Kũmenya Itemi rĩa Kristo Mũbango-inĩ wa Ngai

“KĨAMBĨRĨRIA-INĨ Ngai nĩ oombire igũrũ na thĩ,” na indo iria ciothe oombire ciarĩ “njega mũno.” (Kĩam. 1:1, 31) Jehova oombĩte andũ marĩ na kĩĩrĩgĩrĩro kĩega kĩa ihinda rĩũkĩte. No ũremi ũrĩa woimĩrire Edeni nĩ wathararirie kĩĩrĩgĩrĩro kĩu kwa ihinda. O na kũrĩ ũguo, muoroto wa Jehova harĩ thĩ na andũ ndwacenjirie. Ngai nĩ oonanirie atĩ njiarũa cia Adamu iria ingĩgathĩka nĩ ingĩkahonokio. Ũthathaiya wa ma nĩ ũngĩgacokio, na Ngai aniine Shaitani hamwe na mawĩra make moru. (Kĩam. 3:15) O rĩngĩ, maũndũ nĩ mangĩgakorũo marĩ ‘mega mũno.’ Jehova angĩkahingia ũndũ ũcio kũgerera Mũrũ wake, Jesu Kristo. (1 Joh. 3:8) Kwoguo, nĩ harĩ bata tũmenye itemi rĩa Jesu mũbango-inĩ wa Ngai.​—Atũm. 4:12; Afil. 2:9, 11.

ITEMI RĨA KRISTO NĨ RĨRĨKŨ?

² Tweciria ũhoro wa itemi rĩa Kristo mũbango-inĩ wa Ngai, nĩ tuonaga atĩ itemi rĩu rĩake nĩ rĩhutĩtie mawĩra maingĩ. Jesu atungataga arĩ Mũkũũri witũ, Mũthĩnjĩri-Ngai Mũnene, Mũtwe wa kĩũngano gĩa Gĩkristiano, na rĩu nĩ Mũthamaki wa Ũthamaki wa Ngai. Gwĩcũrania ũhoro wa mawĩra macio nĩ gũtũteithagia gũtaũkĩrũo wega makĩria nĩ mũbango wa Ngai na gũkongerera wendo witũ harĩ Kristo Jesu. Bibilia nĩ ĩtaaragĩria mawĩra mamwe make.

³ Hĩndĩ ya ũtungata wa Kristo gũkũ thĩ, nĩ kwamenyekire wega atĩ kũiguithanio kwa andũ na Ngai kũngĩahotekire kũgerera Jesu. (Joh. 14:6) Jesu arĩ Mũkũũri, aarutire muoyo wake nĩ ũndũ wa gũkũũra andũ aingĩ. (Mat. 20:28) Kwoguo Jesu to gũkorũo akoragwo arĩ kĩonereria kĩega harĩ mĩthiĩre ya ũthingu, no nĩwe ũkoragwo na itemi inene harĩ kũhinga kwa muoroto wa Jehova harĩ andũ. Nĩ kũgerera harĩ we tu twĩtĩkĩrĩkaga harĩ Ngai. (Atũm. 5:31; 2 Kor. 5:18, 19) Gĩkuũ kĩa Jesu na kũriũka gwake nĩ itũmĩte kũgĩe na mweke wa andũ arĩa athĩki gũkenera irathimo cia tene na tene rungu rwa Ũthamaki wa Ngai.

⁴ Jesu arĩ Mũthĩnjĩri-Ngai Mũnene nĩ ahotaga “gũtũiguĩra tha maũndũ-inĩ marĩa twagĩte hinya” na akahumbĩra mehia ma arũmĩrĩri ake. Mũtũmwo Paulo aataarĩirie ũũ: “Tũtirĩ na mũthĩnjĩri-Ngai mũnene ũtangĩhota gũtũiguĩra tha maũndũ-inĩ marĩa twagĩte hinya, no ũrĩa tũrĩ nake nĩ ageretio maũndũ-inĩ mothe o ta ithuĩ, no ndarĩ mehia.” Aacokire agĩkĩra ngoro arĩa monanagia wĩtĩkio harĩ Jesu Kristo mahũthĩre wega mweke ũcio wa kũiguithanio na Ngai. Ooigire ũũ: “Kwoguo-rĩ, nĩ tũgĩkuhĩrĩriei gĩtĩ kĩa ũnene kĩa ũtugi mũnene tũrĩ na wĩyathi wa kwaria, nĩguo tũiguĩrũo tha na tuonio ũtugi mũnene ũrĩ ũteithio ihinda rĩrĩa rĩagĩrĩire.”​—Ahib. 4:14-16; 1 Joh. 2:2.

