Ibuku rĩa Ayubu no Rĩgũteithie Rĩrĩa Ũrathĩnĩka

1-2. Tũrabatara gũthoma ibuku rĩa Ayubu nĩkĩ?

HIHI nĩ wĩrĩgĩte gũthoma ibuku rĩa Ayubu? O na gũtuĩka rĩaandĩkirũo mĩaka ta 3,500 mĩhĩtũku, nĩ rĩmwe rĩa mabuku marĩa monagwo marĩ ma bata mũno. Andũ nĩ magathagĩrĩria mwandĩki wa ibuku rĩu tondũ ahũthĩrĩte ciugo iragucĩrĩria, irahutia ngoro, na irataũkĩka na njĩra hũthũ. O na gũtuĩka Musa nĩwe wandĩkire ibuku rĩu, ũhoro ũcio aandĩkire waumĩte kũrĩ Jehova.—2 Tim. 3:16.

² Ibuku rĩa Ayubu nĩ gĩcunjĩ kĩa bata mũno kĩa Bibilia. Nĩkĩ? Ũndũ ũmwe nĩ atĩ nĩ rĩtũteithagia gũtaũkĩrũo atĩ araika na andũ nĩ marabatara gwĩtuĩra kana nĩ megũtetera rĩĩtwa rĩa Jehova. Ningĩ nĩ rĩtũrutaga ũhoro wa ngumo cia magegania cia Jehova, ta wendo, ũũgĩ, kĩhooto, na hinya. Kwa ngerekano, ibuku rĩa Ayubu rĩĩtĩte Jehova “Mwene-Hinya-Wothe” maita 31. Macio nĩ maita maingĩ gũkĩra marĩa rĩhũthĩrĩtwo mabuku-inĩ macio mangĩ ma Bibilia maturanĩirũo hamwe. Ningĩ ibuku rĩu nĩ rĩcokagia ciũria nyingĩ twĩyũragia ũtũũro-inĩ, ta kĩũria gĩkĩ gĩtũũrĩte gĩthumbũrĩte andũ aingĩ: Ngai etĩkĩrĩtie mathĩna nĩkĩ?

3. Gũthuthuria ibuku rĩa Ayubu kũngĩtũteithia atĩa?

³ O ta ũrĩa mũndũ ũrĩ kĩrĩma igũrũ ahotaga kuona wega kĩrĩa kĩmũthiũrũrũkĩirie, no taguo ibuku rĩa Ayubu rĩtũteithagia kuona mathĩna maitũ na muonere ũrĩa wagĩrĩire o ta wa Jehova. Rekei tuone ũrĩa ibuku rĩu rĩngĩtũteithia rĩrĩa tũrathĩnĩka. Nĩ tũkuona ũrĩa rũgano rwa Ayubu rũngĩateithirie Aisiraeli na ũrĩa o na ithuĩ rũngĩtũteithia. Ningĩ nĩ tũkuona ũrĩa tũngĩhũthĩra ibuku rĩa Ayubu gũteithia arĩa angĩ.

NGAI NĨ EETĨKĨRIRIE AYUBU ANYAMARĨKE

4. Ayubu aarĩ ngũrani atĩa na Aisiraeli amwe?

⁴ Hĩndĩ ĩrĩa Aisiraeli maarĩ ngombo bũrũri-inĩ wa Misiri, nĩ kwarĩ na mũndũ wetagwo Ayubu waikaraga bũrũri-inĩ wa Uzu, ũrĩa hihi warĩ hakuhĩ na gĩcigo kĩa Arabia. Ayubu aatungatagĩra Jehova arĩ mwĩhokeku, ngũrani na Aisiraeli amwe arĩa maambĩrĩirie gũthathaiya mĩhianano marĩ Misiri. (Josh. 24:14; Ezek. 20:8) Jehova aaugire ũũ igũrũ rĩgiĩ Ayubu: “Gũtirĩ ũngĩ take thĩinĩ wa thĩ.”a (Ayub. 1:8) Ayubu aarĩ mũtongu mũno na nĩwe warĩ na igweta mũno harĩ andũ othe a mwena ũcio wa Irathĩro. (Ayub. 1:3) No mũhaka akorũo Shaitani nĩ aarakaraga mũno nĩ kuona mũndũ wagaacĩrĩte mũno na watĩĩtwo nĩ andũ agĩtungatĩra Jehova arĩ mwĩhokeku.

