Ndini na Mbaara Ĩrĩa ĩrĩ Ukraine—Mawoni ma Bibilia nĩ Marĩkũ?

Ta wĩcirie maũndũ maya megiĩ atongoria a ndini marĩ igweta na mbaara ĩrĩa ĩrĩ Ukraine:

• “Mũnene wa Kanitha wa Orthodox wa Russia, wĩtagwo Patriarch Kirill, ndaugĩte ũndũ o wothe wa kũregana na tharĩkĩro ya Russia. . . . Kanitha wake nĩ ũthiĩte na mbere gũtheremia ndeto cia maheeni ciĩgiĩ Ukraine, na Putin nĩ acihũthĩrĩte gũtetera tharĩkĩro yake kwerekera Ukraine.”—EUobserver, Machi 7, 2022.

• “Patriarch Kirill . . . nĩ ateteire mũno tharĩkĩro ya Russia kwerekera Ukraine, akauga atĩ mbaara ĩyo nĩ njĩra ya kũrũa na mehia.”—AP News, Machi 8, 2022.

• “Mũthenya wa Njumatatũ, mũtongoria wa Kanitha wa Orthodox wa Ukraine wĩtagwo Metropolitan Epiphanius I kuuma Kyiv, nĩ aarathimire andũ ake ‘mathiĩ makarũe na njeshi cia Russia’ . . . Ningĩ nĩ aaugire atĩ ti mehia kũũraga thigari cia Russia.”—Jerusalem Post, Machi 16, 2022.

• “Ithuĩ [Kĩama kĩa Ukraine kĩa Makanitha na Ikundi cia Kĩĩndini (UCCRO)] nĩ tũranyita mbaru njeshi cia Ukraine na arĩa othe maratũgitĩra, tũkamarathima makĩgitĩra Ukraine kuumana na thũ, na tũkamahoera.”—Ciugo cia UCCRO,a Februarĩ 24, 2022.

Ũkuona atĩa? Hihi ndini iria ciugaga atĩ irarũmĩrĩra Jesu Kristo nĩ ciagĩrĩire kwĩra arũmĩrĩri a cio mathiĩ mbaara-inĩ? Bibilia yugaga atĩa?

Ũrĩa ndini ikoretwo ikĩnyitanĩra mbaara-inĩ

Historĩ nĩ yonanĩtie atĩ kaingĩ ndini nĩ ciĩtĩkĩrĩtie mbaara, ikamĩtetera, o na kana ikamĩgaathĩrĩria, igĩtuaga atĩ nĩ thayũ iretha. Kwa ihinda rĩa mĩaka mĩingĩ, Aira a Jehova nĩ maumbũranĩtie ũhinga ũcio wa ndini. Ta wĩcirie ũhoro wa ngerekano ici icabithĩtio mabuku-inĩ maitũ.

• Gĩcunjĩ kĩrĩ na kĩongo “Zile Krusedi—‘Uwongo Wenye Msiba’” nĩ kĩonanĩtie ũrĩa Kanitha wa Gatoreki wa Roma warĩ na itemi harĩ njũragano iria ciekirũo na rĩĩtwa rĩa Ngai na rĩa Kristo.

• Gĩcunjĩ kĩrĩ na kĩongo “Kanisa Katoliki Katika Afrika” nĩ gĩtaarĩirie ũrĩa ndini yaremirũo kũgirĩrĩria mbaara ya gĩĩkabira, o na njũragano.

• Icunjĩ irĩ na kĩongo “Je, Dini Inapaswa Kulaumiwa?,” “Fungu la Dini Katika Vita vya Binadamu,” na “Dini Yajiunga” nĩ itaarĩirie ũrĩa atongoria a Gatoreki, a Orthodox, na a ndini cia Gĩprotestanti manyitĩte mbaru mĩena yerĩ mbaara-inĩ nyingĩ.

Hihi ndini cia Gĩkristiano nĩ ciagĩrĩirũo kũnyita mbaara mbaru?

Ũrĩa Jesu aarutanire: “No mũhaka wende mũndũ ũrĩa mũriganĩtie nake o ta ũrĩa wĩyendete wee mwene.” (Mathayo 22:39) “Endagai thũ cianyu.”—Mathayo 5:44-47.

Ũrĩa Jesu aaugire: “Ũthamaki wakwa ti wa thĩ ĩno. Korũo Ũthamaki wakwa nĩ wa thĩ ĩno-rĩ, ndungata ciakwa nĩ ingĩndũĩrĩire nĩguo ndikaneanwo.” (Johana 18:36) “Arĩa othe moyaga rũhiũ rwa njora makaaniinwo o na rũhiũ rwa njora.”—Mathayo 26:47-52.

Ta wĩcirie: Angĩkorũo Akristiano o na matiabatiĩ kũrũa nĩguo magitĩre Jesu-rĩ, hihi nĩ magĩrĩirũo kũrũa nĩ ũndũ wa gĩtũmi kĩngĩ o gĩothe? Thoma gĩcunjĩ kĩrĩ na kĩongo “Je, Ukristo Unaunga Mkono Vita?” wone ũrĩa Akristiano a tene maarũmagĩrĩra biũ kĩonereria kĩa Jesu na morutani make.

Gũgaathiĩ atĩa harĩ ndini iria inyitaga mbaara mbaru?

Bibilia ĩrutanaga atĩ Ngai ndetĩkagĩra ndini iria ciugaga atĩ irutanaga ũhoro wa Jesu no itirũmagĩrĩra morutani make.—Mathayo 7:21-23; Tito 1:16.

• Ibuku rĩa Kũguũrĩrio rĩonanagia atĩ Ngai nĩ agaatuĩra ndini ta icio nĩ ũndũ wa ikuũ cia “arĩa othe manathĩnjwo thĩinĩ wa thĩ.” (Kũguũrĩrio 18:21, 24) Nĩguo ũmenye gĩtũmi, thoma gĩcunjĩ kĩrĩ na kĩongo “Babiloni Mkubwa Ni Nani?”

• Jesu aaugire atĩ ndini ciothe iria itetĩkĩrĩkĩte nĩ Ngai nĩ ikaaniinwo nĩ ũndũ wa ciĩko ciacio njũru, o ta ũrĩa mũtĩ mũbuthu ũrĩa ũciaraga maciaro moru “ũtemagwo na ũgaikio mwaki-inĩ.” (Mathayo 7:15-20) Thoma gĩcunjĩ kĩrĩ na kĩongo “Mũthia wa Ndini Ĩtarĩ ya Ma Ũrĩ Hakuhĩ!” nĩguo wone ũrĩa ũndũ ũcio ũgeekĩka.

Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images