Mbaara ya Ukraine nĩ Ĩingĩrĩte Mwaka wa Kerĩ—Hihi Bibilia Ĩheanĩte Kĩĩrĩgĩrĩro Kĩrĩkũ?

Njumaa Februarĩ 24, 2023 nĩrĩo mbaara ĩrĩa ĩrĩ Ukraine yaniinire mwaka ũmwe. Kũringana na riboti imwe, thigari ta 300,000 cia Ukraine na Russia nĩ ciũragĩtwo kana ikagurario, na kũrerĩkana atĩ raia ta 30,000 nĩ moragĩtwo mbaara-inĩ ĩyo. O na kũrĩ ũguo, mũigana ũcio no ũkorũo o na ũrĩ mũnene makĩria.

Ũndũ wa kĩeha nĩ atĩ, gũtironeka ta mbaara ĩyo ĩgũthira na ihenya.

• “Hakuhĩ mwaka ũmwe kuuma rĩrĩa njeshi cia Russia ciaingĩrire Ukraine, gũtironeka ta mbaara ĩyo ĩgũthira na ihenya. Gũtirĩ mwena o na ũmwe ũroneka ta ũngĩhootana mbaara ĩyo, na ningĩ gũtironeka ta mĩena ĩyo yerĩ ĩngĩaria ĩiguithanĩrie kũniina mbaara.”—NPR (National Public Radio), Februarĩ 19, 2023.

Andũ aingĩ nĩ matangĩkaga nĩ ũndũ wa ũrĩa andũ matarĩ na mahĩtia manyamarĩkaga nĩ ũndũ wa mbaara ĩyo na mbaara ingĩ iria irĩ thĩinĩ wa thĩ. Hihi Bibilia ĩheanĩte kĩĩrĩgĩrĩro kĩrĩkũ? Hihi nĩ kũrĩ hĩndĩ mbaara igaathira?

Mbaara ĩrĩa ĩkaaniina mbaara ciothe

Bibilia nĩ yarĩtie ũhoro wa mbaara ĩmwe ĩrĩa ĩgooka kũhonokia andũ, no ti kũmaniina. Mbaara ĩyo ĩtagwo Hari-Magedoni, na thĩinĩ wa Bibilia ĩĩtĩtwo “mbaara ya mũthenya ũrĩa mũnene wa Ngai Mwene-Hinya-Wothe.” (Kũguũrĩrio 16:14, 16) Ngai akaahũthĩra mbaara ĩyo kũniina thirikari ciothe cia gũkũ thĩ, iria itũmĩte gũkorũo na mbaara nyingĩ. Nĩguo wone ũrĩa Hari-Magedoni ĩgaatũma kũgĩe na thayũ wa gũtũũra, thoma icunjĩ ici irũmĩrĩire:

• “Mbaara ya Hari-Magedoni nĩ Kĩĩ?”

• “Hari–Magedoni nĩ Ũhoro Mwega!”