Nĩa Mahunjagia Ũhoro ũrĩa Mwega?

“ . . . nĩũkahunjio thĩ yothe.”—MATHAYO 24:14.

ŨHORO ũrĩa mwega nĩ ũhunjagio nĩ Aira a Jehova thĩinĩ wa thĩ yothe. Mekaga ũguo na njĩra mwanya mwanya. Ĩmwe nĩ na . . .

Njĩra ya Kwaria. Aira a Jehova matwaragĩra andũ ũhoro ũrĩa mwega o ta ũrĩa Jesu na arutwo ake meekaga. (Luka 8:1; 10:1) Matiĩrĩgagĩrĩra andũ merehe kũrĩ o. Aira a Jehova othe—makĩria ma milioni mũgwanja nĩ mahunjagĩria andũ ũhoro wa Ũthamaki wa Ngai. Mahunjagia nyũmba kwa nyũmba, barabara-inĩ, makĩhũthĩra thimũ, o hamwe na njĩra ingĩ. Mwaka ũcio ũrathirire, Aira a Jehova maahũthĩrire makĩria ma mathaa bilioni ĩmwe na nuthu wĩra-inĩ ũcio.

To ũhoro wa Ũthamaki wa Ngai wiki marutaga andũ, ĩndĩ mamarutaga ‘maũndũ marĩa mothe [Jesu] aathanĩte.’ (Mathayo 28:20) Makoragwo makĩruta andũ makĩria ma milioni inyanya Bibilia mĩciĩ-inĩ hatarĩ marĩhi.

Aira a Jehova marahunjia thĩinĩ wa mabũrũri 236 thĩ yothe. Mahunjagĩria andũ a mĩthemba yothe. Mahunjagia matũũra-inĩ na mataũni-inĩ, Mĩtitũ-inĩ ya Amazon na ya Siberian, mawerũ-inĩ ma Afrika nginya Irĩma-inĩ cia Himalaya. Matirĩhagwo nĩguo marute wĩra ũcio; mahũthagĩra mbeca na mahinda mao nĩ ũndũ wa wendo wao harĩ Ngai na harĩ andũ. Ningĩ nĩ mahunjagia ũhoro ũrĩa mwega . . .

Kũgerera Mabuku. Ngathĩti ĩno, Mũrangĩri Yanagĩrĩra Ũthamaki wa Jehova, ihinda-inĩ rĩrĩ ĩracabwo na thiomi 185 na ĩkarutwo kobĩ makĩria ma milioni 42 o riuma. Ngathĩti ĩngĩ ya itari o rĩu, Amkeni!, ĩrĩa o nayo yanagĩrĩra Ũthamaki, ĩcabagwo kobĩ milioni 83 na thiomi hakuhĩ 40 o riuma.

Nĩ gũkoragwo na mabuku, broshua, trakti, CD/MP3, na DVD cia thiomi makĩria ma 540 iria ciaragĩrĩria morutani ma Bibilia. Thĩinĩ wa mĩaka ikũmi tu mĩhĩtũku Aira a Jehova nĩ mathondekete na magakinyĩria andũ indo ta icio makĩria ma bilioni 20, icio nĩ hakuhĩ indo ithatũ harĩ o mũndũ thĩinĩ wa thĩ!

Ningĩ Aira a Jehova nĩ macabĩte kana magacabithia Bibilia nyingĩ. Bibilia Takatifu Tafsiri ya Ulimwengu Mpya—ĩrĩa ĩtaũrĩtwo, ĩgacabwo na ĩgakinyĩrio andũ nĩ Aira a Jehova—kahinda-inĩ gaka nĩ ĩracabwo ĩrĩ yothe kana ĩrĩ icunjĩ thĩinĩ wa thiomi 96. Na makĩria ma kobĩ milioni 166 nĩ ikinyĩirio andũ. Aira a Jehova ningĩ nĩ maheanaga ũhoro mwega kũgerera . . .

Mĩcemanio ya Gĩkristiano. Mĩcemanio ĩrĩa ĩkoragwo thĩinĩ wa Nyũmba cia Ũthamaki o kiumia ti ya kĩĩndini tu; ĩkoragwo ĩrongoreirio kũrutana. Nĩ gũkoragwo na mĩario yaragĩrĩria maũndũ ngũrani kuuma Bibilia-inĩ, hamwe na wĩruti wa Bibilia kũgerera ngathĩti ya Mũrangĩri na mabuku mangĩ. Mĩcemanio-inĩ ĩyo Aira a Jehova nĩ merutaga ũrĩa mangĩhunjĩria andũ ũhoro mwega na njĩra njega makĩria.

Thĩinĩ wa ciũngano makĩria ma 107, 000 iria irĩ thĩ yothe Aira a Jehova merutaga ũhoro ũhanaine, ũndũ ũrĩa ũtũmaga makorũo na ũrũmwe. Andũ othe nĩ manyitagwo ũgeni mĩcemanio-inĩ ĩyo. Gũtiũnganagio mĩhothi. Ma nĩ atĩ, maũndũ macio mothe mangĩkorũo marĩ ma tũhũ Aira a Jehova mangĩaga gwĩka kũringana na ũrĩa mahunjagia. Kwoguo nĩ merutanagĩria kũhunjia ũhoro ũrĩa mwega na njĩra ya . . .

O Mũndũ Kũiga Kĩonereria Kĩega. Merutanagĩria kũiga kĩonereria kĩega mĩtugo-inĩ ya Gĩkristiano, makĩgeragia o ũrĩa wothe mangĩhota gwĩkĩra andũ arĩa angĩ maũndũ marĩa o ene mangĩenda gwĩkĩrũo. (Mathayo 7:12) O na gũtuĩka ti akinyanĩru na rĩmwe na rĩmwe nĩ mahĩtagia-rĩ, nĩ makoragwo na wendo wa gũteithia andũ na njĩra ingĩ rĩrĩa kwahoteka, to kũmahunjĩria ũhoro ũrĩa mwega tu.

Aira a Jehova matikũgarũra thĩ yothe na njĩra ya kũhunjia. Ĩndĩ, o ta ũrĩa Jesu aarathĩte-rĩ, rĩrĩa Jehova akona atĩ wĩra ũcio nĩ warĩka, hĩndĩ ĩyo nĩrĩo ithirĩro rĩgakinya. Ũndũ ũcio ũgaakorũo na moimĩrĩro marĩkũ harĩ thĩ na atũũri ayo?

[Mbica karatathi ka 7]

Ũhoro ũrĩa mwega nĩ ũrahunjio nĩ Aira a Jehova thĩinĩ wa thĩ yothe