’​—2 Tim. 3:1, 13.

³ Thĩinĩ wa gĩcunjĩ gĩkĩ, nĩ tũkwarĩrĩria ũrĩa Shaitani ahũthagĩra “maheeni ma tũhũ” nĩguo acenjie mwĩcirĩrie witũ. Nĩ tũkwĩruta ũhoro wĩgiĩ “mawara” make matatũ. (Ef. 6:11) Nakĩo gĩcunjĩ kĩrĩa kĩrũmĩrĩire nĩ kĩarĩrĩirie ũrĩa tũngĩeheria mwĩcirĩrie o wothe mũũru tũngĩkorũo naguo uumanĩte na mawara make. Rekei twambe twarĩrĩrie maũndũ marĩa tũngĩĩruta kuumana na ũrĩa Shaitani aahĩtithirie Aisiraeli thutha wao kũingĩra Bũrũri wa Kĩĩranĩro.

NĨ AAMAHEENEREIRIE MATHATHAIYE MĨHIANANO

4-6. Kũringana na Gũcokerithia Maathani 11:10-15, nĩ mogarũrũku marĩkũ megiĩ ũrĩmi Aisiraeli maabataraga gwĩka maingĩra Bũrũri wa Kĩĩranĩro?

⁴ Shaitani aahũthĩrire wara kũheenereria Aisiraeli mathathaiye mĩhianano. Eekire ũguo atĩa? Nĩ aamenyaga atĩ nĩ maabataraga irio, na kwoguo akĩhũthĩra ũndũ ũcio kũmahĩtithia. Thutha wa Aisiraeli kũingĩra Bũrũri-inĩ wa Kĩĩranĩro, no mũhaka mangĩerutire kũhũthĩra njĩra njerũ cia ũrĩmi. Rĩrĩa maarĩ Misiri, Aisiraeli maaitagĩrĩria mĩgũnda yao maĩ makĩhũthĩra maĩ ma Rũũĩ rwa Nailo. No thĩinĩ wa Bũrũri ũcio wa Kĩĩranĩro gũtiarĩ na njũũĩ nene, kwoguo nĩguo makũrie irio, meehokaga maaĩ ma mbura na ime. (Thoma Gũcokerithia Maathani 11:10-15; Isa. 18:4, 5) Nĩ ũndũ ũcio, no mũhaka Aisiraeli mangĩerutire kũhũthĩra njĩra njerũ cia ũrĩmi. Ũndũ ũcio ndwarĩ mũhũthũ tondũ andũ aingĩ arĩa mooĩ ũhoro wa ũrĩmi nĩ maakuĩrĩire werũ-inĩ.

⁵ Jehova nĩ aataarĩirie andũ ake atĩ maũndũ mao nĩ maacenjetie. Aacokire akĩmahe ũtaaro ũyũ, ũrĩa ũngĩoneka ta ũtahutanĩtie na ũhoro wa ũrĩmi: “Mwĩmenyererei ngoro cianyu itikanaheeneke mũgarũrũke mũthathaiye ngai ingĩ na mũcinamĩrĩre.” (Gũcok. 11:16, 17) Nĩ kĩĩ gĩatũmire Jehova ahe Aisiraeli mũkaana wĩgiĩ gũthathaiya ngai cia maheeni na aragia ũhoro wĩgiĩ kwĩruta njĩra njerũ cia ũrĩmi?

⁶ Jehova nĩ aamenyaga atĩ Aisiraeli nĩ maangĩendire kwĩruta njĩra cia ũrĩmi kuuma kũrĩ andũ mataamũthathayagia arĩa maamathiũrũrũkĩirie. Ũrĩa kũrĩ nĩ atĩ, andũ acio maamathiũrũrũkĩirie nĩ mooĩ maũndũ maingĩ megiĩ ũrĩmi gũkĩra Aisiraeli, na kwoguo Aisiraeli nĩ mangĩerutire maũndũ ma bata kuuma kũrĩ o. No nĩ haarĩ na ũgwati. Arĩmi acio Akanaani maathathayagia Baali na kwoguo mwĩcirĩrie wao nĩ wathũkĩtio nĩ ũthathayia ũcio. Meetĩkĩtie atĩ igũrũ nĩ rĩa Baali na atĩ nĩwe wamaheaga mbura. Jehova ndeendaga andũ ake mahĩtithio nĩ mawĩtĩkio ta macio ma maheeni. O na kũrĩ ũguo, maita maingĩ Aisiraeli nĩ maathurire gũthathaiya Baali. (Ndar. 25:3, 5; Atiir. 2:13; 1 Ath. 18:18) Rĩu reke tuone ũrĩa Shaitani aahotire kũnyita Aisiraeli mĩgwate.

