Rĩĩtwa rĩa Jehova nĩ rĩa Bata Mũno Harĩ Jesu

1-2. (a) Jesu eekire atĩa ũtukũ wa mũico atanoragwo? (b) Tũkwarĩrĩria ciũria irĩkũ gĩcunjĩ-inĩ gĩkĩ?

KŨRĨ Aramithi hwaĩ-inĩ Nisani 14, mwaka wa 33 M.M., Jesu nĩ aakũngũĩire Irio cia Hwaĩ-inĩ cia Mwathani hamwe na atũmwo ake. Nĩ aamenyaga atĩ aarĩ hakuhĩ gũkunyanĩrũo, gũciirithio, gũtuĩrũo, kũnyamario, na kũũragwo. Nĩ ũndũ ũcio thutha wa gĩkũngũĩro kĩu, Jesu nĩ eerire atũmwo acio maũndũ maingĩ ma kũmekĩra ngoro. Na matanoima kũu maarĩagĩra, Jesu nĩ aahoire ihoya rĩa bata mũno. Mũtũmwo Johana nĩ aandĩkire ihoya rĩu, rĩrĩa rĩkoragwo thĩinĩ wa Johana mũrango wa 17.

² Ihoya rĩa Jesu rĩtuonagia atĩa ũndũ ũrĩa wamũtangaga ihinda-inĩ rĩu? Ihoya rĩu rĩonanagia atĩa ũndũ ũrĩa warĩ wa bata harĩ Jesu ũtungata-inĩ wake arĩ gũkũ thĩ? Rekei tuone macokio ma ciũria icio.

“NĨ NDĨMAMENYITHĨTIE RĨĨTWA RĨAKU”

3. Jesu aaugire atĩa ũhoro wĩgiĩ rĩĩtwa rĩa Ngai, na eendaga kuonania atĩa? (Johana 17:​6, 26)

³ Jesu aaugire ũũ akĩhoya: “Nĩ ndĩmamenyithĩtie rĩĩtwa rĩaku.” Jesu aagwetire maita merĩ ũndũ ũcio wĩgiĩ kũmenyithania rĩĩtwa rĩa Jehova kũrĩ arutwo ake. (Thoma Johana 17:​6, 26.) Hihi eendaga kuonania ũndũ ũrĩkũ? Hihi aamamenyithĩtie atĩ Ngai etagwo Jehova? Arutwo a Jesu maarĩ Ayahudi, kwoguo nĩ maamenyaga atĩ Ngai etagwo Jehova. Rĩĩtwa rĩu nĩ rĩarĩ kũndũ kũingĩ thĩinĩ wa Maandĩko ma Kĩhibirania. Kwoguo, Jesu ndaaragĩrĩria ũhoro wĩgiĩ rĩĩtwa rĩa Ngai rĩo rĩene, handũ ha ũguo, aaragĩrĩria ũhoro wĩgiĩ ũrĩa Ngai atariĩ. Nĩ aateithĩtie arutwo ake kũmenya Jehova wega, na ũndũ ũcio wahutĩtie kũmenya mĩoroto yake, mawĩko make, na ngumo ciake. No Jesu tu ũngĩahotire gũtaarĩria maũndũ macio na njĩra nginyanĩru.

4-5. (a) Heana ngerekano ĩronania ũrĩa rĩĩtwa rĩa mũndũ rĩngĩtuĩka rĩa bata makĩria harĩ ithuĩ. (b) Nĩ na njĩra ĩrĩkũ arutwo a Jesu maamenyire Jehova wega?

⁴ Ta wĩcirie ngerekano ĩno: Nĩ tũtue atĩ mũthuri ũmwe wa kĩũngano kĩanyu wĩtagwo David nĩ ndagĩtarĩ, na mũyaine nake kwa ihinda rĩa mĩaka mĩingĩ. No mũthenya ũmwe ũkarwara na ũkabatara kũrigitwo na ihenya. Ũgatengʼerio thibitarĩ-inĩ ĩrĩa mũrũ wa Ithe witũ ũcio arutaga wĩra, na akahũthĩra ũmenyeru wake kũhonokia muoyo waku. Hatarĩ nganja no ũigue wendete mũrũ wa Ithe witũ ũcio o na makĩria. Na rĩrĩa waigua rĩĩtwa rĩake, ũkaririkana ũrĩa aagwĩkĩire. Harĩ wee, David ndarĩkoragwo arĩ o mũthuri wa kĩũngano tu, no nĩ nginya ndagĩtarĩ ũrĩa wahonokirie muoyo waku.

