Aira a Jehova Magaga Gũkũngũĩra Krismasi Nĩkĩ?
Maũndũ maugagwo matarĩ ma ma
Ũrĩa andũ maugaga: Aira a Jehova magaga gũkũngũĩra Krismasi tondũ matiĩtĩkĩtie Jesu.
Ũrĩa kũrĩ: Tũrĩ Akristiano. Nĩ twĩtĩkĩtie atĩ kũhonoka kũhotekaga o kũgerera Jesu Kristo tu.—Atũmwo 4:12.
Ũrĩa andũ maugaga: Nĩ mũgayũkanagia famĩlĩ nĩ ũndũ wa kũruta andũ atĩ matiagĩrĩirũo gũkũngũĩra Krismasi.
Ũrĩa kũrĩ: Nĩ tũrũmbũyagia famĩlĩ mũno, na tũhũthagĩra Bibilia gũteithia andũ gũkorũo na famĩlĩ njega makĩria.
Ũrĩa andũ maugaga: Nĩ mũũragwo nĩ maũndũ marĩa makoragwo kuo hĩndĩ ya Krismasi ta kuonania ũtaana, thayũ thĩinĩ wa thĩ, na kwendera andũ maũndũ mega.
Ũrĩa kũrĩ: Twĩrutanagĩria gũkorũo tũrĩ ataana na gũthingata thayũ o mũthenya. (Thimo 11:25; Aroma 12:18) Kwa ngerekano, twĩkaga mĩcemanio itũ na tũkahunjia tũkĩrũmĩrĩra ũtaaro ũyũ wa Jesu: “Mũheetwo tũhũ, heanagai tũhũ.” (Mathayo 10:8) Makĩria ma ũguo, tũrutanaga atĩ Ũthamaki wa Ngai nĩguo mwĩhoko wa ma wa kũrehera andũ thayũ thĩinĩ wa thĩ.—Mathayo 10:7.
Aira a Jehova Magaga Gũkũngũĩra Krismasi Nĩkĩ?
Jesu aathanire tũririkanage gĩkuũ gĩake no ti gũciarũo gwake.—Luka 22:19, 20.
Atũmwo a Jesu na Akristiano a mahinda ma atũmwo matiakũngũyagĩra Krismasi. Ibuku rĩa New Catholic Encyclopedia riugaga atĩ “gĩkũngũĩro gĩa Krismasi kĩaambĩrĩirie thutha wa mwaka wa 243 [M.M.],” makĩria ma mĩaka 100 thutha wa mũtũmwo wa mũico gũkua.
Gũtikoragwo na ũira wa kuonania atĩ Jesu aaciarirũo Dicemba 25; Bibilia ndĩonanagia tarĩki iria aaciarirũo.
Twĩtĩkĩtie atĩ Krismasi ndĩtĩkĩrĩkĩte harĩ Ngai tondũ yumanĩte na mĩtugo ya athathaiya a ndini cia maheeni.—2 Akorintho 6:17.
Mwagaga kũmĩkũngũĩra nĩkĩ na nĩguo andũ aingĩ mekaga?
Andũ aingĩ no makũngũyagĩra Krismasi o na makĩmenyaga atĩ yumanĩte na ndini cia maheeni na ndĩnyitagwo mbaru nĩ Bibilia. Andũ ta acio no morie: Nĩ kĩĩ kĩngĩtũma mwĩke ũndũ ũtekagwo nĩ andũ aingĩ? Mwendaga gũkorũo mũrĩ ngũrani nĩkĩ?
Bibilia ĩtwĩkĩraga ngoro tũhũthĩre ‘ũhoti witũ wa gwĩciria.’ (Aroma 12:1, 2) Ĩtũrutaga atĩ tũbatiĩ kuona ũhoro wa ma ũrĩ wa bata. (Johana 4:23, 24) Kwoguo o na gũtuĩka nĩ twĩciragia ũhoro wa ũrĩa andũ matuonaga, tũrũmagĩrĩra motaaro ma Bibilia o na angĩkorũo gwĩka ũguo gũgũtũma tũkorũo tũrĩ ngũrani.
O na gũtuĩka ithuĩ nĩ tũthuurĩte kwaga gũkũngũĩra Krismasi, nĩ tũtĩĩte kĩhooto kĩa o mũndũ gĩa gwĩtuĩra ũrĩa egwĩka ũndũ-inĩ ũcio. Tũtigiragia andũ arĩa angĩ gũkũngũĩra Krismasi.