MAŨNDŨ MATATŨ SHAITANI AAHŨTHĨRIRE KŨNYITA AISIRAELI MĨGWATE

7. Nĩ ũndũ ũrĩkũ wageririe wĩtĩkio wa Aisiraeli thutha wao kũingĩra Bũrũri wa Kĩĩranĩro?

⁷ Ũndũ ũmwe Shaitani aahũthĩrire na njĩra ya wara nĩ kwarahũra merirĩria ma ndũire ma kuona bũrũri wao ũkiura mbura ya gũkũria irio. Gwakoragwo na mbura nini mũno Bũrũri-inĩ ũcio wa Kĩĩranĩro kuuma mũthia-inĩ wa mweri wa Ĩpuro nginya Septemba o mwaka. Nĩguo Aisiraeli mathiĩ na mbere gũtũũra na makorũo na irio cia kũigana, meehokaga mbura ĩrĩa kaingĩ yambagĩrĩria kuura mweri wa Oktomba. Shaitani aaheenirie Aisiraeli atĩ nĩguo magaacĩre maabatiĩ gwĩka ta ũrĩa andũ arĩa maamathiũrũrũkĩirie meekaga, o acio mataathathayagia Jehova. Andũ acio meetĩkĩtie atĩ harĩ magongona maabataraga gwĩka nĩgetha ngai ciao ciĩtĩkĩre kuuria mbura ĩrĩa maabataraga. Aisiraeli arĩa mataarĩ na wĩtĩkio harĩ Jehova meetĩkĩtie atĩ gwĩka ũguo tu nokuo kũngĩatũmire riũa rĩtikaare ihinda inene, na kwoguo makĩrutĩra ngai ya maheeni yetagwo Baali magongona marĩa maarutagwo nĩ andũ acio maamathiũrũrũkĩirie.

8. Ũndũ wa kerĩ ũrĩa Shaitani aahũthĩrire nĩ ũrĩkũ? Taarĩria.

⁸ Ũndũ wa kerĩ ũrĩa Shaitani aahũthĩrire na njĩra ya wara kũheenia Aisiraeli nĩ gũtũma makũrie merirĩria mathũku. Ndũrĩrĩ iria itaatungatagĩra Jehova ciathathayagia ngai ciao na njĩra ya gwĩka maũndũ moru ma ũũra-thoni. Thĩinĩ wa ũthathayia ũcio wa ũũra-thoni, nĩ gwakoragwo na ũmaraya wa atumia na wa arũme thĩinĩ wa hekarũ. Ngomanio cia arũme kwa arũme na atumia gwa atumia na mĩthemba ĩngĩ ya ngomanio itagĩrĩire cioonagwo irĩ njĩtĩkĩrĩku na irĩ njega! (Gũcok. 23:17, 18; 1 Ath. 14:24) Andũ acio mataathathayagia Jehova meetĩkĩtie atĩ gwĩka maũndũ macio nĩkuo gwatũmaga ngai ciao iteithie bũrũri ũkorũo na bũthi wa irio. Aisiraeli aingĩ nĩ maagucĩrĩirio nĩ maũndũ macio meekagwo nĩ ndũrĩrĩ icio ma ngomanio itagĩrĩire, na magĩtĩkĩra kũheenererio matungatagĩre ngai cia maheeni. Na njĩra ĩyo makĩnyitwo mĩgwate nĩ Shaitani.