⁵ Na njĩra o ta ĩyo, arutwo a Jesu nĩ mooĩ rĩĩtwa rĩa Ngai. No Jesu nĩ aamateithirie kuona rĩĩtwa rĩu rĩrĩ rĩa bata o na makĩria. Tũngiuga ũguo nĩkĩ? Tondũ Jesu eegerekanagia na Ithe maũndũ-inĩ mothe marĩa aaugaga na ageka. Kwoguo gũthikĩrĩria Jesu akĩrutana na kwĩrorera ũrĩa aarũmbũyanagia na andũ nĩ gwateithirie arutwo ake kũmenya Jehova wega.—Joh. 14:9; 17:3.

“RĨĨTWA RĨAKU MWENE RĨRĨA ŨŨHEETE”

6. Nĩ na njĩra ĩrĩkũ Jehova aaheire Jesu rĩĩtwa rĩake? (Johana 17:​11, 12)

⁶ Jesu aahoeire arutwo ake akiuga: “Magitagĩre nĩ ũndũ wa rĩĩtwa rĩaku mwene rĩrĩa ũũheete.” (Thoma Johana 17:​11, 12.) Hihi ũguo nĩ kuuga atĩ Jesu angĩetirũo Jehova? Aca. Ta rora wone atĩ Jesu akĩhoya aaugire ũũ: “Magitagĩre nĩ ũndũ wa rĩĩtwa rĩaku mwene.” Kwoguo rĩĩtwa rĩa Jehova rĩtiatuĩkire rĩĩtwa rĩa Jesu. Gũkĩrĩ ũguo-rĩ, Jesu eendaga kuuga atĩa rĩrĩa aaugire atĩ nĩ aahetwo rĩĩtwa rĩa Ngai? Ũndũ ũmwe nĩ atĩ, Jesu aatũmĩtwo nĩ Jehova arĩ Mwaria wake. Ookire na rĩĩtwa rĩa Ithe, na agĩka maũndũ manene akĩhũthĩra rĩĩtwa rĩu. (Joh. 5:43; 10:25) Makĩria ma ũguo, rĩĩtwa Jesu riugĩte “Jehova nĩ Ũhonokio.” Kwoguo rĩĩtwa rĩa Jesu nĩ rĩhutanĩtie na rĩĩtwa rĩa Jehova.

7. Heana ngerekano ĩronania ũrĩa Jesu angĩaririe ithenya-inĩ rĩa Jehova.

⁷ Ta wĩcirie ngerekano ĩno: Mũtongoria wa bũrũri no atũme mũndũ athiĩ akaarie ithenya-inĩ rĩake. Kwoguo, ciugo cia mwaria ũcio igũkorũo irĩ na hinya o ta irĩ cia mũtongoria ũcio. Na njĩra o ta ĩyo, Jesu aatũmĩtwo nĩ Jehova, na akĩaria na andũ ithenya-inĩ rĩa Jehova.—Mat. 21:9; Luk. 13:35.

8. Nĩ kĩĩ gĩatũmire Jehova auge atĩ Jesu “egũka” na rĩĩtwa rĩake o na Jesu atokĩte gũkũ thĩ? (Thama 23:​20, 21)

⁸ Bibilia ĩtaga Jesu Kiugo, tondũ Jehova nĩ aamũhũthĩrire gũkinyĩria araika o hamwe na andũ ndũmĩrĩri na ũtongoria wake. (Joh. 1:​1-3) Kwahoteka Jesu nĩwe mũraika ũrĩa Jehova aahũthĩraga kũrũmbũiya Aisiraeli rĩrĩa maarĩ werũ-inĩ. Rĩrĩa Jehova eerire Aisiraeli maathĩkagĩre mũraika ũcio, nĩ aamaheire gĩtũmi gĩa gwĩka ũguo. Aameerire ũũ: “Tondũ egũka na rĩĩtwa rĩakwa.”a (Thoma Thama 23:​20, 21.) Jehova aaugire ũguo tondũ Jesu aragia ithenya-inĩ rĩake, na nĩwe kĩonereria kĩrĩa kĩnene harĩ gũtetera na gũtheria rĩĩtwa rĩa Ithe.

