Wagĩrĩirũo Gũtũũra Kũringana na Ithimi cia Bibilia Nĩkĩ?
HIHI mawoni ma Bibilia megiĩ ngomanio nĩ mahĩtũke nĩ mahinda? Hihi mawoni macio nĩ ma kũhinyĩrĩria andũ? Aca. Ithenya rĩa ũguo, mawoni ma Bibilia megiĩ ngomanio matũteithagia gwĩthema:
▪ Mĩrimũ ĩrĩa ĩgwatanagio kũgerera ngomanio
▪ Kũgĩa nda nja ya kĩhiko
▪ Moimĩrĩro moru ma kũharagana kwa ihiko
▪ Thamiri ĩrĩ na mĩĩcuko
▪ Kwĩyagĩra kĩene nĩ ũndũ wa kũhũthĩrũo ũũru nĩ arĩa angĩ
Mũũmbi witũ, Jehova Ngai,a endaga tũkenere na tũgunĩke kuumana na iheo iria aheanĩte. Ngai ‘akũrutaga maũndũ ma gũkũguna.’ (Isaia 48:17) Mũndũ ũrĩa ũrũmagĩrĩra ũtaaro wa Bibilia wĩgiĩ ngomanio akoragwo:
▪ Etĩkĩrĩkĩte nĩ Ngai
▪ Arĩ na thayũ wa meciria
▪ Arĩ na mũtũũrĩre mwega wa famĩlĩ
▪ Aheetwo gĩtĩo
▪ Eheete gĩtĩo
Ĩ angĩkorũo ihinda-inĩ rĩrĩ ndũrarũmĩrĩra ithimi cia Bibilia ciĩgiĩ mĩtugo? Hihi no ũhote gũcenjia mũtũũrĩre waku? Hihi Ngai nĩ agaagũcirithĩria maũndũ marĩa wekĩte tene?
Ta wĩcirie ũndũ ũyũ: Matanagarũrũka, amwe thĩinĩ wa kĩũngano gĩa Gĩkristiano gĩa karine ya mbere maarĩ itharia, ahũri maraya, na arũme makomanagia na arũme arĩa angĩ. Magĩtua itua rĩa kũgarũrĩra mũtũũrĩre wao, makĩgĩa na irathimo nyingĩ. (1 Akorintho 6:9-11) Mahinda-inĩ maya, andũ ngiri nyingĩ thĩinĩ wa thĩ yothe nĩ matuĩte itua o ta rĩu. Nĩ matiganĩte na ngomanio itagĩrĩire, na nĩ meyoneire irathimo iria ciumanaga na gũtũũra kũringana na ithimi cia Bibilia. Kwa ngerekano, ririkana ũhoro wa Sarah, ũrĩa ũgwetetwo thĩinĩ wa gĩcunjĩ kĩa mbere.
“Thutha wa Ihinda Inini Ngĩigua ndĩ Mũtheru”
Sarah nĩ aataũkĩirũo atĩ mĩthiĩre yake mĩũru ndĩamũrehagĩra gĩkeno na kũiganĩra kũrĩa eeriragĩria. Oigire ũũ: “Ndaiguaga ndĩna thamiri thũku. Ndaconokaga mũno na ngetigĩra ndikagĩe nda kana nyitwo nĩ mũrimũ mũũru. Gũtirĩ hingo ndaatigĩte gwĩtĩkia atĩ Ngai arĩ kuo, na nĩ ndaamenyaga atĩ mĩthiĩre yakwa nĩ yamũtuuragia. Ndaiguaga itarĩ mũtheru, na ũndũ ũcio nĩ watũmaga ngiĩke mũno.”
Macũngĩrĩro-inĩ, Sarah nĩ aahotire kũgarũrĩra mĩthiĩre yake. Nĩ aacaririe ũteithio wa aciari ake, arĩa nĩ Aira a Jehova. Ningĩ nĩ aacaririe ũteithio wa athuri a kĩũngano gĩa Gĩkristiano gĩa kwao. Sarah oigire ũũ: “Nĩ ndaahutirio ngoro mũno nĩ ũndũ wa wendo mũnene ũrĩa aciari akwa na athuri a kĩũngano maanyonirie. Thutha wa ihinda inini ngĩigua ndĩ mũtheru.”
Sarah arĩ na ciana igĩrĩ. Oigaga ũũ: “Nĩ njĩraga ciana ciakwa itegũcihitha igũrũ rĩgiĩ matua marĩa ndatuĩte. Nĩ nyendaga cimenye ũrĩa kwaga kũrũmĩrĩra ithimi cia Ngai gwathũkĩtie mũtũũrĩre wakwa. Muoroto wakwa nĩ gũciteithia cimenye ũrĩa cingĩgunĩka kĩĩmeciria, kĩĩmwĩrĩ, o na ngoro, cingĩrũmĩrĩra ithimi cia Ngai ciĩgiĩ ngomanio. Ndĩna ma biũ atĩ Ngai atũheaga ithimi cia mĩtugo tondũ ndendaga kuona tũkĩnyamarĩka.”
O na we no ũgunĩke ũngĩrũmĩrĩra ũtongoria wa Ngai wa wendo. Bibilia ĩtwĩrĩire ũũ: “Mataaro ma Jehova nĩ merekereru, makenagia mũndũ ngoro; watho wa Jehova nĩ mũkembu, wĩkagĩra maitho ũtheri. . . . Kũmamenyerera kwĩ na uumithio mũnene.”—Thaburi 19:8, 11.b
[Ũhoro wa Magũrũ-inĩ]
a Jehova nĩrĩo rĩĩtwa rĩa Ngai kũringana na Bibilia.
b Nĩgetha wĩrute makĩria ũhoro wĩgiĩ ũtaaro wa Bibilia, aranĩria na Aira a Jehova a kwanyu. Kana wandĩke marũa ũkĩhũthĩra andĩrĩthi ĩrĩa ĩrĩ karatathi-inĩ ga 4 kana ũthiĩ Intaneti-inĩ thĩinĩ wa www.watchtower.org.
[Mbica karatathi-inĩ ga 8]
Arĩa maregaga kũrũmĩrĩra ithimi cia Bibilia kaingĩ nĩ marehaga ruo rwa ngoro
[Mbica karatathi-inĩ ga 9]
Arĩa marũmagĩrĩra ithimi cia Bibilia makoragwo na thamiri theru na magakenera mũtũũrĩre mwega wa famĩlĩ