Hihi nĩ Ũbatiĩ Gũtiga Gũtwarithagia Ngaari?

Angĩkorũo nĩ ũcemanĩtie na ũndũ ta ũcio-rĩ, hihi nĩ kĩĩ kĩngĩgũteithia kũmenya kana nĩ ũbatiĩ gũtiga gũtwarithagia ngaari?

Mabũrũri-inĩ mamwe, matereba arĩa makinyĩtie mĩaka ĩigana ũna na nĩ marabatara kwerũhia marũa mao ma ũtereba, no mũhaka mambe mahĩtũkio nĩ ndagĩtarĩ atĩ nĩ maragĩrĩra gũthiĩ na mbere gũtwarithia ngaari. Akristiano arĩa maikaraga mabũrũri-inĩ ta macio nĩ mathĩkagĩra watho ũcio. (Rom. 13:1) No gũtekũmakania kũrĩa ũikaraga, harĩ na maũndũ mangĩgũteithia kũmenya kana ũrĩ o na ũhoti wa gũtwarithia ngaari na njĩra njega.

THUTHURIA ŨHOTI WAKU

Kĩama kĩmwe kĩrũmbũyanagia na maũndũ megiĩ andũ akũrũ kiugaga mũndũ abatiĩ kwĩyũria ciũria ta ici:

• Hihi nĩ nditũhagĩrũo gũthoma wega marũũri ma barabara kana kuona wega ũtukũ?

• Hihi nĩ nyambĩtie kũremwo gũikia maitho na ihenya mĩena yothe ngĩtwarithia ngaari?

• Hihi nĩ harĩ maũndũ nditũhagĩrũo gwĩka na ihenya, ta gũkinyũkia maguta nĩguo nginye mburĩki rĩrĩa kwabatarania?

• Hihi nĩ ndwarithagia ngaari kahora nginya ngatũma kũgĩe njamu?

• Hihi ndanakuhĩrĩria kũgĩa na aksidenti maita maigana ũna, kana ngaari yakwa ĩkamondamondeka kũndũ kũingĩ nĩ ũndũ wa kũgũtha indo barabara-inĩ?

• Hihi ndanarũgamio nĩ mũthigari nĩ ũndũ wa ũrĩa ndĩratwarithia ngaari?

• Hihi ndanacũnga ngĩtwarithia ngaari?

• Hihi harĩ ndawa hũthagĩra ingĩtũma nemwo gũtwarithia ngaari ũrĩa kwagĩrĩire?

• Hihi andũ a famĩlĩ kana arata nĩ maratangĩka nĩ ũndũ wa ũrĩa ndwarithagia ngaari?

Angĩkorũo nĩ harĩ kĩũria kĩmwe kana igĩrĩ wacokia ĩĩ, no ũbatare gwĩka mogarũrũku. Kwa ngerekano, no ũbatare kũnyihanyihia maita marĩa ũtwarithagia ngaari, makĩria mathaa ma ũtukũ. Ningĩ nĩ wega gũikara ũgĩthuthuragia ũhoti waku wa gũtwarithia ngaari. No wĩre mũndũ wa famĩlĩ kana mũrata akũhe mawoni make ũhoro-inĩ wĩgiĩ ũrĩa ũtwarithagia ngaari. Ũndũ ũngĩ ũngĩka nĩ gũcoka kĩrathi kĩa ũtereba wĩna muoroto wa kwagagĩria ũhoti waku wa gũtwarithia ngaari. No angĩkorũo nĩ harĩ ciũria cigana ũna wacokia ĩĩ, no ũkorũo ũrĩ ũndũ wa ũũgĩ gũtiga gũtwarithagia ngaari.a

RŨMĨRĨRA MOTAARO MA BIBILIA

No twage kũmenya na ihenya atĩ nĩ tũrathiĩ o tũkĩremagĩrĩrũo gũtwarithia ngaari. Na no ũkorũo ũtarĩ ũndũ mũhũthũ gũtua itua rĩa gũtiga gũtwarithagia ngaari. Gũkĩrĩ ũguo-rĩ, nĩ motaaro marĩkũ ma Bibilia mangĩgũteithia gũkorũo na muonere ũrĩa wagĩrĩire nĩguo ũhote gũtua itua rĩa ũũgĩ? Reke twarĩrĩrie motaaro merĩ.

Korũo ũrĩ mwĩnyihia. (Thim. 11:2) O ũrĩa tũrakũra, noguo ũhoti witũ wa kuona na wa kũigua ũthiaga ũnyihĩte, o hamwe na hinya wa mwĩrĩ. Kwa ngerekano, o ũrĩa mũndũ arakũra no atige gũthaakaga mĩthaako ĩmwe nĩ kuona atĩ no agurario na njĩra hũthũ. Ũguo noguo gũthiaga ũhoro-inĩ wĩgiĩ gũtwarithia ngaari. Mũndũ mwĩnyihia nĩ atuaga itua rĩa gũtiga gũtwarithia ngaari rĩrĩa ona atĩ ũndũ ũcio no ũmũingĩrie ũgwati-inĩ. (Thim. 22:3) Ningĩ mũndũ mwĩnyihia angĩgweterũo ũndũ ũcio nĩ arĩa angĩ, nĩ akoragwo ehaarĩirie kũmathikĩrĩria na kũrũmĩrĩra ũtaaro wao.—Ringithania 2 Samueli 21:​15-17.

Wĩtheme ihĩtia rĩa ũiti wa thakame. (Gũcok. 22:8) Ngaari no ĩkorũo ĩrĩ ũgwati ĩngĩaga gũtwarithio na njĩra njega. Mũndũ angĩthiĩ na mbere gũtwarithagia ngaari o na thutha wa gũthiĩ akĩremagĩrĩrũo, no aingĩrie muoyo wake na wa arĩa angĩ ũgwati-inĩ. Ningĩ no agĩe na ihĩtia rĩa ũiti wa thakame angĩka aksidenti na orage mũndũ.

Angĩkorũo nĩ ũrabatara gũtua itua rĩa gũtiga gũtwarithagia ngaari, ndũkone ta arĩa angĩ megũkwagĩra kĩene kana mone ũtarĩ wa bata. Ririkana atĩ Jehova nĩ akwendete nĩ ũndũ wa ngumo ciaku njega, ta wĩnyihia na kuonania atĩ nĩ wĩciragia andũ arĩa angĩ. Na ningĩ augĩte atĩ nĩ arĩkũrũmbũyagia na agakũũmĩrĩria. (Isa. 46:4) Ndarĩ hĩndĩ agaagũtiga. Kwoguo mũhoe agũteithie kũhũthĩra ũũgĩ na motaaro ma Bibilia ũgĩtua itua rĩa kana nĩ ũgũtiga gũtwarithagia ngaari.