Kũhũthĩra Maikoroboni

AARĨ na ariũ a Ithe witũ mahũthagĩra mahinda na kĩyo kĩingĩ nĩguo makorũo mĩcemanio-inĩ ya Gĩkristiano. Nĩguo magunĩke, no mũhaka maigue wega maũndũ marĩa mararutanwo.

Hĩndĩ ya Isiraeli ya tene, gũtiarĩ na macini cia kũnenehia mũgambo. Athikĩrĩria milioni nyingĩ rũrĩrĩ-inĩ rwa Isiraeli maahotire atĩa kũigua rĩrĩa Musa aamarĩirie Kĩaragana-inĩ kĩa Moabi mbere ya kũingĩra thĩinĩ wa Bũrũri wa Kĩĩranĩro? No kũhoteke Musa aahũthĩrire njĩra ya gũkinyanĩria ũhoro, ciugo ciake igacokerũo na kayũ nĩ athuri marũgamĩte kũndũ gũtiganĩte thĩinĩ wa kambĩ. (Gũcok. 1:1; 31:1) Ihinda inyinyi thutha wa Aisiraeli kwambĩrĩria kwĩgwatĩra bũrũri ũrĩa warĩ ithũĩro rĩa Jorodani, Joshua nĩ aacokanĩrĩirie rũrĩrĩ rũu mbere ya Kĩrĩma kĩa Gerizimu na Kĩrĩma kĩa Ebari, na Alawii maarĩ kĩanda-inĩ kĩrĩa kĩahakanĩtie irĩma icio. Hĩndĩ ĩyo makĩigua na magĩtĩkania thutha wa gũthomerũo ũhoro wa irathimo na wa kĩrumi kĩrĩa kĩaigĩtwo mbere yao. (Josh. 8:33-35) Kwahoteka o na hĩndĩ ĩyo, Joshua aahũthĩrire andũ gũkinyanĩria ũhoro, o na kũrĩ ũguo ũrĩa kũndũ kũu gwaikarĩte hatarĩ nganja nĩ gwateithagia mũgambo gũthiĩ kũndũ kũraihu.

Mĩaka ta 1,500 thutha ũcio rĩrĩa ‘kĩrĩndĩ kĩingĩ mũno kĩagomanire’ Iria-inĩ rĩa Galili gĩthikĩrĩrie Jesu, aaingĩrire marikabu-inĩ, akĩehehera rũteere-inĩ, agĩikara thĩ akĩarĩria kĩrĩndĩ kĩu. (Mar. 4:1, 2) Nĩ kĩĩ gĩatũmire Jesu arie arĩ marikabu-inĩ? Tondũ mũndũ nĩ aiguĩkaga wega mũgambo wake ũgereire igũrũ rĩa maĩ maingĩ.

Gũkinyĩria kĩambĩrĩria-inĩ gĩa karine ya 20, mũigana wa athikĩrĩria arĩa mangĩaiguire ũrĩa mwaria aroiga wehocetie harĩ mũigana na wagĩrĩru wa mũgambo wake. Ĩndĩ, kwambĩrĩria mĩaka-inĩ ya 1920, ndungata cia Jehova nĩ ciambĩrĩirie kũhũthĩra macini cia kũnenehia mũgambo wa aria thĩinĩ wa irũrũngano.

Macini cia Mũgambo. Macini ta icio no inenehie mũgambo wa mwaria biũ na mwario wake ũkorũo ũrĩ o mwega. Mwaria ndabataraga kwĩgũmĩra mũno akĩaria. Athikĩrĩria matibataraga kwĩhatĩrĩria mũno gũthikĩrĩria. Ithenya rĩa ũguo nĩ matwaranaga wega na ndũmĩrĩri.

Kĩyo kĩingĩ nĩ gĩĩkĩrĩtwo gũtigĩrĩra atĩ igomano-inĩ na irũrũngano-inĩ cia Aira a Jehova kũrĩ na macini njega cia kũnenehia mũgambo. Ningĩ, Nyũmba nyingĩ cia Ũthamaki nĩ cihũthagĩra macini cia kũnenehia mĩgambo ya arĩa marutaga mĩario, arĩa matongoragia mĩcemanio, kana arĩa mathomaga mbere ya andũ kĩũngano-inĩ. Nacio ciũngano imwe nĩ ikoragwo na maikoroboni cia kũhũthĩrũo nĩ athikĩrĩria magĩcokia ciũria hĩndĩ ya mĩcemanio. Angĩkorũo kĩũngano kĩanyu nĩ kĩrĩ indo icio wĩrute gũcihũthĩra wega.

