Njĩra Iria Mahũthagĩra Kũhunjia Ũhoro Mwega
AKRISTIANO nĩ maathĩtwo “mũgatũme andũ a ndũrĩrĩ ciothe matuĩke arutwo,” no ũũ ti kuuga atĩ magarũre andũ na hinya. Ndũmĩrĩri ya Jesu yaarĩ “’hunjagĩrie arĩa athĩni Ũhoro-ũrĩa-Mwega” na “ngohohanie arĩa athuthĩku ngoro” na “ningĩ ’horagĩrie arĩa othe me na kĩeha.” (Mathayo 28:19; Isaia 61:1, 2; Luka 4:18, 19) Aira a Jehova macaragia gwĩka ũũ na ũndũ wa kũmemerekia ũhoro ũrĩa mwega kuuma Biblia-inĩ. Ta mũnabii Ezekieli wa tene-rĩ, ũmũthĩ Aira a Jehova mageragia gũcaria “andũ arĩa megũcakaya na makarĩrĩra maũndũ mothe ma thahu marĩa mekagwo.”—Ezekieli 9:4.
Njĩra ĩrĩa njega yũũĩkaine ĩrĩa mahũthagĩra gwetha arĩa athuthĩku nĩũndũ wa mĩikarĩre ya rĩu-rĩ, nĩ kũhunjia nyũmba o nyũmba. Mekagĩra kĩyo kĩa mwanya nĩgetha makinyĩre mũingĩ, o ta ũrĩa Jesu aathire “akĩhunguraga matũũra o na mĩciĩ, akahunjagia Ũhoro-ũrĩa-Mwega wa ũthamaki wa Ngai.” Arutwo ake a mbere no guo mekire. (Luka 8:1; 9:1-6; 10:1-9) Ũmũthĩ, kũrĩa gũkũhoteka, Aira a Jehova nĩmageragia gũthiĩ mĩciĩ maita maingĩ o mwaka, makĩgeria kwaria kahinda kanini na ene nyũmba maũndũ ma itũũra kana ma mĩena ĩngĩ ya thĩ. Rĩandĩko rĩmwe kana merĩ nĩ mathomagwo na makarĩrĩrio. No mwene nyũmba angĩonania kwenda, Aira nĩ mabangaga gũcoka nĩũndũ wa mĩario makĩria. Makoragwo na Biblia na mabuku maagũtarĩria Biblia na mwene nyũmba enda makabanga kwĩruta Biblia nake gũtarĩ irĩhi. Mamilioni ma mathomo macio ma Biblia matwarithagio na mbere hĩndĩ ciothe harĩ mũndũ ũmwe kana famĩlĩ thĩ yothe.
Njĩra ĩngĩ ya kũheana “Ũhoro-ũrĩa-Mwega wa ũthamaki” nĩ kũgerera mĩcemanio ĩrĩa ĩĩkagwo thĩinĩ wa Kingdom Halls. Aira a Jehova mekaga mĩcemanio yao kiumia o kiumia. Mũcemanio ũmwe nĩ mĩario ya mũingĩ ĩgĩtarĩria ũhoro wa ica ikuhĩ, ũkarũmĩrĩrũo nĩ mĩario ya ũrathi wa Biblia kũgerera ngathĩti ya Watchtower. Mũcemanio ũngĩ nĩ cukuru ya gũthomithia Aira nĩguo matuĩke ahunjia agĩrĩru a ũhoro ũrĩa mwega, ũkarũmĩrĩrũo nĩ gĩcunjĩ kĩa mĩario ya kũruta ũira thĩinĩ wa itũũra rĩao. Ningĩ, o kiumia rita rĩmwe Aira nĩ macemanagia mĩciĩ-inĩ ya andũ kĩũmbe, me tũkundi tũnini, nĩũndũ wa wĩruti wa Biblia.
Andũ oothe nĩetĩkĩrie gũũka mĩcemanio-inĩ ĩno. Gũtihothithagio. Mĩcemanio ĩyo nĩ yakũguna andũ othe. Biblia yugaga ũũ: “Hamwe na ũguo nĩtwĩciragiei ũrĩa tũngĩarahũranaga o mũndũ na ũrĩa ũngĩ, nĩ getha twendanage, na twĩkage ciĩko njega; ningĩ tũtigatige kũũnganaga hamwe, ta ũrĩa andũ amwe mamenyerete gwĩkaga, no kaba tũhatanagĩrĩrie; na twĩkage ũguo o makĩria tondũ wa ũrĩa mũkuona atĩ Mũthenya ũcio nĩũrakuhĩhĩria.” Wĩruti wa mũndũ kĩũmbe na gũtuĩria nĩ wa bata, no gũcemania na arĩa angĩ nĩkuo gũcanjamũraga: “Kĩgera nĩkĩnoraga kĩrĩa kĩngĩ, na noguo mũndũ na mũratawe mohĩganagia gĩthiithi.”—Ahibirania 10:24, 25; Thimo 27:17.
