Hihi Mbaara Igaathira Rĩ?—Mawoni ma Bibilia nĩ Marĩkũ?

Akĩaria ũhoro wa tharĩkĩro ya Iran ya ĩmwe kwa ĩmwe kwerekera bũrũri wa Israel, ĩrĩa yekĩkire mũthenya wa Njuuma, Ĩpuro 13 2024, Mwandĩki Mũnene wa Kĩama kĩa Ũrũmwe wa Mabũrũri António Guterres aaugire ũũ: “Rĩrĩ nĩrĩo ihinda rĩa kũhooreria maũndũ na kũgirĩrĩria mbaara gũthiĩ na mbere. Rĩrĩ nĩrĩo ihinda rĩa kwĩgirĩrĩria biũ.”

Mbaara ĩrĩa ĩrĩ Asia ya Gatagatĩ no ngerekano ĩmwe tu ya ũrĩa kũrathiĩ na mbere thĩinĩ wa thĩ yothe.

“Ihinda-inĩ rĩrĩ, kũrĩ na ngũĩ nyingĩ thĩinĩ wa thĩ gũkĩra hĩndĩ ĩngĩ o yothe kuuma hĩndĩ ya Mbaara ya Kerĩ ya Thĩ, na ihutĩtie andũ bilioni 2, kana mũndũ ũmwe harĩ andũ ana.”—Rũhonge rwa Ũgitĩri rwa Kĩama kĩa Ũrũmwe wa Mabũrũri, Janũarĩ 26, 2023.

Kũrĩa kũrĩ na ngũĩ ihinda-inĩ rĩrĩ nĩ Israel, Gaza, Syria, Azerbaijan, Ukraine, Sudan, Ethiopia, Niger, Myanmar, na Haiti.a

Hihi mbaara ta icio igaathira rĩ? Hihi atongoria a thĩ no mahote kũrehe thayũ? Mawoni ma Bibilia nĩ marĩkũ?

Thĩ ĩiyũire mbaara

Ngũĩ iria irĩ kuo thĩinĩ wa thĩ mahinda-inĩ maya ironania atĩ ica ikuhĩ mbaara ciothe nĩ igũthira. Mbaara icio nĩ irahingia ũrathi wa Bibilia ũrĩa warathĩte igũrũ rĩgiĩ ihinda rĩrĩ tũratũũra. Bibilia ĩrĩĩtaga ihinda rĩa “ithirĩro rĩa mũtabarĩre wa maũndũ.”—Mathayo 24:3.

• “Nĩ mũkaaigua ũhoro wa mbaara na riboti ciĩgiĩ mbaara. . . . Rũrĩrĩ nĩ rũgookĩrĩra rũrĩrĩ rũrĩa rũngĩ na ũthamaki ũũkĩrĩre ũthamaki ũrĩa ũngĩ.”—Mathayo 24:6, 7.

Thoma gĩcunjĩ kĩrĩ na kĩongo “Kĩmenyithia kĩa ‘Matukũ ma Kũrigĩrĩria,’ Kana ‘Ihinda rĩa Mũthia’ nĩ Kĩrĩkũ?” nĩguo wone ũrĩa mbaara iria irĩ kuo ũmũthĩ irahingia ũrathi wa Bibilia.

Mbaara ĩrĩa ĩkaaniina mbaara ciothe

Bibilia nĩ ĩranĩire atĩ ngũĩ ciothe thĩinĩ wa thĩ nĩ ikaaniinwo. Ũndũ ũcio ũkaahotekeka atĩa? Ũndũ ũcio ndũkahoteka kũgerera andũ, no nĩ kũgerera “mbaara ya mũthenya ũrĩa mũnene wa Ngai Mwene-Hinya-Wothe” ya Hari-Magedoni. (Kũguũrĩrio 16:14, 16) Thutha wa mbaara ĩyo, Ngai nĩ akaahingia kĩĩranĩro gĩake gĩa kũrehera andũ thayũ wa gũtũũra.—Thaburi 37:10, 11, 29.

Nĩguo wĩrute makĩria ũhoro wĩgiĩ mbaara ya Ngai ĩrĩa ĩkaaniina mbaara ciothe, thoma gĩcunjĩ kĩrĩ na kĩongo, “Mbaara ya Hari-Magedoni nĩ Kĩĩ?”