9. Kũringana na Hosea 2:16, 17, Shaitani aathũkirie atĩa muonere wa Aisiraeli kwerekera Jehova?

⁹ Ũndũ wa gatatũ ũrĩa Shaitani aahũthĩrire nĩ gũthũkia muonere wa Aisiraeli kwerekera Jehova. Matukũ-inĩ ma mũnabii Jeremia, Jehova nĩ ooigire atĩ anabii a maheeni nĩ maatũmire andũ ake mariganĩrũo nĩ rĩĩtwa rĩake “nĩ ũndũ wa Baali.” (Jer. 23:27) Andũ a Ngai maatigire kũhũthĩra rĩĩtwa rĩa Jehova, makĩambĩrĩria kũhũthĩra rĩĩtwa Baali rĩrĩa riugĩte “Mwene” kana “Mwathi.” Ũndũ ũcio nĩ wathũkagia muonere wa Aisiraeli makaga kuona ngũrani gatagatĩ ka Jehova na Baali, na nĩ watũmaga ũkorũo ũrĩ ũndũ mũhũthũ gũtukania ũthathayia wa Baali na ũthathayia wa Jehova.​—Thoma Hosea 2:16, 17 na kohoro ka magũrũ-inĩ.

MAŨNDŨ MARĨA SHAITANI AHŨTHAGĨRA MAHINDA-INĨ MAYA

10. Nĩ maũndũ marĩkũ Shaitani ahũthagĩra kũnyita andũ mahinda-inĩ maya?

¹⁰ Maũndũ macio nomo Shaitani ahũthagĩra mahinda-inĩ maya. Anyitaga andũ na njĩra ya kũhũthĩra ũũru merirĩria mao ma ndũire, kũgaathĩrĩria ngomanio itagĩrĩire, na gũthũkia muonere wa andũ kwerekera Jehova. Rekei twambe twarĩrĩrie ũndũ ũcio wa gatatũ ahũthagĩra.

11. Shaitani athũkagia muonere wa andũ atĩa kwerekera Jehova?

¹¹ Shaitani nĩ athũkagia muonere wa andũ kwerekera Jehova. Thutha wa atũmwo a Jesu gũkua, andũ amwe arĩa meeĩtaga Akristiano nĩ maambĩrĩirie gũtheremia morutani ma maheeni. (Atũm. 20:29, 30; 2 Thes. 2:3) Aregenyũki acio nĩ maambĩrĩirie gũthũkia muonere wa andũ wĩgiĩ Ngai ũrĩa ũmwe wa ma. Kwa ngerekano, nĩ maatigire kũhũthĩra rĩĩtwa rĩa Ngai thĩinĩ wa Bibilia iria maakobagia na makĩambĩrĩria kũhũthĩra marĩĩtwa ma ũnene ta “Mwathani.” Nĩ ũndũ wa kweheria rĩĩtwa rĩa Ngai na ithenya rĩarĩo magekĩra “Mwathani,” nĩ maatũmaga ũkorũo ũrĩ ũndũ mũritũ harĩ athomi a Bibilia kũmenya ngũrani ya Jehova na “athani” arĩa angĩ magwetetwo Maandĩko-inĩ. (1 Kor. 8:5) Maahũthagĩra kiugo “Mwathani” harĩ Jehova na harĩ Jesu, na kwoguo ũgakorũo ũrĩ ũndũ mũritũ harĩ andũ gũtaũkĩrũo atĩ Jehova na Mũriũ wake nĩ andũ erĩ ngũrani na o ũmwe wao arĩ na itemi rĩake. (Joh. 17:3) Ũndũ ũcio nĩguo watũmire kũgĩe na ũrutani wa Ũtatũ, ũrutani ũrĩa ũtakoragwo Kiugo-inĩ kĩa Ngai. Nĩ ũndũ ũcio, andũ aingĩ monaga Ngai arĩ kĩriga na metĩkĩtie atĩ tũtingĩhota kũmũmenya. Na githĩ macio ti maheeni moru mũno!​—Atũm. 17:27.

