Ithomo rĩa 6

Ũthamaki wa Ngai Nĩ Kĩĩ?

Ũthamaki wa Ngai wĩ kũ? (1) Nũũ Mũthamaki waguo? (2)

Hihi andũ angĩ nĩmagwatanagĩra gwathana hamwe na Mũthamaki? Aakorũo nĩguo-rĩ, nĩ aigana? (3)

Nĩ kĩ kĩonanagia atĩ tũratũũra matukũ-inĩ ma kũrigĩrĩria? (4)

Ũthamaki wa Ngai ũgekĩra andũ atĩa mahinda-inĩ marĩa mokĩte? (5-7)

1. Rĩrĩa aarĩ gũkũ thĩ-rĩ, Jesu nĩaarutire arutwo ake kũhoya Ũthamaki wa Ngai ũũke. Ũthamaki nĩ thirikari ĩtongoragio nĩ mũthamaki. Ũthamaki wa Ngai nĩ thirikari ya mwanya. Ũhaandĩtwo igũrũ naguo ũgaathana igũrũ rĩa thĩ ĩno. Ũgaatheria, kana ũtue, rĩĩtwa rĩa Ngai itheru. Ũkaahotithia wendi wa Ngai wĩkwo gũkũ thĩ o ta ũrĩa wĩkagwo kũu igũrũ.—Mathayo 6:9, 10.

2. Ngai nĩeranĩire atĩ Jesu nĩangĩgatuĩka Mũthamaki wa Ũthamaki Wake. (Luka 1:30-33) Rĩrĩa Jesu aarĩ gũkũ thĩ-rĩ, nĩonanirie ũira wa atĩ we nĩangĩgatuĩka Mwathani mũtugi, wa kĩhooto, na mũkinyanĩru. Rĩrĩa aacokire igũrũ-rĩ, we ndaatũgĩririo atuĩke Mũthamaki wa Ũthamaki wa Ngai hingo ĩo. (Ahibirania 10:12, 13) Thĩinĩ wa 1914, Jehova nĩaaheire Jesu waathani ũrĩa We aamwĩrĩire. Kuumagia hingo ĩo, Jesu nĩaathanaga igũrũ arĩ Mũthamaki ũrĩa Jehova athurĩte.—Danieli 7:13, 14.

3. O na ningĩ Jehova nĩathurĩte arũme na atumia amwe ehokeku kuuma gũkũ thĩ mathiĩ igũrũ. Acio magaathanaga hamwe na Jesu igũrũ rĩa andũ marĩ athamaki, atuanĩri ciira, na athĩnjĩri-Ngai. (Luka 22:28-30; Kũguũrĩrio 5:9, 10) Jesu etire aathani acio hamwe nake thĩinĩ wa Ũthamaki wake “karũũru kanini.” Mũigana wao nĩ 144,000.—Luka 12:32; Kũguũrĩrio 14:1-3.

4. O narua Jesu aatuĩka Mũthamaki, aaingatire Shaitani na araika ake oru kuuma igũrũ akĩmaikia gũkuhĩ na gũkũ thĩ. Nĩkĩo maũndũ marĩ moru mũno gũkũ thĩ kuuma 1914. (Kũguũrĩrio 12:9, 12) Mbaara, ngʼaragu nene, mĩrimũ ya kũgwatanio, kuongerereka kwa uuni watho—macio mothe nĩ gĩcunjĩ gĩa “kĩmenyithia” kĩrĩa kĩonanagia atĩ Jesu nĩarathana na atĩ mũtabarĩre ũyũ ũrĩ matukũ-inĩ maguo ma kũrigĩrĩria.—Mathayo 24:3, 7, 8, 12; Luka 21:10, 11; 2 Timotheo 3:1-5.

5. O ica ikuhĩ Jesu nĩarĩtuĩra ciira andũ, amaamũranie o ta ũrĩa mũrĩithi aamũranagia ngʼondu na mbũri. “Ngʼondu” nĩ arĩa magaakorũo meonanĩtie atĩ o nĩ raiya ake marũmĩtie wĩhokeku. Makaamũkĩra muoyo wa tene na tene gũkũ thĩ. “Mbũri” nĩ arĩa magaakorũo maregete biũ Ũthamaki wa Ngai. (Mathayo 25:31-34, 46) O ica ikuhĩ rĩu, Jesu nĩarĩananga arĩa othe a mũhaano wa mbũri. (2 Athesalonike 1:6-9) Angĩkorũo wee no wende gũtuĩka ũmwe wa “ngʼondu” cia Jesu, no mũhaka ũthikĩrĩrie ndũmĩrĩri ya Ũthamaki na wĩke kũringana na ũrĩa ũreruta.—Mathayo 24:14.

6. Rĩu thĩ ĩgayanĩtio ĩgatuĩka mabũrũri maingĩ. O ũmwe wamo wĩ na thirikari yaguo mwene. Mahinda maingĩ ndũrĩrĩ icio nĩirũaga. No Ũthamaki wa Ngai nĩũrĩcoka ithenya-inĩ rĩa thirikari ciothe cia kĩĩmũndũ. Ũgathamakaga ũrĩ o guo thirikari iiki tu igũrũ rĩa thĩ yothe. (Danieli 2:44) Hingo ĩo gũtigacoka kũgĩa rĩngĩ mbaara, ũũnũhi, na ũtoi. Andũ othe magaatũũrania hamwe me na thayũ na ũrũmwe.—Mika 4:3, 4.

7. Hingo ya Wathani wa Mĩaka Ngiri wa Jesu, andũ ehokeku magaatuĩka akinyanĩru, na thĩ yothe ĩgaatuĩka paradiso. Gũkinyagia mũthia-inĩ wa mĩaka ngiri, Jesu agaakorũo ekĩte maũndũ mothe marĩa Ngai amũũrĩtie eke. Hingo ĩo nĩguo agaacokeria Ithe Ũthamaki. (1 Akorintho 15:24) Nĩ kĩ gĩkũgiria wĩre arata aku na endwa aku maũndũ marĩa Ũthamaki wa Ngai ũrĩka?

[Mbica karatathi ka 13]

Ruungu rwa waathani wa Jesu, gũtigakorũo rĩngĩ na rũthũũro kana mũthutũkanio