GĨCUNJĨ GĨA GATATŨ

Marakara—Rĩrĩa Mũndũ ‘Ahĩtĩirio nĩ Ũrĩa Ũngĩ’

“Mwarĩ wa Ithe witũ ũmwe kĩũngano-inĩ gitũ aanjigĩrĩire kĩgenyo atĩ nĩ njiĩte mbeca ciake. Andũ arĩa angĩ kĩũngano-inĩ mamenya ũhoro ũcio makĩambĩrĩria kũmwĩtĩkia. Thutha-inĩ akĩnjĩra atĩ nĩ amenyithĩtio ũhoro ũngĩ woonanagia atĩ ti niĩ ndaiyĩte. O na gũtuĩka nĩ aacũngire mũhera, ndaiguaga ta itangĩmuohera nĩ ũndũ wa ũguo aanjĩkĩte.”—Linda.

HIHI ũiguaga ta Linda ũrĩa waturirio mũno ngoro nĩ ndungata ĩngĩ ya Jehova? Ũndũ wa kĩeha nĩ atĩ, kũrĩ andũ manarakario mũno nĩ mĩthiĩre ya athathaiya arĩa angĩ, nginya magatiganĩria maũndũ ma kĩĩroho. Hihi ũguo nĩguo kũrĩ harĩ wee?

Hihi nĩ Kũrĩ Mũndũ ‘Ũngĩtũtigithũkania na Wendo wa Ngai’?

Nĩ ma, no tũigue arĩ ũndũ mũritũ mũno kuohera Mũkristiano ũtũhĩtĩirie, tondũ Akristiano magĩrĩirũo gũkorũo mendanĩte. (Johana 13:34, 35) Tũngĩkorũo tũhĩtĩirio nĩ Mũkristiano ũrĩa ũngĩ, no tũigue tũrĩ na ruo rũingĩ mũno rwa ngoro.—Thaburi 55:12.

Bibilia nĩ yonanagia atĩ rĩmwe Mũkristiano no ‘ahĩtĩrio nĩ ũrĩa ũngĩ.’ (Akolosai 3:13) O na kũrĩ ũguo, nĩ ũkoragwo ũrĩ ũndũ mũritũ mũno angĩkorũo nĩ ithuĩ tũhĩtĩirio. Hihi nĩ harĩ ũndũ ũngĩtũteithia? Reke tũthuthurie motaaro matatũ ma Kĩĩmandĩko:

Ithe witũ ũrĩa wĩ igũrũ nĩ onaga maũndũ mothe. Jehova nĩ onaga maũndũ marĩa mothe mekĩkaga, nginya rĩrĩa tũranyamarĩka nĩ gwĩkwo ũndũ ũtarĩ wa kĩhooto. (Ahibirania 4:13) Makĩria ma ũguo, Jehova nĩ atũiguagĩra tha rĩrĩa tũranyamarĩka. (Isaia 63:9) Ndetĩkagĩria “mathĩna kana mĩtangĩko” kana ũndũ ũngĩ o wothe, o na angĩkorũo nĩ ndungata ĩngĩ yake, ‘ĩtũtigithũkanie na wendo wa Ngai.’ (Aroma 8:35, 38, 39) Na githĩ tũtikĩagĩrĩirũo kwĩgerekania nake na njĩra ya kwaga gwĩtĩkĩria ũndũ kana mũndũ o na ũrĩkũ gũtũtigithũkania na Jehova?

Kuohera mũndũ ti kuuga ndahĩtĩtie. Rĩrĩa tuohera arĩa matũhĩtĩirie, ti kuuga atĩ nĩ tũrahũthia mahĩtia mao kana tũgetĩkania na mĩthiĩre yao. Ririkana atĩ Jehova ndakenagio nĩ mehia, no nĩ ohagĩra mũndũ hangĩkorũo harĩ na gĩtũmi gĩa gwĩka ũguo. (Thaburi 103:12, 13; Habakuku 1:13) Rĩrĩa Jehova aratwĩkĩra ngoro tuohere andũ arĩa angĩ, akoragwo agĩtwĩra twĩgerekanie nake. We ‘ndatũũraga arakarĩte nginya tene na tene.’—Thaburi 103:9; Mathayo 6:14.

Nĩ ithuĩ tũgunĩkaga rĩrĩa twatiga kũrakara. Na njĩra ĩrĩkũ? Ta hũũra mbica ũnyitĩte ihiga rĩtarĩ iritũ mũno ũtambũrũkĩtie guoko. No kũhoteke ndũngĩnoga mũno ũngĩrĩnyita ũguo ihinda inini. Ĩ hihi ũngĩthiĩ na mbere kũrĩnyita ihinda iraya? Hihi no ũhote kũrĩnyita ũguo ndagĩka cigana ũna, ithaa, kana makĩria? Hatarĩ nganja, no ũnoge mũno guoko! Ti kuuga atĩ ũritũ wa ihiga rĩu nĩ ũgũcenjia. O ũrĩa ũrathiĩ na mbere kũrĩnyita, noguo ũkũigua ta rĩrĩ iritũ makĩria. Ũguo noguo marakara matariĩ. O ũrĩa tũgũikara tũrakarĩire mũndũ, o na angĩkorũo nĩ ũndũ wa kaũndũ kanini, noguo tũgũthiĩ na mbere gũtuurũo. Nĩkĩo Jehova atwĩraga tũtigane na marakara. Hatarĩ nganja, nĩ ithuĩ tũgunĩkaga tũngĩtiga kũrakara.—Thimo 11:17.

Mwarĩ wa Ithe witũ ũroneka arakaire arorete mwarĩ wa Ithe witũ ũngĩ thĩinĩ wa Nyũmba ya Ũthamaki — Nĩ ithuĩ tũgunĩkaga rĩrĩa twatiga kũrakara

“Ndaiguire ta arĩ Jehova Ũranjarĩria we Mwene”

Nĩ kĩĩ gĩateithirie Linda kwaga kũiga marakara ngoro thutha wa kũhĩtĩrio nĩ Mũkristiano ũngĩ? Ũndũ ũmwe wamũteithirie nĩ gwĩcũrania itũmi cia Kĩĩmandĩko iria cionanagia bata wa kuohanĩra. (Thaburi 130:3, 4) Linda nĩ eekĩrirũo ngoro nĩ kũmenya atĩ rĩrĩa tuohanĩra, Jehova nake nĩ atuohagĩra. (Aefeso 4:32–5:2) Oigire ũũ akĩonania ũrĩa aahutirio nĩ ũndũ ũcio: “Ndaiguire ta arĩ Jehova ũranjarĩria we mwene.”

Thutha wa ihinda, Linda nĩ aahotire gũtooria marakara. Oheire mwarĩ wa Ithe witũ ũcio kuuma ngoro, na rĩu nĩ mũrata wake wa gĩtĩ kĩa mbere. Linda no arathiĩ na mbere gũtungatĩra Jehova. Gĩa na ma atĩ Jehova nĩ arenda gũgũteithia o nawe ũthiĩ na mbere.