Ithomo rĩa 13

Ũngĩhota Kuona Atĩa Ndini ya Ma?

Hihi ndini ciothe nĩikenagia Ngai, kana no ĩmwe tu? (1)

Nĩũndũ kĩ kũrĩ na ndini nyingĩ mũno ciĩĩtaga cia Gĩkristiano? (2)

Ũngĩhota gũkũũrana atĩa Akristiano a ma? (3-7)

1. Jesu aambĩrĩirie ndini ĩmwe ya ma ya Gĩkristiano. Kwoguo rĩu no mũhaka gũkorũo na ngwatanĩro, kana gĩkundi, o kĩmwe tu, kĩa athathayia a ma a Jehova Ngai. (Johana 4:23, 24; Aefeso 4:4, 5) Bibilia ĩrutanaga atĩ nĩ andũ anini tu marĩ thĩinĩ wa njĩra ĩrĩa njeke ĩkinyagia muoyo-inĩ.—Mathayo 7:13, 14.

2. Bibilia nĩyarathire atĩ thutha wa gĩkuũ gĩa atũmwo, morutani ma maheeni na maũndũ memenyeretio matarĩ ma Gĩkristiano nĩmangĩatonyire kahora kahora thĩinĩ wa gĩkundi gĩa Gĩkristiano. Andũ nĩmangĩagucĩrĩirie etĩkia mamarũmĩrĩre handũ ha kũrũmĩrĩra Kristo. (Mathayo 7:15, 21-23; Atũmwo 20:29, 30) Nĩkĩo tuonaga ndini nyingĩ mũno mwanya mwanya ciĩĩtaga cia Gĩkristiano. Tũngĩhota gũkũũrana atĩa Akristiano a ma?

3. Rũũri rũrĩa rũnene makĩria rwa Akristiano a ma nĩ atĩ o me na wendani wa ma gatagatĩ-inĩ kao o ene. (Johana 13:34, 35) Matirutagwo mecirie atĩ o nĩega makĩria kũrĩ andũ a iruka kana rangi ũngĩ. O na matirutagwo gũthũũra andũ a kuuma mabũrũri mangĩ. (Atũmwo 10:34, 35) Kwoguo o matigwatanagĩra mbaara-inĩ. Akristiano a ma matuganaga o ta ariũ na aarĩ a ithe ũmwe.—1 Johana 4:20, 21.

4. Rũũri rũngĩ rwa ndini ya ma nĩ atĩ agwatanĩri ayo nĩmekĩrĩire Bibilia mũno. O mamĩĩtĩkagĩra atĩ nĩ Kiugo kĩa Ngai na nĩmetĩkĩtie ũrĩa yugaga. (Johana 17:17; 2 Timotheo 3:16, 17) O monaga Kiugo kĩa Ngai kĩrĩ kĩa bata makĩria ma meciria kana mĩtugo ya andũ. (Mathayo 15:1-3, 7-9) O mageragia gũtũũra kũringana na Bibilia mũtũũrĩre-inĩ wao wa mũthenya o mũthenya. Kwoguo o matihunjagia ũndũ ũmwe magacoka mageka ũndũ ũngĩ.—Tito 1:15, 16.

5. O na ningĩ no mũhaka ndini ya ma ĩtĩĩe rĩĩtwa rĩa Ngai. (Mathayo 6:9) Jesu nĩaamenyithirie andũ arĩa angĩ rĩĩtwa rĩa Ngai, Jehova. No mũhaka Akristiano a ma meke o ta ũguo. (Johana 17:6, 26; Aroma 10:13, 14) Nĩ andũ arĩkũ itũũra-inĩ rĩanyu maheaga arĩa angĩ ũhoro wa rĩĩtwa rĩa Ngai?

6. No mũhaka Akristiano a ma mahunjie ũhoro wa Ũthamaki wa Ngai. Jesu nĩekire ũguo. Hingo ciothe we aaragia ũhoro wa Ũthamaki. (Luka 8:1) Aathire arutwo ake mahunjie ndũmĩrĩri o ĩo ĩo thĩ yothe. (Mathayo 24:14; 28:19, 20) Akristiano a ma metĩkĩtie atĩ Ũthamaki wa Ngai wiki tu nĩguo ũkarehere thĩ ĩno ũgitĩri wa ma.—Thaburi 146:3-5.

7. No mũhaka arutwo a Jesu matigakorũo marĩ gĩcunjĩ gĩa thĩ ĩno njũru. (Johana 17:16) O matihutanagia na maũndũ ma ũteti ma thĩ kana ngarari mwanya mwanya cia mũingĩ. O nĩmathemaga mũthiĩre wa gũthũkia, maũndũ marĩa memenyeretio, na mawoni marĩa marĩ ma ndũire thĩinĩ wa thĩ. (Jakubu 1:27; 4:4) Hihi wahota gũkũũrana gĩkundi gĩa kĩndini itũũra-inĩ rĩanyu kĩrĩa kĩrĩ na marũũri macio ma Ũkristiano wa ma?

[Mbica karatathi ka 26, 27]

Akristiano a ma nĩmendaine, nĩmatĩĩte Bibilia, na nĩmahunjagia ũhoro wa Ũthamaki wa Ngai