Aira nĩ mahũthagĩra mĩeke o ĩrĩa yoneka kũheana ũhoro ũrĩa mwega rĩrĩa macemania na andũ me mĩhangʼo-inĩ yao. Kwahota gũkorũo nĩ ciugo nyinyi maarĩtie na mũndũ ũrĩa marigainie kana mũgendi ũrĩa maikarainie mbathi-inĩ kana ndege-inĩ, rĩngĩ nĩ mĩario mĩraihu marĩtie na mũratawe kana mũndũ wa mbarĩ, o na kana mũndũ ũrĩa marutithanagia wĩra hamwe mathaa ma mĩaraho. Ũira mũingĩ ũrĩa Jesu aaheanaga arĩ gũkũ thĩ atũmagĩra njĩra ĩno—kũgerera hũgũrũrũ-inĩ cia iria na rwere-inĩ rũa kĩrĩma, akĩrĩa irio mĩciĩ-inĩ ya andũ, arĩ ũhiki-inĩ, kana arĩ macua-inĩ ya ategi a ciũngũyũ Iria-inĩ rĩa Galili. Arutanire thunagogi-inĩ na hekalu thĩinĩ wa Jerusalemu. O kũrĩa guothe akoragũo nĩonaga mahinda ma kwaria ũhoro wa Ũthamaki wa Ngai. Na njĩra o ĩyo Aira a Jehova mageragia kũrũmĩrĩra makinya make.—1 Petero 2:21.
KŨHUNJIA NA NJĨRA YA MŨHAANO
Gũtirĩ o na ĩmwe ya njĩra icio cia kũheana ũhoro mwega ĩngĩkorũo na kĩene kũrĩ wee angĩkorũo ũrĩa ũrakwĩra ndahũthagĩra ũrutani ũcio we Mwene. Kuga ũndũ ũmwe na gwĩka ũndũ ũngĩ nĩ ũhinga, na ũhinga wa ndini nĩguo ũtũmĩte andũ milioni nyingĩ marege Biblia. Biblia ndĩngĩigĩrĩrũo kĩgenyo. Aandĩki-marũa na Afarisai maarĩ na Maandĩko ma Kĩhibirania, no ĩndĩ Jesu amatarũranirie atĩ nĩ hinga. Aaririe ũrĩa maathomaga kuuma Watho-inĩ wa Musa, na akĩongerera akĩra arutwo ake atĩrĩ: “Maũndũ marĩa mothe mamwĩraga mwĩke, mekagei na mũmarũmagie: no tigagai gwĩka ta ũrĩa mekaga o ene; nĩ ũndũ o moigaga, na matiĩkaga.” (Mathayo 23:3) Mũtũũrĩre mwega wa Mũkristiano ũkĩrĩte mathaa maingĩ marĩa ahunjagia. Ũndũ ũcio nĩ wagweteirũo atumia Akristiano arĩa maarĩ na athuri matetĩkĩtie: “Mahote kũgarũrũo ngoro, Ũhoro ũtarĩ ho, nĩ mĩikarĩre ya atumia ao, nĩ ũndũ wa kũonaga ũrĩa mũikaraga na mĩikarĩre ya ũthingu, na mwĩ na gĩtĩo.”—1 Petero 3:1, 2.
Kwoguo-rĩ, Aira a Jehova mageragia kũgaathĩrĩria andũ arĩa angĩ ũhoro ũrĩa mwega na njĩra ĩno: Gũkorũo marĩ mũhaano mwega wa mĩtugo ya Akristiano ĩrĩa magaathagĩrĩria andũ arĩa angĩ. “Maũndũ mothe marĩa mũngĩenda andũ mamwĩkage inyuĩ, mekagei o mo o nao.” (Mathayo 7:12) Mageragia kũhingia ũguo harĩ andũ othe to harĩ Aira arĩa angĩ, arata, andũ a itũũra, o na kana a mbarĩ. Nĩ ũndũ ti akinyanĩru-rĩ, matingĩhota gũtoria hingo ciothe. Wendi wa ngoro ciao nĩ gwĩka andũ othe wega to kũmahunjĩria ũhoro ũrĩa mwega wa Ũthamaki no ĩndĩ nĩ makũnjũragĩra andũ guoko rĩrĩa kwahoteka.—Jakubu 2:14-17.
[Mbica karatathi ka 19]
Hawaii
[Mbica karatathi ka 19]
Venezuela
[Mbica karatathi ka 19]
Yugoslavia
[Mbica karatathi ka 20]
Kingdom Halls, Ciakĩtwo na njĩra hũthũ, nĩ kũndũ kwaragio mĩario ya Biblia
[Mbica karatathi ka 21]
Mũtũũrĩre-inĩ wa familĩ yao na rĩrĩa magomana na angĩ mageragia gwĩka maũndũ marĩa mahunjagia