5. Jehova eetĩkĩririe Ayubu anyamarĩke nĩkĩ? (Ayubu 1:​20-22; 2:​9, 10)

⁵ Shaitani aaugire atĩ Ayubu nĩ angĩatigire gũtungatĩra Jehova angĩacemanirie na mathĩna. (Ayub. 1:​7-11; 2:​2-5) Jehova nĩ eendete Ayubu mũno, no tondũ Shaitani nĩ eekĩrĩire nganja muoroto wa Ayubu, Jehova nĩ eetĩkĩririe Shaitani amũgerie nĩguo kuoneke kana aarĩtie ma. (Ayub. 1:​12-19; 2:​6-8) Shaitani nĩ aaniinĩire Ayubu mahiũ make, akĩũraga ciana ciake ikũmi, na akĩmũrehera mahũha maarĩ na ruo kuuma mũtwe nginya makinya ma magũrũ. No o na thutha wa Shaitani kũnyamaria Ayubu na gĩkĩro kĩnene ũguo, Ayubu ndaigana gũtiganĩria wĩkindĩru wake. (Thoma Ayubu 1:​20-22; 2:​9, 10.) Thutha-inĩ Jehova nĩ aahonirie Ayubu, akĩmũhe ũtonga mũingĩ na ciana ingĩ ikũmi, na andũ makĩambĩrĩria kũmũhe gĩtĩo rĩngĩ. Ningĩ Jehova nĩ aamũrathimire na ũtũũro mũraihu, tondũ nĩ aatũũrire mĩaka ĩngĩ 140, nginya akĩona rũciaro rwa kana rwa ciana ciake. (Ayub. 42:​10-13, 16) Ndungata cia Jehova cia tene ingĩerutire atĩa kuumana na rũgano rwa Ayubu, na ithuĩ tũngĩĩruta atĩa ũmũthĩ?

6. Rũgano rwa Ayubu rũngĩateithirie Aisiraeli atĩa? (Ningĩ rora mbica.)

⁶ Aisiraeli mangĩagunĩkire atĩa? Ũtũũro wa Aisiraeli marĩ Misiri ndwarĩ mũhũthũ. Kwa ngerekano, Joshua na Kalebu nĩ maatũũrire mĩaka mĩingĩ marĩ ngombo. Thutha ũcio nĩ moorũrire werũ-inĩ mĩaka 40 nĩ ũndũ wa ũremi wa Aisiraeli arĩa angĩ. Angĩkorũo Aisiraeli acio nĩ mooĩ rũgano rwa Ayubu, hatarĩ nganja nĩ rwamateithirie o hamwe na njiarũa ciao gũtaũkĩrũo atĩ Shaitani nĩwe ũtũmaga andũ mathĩnĩke no ti Ngai. Ningĩ nĩ maangĩataũkĩirũo wega kĩrĩa gĩtũmaga Ngai etĩkĩrie mathĩna, na ũrĩa akenagio nĩ andũ arĩa matũũragia wĩkindĩru na wĩhokeku wao.

7-8. Ibuku rĩa Ayubu rĩngĩteithia atĩa arĩa maracemania na mathĩna? Heana ngerekano.

