Arutwo Kwamũkĩra Roho Mũtheru

Thikũ ikũmi thutha wa Jesu gũcoka igũrũ, arutwo ake nĩ maamũkĩrire roho mũtheru. Kwarĩ mwaka wa 33 Mahinda Maitũ (M.M.), na andũ aingĩ nĩ maathiĩte Jerusalemu maumĩte kũndũ gũtiganĩte nĩguo makũngũĩre gĩathĩ kĩa Pentekoste. Arutwo ta 120 a Jesu nĩ maacemanĩtie nyũmba-inĩ ĩmwe ya ngoroba. O rĩmwe gũgĩkĩka ũndũ wa magegania. Nĩ kuoonekire kĩndũ kĩahaanaga ta mwaki igũrũ rĩa mĩtwe ya arutwo othe, na makĩambĩrĩria kwaria na thiomi itiganĩte. Nyũmba ĩyo ĩkĩiyũra mũgambo watariĩ ta wa rũhuho rũnene.

Ageni arĩa maathiĩte Jerusalemu maumĩte kũndũ kũngĩ nĩ maaiguire mũgambo ũcio na magĩtengʼera nyũmba-inĩ ĩyo kũrora nĩ kĩĩ gĩathiaga na mbere. Nĩ maamakire mũno rĩrĩa maaiguire arutwo makĩaria na thiomi icio. Maaugire ũũ: ‘Githĩ andũ aya ti a Galili? Marahota atĩa kwaria na thiomi citũ?’

Petero na atũmwo acio angĩ nĩ maarũgamire mbere ya kĩrĩndĩ kĩu. Petero akĩmataarĩria ũrĩa Jesu ooragirũo na atĩ Jehova nĩ aamũriũkĩtie. Agĩcoka akĩmeera ũũ: ‘Rĩu Jesu arĩ igũrũ guoko-inĩ kwa ũrĩo kwa Ngai, na nĩ atũitĩrĩirie roho mũtheru o ta ũrĩa kweranĩirũo. Nĩkĩo mũrona ciama ici na mũgaciigua.’

Ciugo icio cia Petero nĩ ciahutirie andũ acio ngoro mũno na makĩmũũria: “Twagĩrĩirũo gwĩka atĩa?” Nake akĩmeera ũũ: ‘Mwĩrirei mehia manyu na mũbatithio thĩinĩ wa rĩĩtwa rĩa Jesu. Ningĩ nĩ mũkwamũkĩra kĩheo kĩa roho mũtheru.’ Mũthenya ũcio, andũ ta 3,000 nĩ maabatithirio. Kuuma hĩndĩ ĩyo, arutwo makĩambĩrĩria kuongerereka na ihenya mũno thĩinĩ wa Jerusalemu. Magĩteithĩrĩrio nĩ roho mũtheru, atũmwo nĩ maahotire kwambĩrĩria ciũngano ingĩ nyingĩ nĩguo marute arũmĩrĩri a Jesu maũndũ marĩa mothe aamaathĩte.