ITHOMO RĨA 11
Ũrĩa Ũngĩgunĩka Biũ Kuumana na Gũthoma Bibilia
Hihi nĩ ũrĩ wakorũo ũkĩenda kwambĩrĩria wĩra mũna mũnene no ũkona wĩra ũcio ũrĩ mũritũ mũno? Nĩguo ũũhũthahũthie, no gũkorũo waũgayanirie tũcunjĩ tũnini tũnini. O na gũthoma Bibilia no kuoneke kũrĩ ũndũ mũritũ. Wahota kwĩyũria, ‘Ngwambĩrĩria kũ?’ Ithomo-inĩ rĩrĩ, nĩ tũkwarĩrĩria maũndũ mahũthũ ũngĩka, marĩa mangĩgũteithia gũkenera gũthoma na kwĩruta Bibilia.
1. Wagĩrĩirũo gũthoma Bibilia ũtegũtĩĩrĩria nĩkĩ?
Mũndũ ũthomaga Bibilia, kana “watho wa Jehova,” ategũtĩĩrĩria nĩ arĩkoragwo na gĩkeno na nĩ arĩgaacagĩra. (Thoma Thaburi 1:1-3.) Nĩguo ũhote kwambĩrĩria, geria gũthomaga ndagĩka nini o mũthenya. O ũrĩa ũrataũkĩrũo nĩ Bibilia noguo ũrĩkenagĩra kũmĩthoma.
2. Nĩ kĩĩ kĩngĩgũteithia kũgunĩka kuumana na gũthoma Bibilia?
Nĩguo mũndũ agunĩke biũ agĩthoma Bibilia, nĩ abataraga gũtithia nĩguo ecirie ũhoro wĩgiĩ kĩrĩa arathoma. Wagĩrĩirũo ũmĩthomage na “wĩcũranagie ũhoro ũrĩa ũrĩ thĩinĩ [wayo.]” (Joshua 1:8, kohoro ka magũrũ-inĩ) Wĩyũragie ciũria ta ici ũgĩthoma: ‘Ũhoro ũyũ ũranduta atĩa igũrũ rĩgiĩ Jehova Ngai? Ingĩũhũthĩra atĩa ũtũũro-inĩ wakwa? Ingĩhũthĩra mĩhari ĩno atĩa gũteithia andũ angĩ?’
3. Ũngĩruta kũ mahinda ma gũthomaga Bibilia?
Hihi nĩ ũritũhagĩrũo kuona mahinda ma gũthoma Bibilia? Aingĩ aitũ nĩ tũritũhagĩrũo. Geria ‘kũhũthagĩra mahinda maku wega biũ.’ (Aefeso 5:16) No wĩke ũguo na njĩra ya kũbanga ihinda rĩna rĩrĩa ũrĩthomaga Bibilia o mũthenya. Andũ amwe methaga mahinda ma gũthoma Bibilia rũcinĩ tene. Angĩ mathomaga mahinda-inĩ mangĩ ma mũthenya, ta hihi hĩndĩ ya ranji. Nao angĩ mathomaga hwaĩ-inĩ matanakoma. Nĩ ihinda rĩrĩkũ rĩngĩkwagĩrĩra?
THUTHURIA MAKĨRIA
Reke tuone ũrĩa ũngĩka nĩguo ũkenagĩre gũthoma Bibilia. Ningĩ nĩ tũkuona ũrĩa ũngĩhaarĩria wega nĩguo ũgunĩke biũ kuumana na kwĩruta Bibilia.
O ta ũrĩa tũngĩĩruta gũkenera kũrĩa irio tũtamenyerete, no taguo tũngĩĩruta gũkenera gũthoma Bibilia
4. Wĩrute ũrĩa ũngĩkenera gũthoma Bibilia
No ũkorũo ũtarĩ ũndũ mũhũthũ kwambĩrĩria gũthoma Bibilia. O na kũrĩ ũguo, no ‘tũkũrie wendi mũnene’ wa gũthoma Bibilia o ta ũrĩa mũndũ erutaga gũkenera kũrĩa irio atamenyerete. Thomai 1 Petero 2:2, mũcoke mwarĩrĩrie kĩũria gĩkĩ:
Ũngĩthomaga Bibilia o mũthenya-rĩ, hihi nĩ ũkuona ta ũngĩkũria wendi wa kũmĩthoma na ũmĩkenagĩre?
Mwĩrorerei VIDEO ĩno nĩgetha muone ũrĩa andũ amwe meekire nĩguo mahote gũkenera gũthoma Bibilia, mũcoke mwarĩrĩrie ciũria iria irũmĩrĩire.
Kũringana na video ĩyo-rĩ, andũ acio ethĩ maahiũranirie na moritũ marĩkũ?
Nĩ kĩĩ kĩamateithirie gũthiĩ na mbere gũthoma Bibilia mategũtĩĩrĩria?
