ŨTHUTHURIA INTANETI-INĨ
Ũthuthuria
INTANETI-INĨ
Gĩkũyũ
ũ
  • ĩ
  • ũ
  • BIBILIA
  • MABUKU
  • MĨCEMANIO
  • be ithomo 48 kar. 251-kar. 254 kĩb. 2
  • Kũhũthĩra Ihooto

Hatirĩ video.

Tũrekere, nĩ hagĩa thĩna kũhingũra video ĩyo.

  • Kũhũthĩra Ihooto
  • Gunĩka nĩ Cukuru ya Ũtungata wa Gĩtheokrasi
  • Ũhoro Ũhaanaine
  • Wĩgerekanie na Jehova Harĩ Gũkorũo na Ũigananĩru
    Mũrangĩri Yanagĩrĩra Ũthamaki wa Jehova (Wĩruti)—2023
  • Kũhũthĩra Ciũria Wega
    Gunĩka nĩ Cukuru ya Ũtungata wa Gĩtheokrasi
  • Kũhũthĩra Maandĩko Ũrĩa Kwagĩrĩire
    Gunĩka nĩ Cukuru ya Ũtungata wa Gĩtheokrasi
  • Ũtaana na Ũcayanĩri Nĩ Ngumo cia Bata cia Jehova
    Mũrangĩri Yanagĩrĩra Ũthamaki wa Jehova—2013
Ona Makĩria
Gunĩka nĩ Cukuru ya Ũtungata wa Gĩtheokrasi
be ithomo 48 kar. 251-kar. 254 kĩb. 2

ITHOMO RĨA 48

Kũhũthĩra Ihooto

Ũkũbatara gwĩka atĩa?

Hũthĩra maandĩko, ngerekano, na ciũria na njĩra njega na ĩrĩa ĩgũteithia andũ mathikĩrĩrie na mecirie.

Nĩ ũndũ wa bata nĩkĩ?

Kwarĩria andũ ũtarĩ na gĩtĩo na kũnyitĩrĩra mawoni maku mũno no gũtũme mage kũiyũkia ũhoro ũrĩa ũramahe. Kũhũthĩra ihooto gwĩkĩraga andũ ngoro meyarie, gũkamatiga marĩ na ũndũ wa gwĩcũrania, na nĩ ũgaakorũo ũrĩ ũndũ mũhũthũ kwaria nao hĩndĩ ĩngĩ. Njĩra ĩyo no ĩkorũo na moimĩrĩro mega mũno.

NĨ TŨKENAGA mũno nĩ ũndũ wa ũgarũrũku ũrĩa tũgĩte naguo nĩ ũndũ wa Kiugo kĩa Ngai, na nĩ twendaga andũ angĩ o nao magunĩke. Makĩria ma ũguo nĩ tũmenyaga atĩ, kĩrĩgĩrĩro kĩa andũ kĩgiĩ mahinda maroka kĩhocetie harĩ ũrĩa mekũiyũkia ũhoro ũrĩa mwega. (Mat. 7:13, 14; Joh. 12:48) Nĩ twendaga mũno metĩkĩre ũhoro ũrĩa wa ma. Ĩndĩ, nĩguo tũgĩe na moimĩrĩro mega, maũndũ marĩa twĩtĩkĩtie, hamwe na kĩyo gitũ, ciagĩrĩirũo gũtwarana na ũtaũku.

Mũndũ no age kũiyũkia wega ũhoro wa ma, o na ũngĩnyitwo mbaru nĩ Maandĩko maingĩ, ũngĩheanwo hatarĩ ũtaũku na ũkorũo ũkĩguũria atĩ wĩtĩkio ũrĩa akoretwo anyitĩrĩire ti wa ma. Kwa ngerekano, kuga atĩ thigũkũ iria andũ mekĩrĩire ciumanĩte na ndini ĩtarĩ ya ma no kwage gũtũma andũ macenjie ũrĩa macionaga. Kũhũthĩra ihooto nĩyo njĩra ĩrĩa kaingĩ ĩkoragwo na moimĩrĩro mega. Nĩ maũndũ marĩkũ mahutĩtie kũhũthĩra ihooto?

