Hihi Mũcukani arĩ Kuo?

Macokio ma Bibilia

Ĩĩ, Mũcukani arĩ kuo. Nĩwe “mũnene wa thĩ ĩno,” na nĩ kĩũmbe kĩũru kĩa roho kĩrĩa kĩaremeire Ngai. (Johana 14:30; Aefeso 6:11, 12) Bibilia nĩ ĩguũragia ũrĩa Mũcukani ahaana kũgerera marĩĩtwa maya:

• Shaitani, rĩrĩa riugĩte “Mũkararia.”—Ayubu 1:6.

• Mũcukani, rĩrĩa riugĩte “Mũcambania.”—Kũguũrĩrio 12:9.

• Nyoka, rĩrĩa rĩhũthĩrĩtwo Bibilia-inĩ kuonania “Mũheenereria.”—2 Akorintho 11:3.

• Mũgerania.—Mathayo 4:3.

• Mũheenania.—Johana 8:44.

Ti ũũru ũkoragwo thĩinĩ wa mũndũ

Andũ amwe monaga Shaitani Mũcukani ta arĩ ũũru ũkoragwo thĩinĩ wa mũndũ. No Bibilia nĩ yonanĩtie mĩario gatagatĩ-inĩ ka Ngai na Shaitani. Ngai nĩ mũkinyanĩru, na kwoguo ndangĩkorũo aaragĩria na ũũru ũrĩ thĩinĩ wake. (Gũcokerithia Maathani 32:4; Ayubu 2:1-6) Jesu o nake ndarĩ mehia, no Shaitani nĩ aamũgeririe. (Mathayo 4:8-10; 1 Johana 3:5) Kwoguo Bibilia yonanagia atĩ Mũcukani ti ũũru ũhaananagio na mũndũ no nĩ kĩũmbe kĩa biũ.

Hihi nĩ ũndũ wa kũgegania atĩ andũ amwe matiĩtĩkĩtie nĩ kũrĩ Mũcukani? Aca, tondũ Bibilia yugaga atĩ Shaitani ahenagĩrĩria andũ nĩguo ahingie muoroto wake. (2 Athesalonike 2:9, 10) Wara ũmwe mũnene Shaitani ahũthagĩra kũheenereria andũ nĩ kũmatumumaria nĩguo matikamenye arĩ kuo.—2 Akorintho 4:4.

Maheeni mangĩ megiĩ Mũcukani

Maheeni: Lucifa nĩ rĩĩtwa rĩngĩ rĩa Mũcukani.

Ũhoro wa Ma: Kiugo gĩa Kĩhibirania kĩrĩa gĩtaũrĩtwo “Lucifa” nĩ Bibilia imwe, kiugaga “njata ya kĩwariĩ.” (Isaia 14:12) Ũhoro ũrĩa ũthiũrũrũkĩirie rĩandĩko rĩu wonanagia atĩ kiugo kĩu kĩaragĩrĩria ũrĩa athamaki maarũmanĩrĩire, kana famĩlĩ ya athamaki a Babuloni, arĩa Ngai angĩaconorithirie nĩ ũndũ wa mwĩtĩo wao. (Isaia 14:4, 13-20) Ciugo “njata ya kĩwariĩ” ciahũthagĩrũo kũnyũrũria ũthamaki wa Babuloni thutha wa kũhagũrũo.

Maheeni: Shaitani ahũthagĩrũo nĩ Ngai arĩ “mũtuanĩri cira.”

Fact: Mũcukani nĩ thũ ya Ngai no ti ndungata ya Ngai. Shaitani Mũcukani nĩ akararagia andũ arĩa matungatagĩra Ngai na akamathitanga na maheeni.—1 Petero 5:8; Kũguũrĩrio 12:10.