⁷ Ithuĩ tũngĩgunĩka atĩa? Ũndũ wa kĩeha nĩ atĩ, andũ aingĩ ũmũthĩ nĩ matigĩte kwĩhoka Ngai tondũ matitaũkagĩrũo kĩrĩa gĩtũmaga andũ ega macemanie na maũndũ moru. Kwa ngerekano, ta wĩcirie ũhoro wa mwarĩ wa Ithe witũ ũmwe kuuma Rwanda wĩtagwo Hazel.b Arĩ mũnini nĩ eetĩkĩtie Ngai. No thutha-inĩ nĩ aacemanirie na maũndũ maingĩ moru. Aciari ake nĩ maatiganire na nyina akĩhikio nĩ mũthuri ũngĩ, ũrĩa wekaga Hazel maũndũ moru. Ningĩ arĩ tinĩnja nĩ aanyitirũo kĩa hinya. Hazel nĩ aathiire kanitha-inĩ yao nĩguo omĩrĩrio, no ndaateithĩkire. Hazel nĩ acokire akĩandĩkĩra Ngai marũa. Marũa-inĩ macio aaugĩte ũũ: “Ngai nĩ ngũhoete, na ngerutanĩria gwĩka maũndũ marĩa mega, no ũndĩhĩte wega na ũũru. Ndigũcoka gũgũtungatĩra, na rĩu ndĩkaga ũndũ ũrĩa wothe ũrangenia.” Hatarĩ nganja nĩ tũiguagĩra tha andũ ta Hazel, arĩa mahĩtithĩtio magakinyĩrĩra gwĩtĩkia atĩ Ngai nĩwe ũmarehagĩra mathĩna.

⁸ No ithuĩ nĩ twĩrutĩte kuumana na ibuku rĩa Ayubu atĩ Ngai tiwe ũtũrehagĩra mathĩna, no nĩ Shaitani. Ningĩ nĩ twĩrutĩte atĩ tũtibatiĩ gũtua atĩ arĩa marathĩnĩka nĩ kũgetha maragetha kĩrĩa mahandĩte. Bibilia yugaga atĩ “ihinda na maũndũ materĩgĩrĩirũo” no makore mũndũ o wothe hĩndĩ o yothe. (Koh. 9:11; Ayub. 4:​1, 8) Na rĩrĩa twakirĩrĩria magerio tũrĩ ehokeku, nĩ tũheaga Jehova mweke wa kuonania atĩ Shaitani nĩ mũheenania. Na njĩra ĩyo tũgateithĩrĩria harĩ gũtetera rĩĩtwa rĩa Jehova. (Ayub. 2:3; Thim. 27:11) Nĩ tũcokagia ngatho nĩ ũndũ wa maũndũ macio twĩrutĩte, tondũ nĩ matũteithagia kũmenya kĩrĩa gĩtũmaga tũcemanie na mathĩna. Thutha-inĩ Hazel nĩ eerutire Bibilia hamwe na Aira a Jehova, na akĩĩruta atĩ Ngai tiwe ũtũmaga andũ mathĩnĩke. Aaugire: “Nĩ ndahoire Ngai rĩngĩ na ngĩmũitũrũrĩra ngoro yakwa. Nderire Jehova atĩ rĩrĩa ndamwĩrĩte nĩ ndatiga kũmũtungatĩra, ũguo tiguo ndendaga gwĩka. Ndaugĩte ũguo tondũ ihinda-inĩ rĩu ndiamũĩ wega. Rĩu nĩ menyete atĩ Jehova nĩ anyendete na kwoguo nĩ njiguaga njiganĩire na ndĩ na gĩkeno.” Na githĩ tũtikenaga nĩ kũmenya kĩrĩa gĩtũmaga Ngai etĩkĩrie mathĩna? Reke rĩu tuone ũrĩa rũgano rwa Ayubu rũngĩtũteithia rĩrĩa tũracemania na magerio.

