Bibilia Yugaga Atĩa Igũrũ Rĩgiĩ Kĩhiko kĩa Andũ a Rangi Kana Rũrĩrĩ Ngũrani?

Macokio ma Bibilia

Ngai nĩ etĩkĩrĩtie kĩhiko gatagatĩ ka mũthuri na mũtumia kuuma ndũrĩrĩ kana rangi ngũrani tondũ othe nĩ maiganaine maitho-inĩ make. Bibilia yugaga ũũ: “Ngai ndarĩ mũthutũkanio . . . wa ndũrĩrĩ.”—Atũmwo 10:34, 35.

Wĩcirie ũhoro wa mootaro mangĩ ma Bibilia marĩa mahutĩtie kĩhiko, na andũ a ndũrĩrĩ ciothe na rangi gũkorũo maiganaine.

Andũ othe mooimire harĩ mũndũ ũmwe

Andũ othe mooimire harĩ mũndũ wa mbere Adamu na mũtumia wake Hawa, ũrĩa Bibilia yugaga atĩ nĩwe “nyina wa arĩa othe magĩaga muoyo.” (Kĩambĩrĩria 3:20) Nĩ ũndũ ũcio, Bibilia yugaga atĩ Ngai “ombire andũ a ndũrĩrĩ ciothe kuumana na mũndũ ũmwe.” (Atũmwo 17:26) Andũ othe nĩ a famĩlĩ ĩmwe gũtekũmakania nĩ a rangi kana rũrĩrĩ rũrĩkũ. Ĩ angĩkorũo kwanyu andũ nĩ makoragwo na rũmena rwa ndũrĩrĩ na mũthutũkanio?

Andũ ogĩ nĩ mataaranaga

O na gũtuĩka kĩhiko kĩa andũ a rangi kana ndũrĩrĩ ngũrani nĩ gĩtĩkĩrĩku harĩ Ngai, ti andũ othe makoragwo na mwĩcirĩrie ta wake. (Isaia 55:8, 9) Angĩkorũo nĩ ũrenda kũhikia kana kũhikĩra mũndũ wa rũrĩrĩ kana rangi ũngĩ, we na ũrĩa mũrahikania nake mwagĩrĩirũo kwarĩrĩria maũndũ maya:

• Mũkũhiũrania atĩa na hatĩka iria ingiuma kũrĩ andũ a itũũra kana a famĩlĩ?

• Mũgaateithia ciana cianyu atĩa nĩguo ihote kũhiũranagia na mũthutũkanio?

Kwaranĩria na njĩra ĩyo no gũteithĩrĩrie kũgacĩrithia kĩhiko.—Thimo 13:10; 21:5.