12. Nĩ maũndũ marĩkũ matheremagio nĩ ndini ya maheeni? Moimĩrĩro makoragwo marĩ marĩkũ kũringana na Aroma 1:28-31?

¹² Shaitani nĩ atũmaga andũ makũrie merirĩria mathũku. Hĩndĩ ya Isiraeli ya tene, Shaitani aahũthĩrire ndini ya maheeni gũtheremia maũndũ ma ũũra-thoni. O na ũmũthĩ noguo ekaga. Ndini ya maheeni nĩ ĩtĩkagĩria maũndũ ma ũũra-thoni o na ĩkagaathĩrĩria mĩtugo ya rũtũrĩko. Ũndũ ũcio nĩ ũtũmĩte andũ aingĩ arĩa meĩtaga ndungata cia Ngai matiganĩrie ithimi ciake ciĩgiĩ mĩtugo. Mũtũmwo Paulo nĩ oonanirie moimĩrĩro ma ũndũ ũcio makoragwo marĩ marĩkũ thĩinĩ wa marũa make kũrĩ Aroma. (Thoma Aroma 1:28-31.) “Maũndũ matagĩrĩire” nĩ hamwe na mĩthemba yothe ya ngomanio itagĩrĩire, o ũndũ ũmwe na ngomanio cia arũme kwa arũme na cia atumia gwa atumia. (Rom. 1:24-27, 32; Kũg. 2:20) Na githĩ ti ũndũ wa bata tũrũmagĩrĩre morutani ma Bibilia na kinyi!

13. Ũndũ ũngĩ Shaitani ahũthagĩra nĩ ũrĩkũ?

¹³ Shaitani nĩ ahũthagĩra ũũru merirĩria ma ndũire. Tũkoragwo na merirĩria ma ndũire ma kwĩruta ũndũ mũna ũngĩtũteithia kũhingia mabataro maitũ na ma famĩlĩ citũ. (1 Tim. 5:8) Kaingĩ no twĩrute maũndũ ta macio na njĩra ya gũthiĩ cukuru na gũthoma na kĩyo. No nĩ twagĩrĩirũo kwĩmenyerera. Thĩinĩ wa mabũrũri maingĩ, andũ matirutagwo o maũndũ marĩa mangĩmateithia ũtũũro-inĩ, no marutagwo nginya ũrĩa mangĩhũthĩra ũũgĩ wa gũkũ thĩ. Arutwo mekĩragwo ngoro gwĩkĩrĩra nganja kana Ngai arĩ kuo na kwaga kũhe Bibilia gĩtĩo. Meragwo atĩ andũ arĩa othe athomu metĩkĩtie atĩ muoyo waambĩrĩirie na njĩra ya indo kwĩyumĩria cio nyene. (Rom. 1:21-23) Morutani ta macio makoragwo marĩ mũgarũ na “ũũgĩ wa Ngai.”​—1 Kor. 1:19-21; 3:18-20.

14. Ũũgĩ wa gũkũ thĩ ũtũmaga andũ meke atĩa?

¹⁴ Ũũgĩ wa gũkũ thĩ nĩ ũhũthagia kana ũkaregana na ithimi cia Jehova cia ũthingu. Ndũteithagia andũ gũkũria maciaro ma roho wa Ngai, no handũ ha ũguo ũtũmaga andũ meke “ciĩko cia kĩĩmwĩrĩ.” (Gal. 5:19-23) Ũtũmaga andũ magĩe na mwĩtĩo, na tondũ wa ũguo magatuĩka “eyendi.” (2 Tim. 3:2-4) Ngumo icio nĩ ngũrani na mwerekera wa ũhooreri na wĩnyihia ũrĩa ndungata cia Ngai ciĩkagĩrũo ngoro gũkũria. (2 Sam. 22:28) Akristiano amwe arĩa mathomete gĩthomo kĩa yunivasĩtĩ nĩ mambĩrĩirie gwĩciria kũringana na mwĩcirĩrie wa gũkũ thĩ handũ ha mwĩcirĩrie wa Ngai. Rekei tuone ũndũ ũmwe ũngĩkĩka tũngĩhũthia ũndũ ũcio.