Maandĩko matwĩraga atĩ “ũũgĩ ũrĩa uumaga Igũrũ . . . wenda ũiguano, na nĩũcayanagĩra.” (Jak. 3:17) Kiugo gĩa Kĩgiriki kĩrĩa haha gĩtaũrĩtwo “nĩũcayanagĩra” nĩ kuga “nĩ ũthikagĩrĩria ihooto.” Bibilia imwe ihũthĩrĩte ciugo “kũrũmbũiya,” “ũhoreri,” kana “ũkirĩrĩria.” Ta rora wone atĩ ũcayanĩri nĩ wĩtainwo na thayũ. Thĩinĩ wa Tito 3:2 ũcayanĩri ũgwetetwo hamwe na ũhoreri na ũkonanio atĩ nĩ mũgarũ na kũũgitana. Afilipi 4:5 ĩtwĩraga tũmenyekanage na ngumo ya “gũkiranĩrĩria.” Mũndũ mũcayanĩri nĩ eciragia ũhoro wa maũndũ na mathugunda ma ngoro ma mũndũ ũrĩa araarĩria. Nĩ akoragwo eharĩirie gwĩtĩkĩra ihooto rĩrĩa kwagĩrĩire gwĩka ũguo. Kũhiũrania na andũ na njĩra ta ĩyo nĩ kũhingũraga meciria na ngoro ciao nĩguo maiyũkie wega rĩrĩa tũrahũthĩra ihooto ciumĩte Maandĩko-inĩ.

Wagĩrĩirũo Kwambĩrĩria Atĩa? Luka oigire atĩ rĩrĩa mũtũmwo Paulo aarĩ Thesalonike, aahũthagĩra Maandĩko, “agataarĩria na akonania akĩgwetaga ũhoro mwandĩke atĩ nĩ kwaagĩrĩire Kristo anyamarĩke acoke ariũke oime kũrĩ arĩa akuũ.” (Atũm. 17:2, 3, NW) Ririkana atĩ Paulo eekire ũguo thĩinĩ wa Thunagogi ya Ayahudi. Andũ arĩa aaragĩria nĩ meetĩkĩtie Maandĩko ma Kĩhibirania. Warĩ ũndũ wa ũũgĩ kwambĩrĩria na ũndũ ũrĩa meetĩkanagia naguo.

Paulo akĩarĩria Agiriki thĩinĩ wa Areopago itũũra-inĩ rĩa Athene, ndaambĩrĩirie na kũgweta Maandĩko. Ithenya rĩa ũguo, aambĩrĩirie na maũndũ marĩa maamenyaga na makametĩkĩra, agĩcoka akĩhũthĩra maũndũ macio kũmateithia mecirie ũhoro wa Mũũmbi na mĩoroto Yake.—Atũm. 17:22-31.

Mahinda-inĩ maya maitũ, kũrĩ na andũ bilioni nyingĩ matetĩkĩtie atĩ Bibilia no ĩmatongorie ũtũũro-inĩ wao. Ĩndĩ hakuhĩ ũtũũro wa andũ othe nĩ ũhutĩtio nĩ maũndũ moru marĩa marĩ thĩinĩ wa mũtabarĩre ũyũ wa maũndũ. Andũ nĩ meriragĩria ũndũ ũngĩ mwegega. Ũngĩamba kũmonia atĩ nĩ ũramacaĩra nĩ ũndũ wa mathĩna mao ũcoke wonanie ũrĩa Bibilia yugaga igũrũ rĩamo; njĩra ta ĩyo ya ũtaũku yahota gũtũma andũ ta acio mathikĩrĩrie ũrĩa Bibilia yugaga igũrũ rĩgiĩ muoroto wa Ngai harĩ andũ.

No kũhoteke mĩtugo kana mawĩtĩkio ma ndini marĩa mũrutwo wa Bibilia arĩ namo aamarutĩte kũrĩ aciari ake. Thutha wa kwĩruta atĩ mĩtugo na mawĩtĩkio macio matikenagia Ngai, akamatiga arũmĩrĩre morutani ma Bibilia. Mũrutwo ũcio wa Bibilia angĩtaarĩria aciari ake atĩa itua rĩu? Mahota gwĩciria atĩ nĩ aramakana nĩ ũndũ wa kũrega maũndũ ma ndini marĩa mamũrutĩte. Mũrutwo ũcio wa Bibilia no atue atĩ mbere ya gũtaarĩria aciari ake mũthingi wa Kĩĩmaandĩko wa itua rĩake, nĩ ekũbatara gũtigĩrĩra nĩ mamenya no amendete na no amatĩĩte.

