Mawoni ma Bibilia nĩ Marĩkũ Igũrũ Rĩgiĩ Mbaara ya Israel na Mabũrũri Marĩa Mamĩrigicĩirie?

Andũ thĩinĩ wa thĩ nĩ maratangĩka nĩ ũndũ wa mbaara ĩrĩa ĩrathiĩ na mbere ĩhutĩtie Amerika (US), Israel, na Iran. Hihi mbaara ĩyo nĩ ĩkũneneha ĩhutie mabũrũri mangĩ? Hihi thirikari no ihote kũgirĩrĩria ngahĩha na irehe thayũ thĩinĩ wa thĩ?

Andũ arĩa mathomete ũhoro wĩgiĩ ũrathi wa Bibilia no meyũrie kana hihi mbaara ĩyo ĩrĩ Israel na mabũrũri marĩa mamĩrigicĩirie nĩyo ĩgũkorũo ĩrĩ kĩambĩrĩria kĩa mbaara ya Hari-Magedoni, ĩrĩa yarathĩtwo thĩinĩ wa ibuku rĩa Kũguũrĩrio.

Bibilia yugaga atĩa?

Hihi thirikari no ihote kũniina mbaara ĩrĩa ĩrĩ Israel na mabũrũri marĩa mamĩrigicĩirie?

Bibilia yugaga ũũ: “Mũtikaigage mwĩhoko wanyu harĩ anene kana harĩ mũrũ wa mũndũ, o ũcio ũtangĩhota kũrehe ũhonokio.”—Thaburi 146:3.

Tũtiũĩ kana thirikari nĩ ikũhota gũcokia thayũ thĩinĩ wa mabũrũri macio. O na kũrĩ ũguo, Bibilia nĩ yonanĩtie wega atĩ gũtirĩ mũtongoria wa gĩũteti, thirikari ya gũkũ thĩ, kana gĩkundi kĩa andũ kĩngĩhota kũniina mbaara na kũrehe thayũ wa gũtũũra. No Ngai tu ũngĩhota ‘kũniina mbaara kũndũ guothe thĩinĩ wa thĩ.’—Thaburi 46:9.

• Nĩguo wĩrute makĩria, thoma ngathĩti ya Mũrangĩri ĩrĩ na kĩongo “Mbaara Igaathira Rĩ?”

Hihi mbaara ĩrĩa ĩrĩ Israel na mabũrũri marĩa mamĩrigicĩirie nĩ ĩrahingia ũrathi?

Bibilia yugaga ũũ: “Nĩ mũkaaigua ũhoro wa mbaara na riboti ciĩgiĩ mbaara. . . . Rũrĩrĩ nĩ rũgookĩrĩra rũrĩrĩ rũrĩa rũngĩ na ũthamaki ũũkĩrĩre ũthamaki ũrĩa ũngĩ.”—Mathayo 24:6, 7.

Mbaara ĩyo ĩrĩ thĩinĩ wa Israel na mabũrũri marĩa mamĩrigicĩirie nĩ ũndũ ũmwe ũronania “ithirĩro rĩa mũtabarĩre wa maũndũ,” na ũgekĩra ũira atĩ tũratũũra “matukũ-inĩ ma kũrigĩrĩria.” (Mathayo 24:3; 2 Timotheo 3:1) Mbaara iria irĩ kuo nĩ ironania atĩ ica ikuhĩ Ngai nĩ ekũniina mbaara o hamwe na maũndũ marĩa mangĩ marehaga mathĩna thĩinĩ wa thĩ.

• Nĩguo wĩrute makĩria, thoma gĩcunjĩ kĩrĩ na kĩongo “Kĩmenyithia kĩa ‘Matukũ ma Kũrigĩrĩria,’ Kana ‘Ihinda rĩa Mũthia’ nĩ Kĩrĩkũ?”

Hihi mbaara ya Hari-Magedoni ĩkaambĩrĩria Israel na mabũrũri marĩa mamĩrigicĩirie?

Bibilia yugaga ũũ: “Ikĩmacokanĩrĩria hamwe handũ harĩa hetagwo na Kĩhibirania Hari-Magedoni.”—Kũguũrĩrio 16:16.

Mbaara ya Hari-Magedoni ti mbaara ĩkaambĩrĩria Israel na mabũrũri marĩa mamĩrigicĩirie ĩkĩrũo nĩ thirikari cia thĩ. No nĩ mbaara ĩkaahutia thĩ yothe na ĩkaarũo nĩ thirikari ciothe cia thĩ ikĩrũa na Ngai.

• Nĩguo wĩrute makĩria, thoma gĩcunjĩ kĩrĩ na kĩongo “Mbaara ya Hari-Magedoni nĩ Kĩĩ?”

Nĩ kĩĩ kĩngĩtũteithia kwaga gũtangĩka o na kũrĩ na mathĩna maingĩ ũguo?

Bibilia yugaga ũũ: “Mũtigatangĩkage nĩ ũndũ o na ũrĩkũ, no maũndũ-inĩ mothe menyithagiai Ngai maũndũ marĩa mũbataraga kũgerera mahoya na mathaithana o hamwe na gũcokia ngatho.”—Afilipi 4:6.

Jehovaa Ngai atwĩraga tũmũhoe. Na tondũ Ngai nĩ atũrũmbũyagia, nĩ arĩiguaga mahoya maitũ na agatũteithia kũhiũrania na mĩtangĩko. (1 Petero 5:7) Njĩra ĩmwe ekaga ũguo nĩ kũgerera gũtũteithia gũtaũkĩrũo kĩrĩa gĩtũmaga gũkorũo na mbaara, ũrĩa igaathira, na ũrĩa ageeka nĩguo ehererie andũ ruo na mathĩna.—Kũguũrĩrio 21:3, 4.

• Nĩguo wĩrute makĩria igũrũ rĩgiĩ ũrĩa Ngai atũteithagia, thoma gĩcunjĩ kĩrĩ na kĩongo “Je, Ninaweza Kupata Faraja Katika Biblia?”