⁵ Ningĩ Jesu nĩwe Mũtwe wa kĩũngano gĩa Gĩkristiano. O ta ũrĩa kwarĩ hĩndĩ ya arũmĩrĩri ake karine-inĩ ya mbere, o na ũmũthĩ tũtibataraga mũtongoria wa gũkũ thĩ. Jesu aheanaga ũtongoria kũgerera roho mũtheru na arĩithi arĩa mamũrĩtwo, arĩa mamenyaga atĩ nĩ makoorio nĩwe na Ithe nĩ ũndũ wa ũrĩa marũmbũyagia rũũru rwa Ngai. (Ahib. 13:17; 1 Pet. 5:2, 3) Jehova ooigire ũũ akĩratha ũhoro wa Jesu: “Atĩrĩrĩ, ũcio nĩ ndamũtuire mũira kũrĩ ndũrĩrĩ, na ngĩmũtua mũtongoria na mũnene wa ndũrĩrĩ.” (Isa. 55:4) Jesu nĩ oonanirie atĩ ũrathi ũcio nĩ wahingire, rĩrĩa eerire arutwo ake ũũ: “O na mũtikanetwo atongoria, nĩ gũkorũo Mũtongoria wanyu nĩ ũmwe, nĩwe Kristo.”​—Mat. 23:10.

⁶ Jesu akĩonania mwĩcirĩrie na wendi wake wa gũtũteithia, atwĩraga ũũ: “Ũkai kũrĩ niĩ, inyuothe arĩa mũnogete na mũtitikĩte mĩrigo, na nĩ ngũmũcanjamũra. Oyai icoki rĩakwa mwĩigĩrĩre na mwĩrute kuuma kũrĩ niĩ, nĩ ũndũ niĩ ndĩ mũhooreri na mwĩnyihia ngoro-inĩ, na nĩ mũgũcanjamũrũo. Tondũ icoki rĩakwa nĩ inyoroku, na mũrigo wakwa nĩ mũhũthũ.” (Mat. 11:28-30) Jesu akĩĩgerekania na Ithe, Jehova Ngai, nĩ atongoragia maũndũ ma kĩũngano gĩa Gĩkristiano na ũhooreri na njĩra ĩratũcanjamũra, ũndũ ũrĩa wonanagia atĩ nĩwe “mũrĩithi ũrĩa mwega.”​—Joh. 10:11; Isa. 40:11.

⁷ Marũa-inĩ ma mbere ma Paulo kũrĩ Akorintho, nĩ aataarĩirie wĩra ũngĩ wa Jesu Kristo. Ooigire ũũ: “No mũhaka agaathana arĩ mũthamaki nginya rĩrĩa Ngai akaaiga thũ ciothe rungu rwa makinya make. No rĩrĩa indo ciothe igaakorũo ciigĩtwo rungu rwake, hĩndĩ ĩyo Mũriũ we mwene o nake nĩ akeeiga rungu rwa Ũrĩa waigire indo ciothe rungu rwake, nĩguo Ngai akorũo arĩ maũndũ mothe harĩ andũ othe.” (1 Kor. 15:25, 28) Jesu atanoka gũkũ thĩ aarĩ “mũruti wĩra njorua” wa Ngai, nĩ gũkorũo nĩwe irigithathi harĩ ũũmbi wa Ngai. (Thim. 8:22-31) Rĩrĩa Jesu aatũmirũo gũkũ thĩ, eekaga wendi wa Ngai hingo ciothe. Nĩ aakirĩrĩirie igerio rĩrĩa inene na aakuire arĩ mwĩhokeku harĩ Ithe. (Joh. 4:34; 15:10) Tondũ Jesu aarĩ mwĩhokeku nginya gũkua gwake, Ngai nĩ aamũriũkirie na akĩmũhe kĩhooto gĩa gũkorũo arĩ Mũthamaki wa Ũthamaki wa igũrũ. (Atũm. 2:32-36) Arĩ mũthamaki, Kristo Jesu nĩ aheetwo nĩ Ngai wĩra wa mwanya wa gũtongoria makiri ma ciũmbe cia roho irĩ hinya nĩguo eherie ũtongoria wa andũ na maũndũ mothe moru thĩinĩ wa thĩ. (Thim. 2:21, 22; 2 Thes. 1:6-9; Kũg. 19:11-21; 20:1-3) Thutha ũcio, Ũthamaki wa Ngai ũgĩtongorio nĩ Kristo noguo tu ũgaakorũo ũgĩatha thĩ yothe.​—Kũg. 11:15.