ŨRĨA RŨGANO RWA AYUBU RŨTŨTEITHAGIA GŨKIRĨRĨRIA

9. Taarĩria ũrĩa Ayubu aathĩnĩkire nĩ ũndũ wa mũrimũ. (Jakubu 5:11)

⁹ Ta hũũra mbica Ayubu aikarĩte mũhu-inĩ, aiyũire mahũha mwĩrĩ wothe na arĩ na ruo rũingĩ. Mũrimũ ũcio ũtũmĩte ahĩnje, na ngothi yake ĩkaira na ĩkambĩrĩria kũũnũka. Mwĩrĩ wake ndũrĩ na hinya, na aikarĩte thĩ agĩĩthũa na icunjĩ cia nyũngũ, agĩcayaga nĩ ruo. No o na Ayubu akĩnyamarĩkaga na njĩra ĩyo, nĩ aathiire na mbere gũkorũo arĩ mwĩhokeku harĩ Jehova. (Thoma Jakubu 5:11.) Nĩ kĩĩ kĩamũteithirie gũkirĩrĩria?

10. Nĩ kĩĩ kĩronania atĩ Ayubu nĩ aaiguaga arĩ na wĩyathi wa kwaria na Jehova?

¹⁰ Ayubu nĩ aaitũrũrĩire Jehova ngoro yake. (Ayub. 10:​1, 2; 16:20) Kwa ngerekano, mũrango wa gatatũ ũtwĩraga atĩ Ayubu nĩ aaririe arĩ na marũrũ nĩ ũndũ wa mathĩna marĩa maamũkorete, na eeciragia atĩ Jehova nĩwe wamũreheire mathĩna macio. Na rĩrĩa aaragia na arata ake atatũ, nĩ aateteire wĩkindĩru wake rĩngĩ na rĩngĩ, na kaingĩ eerekagĩria ciugo ciake harĩ Jehova. Ciugo cia Ayubu cionanagia ihinda-inĩ rĩu nĩ eeyonaga arĩ mũthingu gũkĩra Ngai. (Ayub. 10:​1-3; 32:​1, 2; 35:​1, 2) No nĩ aacokire akiuga atĩ nĩ aarĩtie “mĩario ĩtarĩ mĩrũngĩrĩru” akĩgeria gũtetera wĩkindĩru wake. (Ayub. 6:​3, 26) Naguo mũrango wa 31 wonanagia atĩ Ayubu nĩ eendaga Ngai amũcokerie na auge atĩ ndaarĩ na mahĩtia. (Ayub. 31:35) No Ayubu ndaarĩ na kĩhooto gĩa kwĩra Jehova amũtaarĩrie kĩrĩa kĩratũma athĩnĩke.

11. Jehova aarũmbũyanirie atĩa na Ayubu?

¹¹ Thutha wa gwĩcũrania ũhoro wa Ayubu, nĩ tũtaũkagĩrũo atĩ aarĩirie Jehova na njĩra ĩyo tondũ aarĩ na ũrata mũrũmu hamwe nake, na aarĩ na ma biũ atĩ Jehova nĩ angĩamũtuĩrĩire na njĩra ya kĩhooto. Thutha-inĩ Jehova nĩ aarĩirie Ayubu kĩhuhũkanio-inĩ, no ndamũtaarĩirie kĩrĩa gĩatũmaga athĩnĩke. O na ndamũrũithirie nĩ ũndũ wa kwaria na marũrũ kana kũgeria kuonania atĩ nĩ mũthingu gũkĩra Ngai. Handũ ha ũguo, Jehova aamũrũngire ta ũrĩa mũciari ũrĩ wendo arũngaga mwana wake. Njĩra ĩyo Jehova aahũthĩrire nĩyo yarĩ njega biũ, tondũ Ayubu nĩ eenyihirie na agĩtĩkĩra atĩ ndoĩ maũndũ maingĩ, na akĩĩrira nĩ ũndũ wa maũndũ marĩa aaugĩte. (Ayub. 31:6; 40:​4, 5; 42:​1-6) Hihi rũgano rũu rũngĩateithirie atĩa ndungata cia Jehova cia mahinda ma tene, na rũngĩtũteithia atĩa ũmũthĩ?

