‘Tũũriai Ũrũmwe wa Roho’
MŨTŨMWO Paulo eerire Akristiano a Efeso ‘makiranagĩrĩrie o mũndũ na ũrĩa ũngĩ marĩ na wendo, o makĩĩrutanagĩria biũ gũtũũria ũrũmwe wa roho thĩinĩ wa thayũ ũrĩa ũmanyitithanagia.’—Ef. 4:2, 3.
Tondũ “ũrũmwe” ũrĩa tũkenagĩra nĩ “wa roho,” ũguo nĩ kuuga ũkoragwo uumanĩte na hinya wa Ngai wa gwĩka maũndũ. O na kũrĩ ũguo, Paulo oonanirie atĩ kĩyo nĩ kĩrabatarania nĩguo ũrũmwe ũcio ũtũũre. O Mũkristiano arĩ na itemi rĩa “gũtũũria ũrũmwe wa roho.”
Kwa ngerekano, mũndũ angĩkũhe ngaari njerũ ĩrĩ kĩheo-rĩ, nũũ wĩna ũigĩrĩrĩki wa kũmĩmenyerera? Hatarĩ nganja nĩwe. Kwoguo ngaari ĩyo ĩngĩthũka nĩ ũndũ wa kwaga kũmĩmenyerera, ndũngĩcokereria mahĩtia ũrĩa ũkũheete kĩheo kĩu.
Ũndũ ũmwe na ũcio, o na gũtuĩka ũrũmwe witũ ũkoragwo ũrĩ kĩheo kuuma kũrĩ Ngai, o ũmwe witũ arĩ na ũigĩrĩrĩki wa kũũtũũria. Kwoguo angĩkorũo tũtiraiguithania na mũrũ kana mwarĩ wa Ithe witũ, no twĩyũrie, ‘Hihi nĩ ndĩrerutanĩria kũhingia itemi rĩakwa rĩa gũtũũria ũrũmwe wa roho na njĩra ya gũcokia thayũ?’
‘WĨRUTANAGĨRIE BIŨ’ GŨTŨŨRIA ŨRŨMWE
O ta ũrĩa Paulo oonanirie, rĩmwe no tũbatare kwĩrutanĩria biũ gũtũũria ũrũmwe wa roho, makĩria rĩrĩa tũhĩtĩirio nĩ mũrũ kana mwarĩ wa Ithe witũ. Hihi gũtũũria ũrũmwe nĩ kuuga atĩ hingo ciothe nĩ tũbatiĩ kwarĩrĩria na ũrĩa ũtũhĩtĩirie igũrũ rĩgiĩ ũrĩa atũtuurithĩtie? Aca to mũhaka. Nĩ wega wĩyũrie, ‘Kwarĩrĩria thĩna ũcio nĩ thayũ gũkũrehe-ĩ, kana nĩ gũthũkia gũgũthũkia maũndũ makĩria?’ Rĩmwe ũndũ ũrĩa wa ũũgĩ nĩ kuohera mũndũ ũcio kana kwaga gũtindanĩra na ũhoro ũcio.—Thim. 19:11; Mar. 11:25.
Wĩyũrie, ‘Kwarĩrĩria thĩna ũcio nĩ thayũ gũkũrehe-ĩ, kana nĩ gũthũkia gũgũthũkia maũndũ makĩria?’
O ta ũrĩa Mũtũmwo Paulo aaugire, rekei tũthiĩ na mbere ‘gũkiranagĩrĩria o mũndũ na ũrĩa ũngĩ tũrĩ na wendo.’ (Ef. 4:2) Ibuku rĩmwe riugaga atĩ ciugo icio ningĩ no itaũrũo “mamũkagĩrei o ũrĩa matariĩ.” Ũguo nĩ kuuga tũbatiĩ kũririkana atĩ Akristiano arĩa angĩ ti akinyanĩru o ta ũrĩa o na ithuĩ tũtarĩ akinyanĩru. Ũrĩa kũrĩ nĩ atĩ nĩ twĩrutanagĩria ‘kwĩhumba ũmũndũ mwerũ.’ (Ef. 4:23, 24) O na kũrĩ ũguo, gũtirĩ o na ũmwe witũ ũngĩka ũguo na njĩra nginyanĩru. (Rom. 3:23) Tũngĩririkanaga ũndũ ũcio, nĩ ũrĩkoragwo ũrĩ ũndũ mũhũthũ gũkirĩrĩria arĩa angĩ, kũmohera, na kwoguo ‘tũgatũũria ũrũmwe wa roho.’
Tũngĩohagĩra arĩa angĩ na tũkaga gũtindanĩra na mahĩtia mao, nĩ tũrĩthiaga na mbere gũkenera ‘thayũ ũrĩa ũtũnyitithanagia.’ Kiugo gĩa Kĩngiriki kĩrĩa gĩtaũrĩtwo “ũmũnyitithanagia” thĩinĩ wa Aefeso 4:3, gĩtaũrĩtwo “nga” thĩinĩ wa Akolosai 2:19. Nga nĩ mĩkiha ĩrĩ hinya ĩrĩa ĩnyitithanagia ihĩndĩ rĩmwe na rĩrĩa rĩngĩ thĩinĩ wa mwĩrĩ. Na njĩra o ta ĩyo, thayũ na wendo witũ harĩ Akristiano arĩa angĩ nĩ irĩtũteithagia gũtũũria ũrata hamwe nao o na rĩrĩa twaga gwĩtĩkania maũndũ-inĩ mamwe.
Kwoguo rĩrĩa Mũkristiano ũngĩ akũhĩtĩria kana agũtuurithia, geria gũtaũkĩrũo nĩwe handũ ha kũmũmenereria. (Kol. 3:12) Tondũ ithuothe tũrĩ andũ matarĩ akinyanĩru, no nginya akorũo o nawe wanatuurithia arĩa angĩ. Kũririkanaga ũguo nĩ kũrĩgũteithagia kũhingia itemi rĩaku harĩ “gũtũũria ũrũmwe wa roho.”