“AWA, GOOCITHIA RĨĨTWA RĨAKU”

9. Jesu oonanirie atĩa atĩ rĩĩtwa rĩa Jehova rĩarĩ rĩa bata mũno harĩ we?

⁹ O ta ũrĩa tuona, Jesu nĩ oonaga rĩĩtwa rĩa Jehova rĩrĩ rĩa bata mũno o na mbere ya gũka gũkũ thĩ. Nginya rĩrĩa aarĩ gũkũ thĩ, ciĩko ciake nĩ cioonanagia atĩ nĩ aatĩĩte mũno rĩĩtwa rĩa Jehova. Mũthia-inĩ wa ũtungata wake gũkũ thĩ, eerire Jehova ũũ: “Awa, goocithia rĩĩtwa rĩaku.” O rĩo Ithe akĩmũcokeria kuuma igũrũ, akĩmwĩra ũũ na mũgambo mũnene: “Nĩ ndĩrĩgoocithĩtie na nĩ ngũrĩgoocithia rĩngĩ.”—Joh. 12:28.

10-11. (a) Jesu aagoocithirie rĩĩtwa rĩa Jehova atĩa? (Ningĩ rora mbica.) (b) Rĩĩtwa rĩa Jehova rĩrabatara gũtherio na gũteterũo nĩkĩ?

¹⁰ O na Jesu nĩ aagoocithirie rĩĩtwa rĩa Ithe. Eekire ũguo atĩa? Ũndũ ũmwe nĩ atĩ, nĩ aamenyithanagia ngumo cia magegania cia Ithe, o hamwe na mawĩko make. No nĩ eekire ũndũ ũngĩ makĩria. Rĩĩtwa rĩa Jehova nĩ rĩabataraga gũtherio na gũteterũo. Jesu nĩ oonanirie ũrĩa ũndũ ũcio ũrĩ wa bata rĩrĩa aarutire arũmĩrĩri ake ihoya rĩa kĩonereria. Aarĩambĩrĩirie na ciugo ici: “Ithe witũ ũrĩ igũrũ, rĩĩtwa rĩaku nĩ rĩtherio.”—Mat. 6:9.

¹¹ Hihi rĩĩtwa rĩa Jehova rĩrabatara gũtherio na gũteterũo nĩkĩ? Tondũ Shaitani nĩ aacambithirie Jehova mũgũnda-inĩ wa Edeni. Aaugire atĩ Jehova nĩ mũheenania na atĩ harĩ ũndũ mwega aaimaga Adamu na Hawa. (Kĩam. 3:​1-5) Nĩ ta Shaitani eendaga kuonania atĩ njĩra ya Jehova ya gwĩka maũndũ ti njega. Thitango icio cia maheeni nĩ ciathũkĩirie Jehova rĩĩtwa. Ningĩ matukũ-inĩ ma Ayubu, Shaitani aaugire atĩ arĩa matungatagĩra Jehova, mamũtungatagĩra no ũndũ wa kĩrĩa Jehova amaheaga. Shaitani aacokire akiuga atĩ gũtirĩ mũndũ wendete Jehova kuuma ngoro, na kwoguo no tũtige gũtungatĩra Jehova tũngĩcemania na magerio. (Ayub. 1:​9-11; 2:4) Kwoguo ihinda nĩ rĩabataranagia nĩguo kuoneke wega nũũ waaragia maheeni gatagatĩ-inĩ ka Jehova na Shaitani.