Maũndũ Mamwe ma Kũririkana. Nĩguo ũhũthĩre indo icio ũrĩa kwagĩrĩire, ririkana maũndũ maya: (1) Maikoroboni yagĩrĩirũo gũkorũo kĩndũ inji inya nginya ithathatũ kuuma kanua-inĩ. Maikoroboni ĩngĩkorũo hakuhĩ mũno, ciugo ciaku no ciage kũiguĩka wega. Ĩngĩkorũo haraihu mũno, mũgambo waku ndũngĩiguĩka biũ. (2) Maikoroboni yagĩrĩirũo gũkorũo mbere yaku, no ti mwena-inĩ. Angĩkorũo nĩ ũraceraceria mũtwe mwena na mwena, tigĩrĩra atĩ ũraria o rĩrĩa ũrorete maikoroboni-inĩ. (3) Ongongerera mũgambo gũkĩra ũrĩa waragia naguo ndeereti-inĩ cia o mũthenya. No hatirĩ bata wa kũgũtũka. Macini ya mũgambo nĩ ĩgũkinyia mũgambo waku kũrĩ athikĩrĩria aku nginya arĩa marĩ kũraihu mũno. (4) Angĩkorũo nĩ ũrabatara gũtheria mũmero kana nĩ ũraigua ũkĩenda kũhaya kana gwathimũra, tigĩrĩra atĩ nĩ wehũgũra kuuma maikoroboni-inĩ.

Rĩrĩa Ũraruta Mĩario. Rĩrĩa wathiĩ rĩarĩrio-inĩ, nĩ harĩ mũrũ wa Ithe witũ ũkaga kũiganania maikoroboni. Rũgama ũrĩa ũrũgamaga na ũkorũo ũrorete athikĩrĩria rĩrĩa areka ũguo. Igĩrĩra maũndũ marĩa wandĩkĩte harĩa ũrarĩria, na ũtigĩrĩre atĩ maikoroboni ndĩramathiĩka.

Wambĩrĩria kwaria, thikĩrĩria ũrĩa mũgambo waku ũraiguĩka kuuma gĩkeero-inĩ. Hihi mũgambo nĩ mũnene makĩria, kana kũrĩ na ciugo imwe irate andũ matũ? No ũbatare gũcoka na thutha inji ĩmwe kana igĩrĩ. Rĩrĩa ũraikia maitho maku maũndũ-inĩ marĩa wandĩkĩte ririkana atĩ wagĩrĩirũo nĩ gũthoma kana kwaria o rĩrĩa ũrorete ĩmwe kwa ĩmwe maikoroboni-inĩ kana igũrũ rĩayo hanini, no ti thĩ wayo.

Rĩrĩa Ũrathoma Ũrĩ Rĩarĩrio-inĩ. Nĩ wega makĩria kũnyita Bibilia yaku kana ibuku rĩngĩ woete igũrũ nĩguo ũthiũ waku ũkorũo werekeire athikĩrĩria. Tondũ no kũhoteke atĩ maikoroboni ĩgũkorũo mbere yaku-rĩ, no ũbatare kũnyita ibuku rĩrĩa ũrathoma ũrĩigĩte rũere-inĩ hanini. Ũguo nĩ kuuga atĩ mũtwe waku wagĩrĩirũo gũkorũo hanini rũere-inĩ rũu rũngĩ rwa maikoroboni. Kwoguo, rĩrĩa ũrathoma mũgambo waku ũgũthiĩ ĩmwe kwa ĩmwe maikoroboni-inĩ.

Ariũ a Ithe witũ aingĩ arĩa mathomaga hĩndĩ ya Wĩruti wa Mũrangĩri mathomaga marũgamĩte hakuhĩ na maikoroboni ĩhocetio handũ. Ũndũ ũcio ũmateithagia kũhihia wega makĩria na magathoma ũrĩa kwagĩrĩire kuuma ngoro. Ririkana atĩ ũthomi wa ibungo nĩ gĩcunjĩ kĩa bata mũno harĩ mũcemanio ũcio. Kũgunĩka kwa athikĩrĩria kwĩhocetie na njĩra nene harĩ kũigua wega kĩrĩa kĩrathomwo.

