Mĩtugo Mĩega Yathiire Kũ?—Mawoni ma Bibilia nĩ Marĩkũ?

Mĩtugo mĩega ĩrathiĩ ĩthirĩte. Arwaru matarĩ na gĩtĩo nĩ magũthũkagĩra mandagĩtarĩ; andũ mararĩa mũkawa-inĩ nĩ maragĩria ũũru arĩa maramenderia; athii marĩ ndege-inĩ nĩ matharĩkagĩra arĩa marũmbũyagia andũ ndege-inĩ; ciana nemi nĩ inyũrũragia arimũ, ikamehĩtĩra, na ikamatharĩkĩra; na ateti amwe nĩ mekaga maũndũ ma kũgegia andũ nao arĩa angĩ makageria kwĩyonania ũrĩa o marĩ ega.

Bibilia nĩrĩo ibuku rĩrĩa rĩngĩhokeka harĩ kũmenyithania mĩtugo ĩrĩa mĩega nĩ ĩrĩkũ. Ningĩ nĩ yonanagia kĩrĩa gĩtũmĩte andũ aingĩ matukũ-inĩ maya mage mĩtugo mĩega.

Mĩtugo mĩega yathiire kũ?

Kũndũ guothe thĩinĩ wa thĩ, nĩ kũroneka atĩ mĩtugo mĩega na ya gwĩtĩkĩrĩka ĩrathiĩ ĩhotomete.

• Ũthuthuria ũmwe wa ica ikuhĩ wonanĩtie atĩ andũ thĩinĩ wa Amerika (US), metĩkĩtie atĩ mĩtugo ya andũ thĩinĩ wa bũrũri ũcio nĩ ĩthũkĩte mũno mahinda-inĩ maya gũkĩra hĩndĩ ĩngĩ o yothe ihinda-inĩ rĩa mĩaka 22 mĩhĩtũku.

• Nĩ kũrĩ ũthuthuria ũngĩ wekirũo harĩ andũ makĩria ma 32,000 thĩinĩ wa mabũrũri 28, na gĩcunjĩ kĩa 65 harĩ igana kĩa andũ acio maahoirũo ũhoro mooigire atĩ matirĩ mona mĩtugo ĩthũkĩte ta ũrĩa ĩthũkĩte ihinda-inĩ rĩrĩ.

Bibilia nĩ yarathĩte ũhoro wa mĩtugo ĩrĩa tũrona mahinda-inĩ maya.

• “Matukũinĩ ma mũthia nĩgũgaakorwo na mahinda maritũ, tondũ hĩndĩ ĩyo andũ magaakorwo marĩ eyendi, akorokeri mbeeca, egaathi, eegani, arumani, andũ mataheaga aciari aao gĩtĩĩo, andũ matarĩ ngaatho, . . . andũ matarĩ na wendani [na] mahaana nyamũ.”—2 Timotheo 3:1-3, The Holy Bible in Gĩkũyũ Language.

Nĩguo wone ũhoro makĩria wĩgiĩ ũrĩa ũrathi ũcio ũrahinga, thoma gĩcunjĩ kĩrĩ na kĩongo “Je, Biblia Ilitabiri Mitazamo na Matendo ya Watu Leo?”

Nĩ kĩĩ kĩngĩgũteithia kũmenya mĩtugo ĩrĩa mĩega nĩ ĩrĩkũ?

Thĩinĩ wa thĩ ĩno ĩrĩa mĩtugo ĩrathiĩ ĩthũkĩte, andũ milioni nyingĩ nĩ monete atĩ Bibilia nĩ ĩkoragwo na ũtaaro ũngĩmateithia kũmenya mĩtugo ĩrĩa mĩega nĩ ĩrĩkũ. Ũtaaro wayo ũkoragwo ũrĩ wa “kwĩhokeka hĩndĩ ciothe, rĩu na nginya tene na tene.” (Thaburi 111:8) Reke tuone ngerekano cigana ũna:

• Ũrĩa Bibilia yugaga: “Maũndũ mothe marĩa mũngĩenda andũ arĩa angĩ mamwĩkage, no mũhaka o na inyuĩ mũmekage o tamo.”—Mathayo 7:12.

  Ũrutani: Twagĩrĩirũo gwĩkagĩra andũ arĩa angĩ maũndũ ma ũtugi na ma gĩtĩo, o ta marĩa o na ithuĩ tũngĩenda matwĩkagĩre.

• Ũrĩa Bibilia yugaga: “Rĩu tondũ nĩ mũrĩkĩtie kweheria maheeni, o mũndũ nĩ aragie ma na ũrĩa ũngĩ.”—Aefeso 4:25.

  Ũrutani: Twagĩrĩirũo gũkorũo tũrĩ ehokeku maũndũ-inĩ mothe marĩa tũraria na marĩa tũreka.

Nĩguo wone ũhoro makĩria wĩgiĩ maũndũ macio, thoma:

• Ngathĩti ya Mũrangĩri ĩrĩ na kĩongo “Ũtaaro Ũngĩgũteithia Gũkũũrana Wega na Ũũru.”

• Gĩcunjĩ kĩrĩ na kĩongo “Jinsi Biblia Inavyoweza Kukusaidia Kuwa Mstahimilivu.”