“NĨ NGŨRUTA MUOYO WAKWA”

12. Tondũ Jesu nĩ endete rĩĩtwa rĩa Jehova-rĩ, nĩ ũndũ ũrĩkũ eehaarĩirie gwĩka?

¹² Jesu nĩ endete Jehova, na kwoguo nĩ eendaga gwĩka ũrĩa wothe angĩahotire nĩguo atherie na atetere rĩĩtwa rĩa Jehova. Nĩkĩo aaugire ũũ: “Nĩ ngũruta muoyo wakwa.” (Joh. 10:​17, 18) Kwoguo nĩ eehaarĩirie nginya gũkua nĩ ũndũ wa rĩĩtwa rĩa Jehova.b Aciari aitũ a mbere Adamu na Hawa maarĩ akinyanĩru, no nĩ maaremeire Jehova na makĩnyitanĩra na Shaitani. Ngũrani nao, Jesu nĩ eehaarĩirie gũka gũkũ thĩ nĩguo onanie atĩ nĩ endete Jehova. Eekire ũguo na njĩra ya kuonania wathĩki ũtũũro-inĩ wake wothe. (Ahib. 4:15; 5:​7-10) Nĩ aatũũririe wĩkindĩru wake nginya rĩrĩa aakuĩrĩire mũtĩ-inĩ wa kũnyarirĩrũo. (Ahib. 12:2) Na njĩra ĩyo akĩonania atĩ nĩ endete Jehova na rĩĩtwa rĩake.

13. Nĩ kĩĩ kĩngĩtũma tuuge atĩ Jesu nĩwe ũngĩahotire kuonania wega atĩ Shaitani nĩ mũheenania? (Ningĩ rora mbica.)

¹³ Jesu nĩ oonanirie wega kũgerera ũtũũro wake atĩ Shaitani nĩwe mũheenania, no ti Jehova. (Joh. 8:44) Gũtirĩ mũndũ ũngĩ ũĩ Jehova wega ta Jesu. Korũo nĩ haarĩ ũndũ wa ma thitango-inĩ iria Shaitani eerekeirie Jehova, Jesu nĩ angĩamenyete ũndũ ũcio. No Jesu nĩ aatuĩte itua irũmu rĩa gũtetera rĩĩtwa rĩa Jehova, nginya rĩrĩa kũngĩoonekire ta Jehova amũtiganĩirie. Jesu nĩ eehaarĩirie nginya gũkua, handũ ha kũremera Ithe.—Mat. 27:46.c

‘NĨ NDĨKĨTIE WĨRA ŨRĨA ŨŨHEETE’

14. Jehova aarathimire Jesu atĩa nĩ ũndũ wa wĩhokeku wake?

¹⁴ Ihoya-inĩ rĩrĩa Jesu aahoire ũtukũ wa mũico atanakua, aaugire ũũ: “Nĩ [ndĩkĩtie] wĩra ũrĩa ũũheete ndute.” Aarĩ na ma atĩ Jehova nĩ angĩamũrathimire nĩ ũndũ wa wĩhokeku wake. (Joh. 17:​4, 5) Na hatarĩ nganja ũguo nĩguo Jehova eekire. Ndaarekire Jesu atũũre mbĩrĩra-inĩ. (Atũm. 2:​23, 24) Nĩ aamũriũkirie na akĩmũhe gaturũa kanene kũrĩa igũrũ. (Afil. 2:​8, 9) Mũthia-inĩ, Jesu nĩ aambĩrĩirie gwathana arĩ Mũthamaki wa Ũthamaki wa Ngai. Hihi Ũthamaki ũcio ũngĩkaahingia ũndũ ũrĩkũ? Ihoya rĩa kĩonereria nĩ rĩcoketie kĩũria kĩu tondũ riugaga ũũ: “Ũthamaki waku nĩ ũũke. Wendi [wa Jehova] nĩ wĩkwo gũkũ thĩ o ta kũu igũrũ.”—Mat. 6:10.

15. Nĩ maũndũ marĩkũ Jesu ageeka?

¹⁵ Ica ikuhĩ, Jesu nĩ ekũrũa na thũ cia Jehova, na aniine andũ arĩa aganu mbaara-inĩ ya Hari–Magedoni. (Kũg. 16:​14, 16; 19:​11-16) Ihinda inini thutha ũcio, nĩ agaikia Shaitani “irima rĩrĩa rĩtarĩ gĩturi,” amwagithie hinya biũ. (Kũg. 20:​1-3) Hĩndĩ ya Wathani wa Mĩaka Ngiri, Jesu nĩ agaacokia thayũ thĩinĩ wa thĩ na ateithie andũ gũtuĩka akinyanĩru. Ningĩ nĩ akaariũkia arĩa makuĩte, na atue thĩ yothe paradiso. Hĩndĩ ĩyo, muoroto wa Jehova nĩ ũgaakorũo ũhingĩte.—Kũg. 21:​1-4.