12. Aisiraeli mangĩagunĩkire atĩa kuumana na rũgano rwa Ayubu?

¹² Aisiraeli mangĩagunĩkire atĩa? Nĩ mangĩerutire kuumana na rũgano rwa Ayubu. Kwa ngerekano, ta wĩcirie ũhoro wa Musa. Agĩtongoria rũrĩrĩ rwa Isiraeli, nĩ aacemanirie na moritũ maingĩ na maũndũ ma kũũraga ngoro. No ngũrani na Aisiraeli arĩa maatetagia Jehova kaingĩ, Musa nĩ aahoyaga Jehova rĩrĩa acemania na moritũ. (Tham. 16:​6-8; Ndar. 11:​10-14; 14:​1-4, 11; 16:​41, 49; 17:5) Ningĩ rũgano rwa Ayubu nĩ rũngĩateithirie Musa rĩrĩa aarũngagwo nĩ Jehova. Kwa ngerekano, Aisiraeli matigĩtie ihinda inini matonye Bũrũri wa Kĩĩranĩro, Musa nĩ aarakaririo nĩo na akĩaria “na mĩromo yake atecirĩtie,” akĩaga kũgoocithia rĩĩtwa rĩa Jehova. (Thab. 106:​32, 33) Ũndũ ũcio nĩ watũmire Musa orũo nĩ mweke wa kũingĩra Bũrũri wa Kĩĩranĩro. (Gũcok. 32:​50-52) No mũhaka akorũo Musa nĩ aatuurirũo nĩ ũndũ ũcio, ĩndĩ arĩ na wĩnyihia nĩ eetĩkĩrire kũrũngwo nĩ Jehova. Ningĩ rũgano rwa Ayubu nĩ rũngĩateithirie njiarũa cia Aisiraeli acio gũkirĩrĩria moritũ marĩa mangĩacemanirie namo. Mangĩecũranirie rũgano rũu, nĩ mangĩerutire atĩ no maitũrũrĩre Jehova ngoro ciao na metheme kwĩyona marĩ athingu gũkĩra Jehova. Ningĩ nĩ mangĩerutire atĩ nĩ mabatiĩ gwĩtĩkĩra kũrũngwo nĩ Jehova marĩ na wĩnyihia.

13. Rũgano rwa Ayubu rũngĩtũteithia atĩa gũkirĩrĩria? (Ahibirania 10:36)

¹³ Ithuĩ tũngĩgunĩka atĩa? Nĩ tũbataraga ũkirĩrĩria nĩ ũndũ wa moritũ marĩa tũcemanagia namo ũtũũro-inĩ. (Thoma Ahibirania 10:36.) Nĩ tũcemanagia na moritũ ta kũrwara, mathĩna ma famĩlĩ, na gũkuĩrũo nĩ mũndũ twendete. Na rĩmwe ciugo kana ciĩko cia arĩa angĩ no itũme tũritũhĩrũo o na makĩria gũkirĩrĩria. (Thim. 12:18) No ibuku rĩa Ayubu nĩ rĩtũrutaga atĩ no tũitũrũrĩre Jehova ngoro citũ tũrĩ na ma atĩ nĩ egũtũigua. (1 Joh. 5:14) Ndangĩtũrakarĩra tũngĩmwĩra ũrĩa tũraigua ngoro-inĩ, o na angĩkorũo rĩmwe no twĩkore tũkĩaria “mĩario ĩtarĩ mĩrũngĩrĩru” o ta Ayubu. Handũ ha ũguo, nĩ arĩtũheaga hinya na ũũgĩ ũrĩa tũrabatara nĩguo tũhote gũkirĩrĩria. (2 Maũ. 16:9; Jak. 1:5) Ningĩ Jehova nĩ atũrũngaga rĩrĩa kwabatarania, o ta ũrĩa eekire harĩ Ayubu. Ibuku rĩa Ayubu nĩ rĩtũrutaga ũrĩa tũngĩkirĩrĩria rĩrĩa twarũngwo kana twaheo ũtaaro nĩ Kiugo kĩa Ngai, ithondeka rĩake, kana arata agimaru kĩĩroho. (Ahib. 12:​5-7) O ta ũrĩa Ayubu aagunĩkire nĩ ũndũ wa gwĩtĩkĩra kũrũngwo nĩ Jehova, no taguo tũrĩgunĩkaga tweka ũguo. (2 Kor. 13:11) Na githĩ macio ti maũndũ ma bata twĩrutaga kuumana na ibuku rĩa Ayubu? Rekei rĩu tuone ũrĩa tũngĩhũthĩra rũgano rwa Ayubu gũteithia arĩa angĩ.