KŨMENYA ITEMI RĨA JESU NĨ KUUGA ATĨA?

⁸ Jesu Kristo arĩ we Kĩonereria gitũ, nĩ mũkinyanĩru. Nĩ aheetwo wĩra wa gũtũrũmbũiya. Nĩguo tũgunĩke kuumana na ũrĩa atũrũmbũyagia, nĩ tũrabatara gũtũũria wĩhokeku harĩ Jehova na tũtwaranage na ithondeka rĩake rĩrĩa rĩrathiĩ na mbere.

⁹ Arũmĩrĩri a Jesu a karine ya mbere nĩ maataũkĩirũo biũ nĩ itemi rĩa Kristo mũbango-inĩ wa Ngai. Moonanirie ũguo na njĩra ya kũrutithania wĩra marĩ na ũrũmwe rungu rwa ũtongoria wa Kristo, na kũrũmĩrĩra motaaro marĩa aaheanaga kũgerera roho mũtheru. (Atũm. 15:12-21) Mũtũmwo Paulo aaragia ũhoro wĩgiĩ ũrũmwe wa kĩũngano kĩa Akristiano arĩa aitĩrĩrie maguta rĩrĩa aandĩkire ũũ: “O tũkĩaragia ũhoro wa ma-rĩ, nĩ tũkũrei tũrĩ na wendo maũndũ-inĩ mothe kwerekera Kristo, o we mũtwe witũ. Kuuma harĩ we, mwĩrĩ wothe nĩ ũnyitithanĩtio wega na ũgateithio ũnyitanĩre na irũngo ciothe iria iheanaga kĩrĩa kĩrabatarania. Rĩrĩa o kĩĩga kĩaruta wĩra ũrĩa kwagĩrĩire-rĩ, mwĩrĩ nĩ ũkũraga o ũgĩthiaga na mbere kwĩyaka guo mwene thĩinĩ wa wendo.”​—Ef. 4:15, 16.

¹⁰ Rĩrĩa o mũndũ thĩinĩ wa kĩũngano anyitanĩra na arĩa angĩ na othe makarutithania wĩra rungu rwa ũtongoria wa Kristo, nĩ kũgĩaga wongerereku na wendo ũrĩa “wohithanagia andũ na njĩra nginyanĩru.”​—Kol. 3:14; 1 Kor. 12:14-26.

¹¹ Maũndũ marĩa marekĩka thĩinĩ wa thĩ, marĩa marahingia ũrathi wa Bibilia, nĩ maronania wega atĩ kuuma mwaka wa 1914, Jesu nĩ aaheirũo wathani. Rĩu arathana gatagatĩ-inĩ ga thũ ciake. (Thab. 2:1-12; 110:1, 2) Ũndũ ũcio ũronania atĩa harĩ arĩa marĩ thĩinĩ wa thĩ? Ica ikuhĩ Jesu nĩ ekuonania itemi rĩake arĩ Mũthamaki wa athamaki na Mwathani wa athani rĩrĩa akaahingia ituĩro rĩa Ngai harĩ thũ ciake. (Kũg. 11:15; 12:10; 19:16) Thutha ũcio, kĩĩranĩro kĩa Jehova gĩa kũhonokia andũ kĩrĩa eeranĩire thutha wa ũremi wa Edeni nĩ gĩkaahinga harĩ arĩa magaakorũo guoko-inĩ kwa ũrĩo gwa Kristo. (Mat. 25:34) Nĩ tũkenaga mũno nĩ kũmenya itemi rĩa Kristo mũbango-inĩ wa Ngai! Rekei tũthiĩ na mbere kũhunjia tũrĩ na ũrũmwe rungu rwa ũtongoria wa Kristo matukũ-inĩ maya ma mũico.