16. Nĩ maũndũ marĩkũ magaakorũo mahingĩtio gũkinyĩria mũthia wa Wathani wa Mĩaka Ngiri?

¹⁶ Hihi ũtũũro ũgaakorũo ũhaana atĩa thutha wa Wathani ũcio wa Mĩaka Ngiri? Mehia na kwaga gũkinyanĩra igaakorũo ithirĩte. Andũ matikabatara kũhoya moherũo mehia kũgerera mũthingi wa ũkũũri, na ningĩ matikabatara athĩnjĩri-Ngai a kũmaiguithania hamwe na Ngai. Nayo ‘thũ ya mũico, nĩyo gĩkuũ kĩrĩa kĩaumanire na Adamu, ĩgaakorũo ĩniinĩtwo.’ Nao arĩa makuĩte nĩ magaacokio muoyo. Andũ othe thĩinĩ wa thĩ magaakorũo marĩ akinyanĩru.—1 Kor. 15:​25, 26.

17-18. (a) Nĩ atĩa ũngĩ gũgeekĩka thutha wa Wathani wa Mĩaka Ngiri? (b) Jesu ageeka atĩa ihinda rĩake rĩa gwathana rĩathira? (1 Akorintho 15:​24, 28) (Ningĩ rora mbica.)

¹⁷ Nĩ atĩa ũngĩ gũgeekĩka thutha wa Wathani ũcio wa Mĩaka Ngiri? Ihinda-inĩ rĩu, nĩ harĩ ũndũ wa mwanya ũgeekĩka. Rĩĩtwa rĩa Jehova rĩgaakorũo rĩtheretio biũ. Tũngiuga ũguo nĩkĩ? Thĩinĩ wa mũgũnda wa Edeni, Shaitani aaugire atĩ Jehova nĩ mũheenania, na atĩ ndathanaga na njĩra ya wendo. Kuuma hĩndĩ ĩyo, arĩa matungatagĩra Jehova nĩ makoretwo makĩonania rĩngĩ na rĩngĩ atĩ thitango icio nĩ cia maheeni. Kwoguo gũkinyĩria mũthia wa Wathani wa Mĩaka Ngiri, rĩĩtwa rĩa Jehova rĩgaakorũo rĩtheretio na rĩgateterũo biũ. Nĩ agaakorũo onanĩtie wega atĩ hatarĩ nganja we nĩ Ithe witũ wa igũrũ ũtwendete.

¹⁸ Gũkinyĩria mũthia wa Wathani wa Mĩaka Ngiri, thitango icio cia Shaitani nĩ igaakorũo cionekete wega atĩ nĩ cia maheeni. Hihi Jesu ageeka atĩa ihinda rĩake rĩa gwathana rĩathira? Hihi nĩ akaaremera Jehova ta Shaitani? Aca. (Thoma 1 Akorintho 15:​24, 28.) Nĩ agaacokeria Ithe Ũthamaki, na enyihie rungu rwa wathani wake. Ngũrani na ũrĩa Shaitani aaremeire Jehova, Jesu nĩ agaakorũo ehaarĩirie gũcokeria Jehova wathani wothe, tondũ nĩ endete Ithe mũno.

19. Rĩĩtwa rĩa Jehova rĩarĩ rĩa bata atĩa harĩ Jesu?

¹⁹ Hatarĩ nganja Jehova aarĩ na itũmi njega cia kũhe Jesu rĩĩtwa rĩake. Jesu nĩ ahingĩtie na njĩra nginyanĩru itemi rĩrĩa Ithe amũheete. Nĩ onanĩtie atĩ rĩĩtwa rĩa Ithe nĩ rĩa bata mũno harĩ we gũkĩra ũndũ ũngĩ o wothe. Nĩ eehaarĩirie gũkua nĩ ũndũ wa rĩĩtwa rĩu, na nĩ agaakorũo ehaarĩirie gũcokeria Jehova ũnene wothe thutha wa Wathani wa Mĩaka Ngiri. Tũngĩĩgerekania atĩa na Jesu? Nĩ tũkaarĩrĩria kĩũria kĩu gĩcunjĩ-inĩ kĩrĩa kĩrũmĩrĩire.