Hihi Mũthiaga Kũhunjia Nyũmba kwa Nyũmba Nĩguo Mũkaahonoka?

Aca. Nĩ tũhunjagia nyũmba kwa nyũmba maita maingĩ, no tũtiĩtĩkĩtie atĩ gwĩka ũguo nĩkuo gũgaatũma tũhonoke. (Aefeso 2:8) Nĩkĩ hihi?

Wĩcirie ũhoro wa ngerekano ĩno: Ta tua atĩ mũndũ ũmwe mwega nĩ eranĩra kũheana kĩheo kĩa goro kũrĩ mũndũ o wothe ũgũthiĩ handũ hana ihinda-inĩ rĩna. Ũngĩkorũo wĩtĩkĩtie kĩĩranĩro kĩa mũndũ ũcio-rĩ, no ũthiĩ? Hatarĩ nganja no ũthiĩ! No kũhoteke o na no wĩre arata aku na andũ anyu a famĩlĩ ũhoro ũcio nĩguo o nao magunĩke. O na kũrĩ ũguo, ndũkũgĩa na kĩheo kĩu nĩ ũndũ wa kũrũmĩrĩra ũrĩa mũndũ ũcio augĩte. Ũkũgĩa nakĩo tondũ mũndũ ũcio nĩ arenda gũkũhe.

Na njĩra o ta ĩyo, Aira a Jehova nĩ metĩkĩtie kĩĩranĩro kĩa Ngai kĩa muoyo wa tene na tene kũrĩ arĩa othe mamwathĩkagĩra. (Aroma 6:23) Nĩ twĩrutanagĩria kwĩra andũ arĩa angĩ maũndũ marĩa twĩtĩkĩtie, tũkĩĩhoka atĩ nĩ mekũgunĩka kuumana na ciĩranĩro cia Ngai. No tũtiĩtĩkĩtie atĩ tũkaahonoka nĩ ũndũ wa kũhunjia. (Aroma 1:17; 3:28) Ũrĩa kũrĩ nĩ atĩ, gũtirĩ mũndũ ũngĩhota gwĩka ũndũ ũngĩtũma agĩrĩre kũheo kĩrathimo kĩu kĩega nĩ Ngai. “Nĩ kũhonokia aatũhonokirie, ti tondũ wa ciĩko iria twekaga ithuene cia gwĩtua athingu, no nĩ ũndũ wa tha ciake.”—Tito 3:5, The Bible in Gikũyũ.