Meekire atĩa nĩguo makenagĩre gũthoma Bibilia?
Maũndũ mangĩgũteithia kwambĩrĩria:
Thuura Bibilia ya kwĩhokeka ĩrĩ na rũthiomi rwa kĩĩrĩu. No ũhũthĩre Bibilia ya New World Translation angĩkorũo ĩrĩ kuo na rũthiomi rwanyu.
Ambĩrĩria na icunjĩ iria ũrona ta ũgũkenera makĩria. Nĩguo wone icunjĩ iria ũngĩambĩrĩria nacio, rora gacunjĩ ka “Ũrĩa Ũngĩambĩrĩria Gũthomaga Bibilia.”
Rũmĩrĩra Ũthomi Waku. Hũthĩra mũtaratara wa “Rũmĩrĩra Ũthomi Waku wa Bibilia” ũrĩa ũrĩ ibuku-inĩ rĩrĩ.
Hũthĩra programu ya JW Library®. No ĩgũteithie gũthoma Bibilia na gũthikĩrĩria ĩgĩthomwo ũrĩ handũ o hothe, ũkĩhũthĩra thimũ ya smartphone kana indo ingĩ ta icio.
Hũthĩra icunjĩ cia ũhoro muongerere iria irĩ Bibilia-inĩ ya New World Translation in Kikuyu. Nĩ ikoragwo na tũcunjĩ twa mapu, mĩcoro, na ũthathaũri wa ciugo cia Bibilia, tũrĩa tũngĩgũteithia gũkenera ũgĩthoma.
5. Haaragĩria wĩruti waku wa Bibilia
Thomai Thaburi 119:34, mũcoke mwarĩrĩrie kĩũria gĩkĩ:
Nĩkĩ nĩ ũndũ wa bata kũhoya ũtanathoma Bibilia kana ũtanambĩrĩria kũhaarĩria wĩruti waku wa Bibilia?
Ũngĩka atĩa nĩguo ũgunĩkage biũ mũkĩĩruta? Ũkĩhaarĩria ithomo o rĩothe ibuku-inĩ rĩrĩ, geria kũrũmĩrĩra njĩra ĩno:
Thoma gĩcunjĩ kĩa mbere kĩa ithomo rĩu.
Humbũria maandĩko marĩa monanĩtio na ũmathome, na ũgerie gũtaũkĩrũo nĩ ũrĩa mahutanĩtie na kĩrĩa kĩraarĩrĩrio.
Kururĩra maũndũ manene marĩa macoketie kĩũria kĩrĩa kĩũrĩtio. Ũndũ ũcio no ũgũteithie mũkĩarĩrĩria ithomo rĩu na mwarimũ waku.
Hihi nĩ ũĩ?
Aira a Jehova manahũthĩra Bibilia nyingĩ itiganĩte. O na kũrĩ ũguo, nĩ twendete Bibilia ya New World Translation in Kikuyu tondũ nĩ ĩkoragwo na ũhoro mũrũngĩrĩru, nĩ ĩtaũkĩkaga wega, na nĩ ĩhũthĩrĩte rĩĩtwa rĩa Ngai.—Rora gĩcunjĩ kĩa “Hihi Aira a Jehova nĩ Makoragwo na Bibilia Yao?”
ANDŨ AMWE MOIGAGA: “Kwĩruta Bibilia nĩ wĩra mũritũ mũno. Niĩ ndikoragwo na mahinda kana hinya wa kwĩruta.”
Wee ũngiuga atĩa?
ŨRĨA TWERUTA
Nĩguo ũgunĩke biũ kuumana na Bibilia, bangaga ihinda rĩrĩa ũrĩmĩthomaga, ũkahoya nĩguo ũtaũkĩrũo nĩ kĩrĩa ũrathoma, na ũkahaaragĩria wega wĩruti waku wa Bibilia.
Ciũria cia gũcokera
Ũngĩka atĩa nĩguo ũgunĩke biũ kuumana na Bibilia?
Nĩrĩ ũngĩona ihinda rĩa gũthoma na kwĩruta Bibilia?
Wagĩrĩirũo kũhaaragĩria wĩruti waku wa Bibilia nĩkĩ?
RIKĨRA
Thuthuria maũndũ mamwe mangĩgũteithia kũgunĩka biũ kuumana na gũthoma Bibilia.
Rora wone njĩra ithatũ cia gũthoma Bibilia.
“Bibilia Ĩngĩndeithia Atĩa?—Gĩcunjĩ kĩa 1: Kũmenya Bibilia Yaku” (Gĩcunjĩ thĩinĩ wa jw.org/ki)
Thuthuria ũrĩa ũngĩkenera gũthoma Bibilia.
Wĩrute maũndũ mangĩgũteithia ũgĩthoma Bibilia kuuma kũrĩ andũ makoretwo magĩthoma Bibilia ihinda iraihu.