15-16. Nĩ ũndũ ũrĩkũ ũreruta kuumana na ũhoro wa mwarĩ wa Ithe witũ ũmwe?

¹⁵ Mwarĩ wa Ithe witũ ũmwe ũkoretwo ũtungata-inĩ wa mahinda mothe ihinda rĩa makĩria ma mĩaka 15 ooigire ũũ: “Tondũ ndaarĩ Mũira wa Jehova mũbatithie, nĩ ndathomete na ngaigua ũhoro wa mogwati ma gĩthomo kĩa yunivasĩtĩ, no ndioyaga ũndũ ũcio na ũritũ. Ndionaga ta ũtaaro ũcio wahutagia.” Hihi moimĩrĩro maarĩ marĩkũ? Ooigire ũũ: “Maũndũ marĩa ndaathomagĩra mooyaga mahinda na hinya wakwa mũingĩ ũũ atĩ ndiahotaga kũgĩa na mahinda maiganu ma kũhoya Jehova ta ũrĩa ndekaga hau kabere, ndaakoragwo nogete mũno nginya ngaremwo kũgĩa na ndeereti cia Bibilia hamwe na andũ arĩa angĩ, na ngaremwo nginya kũhaarĩria mĩcemanio. Wega nĩ atĩ rĩrĩa ndataũkĩirũo atĩ gũthingata mũno gĩthomo kĩa igũrũ nĩ gwathũkagia ũrata wakwa na Jehova, nĩ ndamenyire atĩ nĩ ndabataraga gũtigana nakĩo. Na nĩguo ndekire.”

¹⁶ Hihi gĩthomo kĩa igũrũ kĩarĩ na moimĩrĩro marĩkũ harĩ mwĩcirĩrie wa mwarĩ wa Ithe witũ ũcio? Ooigire ũũ: “Nĩ njonokaga kuuga atĩ gĩthomo kĩrĩa ndathingataga kĩandutire gwĩkĩrĩra andũ arĩa angĩ nganja, mũno makĩria aarĩ na ariũ a Ithe witũ, na ningĩ gĩkĩnduta kwĩrĩgagĩrĩra maũndũ maingĩ kuuma kũrĩ o, na kwĩyamũrania nao. Ndooire ihinda iraihu mũno gũcenjia mwĩcirĩrie ũcio. Ũndũ ũcio nĩ watũmire nyone atĩ nĩ ũgwati kũhũthia mĩkaana ĩrĩa tũheagwo nĩ Ithe witũ wa igũrũ kũgerera ithondeka rĩake. Jehova nĩ aanjũĩ wega gũkĩra ũrĩa niĩ ndeyũĩ. Na arĩ korũo nĩ ndathikĩrĩirie!”

17. (a) Twagĩrĩirũo gũtua itua rĩrĩkũ? (b) Nĩ ũndũ ũrĩkũ tũkaarĩrĩria gĩcunjĩ-inĩ kĩrĩa kĩrũmĩrĩire?

¹⁷ Tua itua rĩa kwaga kũnyitwo mĩgwate “kũgerera ũũgĩ wa andũ na maheeni ma tũhũ” ma thĩ ya Shaitani. Wĩgitagĩre hingo ciothe kuumana na mawara ma Shaitani. (1 Kor. 3:18; 2 Kor. 2:11) Ndũkanareke athũkie muonere waku kwerekera Jehova. Ikaraga kũringana na ithimi cia ũthingu cia Jehova. Na ndũkanareke Shaitani akũheenie ũhũthie ũtaaro wa Jehova. No hihi wagĩrĩirũo gwĩka atĩa ũngĩmenya atĩ nĩ ũthũkĩtio nĩ mwĩcirĩrie wa thĩ ĩno? Gĩcunjĩ kĩrĩa kĩrũmĩrĩire nĩ kĩonanĩtie ũrĩa Kiugo kĩa Ngai kĩngĩtũteithia gũtharũria nginya mĩtugo na meciria marĩa “marũmĩte mũno.”​—2 Kor. 10:4, 5.