Ngai nĩ Oombire Igũrũ na Thĩ

Jehova Ngai nĩwe watũmbire. Oombire indo ciothe iria tuonaga na iria tũtonaga. Aambire kũũmba araika aingĩ mũno atanomba indo iria tuonaga. Hihi nĩ ũĩ araika nĩa? Nĩ ciũmbe cia roho iria Jehova oombire ihaana take. Tũtingĩhota kũmona o ta ũrĩa tũtangĩhota kuona Ngai. Mũraika wa mbere ũrĩa Jehova oombire, aatuĩkire mũteithia wake. Mũraika ũcio nĩ aateithĩrĩirie Jehova kũũmba njata, thĩ nyingĩ iria ikoragwo kuo, na indo iria ingĩ ciothe. Ĩmwe ya thĩ icio nĩ ĩno tũikaraga.

Jehova aacokire akĩhaarĩria thĩ nĩguo ĩikaragwo nĩ andũ na nyamũ. Nĩ aatũmire riũa rĩarage gũkũ thĩ. Ningĩ nĩ oombire irĩma, maria manene, na njũũĩ.

Aacokire agĩka atĩa? Jehova ooigire ũũ: ‘Nĩ ngũtũma kũgĩe nyeki, na mĩmera, na mĩtĩ.’ Gũkĩambĩrĩria kũgĩa na matunda ma mĩthemba mĩingĩ, mĩmera, na mahũa. Thutha ũcio Jehova akĩũmba nyamũ cia mĩthemba yothe, iria ciũmbũkaga, cia maĩ-inĩ, iria itambaga thĩ, na iria ithiaga ciĩnyogondete. Oombire imwe irĩ nini ta mbũkũ, na ingĩ irĩ nene ta njogu. Nĩ nyamũ ĩrĩkũ wendete mũno?

Jehova aacokire akĩra mũraika ũrĩa aambire kũũmba ũũ: “Nĩ tũũmbe mũndũ.” Andũ mangĩombirũo marĩ ngũrani na nyamũ. Nĩ mangĩahotire gũthondeka indo, kwaria, gũtheka, na kũhoya. Nĩ mangĩahotire kũmenyerera thĩ na nyamũ iria Ngai oombire. Hihi nĩ ũĩ mũndũ wa mbere kũũmbwo aarĩ ũ? Reke tuone.