Hĩndĩ ya Gwĩtĩkĩra Ihooto. O na gũtuĩka Jehova nĩwe mwene ũnene wothe wa gwathana-rĩ, nĩ etĩkagĩra ihooto na njĩra nene mũno. Rĩrĩa araika a Jehova maahonokagia Loti na famĩlĩ yake kuuma Sodomu, maamwĩrire ũũ: “Wĩthare ũũrĩre kĩrĩma-inĩ ndũkaninwo.” Ĩndĩ Loti agĩthaithana akiuga: ‘Aca, ti ũguo Jehova.’ Agĩthaithana etĩkĩrio methare mathiĩ Zoari. Jehova nĩ acaĩire Loti na njĩra ya kũmwĩtĩkĩria etharĩre kuo; nĩ ũndũ ũcio rĩrĩa matũũra marĩa mangĩ maanangagwo, Zoari rĩtianangirwo. O na kũrĩ ũguo-rĩ, thutha-inĩ Loti nĩ aarũmĩrĩire ũtongoria wa Jehova wa hau kabere, agĩthamĩra irĩma-inĩ. (Kĩam. 19:17-30) Jehova nĩ aamenyaga atĩ uuge wake nĩguo warĩ mwagĩrĩru, ĩndĩ akĩonania ũkirĩrĩria nginya rĩrĩa Loti aataũkĩirũo nĩ ũndũ ũcio.

Nĩguo tũgĩe na moimĩrĩro mega tũgĩteithia andũ, o na ithuĩ nĩ tũkũbatara gũkorũo na ũcayanĩri. Twahota gũkorũo na ma biũ atĩ mũndũ ũcio ũngĩ nĩwe ũhĩtĩtie, na tũkorũo na itũmi njega cia gwĩkĩra ũira ũndũ ũcio. No rĩmwe na rĩmwe nĩ wega kwaga gũtindĩkĩrĩria mũndũ. Gũcayanĩra ti kũhũthia ithimi cia Jehova. No ũkorũo ũrĩ ũndũ mwega gũcokeria mũndũ ũcio ngatho nĩ ũndũ wa kwĩyaria kana wage gũtinda ũkĩrũnga mahĩtia hĩndĩ o ĩyo nĩguo warĩrĩrie ũndũ ũngĩ ũrĩa ũgũkorũo na moimĩrĩro mega makĩria. O na angĩmenereria ũndũ ũrĩa wĩtĩkĩtie, ndũkarakare. No ũmũrie kĩrĩa gĩtũmĩte akorũo na mawoni macio. Thikĩrĩria macokio make wega. Ũndũ ũcio nĩ ũgũgũteithia gũtaũkĩrũo nĩ mwĩcirĩrie wake. Ningĩ no ũkorũo ũrĩ mũthingi wa gũkagĩa na ndeereti njega ihinda rĩũkĩte.—Thim. 16:23; 19:11.

Jehova nĩ aheete andũ ũhoti wa gwĩthurĩra. Nĩ ametĩkĩrĩtie kũhũthĩra ũhoti ũcio, o na gũtuĩka no mage kũũhũthĩra wega. Joshua arĩ mwaria wa Jehova, nĩ aatarĩirie ũrĩa Ngai aahiũranirie na Aisiraeli. No agĩcoka akiuga ũũ: “Rĩu mũngĩkorũo nĩmũkuona arĩ ũũru gũtungatĩra Jehova, thurai ũmũthĩ ũrĩa mũrĩtungatagĩra; mũmenye kana nĩ ngai iria maithe manyu maatungatagĩra mũrĩmo ũcio wa rũũĩ rũa Farati, kana nĩ ngai cia Aamori, arĩa mũtũũranĩtie nao bũrũri wao; no rĩrĩ, ha ũhoro wakwa niĩ mwene, na nyũmba yakwa-rĩ, tĩrĩtungatagĩra Jehova.” (Josh. 24:15) Wĩra witũ ũmũthĩ nĩ kũruta “ũira,” na twaragia tũrĩ na ũmĩrĩru, ĩndĩ tũtitindĩkagĩrĩria andũ metĩkie. (Mat. 24:14) No mũhaka methurĩre, na tũtimaimaga kĩhooto kĩu.