Hĩndĩ ya Gũcokia Ciũria Mũcemanio-inĩ. Angĩkorũo kĩũngano-inĩ kĩanyu nĩ mũhũthagĩra maikoroboni gũcokia ciũria, ririkana atĩ no ũkũbatara kwaria na njĩra ĩraiguĩka na mũgambo mũiganu. Rĩrĩa ũracokia nyita ibuku rĩrĩa mũrathoma kana Bibilia na guoko. Ũndũ ũcio ũgũgũteithia kuona wega ũhoro ũcio rĩrĩa ũraria na maikoroboni.

Ciũngano-inĩ imwe ariũ a Ithe witũ nĩ maheagwo wĩra wa gũtwarĩra athikĩrĩria maikoroboni hĩndĩ ya gũcokia ciũria. Angĩkorũo kwanyu nĩ gwĩkagwo ũguo, rĩrĩa waheo mweke ũcokie kĩũria ikara woete guoko igũrũ nĩguo mũrũ wa Ithe witũ ũrĩa ũratwarĩra andũ maikoroboni one harĩa ũikarĩte na agũkinyĩre na ihenya. Angĩkorũo nĩ maikoroboni ĩrĩa ya kwĩnyitĩra, wĩhaarĩrie kũmĩamũkĩra. Ndũkambĩrĩrie gũcokia ũtanyitĩte maikoroboni wega. Warĩkia kwaria, mĩneane o na ihenya.

Rĩrĩa Ũrĩ na Kĩonereria. Angĩkorũo mũndũ nĩ ekũhũthĩra maikoroboni hĩndĩ ya kĩonereria nĩ ekũbatara gwĩciria wega mbere. Angĩkorũo maikoroboni ĩhocetio handũ, nĩ ũkũhota kũhũthĩra moko maku merĩ kũnyita Bibilia yaku na maũndũ marĩa wandĩkĩte. Kũhũthĩra maikoroboni ya kwĩnyitĩra no gũkũhe mweke wa kũhũthĩra ciĩga cia mwĩrĩ makĩria, ĩndĩ no ũbatare kũbanga ũrĩa mũrĩ nake akũnyitĩre. Ũngĩka ũguo nĩ ũkũhota kũhũthĩra moko maku wega kũnyita Bibilia. Mũrĩ na mwene nyũmba no mũbatare kwĩmenyeria nĩguo amenye ũrĩa agaakũnyitĩra maikoroboni. Ningĩ ririkana atĩ, ũrĩ rĩarĩrio-inĩ mũtiagĩrĩirũo kuonia athikĩrĩria mũgongo, makĩria rĩrĩa mũraria.

Cionereria cia Mũcemanio wa Ũtungata no cikorũo na andũ maigana ũna, na no mabatare gũceeracera hau rĩarĩrio-inĩ. Kwoguo no kũbataranie maikoroboni cigana ũna. Ciagĩrĩirũo gũkorũo ciigĩtwo harĩa hagĩrĩire rĩarĩrio-inĩ, kana arĩa marĩ na kĩonereria matwarĩrũo rĩarĩrio-inĩ. Mĩbango nĩ ĩbataranagia o tene gũtigĩrĩra atĩ maikoroboni irĩ harĩa hagĩrĩire ihinda rĩrĩa rĩagĩrĩire. Kũrora cionereria mbere ya cirutĩtwo nĩ kũheanaga mweke wa kuonia arĩa marĩ na kĩonereria ũrĩa mangĩhũthĩra maikoroboni na njĩra njega. Angĩkorũo gũtikũhoteka gũcokera kĩonereria rĩarĩrio-inĩ, no akorũo arĩ wega arĩa marĩ na kĩonereria kĩu kũhũthĩra kanyamũ kaigana maikoroboni kwĩmenyeria ũrĩa makaamĩnyita. Thutha wa kĩonereria, arĩa marĩ na kĩonereria magĩrĩirũo gũcokia maikoroboni na ũbacĩrĩru harĩa cikũigĩrĩirũo, na memenyerere matigategwo nĩ ngucio cia maikoroboni makiuma rĩarĩrio-inĩ.

Kũhũthĩra maikoroboni wega kũhutanĩtie ĩmwe kwa ĩmwe na ũmwe wa mĩoroto ĩrĩa mĩnene ya mĩcemanio itũ—gwĩkĩrana ngoro rĩrĩa tũrarĩrĩria Kiugo kĩa Ngai. (Ahib. 10:24, 25) Tũngĩĩruta kũhũthĩra maikoroboni wega, o mũndũ no akorũo na itemi harĩ kũhingia muoroto ũcio wa bata.