Aira a Jehova Marutaga Kũ Mbeca cia Gũtwarithia Wĩra Wao na Mbere?

Wĩra witũ wa kũhunjia thĩinĩ wa thĩ yothe ũtwarithagio na mbere nĩ mĩhothi ya kwĩyendera, ĩrĩa kaingĩ ĩrutagwo nĩ Aira a Jehova.a Mathandũkũ ma mĩhothi nĩ maigagwo kũrĩa tũcemanagĩria, na njĩra ingĩ cia kũruta mĩhothi nĩ cionanĩtio thĩinĩ wa website itũ gacunjĩ-inĩ ka Mĩhothi. Mũndũ no athuure kũruta mũhothi nĩ ũndũ wa wĩra witũ wa thĩ yothe, mahũthĩro ma kĩũngano kĩao, kana maũndũ macio merĩ.

Aira a Jehova matiĩrĩgagĩrĩrũo marute gĩcunjĩ gĩa ikũmi kana mahothe mũigana mũna wa mbeca kuuma harĩ iria monaga. (2 Akorintho 9:7) Mĩcemanio-inĩ itũ gũtiũnganagio mĩhothi kana andũ magetio mbeca makĩingĩra, na gũtirĩ marĩhi marĩhagio nĩ ũndũ wa kũbatithio, mathiko, mohiki, kana magongona mangĩ ma kĩĩndini. Tũtihothithagia mbeca kũgerera harambĩ kana njĩra ingĩ ta icio. Gũtimenyithanagio marĩĩtwa ma andũ arĩa maruta mĩhothi. (Mathayo 6:2-4) Mabuku na website citũ itigaathagĩrĩria indo cia kĩĩbiacara.

Thĩinĩ wa ciũngano ciothe cia Aira a Jehova, o mweri nĩ gũthomagwo riboti ya mahũthĩro ma mbeca hĩndĩ ya mĩcemanio itũ, na mũndũ o wothe no oke mĩcemanio-inĩ ĩyo. Rekondi cia mbeca cia o kĩũngano nĩ iroragwo kaingĩ nĩgetha gũtigĩrĩrũo atĩ mĩhothi nĩ ĩrahũthĩrũo ũrĩa kwagĩrĩire.—2 Akorintho 8:20, 21.

Njĩra cia Kũruta Mĩhothi

• Mathandũkũ ma mĩhothi: No ũikie mbeca kana ceki mathandũkũ-inĩ ma mĩhothi marĩa makoragwo Nyũmba-inĩ cia Ũthamaki, Nyũmba-inĩ cia Igomano, kana kũndũ kũngĩ kũrĩa twĩkagĩra mĩcemanio itũ.

• Kũruta mũhothi kũgerera intaneti: Thĩinĩ wa mabũrũri maingĩ, no ũrute mĩhothi kũgerera debit card, credit card, bank transfer, na njĩra ingĩ ta icio ũngĩthiĩ gacunjĩ-inĩ ka “Mĩhothi.”b Aira a Jehova amwe nĩ ‘maigaga kĩndũ’ o mweri na njĩra ya kũbanga mũigana mũna wa mbeca ũrĩa marĩhothaga o hĩndĩ makĩhũthĩra njĩra icio.—1 Akorintho 16:2.

  

• Mĩhothi ĩbangĩtwo kabere: Njĩra imwe cia kũhotha ibataraga mũndũ akorũo ebangĩte kabere o na kana acarie ũtaaro wa kĩĩwatho. Kũbanga kũu no gũgũteithie kũgunĩka kuumana na mawatho ma kũnyihia igooti bũrũri-inĩ wanyu. Andũ aingĩ nĩ magunĩkĩte nĩ ũndũ wa kũmenya wega iheo iria mũndũ angĩheana arĩ muoyo na iria angĩthuura ineanwo kũrĩ mũndũ akua. No warie na wabici ya rũhonge ya Aira a Jehova ya bũrũri wanyu nĩguo ũheo ũhoro makĩria ũngĩenda kũruta mũhothi na njĩra ici:

  • akaunti cia bengi

  • marĩhi ma kũrũgamĩrĩra ũndũ ũterĩgĩrĩirũo (insurance) na mbeca cia ritaya

  • nyũmba na mĩgũnda

  • cĩya na bondi (stocks and bonds)

  • marũa ma kwĩgaya na ũramati (wills and trusts)

Nĩguo wone ũhoro makĩria wĩgiĩ njĩra cia kũruta mĩhothi iria ingĩhũthĩka kũrĩa ũikaraga, thiĩ gacunjĩ-inĩ ka “Mĩhothi.”