Johana Kũhaarĩria Gũka kwa Jesu

Johana mũrũ wa Zekaria na Elizabethi, aatuĩkire mũnabii aaneneha. Jehova aahũthĩrire Johana kũruta andũ atĩ Mesia nĩ angĩokire. No handũ ha kũrutana thunagogi-inĩ kana taũni-inĩ, Johana aahunjagia werũ-inĩ. Andũ maaumaga Jerusalemu na Judea guothe magoka kũrutwo nĩwe. Aamarutaga atĩ nĩ maagĩrĩirũo gũtigana na ciĩko njũru nĩguo makenie Ngai. Thutha wa andũ acio kũmũthikĩrĩria, aingĩ ao nĩ meeririre mehia, na Johana akĩmabatithĩria Rũũĩ-inĩ rwa Jorodani.

Johana aaikaraga ũtũũro mũhũthũ. Eekĩraga nguo ciathondeketwo na guoya wa ngamĩra, na aarĩaga ngigĩ na ũũkĩ wa gĩthaka. Andũ nĩ meendaga mũno kũmenya ũhoro wake. O na Afarisai na Asadukai arĩa maarĩ na mwĩtĩo nĩ maathiaga kũmuona. Johana aameerire ũũ: ‘Nĩ mũrabatara kũgarũrĩra mĩthiĩre yanyu na mwĩrire. Mũtigecirie mũrĩ andũ a mwanya atĩ tondũ nĩ mugaga mũrĩ njiarũa cia Iburahimu. Gũkorũo mũrĩ njiarũa cia Iburahimu ti kuuga atĩ mũrĩ ciana cia Ngai.’

Andũ aingĩ nĩ maathiaga kũrĩ Johana, na makamũũria: ‘Twagĩrĩirũo gwĩka atĩa nĩguo tũkenie Ngai?’ Johana eeraga Ayahudi acio ũũ: ‘Angĩkorũo ũrĩ na nguo igĩrĩ, heana ĩmwe kũrĩ mũndũ ũrĩa ũtarĩ.’ Hihi nĩ ũĩ nĩ kĩĩ gĩatũmire ameere ũguo? Eendaga mamenye atĩ nĩguo makenie Ngai, no mũhaka maangĩendire andũ arĩa angĩ.

Johana eerire etia a mbeca cia igooti ũũ: ‘Tuĩkai andũ ehokeku na mũtikanaheenie mũndũ o na ũrĩkũ.’ Nacio thigari aaciĩrire ũũ: ‘Mũtigacoke kuoya mahaki kana kũheenania.’

Athĩnjĩri-Ngai na Alawii o nao nĩ maathiire kũrĩ Johana makĩmũũria: ‘Wee nĩwe ũ? Gũtirĩ mũndũ ũtarenda gũkũmenya.’ Johana aameerire ũũ: ‘Niĩ ndĩ mũgambo ũrĩ werũ-inĩ, ũrĩa ũratongoria andũ harĩ Jehova o ta ũrĩa Isaia aarathĩte.’

Andũ nĩ maakenagio nĩ maũndũ marĩa Johana aamarutaga. Andũ aingĩ nĩ meeyũragia kana hihi Johana nĩwe warĩ Mesia. No akĩmeera ũũ: ‘Nĩ kũrĩ mũndũ ũngĩ mũnene kũngĩra ũroka. Na o na ndirĩ mwagĩrĩru wa kuohora ndigi cia iratũ ciake. Niĩ batithanagia na maĩ, nowe akaabatithanagia na roho mũtheru.’