Ngai Nũũ?

Andũ aingĩ nĩ moigaga nĩ metĩkĩtie Ngai. No ũngĩmoria Ngai nũũ, megũkũhe macokio matiganĩte. Amwe meciragia Ngai nĩ mũtuanĩri ciira ũtarĩ tha, wendaga o kũherithia andũ nĩ ũndũ wa maũndũ moru marĩa mekĩte. Angĩ meciragia atĩ hingo ciothe, Ngai akoragwo na wendo na nĩ ohanagĩra gũtekũmakania nĩ ũndũ ũrĩkũ mũndũ ekĩte. Angĩ nao metĩkĩtie atĩ Ngai akoragwo atũraihĩrĩirie mũno na ndatindanagĩra na ithuĩ. Nĩ ũndũ wa mawoni ta macio matiganĩte, andũ aingĩ monaga atĩ nĩ ũndũ ũtangĩhoteka harĩ andũ kũmenya Ngai nũũ.

Hihi harĩ bata kũmenya Ngai nũũ? Ĩĩ nĩ harĩ bata. Kũmenya Ngai wega no gũtũme ũtũũro waku ũkorũo na muoroto na gĩkeno. (Atũmwo 17:26-28) O ũrĩa ũgũkuhĩrĩria Ngai makĩria, noguo egũkwenda makĩria na agũteithie. (Jakubu 4:8) Gũkorũo na ũmenyo wa ma wĩgiĩ Ngai no gũtũme mũthia-inĩ ũkaagĩa na muoyo wa tene na tene.​—Johana 17:3.

Ũngĩmenya Ngai atĩa? Ta wĩcirie ũhoro wa mũrata waku wa hakuhĩ ũrĩa ũĩ wega. Hihi ũrata wanyu wakũrire atĩa? No kũhoteke nĩ wamenyire rĩĩtwa rĩake, ũrĩa atariĩ, maũndũ marĩa endete na marĩa athũire, o hamwe na maũndũ marĩa aneka na marĩa abangĩte gwĩka, na mangĩ maingĩ. Maũndũ macio nĩmo maatũmire ũmwende, tondũ nĩ werutire ũhoro wake.

Na njĩra o ta ĩyo, no tũmenye Ngai tũngĩĩciria ũhoro wa maũndũ maya:

• NGAI ETAGWO ATĨA?

• HIHI ATARIĨ ATĨA?

• NĨ MAŨNDŨ MARĨKŨ NGAI ANEKA?

• NĨ MAŨNDŨ MARĨKŨ ABANGĨTE GWĨKA?

• KŨMENYA NGAI KŨNGĨKŨGUNA ATĨA?

Kabuku gaka nĩ gegũgũteithia kuona macokio ma Bibilia megiĩ ciũria icio. Icunjĩ iria irĩ kabuku-inĩ gaka, nĩ igũgũteithia kũmenya Ngai na ikuonie ũrĩa ũngĩgunĩka ũngĩgĩa na ũrata wa hakuhĩ hamwe nake.