HŨTHAGĨRA IBUKU RĨA AYUBU GŨTEITHIA ARĨA ANGĨ

14. Nĩ njĩra ĩrĩkũ ĩmwe tũngĩhũthĩra gũtaarĩria mũndũ kĩrĩa gĩtũmaga tũthĩnĩke?

¹⁴ Hihi wanorio nĩ mũndũ ũtungata-inĩ kĩrĩa gĩtũmaga tũthĩnĩke? Wamũcokeirie atĩa? No gũkorũo waambire ũkĩmũtaarĩria ũrĩa gwathire mũgũnda-inĩ wa Edeni. Ũkĩmwĩra atĩ Shaitani nĩ aaheenirie aciari aitũ a mbere, Adamu na Hawa, agĩtũma maremere Ngai. (Kĩam. 3:​1-6) Ũgĩcoka ũkĩmwĩra atĩ ũremi ũcio wa Adamu na Hawa nĩguo ũtũmĩte thĩ yothe ĩkorũo na mathĩna na gĩkuũ. (Rom. 5:12) Ningĩ no gũkorũo nĩ wamũtaarĩirie atĩ Ngai nĩ arekete ihinda rĩhĩtũke nĩguo onanie atĩ Shaitani aarĩtie maheeni, na nĩguo andũ mamenyithio ũhoro mwega wa atĩ ihinda rĩũkĩte nĩ magaatũũra tene na tene marĩ akinyanĩru. (Kũg. 21:​3, 4) Hatarĩ nganja ĩyo nĩ njĩra njega ya gũcokia kĩũria kĩu, na no ĩkorũo na maumĩrĩro mega.

15. Tũngĩhũthĩra atĩa ibuku rĩa Ayubu gũtaarĩria mũndũ kĩrĩa gĩtũmaga tũthĩnĩke? (Ningĩ rora mbica.)

¹⁵ Ningĩ no tũhũthĩre ibuku rĩa Ayubu gũtaarĩria mũndũ kĩrĩa gĩtũmaga tũthĩnĩke. No wambe ũmũcokerie ngatho nĩ kũũria kĩũria kĩu kĩa bata. Ũcoke ũmwĩre atĩ mũthuri ũmwe warĩ mwĩhokeku wetagwo Ayubu o nake nĩ ooririe kĩrĩa gĩatũmaga athĩnĩke. O na eeciragia atĩ Ngai nĩwe wamũrehagĩra mathĩna. (Ayub. 7:​17-21) Kwahoteka mũndũ ũcio no akene kuona atĩ o na mahinda-inĩ ma tene andũ nĩ meeyũragia kĩũria kĩu. No ũcoke ũmũteithie kuona atĩ ti Ngai warehagĩra Ayubu mathĩna, no nĩ Shaitani. Aamũreheire mathĩna akĩenda kuonania atĩ andũ matungatagĩra Ngai o rĩrĩa tu maũndũ mao marathiĩ wega. No ũcoke ũmũtaarĩrie atĩ o na gũtuĩka Ngai tiwe wareheire Ayubu mathĩna, nĩ eetĩkĩririe ũndũ ũcio wĩkĩke, na ũndũ ũcio ũronania atĩ Ngai nĩ akoragwo na ma atĩ andũ arĩa ehokeku no mahote kuonania atĩ Shaitani aarĩtie maheeni. Thutha ũcio no ũmũtaarĩrie atĩ Ngai nĩ aacokire akĩrathima Ayubu nĩ ũndũ wa gũtũũria wĩhokeku wake. Nĩ ũndũ ũcio no tũhote kũũmĩrĩria andũ na njĩra ya kũmateithia gũkorũo na ma atĩ mathĩna marĩa matũkoraga matikoragwo maumĩte kũrĩ Jehova.

