1 Ngai nĩ Kĩriga—Hihi Ũcio nĩ Ũhoro wa Ma?

Ũrĩa ũngĩkorũo ũiguĩte: “Maũndũ ma Ngai nĩ kĩriga.”

Ĩgĩtaarĩria ũrĩa makanitha maingĩ ma Gĩkristiano marutanaga ũhoro wĩgiĩ Ũtatũ, The Athanasian Creed yugaga ũũ: “Gũtirĩ mũndũ Ũngĩtaũkĩrũo nĩ ũrĩa Ithe atariĩ, gũtirĩ mũndũ Ũngĩtaũkĩrũo nĩ ũrĩa Mũriũ atariĩ na gũtirĩ mũndũ Ũngĩtaũkĩrũo nĩ ũrĩa Roho Mũtheru atariĩ.”

Ũrĩa Bibilia ĩrutanaga: Jesu oigire atĩ arĩa ‘magĩaga na ũmenyo wĩgiĩ Ngai ũrĩa ũmwe wa ma’ nĩ makaagaya irathimo. (Johana 17:3) No, tũngĩhota atĩa kũmenya Ngai angĩkorũo we nĩ kĩriga? Handũ ha gũtũgiria tũmũmenye, endaga mũndũ o mũndũ amũmenye.—Jeremia 31:34.

Ma nĩ atĩ, gũtirĩ hĩndĩ tũkaamenya maũndũ mothe makoniĩ Ngai. Ũguo nĩguo kũrĩ tondũ mathugunda make na njĩra ciake nĩ cia igũrũ mũno gũkĩra ciitũ.—Kohelethu 3:11; Isaia 55:8, 9.

Ũrĩa kũmenya ma kũngĩgũteithia: Angĩkorũo gũtirĩ mũndũ ũngĩmenya ũrĩa Ngai atariĩ-rĩ, hakĩrĩ bata ũrĩkũ wa kwenda kũmũmenya? Ngai nĩ atũhotithagia kũmũmenya na ningĩ agatũhotithia gũkũria ũkuruhanu wa hakuhĩ hamwe nake. Ngai akĩaria ũhoro wa Iburahimu mũthuri mwĩhokeku, aamwĩtire “mũrata wakwa,” nake Daudi Mũthamaki wa Isiraeli aandĩkire ũũ: ‘Ndundu ya Jehova nĩ ya arĩa amwĩtigĩri.’—Isaia 41:8; Thaburi 25:14.

Hihi no kũhoteke mũndũ agĩe na ũkuruhanu wa hakuhĩ na Ngai? No woneke ũrĩ ũndũ mũritũ, ĩndĩ Atũmwo 17:27 yugaga ũũ: ‘Ngai ndarĩ haraya na mũndũ o na ũmwe witũ.’ Na njĩra ĩrĩkũ? Kũgerera Bibilia, Ngai nĩ atuonetie maũndũ marĩa tũbataraga nĩguo tũmũmenye wega.a

Atwĩraga atĩ rĩĩtwa rĩake nĩ Jehova. (Isaia 42:8) Thĩinĩ wa Bibilia nĩ atũmenyithĩtie ũrĩa akoretwo agĩtwarana na andũ nĩguo tũmenye ũrĩa Atariĩ. Makĩria ma ũguo, Ngai nĩ atũmenyithagia ũrĩa aiguaga. Nĩ ‘aiguanagĩra tha mũno, na agakinyĩria andũ wega wake, na ndahiũhaga kũrakara, na nĩaiyũirũo nĩ tha, na ũhoro-wa-ma.’ (Thama 34:6) Ciĩko ciitũ no imũkenie kana imũiguithie ũũru. Kwa ngerekano-rĩ, Aisiraeli a tene nĩ ‘maamũiguithagia kĩeha’ rĩrĩa maamũremera, no arĩa maamwathĩkagĩra nĩ maamũkenagia.—Thaburi 78:40; Thimo 27:11.

Korũo Ngai nĩ kĩriga gĩa Ũtatũ-rĩ, tũngĩkĩmũmenya na njĩra ĩrĩkũ?

The Trinity c.1500, Flemish School, (16th century) / H. Shickman Gallery, New York, USA / The Bridgeman Art Library International

[Kohoro ka Magũrũ-inĩ]