Ũria Ciũria. Jesu nĩ aatũigĩire kĩonereria kĩega mũno harĩ kũhũthĩra ihooto akĩaria na andũ. Nĩ aarũmbũyagia maũndũ mao na akahũthĩra ngerekano iria mangĩataũkĩirũo na njĩra hũthũ. Ningĩ nĩ aahũthagĩra ciũria na njĩra njega. Gwĩka ũguo nĩ kwaheaga andũ mweke wa kwĩyaria na gũkaguũria methugunda ma ngoro ciao. Ningĩ nĩ kwamekagĩra ngoro metĩkĩre ihooto cia ũndũ ũrĩa waragĩrĩrio.

Mũrutani ũmwe wa Watho oririe Jesu ũũ: “Mũrutani, ngwĩka atĩa nĩ getha ngagaĩrũo muoyo ũtagathira?” Ũngĩarĩ ũndũ mũhũthũ harĩ Jesu kũmũcokeria. No ithenya rĩa ũguo oririe mũndũ ũcio ciũria. ‘Kwandĩkĩtwo atĩa Watho-inĩ? Ũthomaga atĩa?’ Mũndũ ũcio aacokirie ũrĩa kwagĩrĩire. Hihi gũcokia ũrĩa kwagĩrĩire nĩ kwaninire ndeereti ĩyo? Aca. Jesu aarekire mũndũ ũcio athiĩ na mbere, na kĩũria kĩrĩa mũndũ ũcio oririe kĩonanirie atĩ aageragia gwĩtua mũthingu. Oririe ũũ: “Mũndũ wa itũũra riitũ, nĩ ta ũrĩkũ?” Handũ ha kũmwĩra ĩmwe kwa ĩmwe mũndũ wa itũũra nĩ ũrĩkũ, ũndũ ũrĩa mũndũ ũcio kũngĩahotekire aregane naguo nĩ ũndũ wa mwerekera ũrĩa Ayahudi maarĩ naguo harĩ Asamaria na andũ a Ndũrĩrĩ, Jesu aamwĩrire ecirie ũhoro wa ngerekano ĩmwe. Ngerekano ĩyo yakoniĩ Mũsamaria wateithirie mũgendi ũrĩa watunyĩtwo indo ciake na akahũrũo, ĩndĩ mũthĩnjĩri Ngai na Mũlawii matigana kũmũteithia. Jesu aahũthĩrire kĩũria kĩhũthũ gũtigĩrĩra atĩ mũndũ ũcio nĩ ataũkĩrũo nĩ ũndũ ũcio. Njĩra ya Jesu ya kũhũthĩra ihooto yatũmire mũndũ ũcio one ciugo “mũndũ wa itũũra riitũ,” na njĩra ataacionete nayo hau kabere. (Luk. 10:25-37) Na githĩ kĩu ti kĩonereria kĩega gĩa kũrũmĩrĩra! Handũ ha gũkorũo no wee ũraria, na nĩ ũndũ ũcio ũkaima mwene nyũmba mweke wa gwĩciria, wĩrute kũhũthĩra ciũria na ngerekano na njĩra ya ũũgĩ nĩguo ũteithie mũthikĩrĩria waku ecirie.

Heana Ihooto. Rĩrĩa mũtũmwo Paulo aaririe thunagogi-inĩ thĩinĩ wa Thesalonike, makĩria ma gũthoma maandĩko marĩa athikĩrĩria ake meetĩkanagia namo, harĩ ũndũ ũngĩ eekire. Luka oigaga atĩ Paulo aatarĩirie, akĩruta ihooto, na akĩonania ũrĩa ũhoro ũrĩa aathomire ũngĩhũthĩrũo. Nĩ ũndũ ũcio, ‘amwe ao maaigua ũhoro ũcio, makĩwĩtĩkĩra, magĩtuĩka a thiritũ ya Paulo na Sila.’—Atũm. 17:1-4.