16. Heana ngerekano ĩronania ũrĩa ibuku rĩa Ayubu rĩngĩteithia mũndũ ũrathĩnĩka.

¹⁶ Ta wĩcirie ũrĩa ibuku rĩa Ayubu rĩateithirie mũndũrũme ũmwe mwaka-inĩ wa 2021. Hĩndĩ ĩmwe mwarĩ wa Ithe witũ ũmwe akĩhunjia na thimũ, mũndũ wa mbere ũrĩa aahunjĩirie nĩ mũndũrũme ũcio ũrĩa wetagwo Mario. Thutha wa kũmũthomera mũhari ũmwe wa Bibilia, nĩ aamũtaarĩirie atĩ Ngai nĩ athikagĩrĩria mahoya maitũ na ningĩ nĩ atwĩrĩire ihinda rĩega rĩũkĩte. Rĩrĩa aamũririe mawoni make, Mario aamwĩrire atĩ akĩmũhũũrĩra thimũ ekwandĩkagĩra famĩlĩ yake marũa tondũ ekwendaga kwĩyũraga. Agĩcoka akiuga, “Nĩ njĩtĩkĩtie Ngai, no ndironaga ta atindanagĩra na niĩ.” Rĩrĩa mwarĩ wa Ithe witũ ũcio aamũhũũrĩire thimũ rĩngĩ nĩ maarĩrĩirie nake mathĩna marĩa Ayubu aacemanirie namo. Mario nĩ aatuire itua rĩa gũthoma ibuku rĩothe rĩa Ayubu. Kwoguo mwarĩ wa Ithe witũ ũcio akĩmũtũmĩra link ĩngĩmũteithia kũhingũra Bibilia ya New World Translation thĩinĩ wa jw.org. Hihi maumĩrĩro maarĩ marĩkũ? Mario nĩ eetĩkĩrire kwĩruta Bibilia, na agĩkenera kwĩruta makĩria ũhoro wĩgiĩ Ngai ũrĩ wendo ũrĩa wamũgucĩrĩirie harĩ we.

17. Nĩ kĩĩ gĩtũmaga tũkorũo na ngatho nĩ ũndũ wa Jehova kwandĩkithia rũgano rwa Ayubu Kiugo-inĩ gĩake? (Ayubu 34:12)

¹⁷ Hatarĩ nganja Kiugo kĩa Ngai kĩrĩ na hinya wa gũteithia andũ, nginya arĩa marathĩnĩka. (Ahib. 4:12) Nĩ tũcokagia ngatho mũno tondũ Jehova nĩ aandĩkithirie rũgano rwa Ayubu Kiugo-inĩ gĩake. (Ayub. 19:​23, 24) Ibuku rĩa Ayubu nĩ rĩtũteithagia gũkorũo na ma atĩ “hatarĩ nganja, Ngai ndekaga maũndũ ma waganu.” (Thoma Ayubu 34:12.) Ningĩ nĩ rĩtũrutaga kĩrĩa gĩtũmaga Ngai etĩkĩrie mathĩna na ũrĩa tũngĩkirĩrĩria rĩrĩa tũrathĩnĩka. Makĩria ma ũguo no tũrĩhũthĩre kũũmĩrĩria arĩa marathĩnĩka. Gĩcunjĩ-inĩ kĩrĩa kĩrũmĩrĩire, nĩ tũkoona ũrĩa ibuku rĩa Ayubu rĩngĩtũteithia rĩrĩa tũraheana ũtaaro.