O na angĩkorũo athikĩrĩria aku nĩ a, njĩra ta ĩyo ya kũhũthĩra ihooto no ĩkorũo na moimĩrĩro mega. No ũmĩhũthĩre rĩrĩa ũrahunjĩria andũ a mbarĩ cianyu, andũ mũrutaga wĩra nao kana arĩa mũthomaga nao, ũkĩarĩria andũ ũtoĩ ũrĩ ũtungata-inĩ, ũkĩruta mũndũ Bibilia, kana ũkĩruta mĩario kĩũngano-inĩ. Rĩrĩa wathoma rĩandĩko wahota gũtaũkĩrũo nĩrĩo o na ihenya, ĩndĩ mũndũ ũngĩ no age gũtaũkĩrũo na ihenya. No woneke ta ũranyitĩrĩra mawoni maku mũno ũgĩtarĩria rĩandĩko kana ũkĩonania ũrĩa rĩagĩrĩirũo kũhũthĩrũo. Hihi kwamũra na gũtaarĩria ciugo imwe cia bata thĩinĩ wa rĩandĩko no gũteithie? Hihi no ũhũthĩre ihooto ingĩ, kũngĩhoteka kuuma ũhoro-inĩ ũrĩa ũrĩthiũrũrũkĩirie kana kuuma rĩandĩko-inĩ rĩngĩ, rĩkonainie na kĩrĩa ũraarĩrĩria? Hihi ngerekano no ĩgũteithie kũheana ihooto cia ũrĩa woiga? Hihi ciũria no citeithie athikĩrĩria aku mone ihooto cia ũndũ ũcio? Njĩra ta ĩyo ya kũhũthĩra ihooto nĩ ĩteithagia andũ magĩe na mawoni marĩa magĩrĩire na magĩe na maũndũ maingĩ ma gwĩcũrania.

ŨRĨA ŨNGĨKA ŨGUO

  • Ũgĩciria ũrĩa ũkwambĩrĩria ndeereti yaku, wĩcirie ũhoro wa mĩerekera na maũndũ ma athikĩrĩria aku.

  • Hatirĩ bata wa gũtinda ũkĩrũnga mũndũ agweta ũhoro o wothe ũtarĩ wa ma.

  • Aria na ũmĩrĩru, no ũririkane atĩ o ta we andũ marĩ na wĩyathi wa gwĩthurĩra kĩrĩa megwĩtĩkia.

  • Handũ ha gũcokia ciũria naiyũ naiyũ, hũthĩra ciũria ingĩ kana ngerekano gũteithia mũũria ecirie.

  • Gĩa na hũthĩra ya kuonanagia ihooto cia rĩandĩko na njĩra ya gũtaarĩria ciugo iria cia bata, kuonania ũrĩa maũndũ marĩa marĩthiũrũrũkĩirie kana maandĩko mangĩ maronania ũrĩa riugĩte, kana na njĩra ya kũhũthĩra ngerekano kuonania ũrĩa rĩandĩko rĩrahũthĩka.

KWĨMENYERIA: (1) Thutha wa kũhunjĩria mũndũ ũranyitĩrĩra mũno mawoni make, rora ũrĩa ũtwarithirie ndeereti. Nĩ ihooto irĩkũ ũmũheire? Nĩ ngerekano ĩrĩkũ ũhũthĩrire? Nĩ ciũria irĩkũ ũhũthĩrire? Wonanirie atĩa kũrũmbũiya mathugunda ma ngoro kana maũndũ ma mũthikĩrĩria waku? Angĩkorũo ndũngĩhota gwĩka ũguo ũrĩ ũtungata-inĩ-rĩ, geria kwĩmenyeria mũrĩ na mũhunjia ũngĩ. (2) Wĩmenyerie ũrĩa ũngĩhũthĩra ihooto ũkĩaria na mũndũ (wa riika rĩaku kana mwana) ũreciria gwĩka ũndũ mũũru.

    Mabuku ma Gĩkũyũ (1991-2025)
    Uma
    Ingĩra
    • Gĩkũyũ
    • Tũma
    • Thondeka
    • Copyright © 2025 Watch Tower Bible and Tract Society of Pennsylvania
    • Mawatho ma Ũhũthĩri
    • Ũigi wa Hitho
    • Mpangilio wa Faragha
    • JW.ORG
    • Ingĩra
    Tũma